ᐊᐸᔅᑕᓚᒃ 18
18
ᐊᓐᑕ ᑯᕆᓐᑎᒃ
1ᐹᑎᒪ ᐅᐅ ᑫᒀᓇ, ᐹᓪ ᑮ ᑭᑐᑌᐤ ᐊᑎᓐᓯᒃ ᐅᒋ, ᓀᔥᑕ ᑮ ᐯᒋ ᑕᑯᔑᓐ ᐊᓐᑕ ᑯᕆᓐᑎᒃ; 2ᑮ ᒥᔅᑲᐌᐤ ᒫᑲ ᐯᔭᒃ ᒎᐗ ᐋᑶᓚ ᐁ ᐃᔑᓂᑳᓱᓕᒋ, ᑳ ᑮ ᓂᑕᐎᑭᓕᒋ ᐳᓐᑕᓯᒃ, ᐊᓄᒋᑫ ᐃᑖᓕᐃᒃ ᑳ ᑮ ᐅᒌᓕᒋ, ᐊᓯᒋ ᐎᐎᓕᐗ ᑉᕆᓯᓚ (ᐌᓴ ᒃᓚᑎᐊᔅ ᑮ ᐅᓚᔓᐗᑌᐤ ᒥᓯᐌ ᒎᐗ ᑭᒋ ᑭᑐᑌᓕᒋ ᕈᒥᒃ ᐅᒋ;) ᐅᐅ ᒫᑲ ᑮ ᐯᒋ ᓈᑌᐤ᙮ 3ᐎᓚ ᒫᑲ ᓀᔥᑕ ᐁᒀᓂ ᐁ ᐃᑖᐸᑎᓯᑦ, ᑮ ᐎᒋᑕᔑᑫᒣᐤ, ᓀᔥᑕ ᑮ ᐊᑐᔅᑫᐤ; ᐌᓴ ᐅᑦ ᐃᑖᐸᑎᓯᐎᓂᐙᒃ ᐅᒋ ᑮ ᐅᒥᑭᐗᒥᑫᐗᒃ᙮ 4ᑮ ᐋᔭᒥᐤ ᒫᑲ ᐊᓐᑕ ᐋᔭᒥᐁᐎᑲᒥᑯᒃ ᑕᑣᐤ ᐁ ᐋᔭᒥᐁᑭᔑᑲᓕᒃ, ᓀᔥᑕ ᑮ ᔑᑭᒣᐤ ᒎᐗ ᓀᔥᑕ ᒃᕆᑲ᙮
5ᐃᔅᐱ ᒫᑲ ᓵᐃᓚᔅ ᓀᔥᑕ ᑕᐃᒧᑎᐊᔅ ᑳ ᐯᒋ ᐅᑐᑌᒋᒃ ᒫᓯᑐᓂᐊᐃᒃ ᐅᒋ, ᐹᓪ ᑮ ᐋᑲᒣᓕᑕᒻ ᐅᑦ ᐊᒑᑯᒃ, ᓀᔥᑕ ᑮ ᑎᐸᒋᒧᔅᑕᐌᐤ ᐊᓂᐃ ᒎᐗ ᒋᓴᓴ ᐁ ᙭ᑎᐎᓕᒋ᙮ 6ᐃᔅᐱ ᒫᑲ ᑳ ᐋᓉᑖᑫᒋᒃ, ᓀᔥᑕ ᐁ ᐸᐸᔅᑖᒧᒋᒃ, ᑮ ᐸᐸᐎᐸᓕᑕᐤ ᐅ ᐎᓚᒋᑲᓐ, ᑮ ᐃᑌᐤ ᒫᑲ, ᑭᒥᑯᐙᐤ ᑲᑕ ᐊᔅᑌᐤ ᑎᐯᓚᐌ ᑭᔅᑎᒀᓂᐙᒃ: ᓂᓚ ᓂ ᐸᔦᑭᓯᓐ: ᐊᓄᒡ ᐅᒋ ᓂ ᑳ ᓈᑖᐗᒃ ᐊᓂᑭ ᒉᓐᑖᐃᓚᒃ᙮ 7ᐊᓐᑕ ᒫᑲ ᑮ ᐅᒋ ᑭᑐᑌᐤ, ᑮ ᐱᑐᑫᐤ ᒫᑲ ᐯᔭᒃ ᐃᓕᓕᐗ ᐎᑭᓕᒃ ᒐᔅᑕᔅ ᑳ ᐃᔑᓂᑳᓱᓕᒋ, ᐊᐌᓇ ᑳ ᐅᒋᒋᑾᓇᐱᔅᑕᐙᑦ ᑭᒋᒪᓂᑐᐗ, ᐊᓇ ᐎᑭ ᑭᔑᐙᒃ ᐋᔭᒥᐁᐎᑲᒥᑯᒃ ᑳ ᐃᑕᑾᓂᓕᒃ᙮ 8ᒃᕆᔅᐸᔅ ᒫᑲ, ᑳ ᒫᐗᒋ ᓂᑳᓂᑎᐯᓕᑕᒃ ᐋᔭᒥᐁᐎᑲᒥᑯᓕᐤ, ᑮ ᑖᐺᔦᓕᒣᐤ ᐅᑎᐯᓕᒋᑫᐗ ᐊᓯᒋ ᒥᓯᐌ ᑳ ᐃᑕᔑᑦ ᐎᑭᓕᒃ; ᓀᔥᑕ ᒥᒉᑦ ᐊᓂᑭ ᑯᕆᓐᑎᐎᓕᓕᐗᒃ ᐁ ᐯᑕᑭᒃ, ᑮ ᑖᐺᑕᒶᒃ, ᓀᔥᑕ ᑮ ᓯᑲᐊᑕᐙᑲᓂᐎᐗᒃ᙮
9ᐁᑯ ᒫᑲ ᐅᑎᐯᓕᒋᑫᐤ ᑳ ᐊᔭᒥᐋᑦ ᐹᓚ ᓂᐹᑎᐱᔉ ᐸᐙᒧᐎᓂᒃ, ᐁᑳᐎᓚ ᑯᔅᑖᒋ ᒫᑲ ᐋᔭᒥ, ᓀᔥᑕ ᐁᑳᐎᓚ ᑭᐱᑐᐌ: 10ᐌᓴ ᑭ ᐎᒉᐎᑎᓐ, ᓇᒪᐎᓚ ᒫᑲ ᐊᐌᓇ ᐃᓕᓕᐤ ᐙᔦᔥ ᑭ ᑳ ᑐᑕᒃ ᑭᒋ ᐋᑯᐃᔉ: ᐌᓴ ᓂᑦ ᐋᔭᐙᐗᒃ ᒥᒉᑦ ᐃᓕᓕᐗᒃ ᐅᒪ ᐃᑖᐎᓂᒃ᙮ 11ᐁᑯᑕ ᒫᑲ ᐁᑖᑦ ᐯᔭᑯ ᐱᐳᓐ ᓀᔥᑕ ᓂᑯᑣᓱ ᐱᓯᒶ, ᐁ ᑭᔅᑭᓄᐊᒫᑫᐙᑦ ᑭᒋᒪᓂᑐᐗ ᐅᑦ ᐋᔭᒥᐎᓂᓕᐤ ᐃᑕ ᐁ ᐃᑕᓕᒋ᙮
12ᐃᔅᐱ ᒫᑲ ᑳᓕᐅ ᑳ ᑎᐯᓕᑕᒃ ᐊᑳᐃᐊᐃᓕᐤ, ᐊᓂᑭ ᒎᐗᒃ ᑮ ᒫᒪᐎ ᐸᓯᑯᔅᑕᐌᐗᒃ ᐹᓚ, ᑮ ᐯᔑᐌᐗᒃ ᒫᑲ ᐊᓐᑕ ᑎᐸᔅᑯᓂᑫᐎ ᐊᐱᐎᓂᒃ, 13ᐁ ᐃᑗᒋᒃ, ᐊᐗ ᐃᓕᓕᐤ ᔑᑭᒣᐤ ᐃᓕᓕᐗ ᑭᒋ ᐋᔭᒥᐁᔅᑕᐙᓕᒋ ᑭᒋᒪᓂᑐᐗ ᐱᑐᔥ ᑳ ᐃᑕᔅᑌᒃ ᐅᓚᔓᐌᐎᓂᒃ᙮
14ᐃᔅᐱ ᒫᑲ ᐹᓪ ᐙ ᐊᑎ ᐹᔅᑭᑐᓀᓕᑦ, ᑳᓕᐅ ᑮ ᐃᑌᐤ ᐊᓂᐃ ᒎᐗ, ᑮᔥᐱᓐ ᐙᔦᔥ ᑮ ᒪᒋ ᑐᒋᑳᑌᑯᐸᓀ, ᓀᔥᑕᐱᑯ ᑮ ᒪᒋ ᐋᔨᑎᓈᓂᐙᓄᑯᐸᓀ, ᐅ ᑭᓚᐗᐤ ᑳ ᒎᐎᔦᒃ, ᒀᔭᔉ ᑲᑕ ᐃᑌᓕᑖ ᑲᓄᐸᓐ ᑭᒋ ᐱᔑᒋᐃᑕᑾᒃ: 15ᒫᑲ ᑮᔥᐱᓐ ᐱᑯ ᑲᑴᒋᑫᒧᓇᓂᐗᒃ ᐋᔭᒥᐎᓇ ᐅᒋ ᓀᔥᑕ ᐃᔑᓂᑳᓱᐎᓇ, ᓀᔥᑕ ᑭᑦ ᐅᓚᔓᐌᐎᓂᐗᐤ ᐅᒋ, ᑭᓚᐗᐤ ᑲᓇᐙᐸᑕᒧᒃ ᐊᓂᒪ; ᐌᓴ ᓇᒪᐎᓚ ᓂᓚ ᓂ ᑳ ᑎᐹᔅᑯᓀᐤ ᐊᓂᐃ ᑐᐎ ᑫᒀᓇ᙮ 16ᑮ ᑭᒋᑎᔕᐌᐤ ᒫᑲ ᑎᐸᔅᑯᓂᑫᐎ ᐊᐱᐎᓂᒃ ᐅᒋ᙮ 17ᐁᑯ ᒫᑲ ᒥᓯᐌ ᐊᓂᑭ ᒃᕆᑲᒃ ᑳ ᐅᑎᓈᒋᒃ ᓴᔅᑎᓂᓴ, ᐊᓂᐃ ᑳ ᒫᐗᒡ ᓂᑲᓂᑎᐯᓕᑕᒥᓕᒋ ᐋᔭᒥᐁᐎᑲᒥᑯᓕᐤ, ᓀᔥᑕ ᑮ ᐸᐸᑲᒪᐌᐗᒃ ᐅᑎᔥᑲᐤ ᑎᐸᔅᑯᓂᑫᐎ ᐊᐱᐎᓂᒃ᙮ ᑳᓕᐅ ᒫᑲ ᓇᒪᐎᓚ ᐗᐗᒡ ᐅᒋ ᐱᓯᔅᑫᓕᑕᒻ ᐅᐅ ᑫᒀᓇ᙮
ᑄᓪ ᑮᐌᐤ ᐋᓐᑎᐗᑭᒃ
18ᐹᓪ ᒫᑲ ᐹᑎᒪ ᐅᒪ ᑫᔮᐸᒡ ᑭᓉᔥ ᓇᐗᒡ ᐊᓐᑕ ᑮ ᑕᔑᑫᐤ, ᐁᑯ ᒫᑲ ᑳ ᓇᑲᑖᑦ ᐊᓂᐃ ᑳ ᐎᒋᔕᓂᑐᓕᒋ, ᓀᔥᑕ ᑮ ᐃᑖᔑᐤ ᐊᓐᑕ ᓰᕆᐊᐃᒃ, ᑮ ᐎᒉᐎᑯ ᒫᑲ ᐊᓂᐃ ᑉᕆᓯᓚ ᓀᔥᑕ ᐋᑶᓚ; ᐁ ᑮ ᑳᔥᑭᐹᑕᒃ ᐅᔅᑎᒀᓐ ᐊᓐᑕ ᓯᓐᒃᕆᐊᐃᒃ: ᐌᓴ ᑮ ᑭᔅᑭᒧ᙮ 19ᑮ ᐯᒋ ᐃᑐᑌᐤ ᒫᑲ ᐃᐱᓴᓯᒃ, ᓀᔥᑕ ᐁᑯᑕ ᑮ ᓇᑲᑌᐤ: ᒫᑲ ᐎᓚ ᐱᑯ ᑮ ᐱᑐᑫᐤ ᐋᔭᒥᐁᐎᑲᒥᑯᒃ, ᓀᔥᑕ ᑮ ᐎᒋᐊᔮᒥᒣᐤ ᐊᓂᐃ ᒎᐗ᙮ 20ᐃᔅᐱ ᒫᑲ ᑳ ᓇᑕᐌᓕᒫᒋᒃ ᓇᐗᒡ ᑭᓉᔥ ᑭᒋ ᐎᑭᑕᔑᑫᒥᑯᒋᒃ, ᓇᒪᐎᓚ ᐅᒋ ᓇᔅᑯᒣᓂ; 21ᒫᑲ ᑮ ᐗᒋᔦᒣᐤ, ᐁ ᐃᑗᑦ, ᔮᓕᑌᓪ ᓂ ᑳ ᑲᓇᐌᓕᑌᓐ ᐅᒪ ᒪᑯᔐᐎᓐ ᑫ ᐅᑎᒋᐸᓕᒃ ᐊᓐᑕ ᒋᕉᓴᓚᒣᒃ: ᒫᑲ ᒥᓇ ᑭ ᑳ ᐯᒋ ᓈᑎᑎᓇᐗᐤ, ᑮᔥᐱᓐ ᑭᒋᒪᓂᑐ ᐃᑌᓕᑕᑫ᙮ ᑮ ᑭᑕᔑᐤ ᒫᑲ ᐃᐱᓴᓯᒃ ᐅᒋ᙮
22ᐃᔅᐱ ᒫᑲ ᑳ ᑮ ᑲᐹᑦ ᐊᓐᑕ ᓯᓴᕆᐊᐃᒃ, ᓀᔥᑕ ᑳ ᑯᔅᐱᑦ, ᓀᔥᑕ ᑳ ᐊᑕᒥᔅᑲᐙᑦ ᒫᒪᐎᐋᔭᒥᐋᐗ, ᑮ ᐃᑐᑌᐤ ᐊᓐᑕ ᐊᓐᑎᐊᑭᒃ᙮ 23ᐃᔅᐱ ᒫᑲ ᑭᓉᔥ ᓇᐗᒡ ᐊᓐᑕ ᑳ ᑮ ᐃᑕᑦ, ᑮ ᑭᑐᑌᐤ, ᑮ ᐸᐹᐃᑐᑌᐤ ᒫᑲ ᒥᓯᐌ ᑳᓓᔑᐊ ᓀᔥᑕ ᑉᕆᒋᐊ ᐊᔅᑭᓕᐤ ᐯᔮᑕᒃ, ᐁ ᒪᔅᑲᐎᓯᐋᑦ ᒥᓯᐌ ᑭᔅᑭᓄᐊᒪᐙᑲᓇ᙮
ᐊᐳᓚᔅ ᐊᓐᑕ ᐃᐱᓴᓯᒃ ᓀᔥᑕ ᑯᕆᓐᑎᒃ
24ᐯᔭᒃ ᒫᑲ ᒎ, ᐊᐳᓚᔅ ᑳ ᐃᔑᓂᑳᓱᑦ, ᐁ ᑮ ᓂᑖᐎᑭᑦ ᐋᓕᒃᓴᓐᑦᕆᔭᐃᒃ, ᑳ ᓂᑕ ᐊᔭᒥᑦ ᐃᓕᓕᐤ, ᓀᔥᑕ ᐁ ᑲᑫᑕᐌᓕᑕᒃ ᑭᒋᒪᓯᓇᐃᑫᐎᓂᒃ, ᑮ ᐯᒋ ᑕᑯᔑᓐ ᐊᓐᑕ ᐃᐱᓴᓯᒃ᙮ 25ᐊᐗ ᐃᓕᓕᐤ ᑮ ᑭᔅᑭᓄᐊᒪᐙᑲᓂᐎᐤ ᐅᑦ ᐃᔑᑣᐎᓂᓕᒃ ᐅᑎᐯᓕᒋᑫᐗ; ᐁ ᑮ ᒫᔥᑲᐌᓕᑕᒃ ᒫᑲ ᐅᑦ ᐊᒑᑯᒃ, ᑮ ᐊᔭᒥᐤ ᓀᔥᑕ ᐯᔮᑕᒃ ᑮ ᑭᔅᑭᓄᐊᒫᑫᐌᐤ ᐅᑎᐯᓕᒋᑫᐗ ᐅᑦ ᐊᔨᑎᐎᓂᓕᐗ, ᐁ ᑭᔅᑫᓕᑕᒃ ᐱᑯ ᒑᓐ ᐅ ᓯᑲᐊᑖᑫᐎᓐ᙮ 26ᑮ ᒫᒋ ᓱᑭᑌᐁᐎ ᐋᔭᒥᐤ ᒫᑲ ᐋᔭᒥᐁᐎᑲᒥᑯᒃ: ᐊᓇ ᐃᔅᐱ ᐊᓂᐃ ᐊᑶᓚ ᓀᔥᑕ ᑉᕆᓯᓚ ᑳ ᑮ ᐯᑖᑯᑦ, ᑮ ᐅᑎᓂᑯ, ᓀᔥᑕ ᐊᐙᓯᑌ ᐯᔭᑕᒃ ᑮ ᑭᔅᑭᓄᐊᒫᑯ ᑭᒋᒪᓂᑐ ᐅᑦ ᐃᔑᑣᐎᓂᓕᐤ᙮ 27ᐃᔅᐱ ᒫᑲ ᑳ ᐃᑌᓕᑕᒃ ᑭᒋ ᐃᑐᑌᑦ ᐊᓐᑕ ᐊᑳᐃᐊᐃᒃ, ᐊᓂᑭ ᑳ ᐎᒋᔖᓂᑐᒋᒃ ᑮ ᒪᓯᓇᐃᑫᐗᒃ ᐁ ᔑᑭᒫᒋᒃ ᐊᓂᐃ ᑭᔅᑭᓄᐊᒪᐗᑲᓇ ᑭᒋ ᐅᑎᓈᓕᒋ: ᐊᓇ ᐃᔅᐱ ᑳ ᑕᑯᔑᒃ ᒥᔅᑕᐃ ᑮ ᐎᒋᐁᐤ ᐊᓂᐃ ᑳ ᑮ ᑕᐺᑕᒥᓕᒋ ᔕᐌᓕᒋᑫᐎᓂᓕᐤ ᐅᒋ: 28ᐌᓴ ᒥᑐᓂ ᑮ ᔕᑯᒋᒣᐤ ᐊᓂᐃ ᒎᐗ, ᓀᔥᑕ ᒧᔑᔐ, ᐁ ᐗᐸᑎᓕᐌᑦ ᑭᒋᒪᓯᓇᐃᑫᐎᓂᒃ ᐅᒋ ᒋᓴᓴ ᐁ ᙭ᑎᐎᓕᒋ᙮
Currently Selected:
ᐊᐸᔅᑕᓚᒃ 18: MCNT91
Highlight
Copy
Compare
Share
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
