ᐊᐸᔅᑕᓚᒃ 20
20
ᐹᓪ ᐃᑐᑌᐤ ᒫᓯᑐᓂᐊ ᐊᔅᑮᒃ ᓀᔥᑕ ᑲᕇᔅ ᐊᔅᑮᒃ
1ᐹᑎᒪ ᒫᑲ ᑳ ᐃᔥᒀᐸᓕᒃ ᐁ ᐸᓯᑯᔅᑕᑐᓇᓂᐗᒃ, ᐹᓪ ᑮ ᓇᑐᒣᐤ ᑭᔅᑭᓄᐊᒪᐗᑲᓇ, ᑮ ᐗᒋᔦᒣᐤ ᒫᑲ, ᓀᔥᑕ ᑮ ᑭᑐᑌᐤ ᑭᒋ ᐃᑐᑌᑦ ᒫᓯᑐᓂᐊᐃᒃ᙮ 2ᐃᔅᐱ ᒫᑲ ᑳ ᑮ ᐹᐹᐃᑐᑌᑦ ᒥᓯᐌ ᐊᓐᑕ, ᓀᔥᑕ ᒥᔅᑕᐃ ᐁ ᑮ ᑲᑫᔅᑭᒫᑦ, ᑮ ᐯᒋ ᐃᑐᑌᐤ ᐊᓐᑕ ᒃᕆᓯᒃ, 3ᐁᑯᑕ ᒫᑲ ᑳ ᐃᑖᑦ ᓂᔅᑐ ᐱᓯᒶ ᐃᔥᐱᔥ᙮ ᐃᔅᐱ ᒫᑲ ᒎᐗᒃ ᑳ ᐊᔅᑲᒪᐙᒋᒃ, ᒣᒀᒡ ᐁ ᐎ ᑭᑕᔑᔅᐸᓐ ᓯᕆᐊᐃᒃ ᐃᔑ, ᑮ ᐃᑌᓕᑕᒻ ᒪᓯᑐᓂᐊᐃᒃ ᑭᒋ ᐊᑎ ᐃᔑ ᑭᐌᑦ᙮ 4ᑮ ᐎᒉᐎᑯ ᒫᑲ ᐁᔖᐃᒃ ᐃᔅᑯ, ᐊᓂᐃ ᓱᐸᑕᕐ ᐱᕆᐊᐃᒃ ᑳ ᐅᒋᑦ; ᓀᔥᑕ ᐊᓂᐃ ᑌᓴᓗᓂᐊᓇ, ᐋᕆᔅᑖᕐᑲᔅ ᓀᔥᑕ ᓯᑲᓐᑕᔅ; ᑲᐃᐊᔅ ᒫᑲ ᑕᕐᐱᐃᒃ ᐅᒋ, ᓀᔥᑕ ᑕᐃᒧᑎᐊᔅ; ᐁᔕᐃᒃ ᒫᑲ ᐅᒋ ᑎᑭᑲᔅ ᓀᔥᑕ ᑦᕈᐱᒪᔅ᙮ 5ᐅᑯ ᐁ ᓂᑳᓄᑌᒋᒃ, ᓂ ᑮ ᐯᐃᑯᓈᓇᒃ ᐊᓐᑕ ᑦᕈᐊᓯᒃ᙮ 6ᓂ ᑮ ᑭᑖᔑᓇᓐ ᒫᑲ ᐱᓕᐸᐃ ᐅᒋ ᐃᔅᐱ ᑳ ᐃᔥᒀᐸᓕᑭ ᐁᑳ ᐁ ᐅᐱᓱᑦ ᐋᓚᑯᓇᐤ ᑭᔑᑳᐗ, ᓀᔥᑕ ᐁ ᑮ ᐅᑎᑕᑭᒋᒃ ᐊᓐᑕ ᑦᕈᐊᓯᒃ ᑳ ᓂᔭᓚᓗᑯᓇᑳᒃ; ᐁᑯᑕ ᑳ ᑮ ᐃᑖᔮᒃ ᓂᔣᓱ ᑭᔑᑳᐗ᙮
ᐹᓪ ᐁᑯ ᒫᒋᒡ ᐁ ᐃᑐᑌᑦ ᐃᑦᕈᐋᓴᒃ
7ᓂᔥᑕᒻ ᐁ ᑭᔑᑳᒃ ᒫᑲ ᐁ ᑕᐗᔅᑌᒃ, ᐃᔅᐱ ᑭᔅᑭᓄᐊᒪᐗᑲᓇᒃ ᑳ ᐯᒋ ᒫᐗᒋᐃᑐᒋᒃ ᑭᒋ ᐸᑴᓈᒋᒃ ᐊᓚᑯᓇᐗ, ᐹᓪ ᑭ ᑲᑫᔅᑭᒣᐤ ᐋᔕᔾ ᐁ ᐊᔦᔅᑲᐎᓯᑦ ᑭᒋ ᑭᑐᑌᑦ ᐊᑎ ᐗᐸᓂᓕᑫ; ᑮ ᐊᔭᒥᐤ ᒫᑲ ᐱᓕᔥ ᐁ ᐋᐱᑕ ᑎᐱᔅᑳᓕᒃ᙮ 8ᑮ ᒥᒉᑎᓋ ᒫᑲ ᐙᔅᑌᓇᒫᑲᓇ ᐱᒋ ᐊᓂᒪ ᐃᔥᐱᒥᒃ ᐱᔅᑭᒋᐙᔅᑳᔨᑲᓂᒃ ᐃᑕ ᑳ ᐃᔑ ᒫᐙᒋᐃᑐᒋᒃ᙮ 9ᐊᓐᑕ ᒫᑲ ᐸᔅᐹᐱᐎᓂᒃ ᑮ ᐊᐱᐤ ᐯᔭᒃ ᐆᔥᑭᓂᑭᐤ ᔫᑎᑲᔅ ᐁ ᐃᔑᓂᑳᓱᑦ, ᐁ ᑮ ᑲᐎᑯᔑᑦ: ᐹᓪ ᒫᑲ ᑭᓉᔥ ᐁ ᑮ ᐊᔭᒥᑦ, ᑮ ᐊᑎ ᑭᐸᒋᐸᓕᐤ ᐁ ᓂᐹᑦ, ᓀᔥᑕ ᓂᔅᑡᐤ ᐁ ᐋᓂᔅᑲᐙᓕᒃ ᐙᔅᑳᔨᑲᓂᓕᐤ ᑮ ᐅᒋ ᐸᑭᔑᓐ, ᑮ ᓂᐱᐤ ᒫᑲ ᐁ ᐅᐱᓈᑲᓂᐎᑦ᙮ 10ᐹᓪ ᒫᑲ ᑮ ᓂᔖᑕᐎᐤ, ᑮ ᐅᑎᓀᐤ ᒫᑲ, ᓀᔥᑕ ᐁ ᐌᐗᑭᓈᑦ, ᑮ ᐃᑗᐤ, ᐁᑳ ᐃᓚ ᒥᑯᔥᑲᒋᐃᑎᓱᒃ; ᐌᓴ ᐱᒋᔅᑳᑯ ᐅ ᐱᒫᑎᓯᐎᓐ᙮ 11ᐃᔅᐱ ᒫᑲ ᒥᓇ ᑳ ᑮ ᐯᒋ ᑯᔅᐹᑕᐎᑦ, ᓀᔥᑕ ᐁ ᑮ ᐸᑴᓈᑦ ᐋᓚᑯᓇᐗ, ᐁ ᑮ ᒥᒋᓱᑦ ᒫᑲ, ᓀᔥᑕ ᑭᓉᔥ ᐁ ᑮ ᐊᔭᒥᑦ, ᐱᓕᔥ ᐁ ᐊᑎ ᐯᑖᐸᓂᓕᒃ ᐁᑯ ᑫᑐᑌᑦ᙮ 12ᑮ ᐯᔑᐌᐗᒃ ᒫᑲ ᐊᓂᐃ ᐅᔥᑭᓂᑭᐗ ᐁ ᐱᒫᑎᓯᓕᒋ, ᓇᒪᐎᓚ ᒫᑲ ᐊᐱᔑᔥ ᐱᑯ ᑮ ᒥᓜᓕᒧᐗᒃ᙮
ᐹᓪ ᐃᑐᑌᐤ ᒥᑎᓕᓂᐃᒃ ᐃᑦᕈᐋᔅ ᐅᒋ
13ᓂᑳᓐ ᒫᑲ ᓂ ᑮ ᐳᓯᓈᓐ ᓈᐱᒀᓂᒃ, ᓀᔥᑕ ᐋᓴᓯᒃ ᓂ ᑮ ᐃᑖᔑᓈᓐ, ᐊᓐᑕ ᐁ ᐃᑌᓕᑕᒫᒃ ᑭᒋ ᐳᓯᐊᑭᑦ ᐹᓪ: ᐌᓴ ᐁᒀᓂ ᑳ ᐃᔑ ᐅᓓᓕᑕᒃ, ᐁ ᐃᑌᓕᑕᒃ ᑭᒋ ᒧᔅᑐᑌᑦ ᐎᓚ᙮ 14ᐃᔅᐱ ᒫᑲ ᑳ ᓇᑭᔥᑲᐎᔭᒥᑦ ᐋᓴᓯᒃ, ᓂ ᑮ ᐳᓯᐋᓈᓐ, ᓀᔥᑕ ᓂ ᑮ ᐯᒋ ᐃᑖᔑᓈᓐ ᒥᑎᓕᓂᐃᒃ᙮ 15ᐊᓐᑕ ᒫᑲ ᓂ ᑮ ᐅᒋ ᑭᑖᔑᓈᓐ, ᓂ ᑮ ᐯᒋ ᐃᑐᑕᓈᓐ ᒫᑲ ᐎᐋᐸᒃ ᑎᐱᔅᑯᒡ ᑲᐃᐅᓯᒃ; ᒥᓇ ᐎᐋᐸᒃ ᒫᑲ ᓂ ᑮ ᐅᑎᑕᐁᓈᓐ ᐊᓐᑕ ᓭᒧᔅ, ᓀᔥᑕ ᓂ ᑮ ᑕᔑᑳᓈᓐ ᐊᓐᑕ ᑦᕈᑭᓕᐊᒥᒃ; ᒥᓇ ᒫᑲ ᐎᐋᐸᒃ ᓂ ᑮ ᐯᑖᔑᓈᓐ ᒪᐃᓕᑕᓯᒃ᙮ 16ᐌᓴ ᐹᓪ ᑮ ᐃᑌᓕᑕᒻ ᑭᒋ ᐊᑎ ᐃᑖᔑᑦ ᐃᐱᓴᓯᒃ, ᐁᑳ ᐁ ᐎ ᐅᑕᒦᑦ ᐊᓐᑕ ᐁᔕᐃᒃ: ᐌᓴ ᑮ ᐎ ᑭᓕᐱᐤ, ᑮᔥᐱᓐ ᑫ ᑮ ᑐᑕᒃ, ᑭᒋ ᐃᑖᑦ ᒋᕉᓴᓚᒥᒃ ᒣᒀᒡ ᐯᓐᑎᑲᔅᑦ ᐁ ᑭᔑᑳᒃ᙮
ᐹᓪ ᒫᒋᒡ ᐋᔭᒥᐁᐤ ᑳ ᓂᑳᓀᓕᑖᑯᓯᓕᒋ ᐃᐱᓴᓯᒃ
17ᒪᐃᓕᑕᓯᒃ ᒫᑲ ᐅᒋ ᑮ ᐃᔓᑎᔕᐅᐌᐤ ᐊᓐᑕ ᐃᐱᓴᓯᒃ, ᓀᔥᑕ ᑮ ᓈᑐᒣᐤ ᑳ ᓂᑳᓀᓕᑖᑯᓸᓕᒋ ᐅᑖᔭᒥᐋᐗ᙮ 18ᐃᔅᐱ ᒫᑲ ᑳ ᑮ ᐯᒋ ᓈᑎᑯᑦ, ᑮ ᐃᑌᐤ, ᑭ ᑭᔅᑫᓕᑌᓇᐗᐤ, ᓃᔥᑕᒻ ᐁ ᑭᔑᑳᒃ ᐅᒋ ᑳ ᐯᒋ ᑕᑯᔑᓈᓐ ᐁᔕᐃᒃ, ᑖᓀ ᑳ ᐃᔑ ᐎᒉᐎᑕᑾᒃ ᒧᔕᒃ, 19ᐁ ᐊᑐᔅᑲᐗᒃ ᐅᑎᐯᓕᒋᑫᐤ ᒥᓯᐌ ᑕᐸᑌᓕᒧᐎ ᒥᑐᓀᓕᒋᑲᓂᒃ, ᓀᔥᑕ ᒥᔅᑕᐃ ᐅᒋᑲᐙᐱᐎᓂᒃ, ᓀᔥᑕ ᑲᑴᒋᐃᑯᓯᐎᓂᒃ, ᑳ ᑮ ᐅᑎᑎᑯᔮᓐ ᐁ ᐊᔅᑲᒪᐎᒋᒃ ᒎᐗᒃ ᐅᒋ: 20ᓀᔥᑕ ᐁᑳ ᐁ ᑮ ᓇᑲᓇᒪᑕᑾᒃ ᑫᒀᓐ ᑫ ᒥᓗ ᑐᑕᑯᔦᑭᐸᓐ, ᒫᑲ ᑭ ᑮ ᐙᐸᑎᓕᑎᓇᐗᐤ, ᓀᔥᑕ ᑭ ᑮ ᑭᔅᑭᓄᐊᒪᑎᓇᐗᐤ ᒧᔓᔐ, ᓀᔥᑕ ᐊᑭᓀ ᐙᔅᑲᔨᑲᓂᒃ᙮ 21ᐁ ᐙᐎᑕᒫᐗᑭᒃ ᒎᐗᒃ, ᓀᔥᑕ ᒃᕆᑲᒃ ᑖᐱᔅᑯᒡ, ᑭᒋ ᑴᔅᑳᑎᓰᔅᑕᐙᒋᒃ ᑭᒋᒪᓂᑐᐗ, ᓀᔥᑕ ᑭᒋ ᑖᐺᔦᓕᒫᒋᒃ ᑭ ᑎᐯᓕᒋᑫᒥᓇᐗ ᒋᓴᔅ ᙭ᑕ᙮ 22ᐊᓄᒡ ᒫᑲ, ᒫᑎᑲ, ᓂᑦ ᐃᑐᑖᓐ ᒋᕉᓴᓚᒥᒃ ᐁ ᒫᒫᒋᑾᐱᓱᔮᓐ ᓂᑦ ᐊᒑᑯᒃ, ᐁᑳ ᐁ ᑭᔅᑫᓕᑕᒫᓐ ᐊᓂᐃ ᑫᒀᓇ ᑫ ᐅᑎᑎᑯᔮᓐ ᐊᓐᑕ: 23ᐱᑯ ᐊᓇ ᑳ ᐸᓓᑭᓯᑦ ᐊᒑᒃ ᐁ ᐎᑕᒃ ᑕᑐ ᐃᑖᐎᓂᒃ, ᐁ ᐃᑗᑦ ᒫᒫᒋᑯᐱᓱᐎᓇ ᓀᔥᑕ ᐋᓕᒥᓯᐎᓇ ᐁ ᐯᐃᑯᔮᓐ᙮ 24ᒫᑲ ᓇᒪᐎᓚ ᐅᒋ ᐯᔭᒃ ᐅᐅ ᑫᒀᓇ ᓂ ᒥᑯᔅᑳᒋᐃᑯᓐ, ᓇᒪ ᓀᔥᑕ ᓂ ᑭᔅᑕᑭᑕᒫᓱᓐ ᓂ ᐱᒪᑎᓯᐎᓐ, ᑭᒋ ᑭ ᑭᔑᑐᑕᒫᓐ ᓂᑦ ᐃᑖᐸᑎᓯᐎᓐ ᐁ ᓯᑭᓓᓯᔮᓐ, ᓀᔥᑕ ᐊᓂᒪ ᐋᔭᒥᐋᐎ ᐋᑐᔅᑫᐎᓐ, ᑳ ᑮ ᒥᓕᑦ ᐅᑎᐯᓕᒋᑫᐤ ᒋᓴᔅ, ᑭᒋ ᑎᐹᑐᑕᒫᓐ ᐁ ᒥᓗᐋᓕᒧᒋᑲᑌᓕᒃ ᐅ ᔕᐌᓕᒋᑫᐎᓐ ᑭᒋᒪᓂᑐ᙮
25ᐊᓄᒡ ᒫᑲ, ᒫᑎᑲ, ᓂ ᑭᔅᑫᓕᑌᓐ ᒥᓯᐌ ᑭᓚᐗᐤ, ᑳ ᑮ ᐸᐹ ᐊᓕᒧᑕᒫᑕᑾᒃ ᑭᒋᒪᓂᑐ ᐅᑦ ᐅᑭᒫᐎᐎᓐ, ᓇᒪᐎᓚ ᒥᓇ ᑭ ᑳ ᐙᐸᑌᓇᐗᐤ ᓂᑖᔅᑕᒥᒃ᙮ 26ᐁᐗᑯ ᐌᒋ ᑭᑦ ᐅᑎᓂᑎᓇᐗᐤ ᑭᒋ ᐙᐸᑕᒣᒃ ᐊᓄᒡ ᑳ ᑭᔑᑳᒃ, ᐁ ᐸᓓᑭᓯᔭᓐ ᒥᓯᐌ ᐃᓕᓕᐗᒃ ᐅᒥᑯᐗᐤ ᐅᒋ᙮ 27ᐌᓴ ᓇᒪᐎᓚ ᓂ ᑮ ᔖᑴᓕᒧᓐ ᑭᒋ ᐎᑕᒪᑕᑾᒃ ᒥᓯᐌ ᑭᒋᒪᓂᑐ ᐅᑦ ᐃᑌᓕᑕᒪᐎᓐ᙮ 28ᔮᒀᒥᓯᒃ ᐃᓴ ᑭᓚᐗᐤ, ᓀᔥᑕ ᒥᓯᐌ ᑳ ᒪᐗᒋᐃᑐᒋᒃ ᐅᒋ, ᐊᓂᐃ ᑳ ᐸᓓᑭᓯᑦ ᐊᒑᒃ ᑳ ᑮ ᑎᐁᓕᑕᒥᐃᑖᒃ, ᑭᒋ ᐊᔕᒥᒣᑾᒃ ᑭᒋᒪᓂᑐ ᐅ ᒫᒪᐎᐋᔭᒥᐋᒪ, ᑳ ᑮ ᐊᑕᐌᔅᑕᒫᓱᑦ ᑎᐱᓚᐌ ᐅᒥᑯᒻ ᐅᒋ᙮ 29ᐌᓴ ᐅᒪ ᓂ ᑭᔅᑫᓕᑌᓐ, ᐹᑎᒪ ᑮ ᑭᑐᑌᔮᓀ ᑭ ᑳ ᐱᑐᑳᑯᐙᐗᒃ ᑳ ᑯᔅᑖᑎᑯᓯᒋᒃ ᒪᐃᑲᓇᒃ, ᐁᑳ ᐁ ᒪᓈᒋᐋᒋᒃ ᒫᓂᔥᒑᓂᔕ᙮ 30ᓀᔥᑕ ᒫᑲ ᑫᒋᐙᒃ ᑭᓚᐙᐤ ᐅᒋ ᐃᓕᓕᐗᒃ ᑲᑕ ᐸᓯᑯᐗᒃ ᐁ ᐊᓕᒧᑕᑭᒃ ᒪᒋ ᑫᒀᓇ, ᑭᒋ ᐅᒋᐱᑕᒫᓱᒋᒃ ᑭᔅᑭᓄᐊᒪᐗᑲᓇ᙮ 31ᐁᐗᑯ ᐅᒋ ᐊᔕᐙᐱᒃ, ᑭᔅᑭᓯᒃ ᒫᑲ, ᓂᔅᑐ ᐱᐳᓋ ᐃᔥᐱᔥ ᐁᑳ ᐁ ᐅᒋ ᑭᐱᒋᔮᓐ ᐁ ᔮᒀᒥᒪᒃ ᒥᓯᐌ ᑕᑐ ᐊᐌᓇ ᐁ ᑎᐱᔅᑲᒃ ᓀᔥᑕ ᐁ ᑭᔑᑳᒃ ᐁ ᐅᒋᑲᐙᐱᔮᓐ᙮
32ᐊᓄᒡ ᒫᑲ, ᓂᒋᔖᓂᑐᒃ, ᑭ ᐸᑭᑌᓕᒥᑎᓇᐗᐤ ᑭᒋᒪᓂᑐ, ᓀᔥᑕ ᐅ ᔕᐌᓕᒋᑫᐎ ᐋᔭᒥᐎᓂᒃ, ᐊᓂᒪ ᑳ ᑲᔥᑭᑖᒪᑲᒃ ᑭᒋ ᓂᑕᐎᑭᐃᑯᔦᒃ, ᓀᔥᑕ ᑭᒋ ᒥᓕᑯᔦᒃ ᑎᐯᓕᒋᑫᐎᓐ ᐃᑕ ᒥᓯᐌ ᒫᒪᐤ ᑳ ᐃᑖᒋᒃ ᑳ ᐸᓓᑭᐊᑲᓂᐎᒋᒃ᙮ 33ᓇᒪᐎᓚ ᐊᐌᓇ ᐃᓕᓕᐤ ᓂ ᑮ ᒧᔅᑌᓇᒸᓐ ᐅ ᔓᓕᐋᓈᐱᔅᑯᒪ, ᓀᔥᑕᐱᑯ ᐅᑦ ᐅᓴᐎᔓᓕᐋᓈᐱᔅᑯᒪ, ᒋᑲ ᓀᔥᑕ ᐱᑯ ᐅ ᐎᓛᒋᑲᓇ᙮ 34ᐁᐁ, ᑭᓚᐗᐤ ᑫᒋᐙᒃ ᑭ ᑭᔅᑫᓕᑌᓈᐗᐤ, ᐅᐅ ᒥᒋᒋᔭ ᐁ ᑮ ᐅᑎᓇᒫᑯᔮᓐ ᑳ ᐃᔑ ᒪᓀᓯᔮᓐ, ᓀᔥᑕ ᐊᓂᑭ ᐊᓯᒋ ᑳ ᑮ ᐎᒉᐎᒋᒃ᙮ 35ᒥᓯᐌ ᑫᒀᓇ ᑭ ᑮ ᐙᐸᑎᓕᑎᓈᐗᐤ, ᐊᓂᒪ ᐁ ᐋᐸᑎᓯᔦᒃ ᐅᒋ ᑭ ᑳ ᐅᑎᓇᒪᐗᑖᐙᐗᒃ ᐊᓂᑭ ᑳ ᓕᓚᒥᓯᒋᒃ, ᓀᔥᑕ ᑭᒋ ᑭᔅᑭᓯᑐᑕᒬᒃ ᐅᑦ ᐋᔭᒥᐎᓇ ᐅᑎᐯᓕᒋᑫᐤ ᒋᓴᔅ, ᑖᓂ ᑳ ᐃᔑ ᐃᑗᑦ, ᐊᐙᓯᑌ ᔕᐌᓕᑕᑯᓯᓇᓂᐗᓐ ᐁ ᒥᓕᐙᓂᐗᒃ ᐃᔥᐱᔥ ᐁ ᐅᑎᓂᑳᓂᐗᒃ᙮
36ᐃᔅᐱ ᒫᑲ ᐅᒪ ᑳ ᑮ ᐃᔑ ᐊᔭᒥᑦ, ᑮ ᐅᒋᒋᑾᓇᐱᐤ, ᒥᓯᐌ ᒫᑲ ᑮ ᐎᒋ ᐋᔭᒥᐋᒣᐤ᙮ 37ᒥᓯᐌ ᒫᑲ ᓲᑲ ᑮ ᒫᑐᐗᒃ, ᑮ ᐸᑭᔑᓋᒃ ᒫᑲ ᐹᓚ ᐅᑾᔮᓕᒃ ᓀᔥᑕ ᑮ ᐅᒉᒣᐗᒃ, 38ᒫᐗᒡ ᐁ ᒥᒋᓚᐌᓯᒋᒃ ᐊᓂᐃ ᐋᔭᒥᐎᓇ ᐅᒋ ᑳ ᑮ ᐃᑗᑦ, ᐁᑳ ᒥᓇ ᑭᒋ ᑮ ᐙᐸᑕᒸᒋᒃ ᐅᑖᔅᑕᒥᑯᓕᐤ᙮ ᑮ ᐎᒉᐌᐗᒃ ᒫᑲ ᓈᐱᒀᓂᒃ ᐃᔅᑯ᙮
Currently Selected:
ᐊᐸᔅᑕᓚᒃ 20: MCNT91
Highlight
Copy
Compare
Share
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
