ᐊᐸᔅᑕᓚᒃ 17
17
ᐊᓐᑕ ᑌᓴᓗᓈᐃᑲᐃᒃ
1ᐁᑯ ᐃᔅᐱ ᑳ ᑮ ᔕᐳᔥᑲᑭᒃ ᐊᒻᐱᐳᓕᔅ ᓀᔥᑕ ᐊᐸᓗᓂᐊ, ᑮ ᐯᒋ ᐃᑐᑌᐗᒃ ᐊᓐᑕ ᑌᓴᓗᓈᐃᑲᐃᒃ, ᐃᑕ ᑳ ᐃᑕᑾᓂᓕᒃ ᒎᐗᒃ ᐅᑦ ᐋᔭᒥᐁᐎᑲᒥᑯᐗᐤ: 2ᐹᓪ ᒫᑲ, ᑖᐱᔅᑯᒡ ᒧᔕᒃ ᑳ ᐃᔑ ᑐᑕᒃ, ᑮ ᐱᑐᑲᐌᐤ, ᓀᔥᑕ ᓂᔅᑐ ᐋᔭᒥᐁᑭᔑᑳᐗ ᑮ ᐎᒋᐋᔭᒥᒣᐤ ᑭᒋᒪᓯᓇᐃᑫᐎᓂᒃ ᐅᒋ, 3ᐁ ᐋᐸᐊᒫᐙᑦ ᓀᔥᑕ ᐁ ᐙᐎᑕᒪᐙᑦ, ᔮᓕᑌᓪ ᙭ ᑖᐺ ᑭᒋ ᑮ ᐎᔭᑫᓕᑕᑭᔅᐸᓐ, ᒥᓇ ᒫᑲ ᑭᒋ ᐗᓂᔥᑳᑦ ᐅᓂᐱᐗ ᐅᒋ; ᓀᔥᑕ ᒫᑲ ᐊᐗ ᒋᓴᔅ ᑳ ᐊᓕᒧᑕᒫᑕᑾᒃ, ᐁᐗᑯ ᙭᙮ 4ᐋᑎᑦ ᒫᑲ ᑮ ᑖᐺᑕᒶᒃ, ᓀᔥᑕ ᑮ ᐗᐎᒉᐌᐗᒃ ᐹᓚ ᓀᔥᑕ ᓴᓚᓴ; ᐊᓂᑭ ᑳ ᐋᔭᒥᐁᐗᑎᓯᒋᒃ ᒃᕆᑲᒃ ᒫᑲ ᐅᒋ ᓈᔅᐱᒡ ᒥᒉᑦ ᐃᓕᓕᐗᒃ, ᓀᔥᑕ ᑭᒋ ᐃᔅᑴᐗᒃ ᐅᒋ ᓇᒪᐎᓚ ᒐᑲᐙᔑᔥ᙮
5ᒫᑲ ᒎᐗᒃ ᐁᑳ ᑳ ᑖᐺᑕᑭᒃ, ᐁ ᐅᑌᓕᑕᑭᒃ, ᑮ ᐅᑎᓀᐗᒃ ᐊᑎᑦ ᑳ ᑭᔥᑴᐊᑎᓯᓕᒋ ᐃᓕᓕᐗ ᓇᐗᒡ ᑳ ᒪᒉᓕᑕᑯᓯᓕᒋ, ᓀᔥᑕ ᒫᒪᐤ ᑮ ᒫᐗᒋᐁᐗᒃ ᐊᐌᓕᐗ, ᑮ ᒥᑯᔅᑲᒋᑖᐗᒃ ᒫᑲ ᒥᓯᐌ ᐃᑖᐎᓂᓕᐤ, ᓀᔥᑕ ᑮ ᐎ ᓂᔑᐗᓈᒋᑕᐗᒃ ᐎᑭᓕᐤ ᒉᓴᓐ, ᑮ ᓇᓈᑐᓇᐌᐗᒃ ᒫᑲ ᐁ ᐎ ᐯᒋ ᐗᓚᐎᑕᑕᐙᒋᒃ ᐃᓕᓕᐗ᙮ 6ᐃᔅᐱ ᒫᑲ ᐁᑳ ᒣᔅᑲᐙᒋᒃ, ᑮ ᐃᔑᑖᐯᐗᒃ ᒉᓴᓇ ᓀᔥᑕ ᐊᑎᑦ ᑳ ᐎᒋᔖᓂᑐᓕᒋ ᐊᓂᐃ ᑳ ᑎᐯᓕᑕᒥᓕᒋ ᐃᑖᐎᓂᓕᐤ, ᐁ ᑌᐺᒋᒃ, ᐅᑯ ᑳ ᑮ ᑴᑎᐱᓇᑭᒃ ᐊᔅᑭᓕᐤ ᑕᑯᔑᓋᒃ ᐅᑕ ᐊᓯᒋ: 7ᐊᓂᐃ ᑳ ᑮ ᐅᑎᓈᑦ ᒉᓴᓐ; ᐅᑯ ᒫᑲ ᒥᓯᐌ ᐋᓉᑐᑕᒸᒃ ᑳ ᐃᔑ ᐃᑖᔓᐌᓕᒋ ᓯᓴᕋ, ᐁ ᐃᑗᒋᒃ ᐃᑖᐤ ᑯᑕᒃ ᑭᒋᐅᑭᒫᐤ, ᐊᐌᓇ ᒋᓴᔅ᙮ 8ᑮ ᒥᑯᔅᑲᒋᐁᐗᒃ ᒫᑲ ᐃᓕᓕᐗ ᓀᔥᑕ ᐊᓂᐃ ᑳ ᑎᐯᓕᑕᒥᓕᒋ ᐃᑖᐎᓂᓕᐤ, ᐃᔅᐱ ᐱᐁᑕᒥᓕᒋ ᐅᐅ ᑫᒀᓇ᙮ 9ᐃᔅᐱ ᒫᑲ ᑳ ᑮ ᐅᑎᓇᒸᒋᒃ ᒉᓴᓇ, ᐅ ᑫᒋᓇᐅᐎᓂᓕᐤ ᓀᔥᑕ ᐊᓂᐃ ᑯᑕᑭᔭ, ᑮ ᐸᑭᑎᓀᐗᒃ᙮
ᐊᓐᑕ ᐱᕇᐊᐃᒃ
10ᑳ ᐎᒋᔖᓂᑐᒋᒃ ᒫᑲ ᑣᔦᒃ ᑮ ᑭᒋᑎᔕᐌᐗᒃ ᐹᓚ ᓀᔥᑕ ᓵᐃᓚᓴ ᓂᐹᑎᐱᔉ ᐱᕇᐊᐃᒃ ᐃᔑ: ᐊᓂᑭ ᐁ ᐯᒋ ᑕᑯᔑᑭᒃ ᐊᓐᑕ ᑮ ᐱᑐᑫᐗᒃ ᒎᐗ ᐅᑦ ᐋᔭᒥᐁᐎᑲᒥᑯᓕᒃ᙮ 11ᐅᑯ ᐊᐙᓯᑌ ᑮ ᑭᔅᑌᓕᑖᑯᓯᐗᒃ ᐃᔥᐱᔥ ᐊᓂᑭ ᑌᓴᓗᓈᐃᑲᐃᒃ ᑳ ᐃᑖᒋᒃ, ᐊᓂᒪ ᐅᒋ ᐁ ᑮ ᐅᑎᓇᑭᒃ ᐋᔭᒥᐎᓂᓕᐤ ᒥᓯᐌ ᒋᑫᓕᑕᒧᐎᓂᒃ, ᓀᔥᑕ ᐁ ᑮ ᓈᓈᑕᐎᑭᔅᑫᓕᑕᑭᒃ ᒪᓯᓇᐃᑫᐎᓇ ᑕᑡᐤ ᑳᔑᑳᓕᑭ, ᑮᔥᐱᓐ ᐊᓂᐃ ᑫᒀᓇ ᐁ ᐃᑭᓄᐗᑴ᙮ 12ᐁᐗᑯ ᐅᒋ ᒥᒉᑦ ᑮ ᑖᐺᑕᒶᒃ; ᑳ ᑭᔅᑌᓕᑕᑯᓯᒋᒃ ᐃᔅᑴᐗᒃ ᑳ ᒃᕆᑭᐎᒋᒃ, ᓀᔥᑕ ᐃᓕᓕᐗᒃ ᐅᒋ, ᓇᒪ ᐎᓚ ᒐᑾᐙᔑᔥ᙮ 13ᒫᑲ ᐃᔅᐱ ᐊᓂᑭ ᒎᐗᒃ ᐊᓐᑕ ᑌᓴᓗᓈᐃᑲ ᑳ ᐃᑖᒋᒃ ᑳ ᑭᔅᑫᓕᑕᑭᒃ ᑭᒋᒪᓂᑐ ᐅᑦ ᐋᔭᒥᐎᓐ ᐁ ᑮ ᐙᐎᑕᒥᓕᒋ ᐹᓚ ᐊᓐᑕ ᐱᕆᐊᐃᒃ, ᐎᓚᐗᐤ ᐊᓯᒋ ᐊᓐᑕ ᑮ ᐯᒋ ᐃᑐᑌᐗᒃ, ᓀᔥᑕ ᑮ ᒥᑯᔅᑳᒋᐁᐗᒃ ᐃᓕᓕᐗ᙮ 14ᑣᔦᒃ ᒫᑲ ᐊᓂᑭ ᑳ ᐎᒋᔖᓂᑐᒋᒃ ᑮ ᑭᒋᑎᔕᐌᐗᒃ ᐹᓚ, ᑭᒋ ᐃᑐᑌᓕᒋ ᑭᒋᑲᒥᒃ: ᓵᐃᓚᔅ ᒫᑲ ᓀᔥᑕ ᑕᐃᒧᑎᐊᔅ ᐁᑯᑕ ᑫᔮᐸᒡ ᑮ ᐃᑖᐗᒃ᙮ 15ᐊᓂᑭ ᒫᑲ ᑳ ᑭᔅᑭᓄᑕᐋᒋᒃ ᐹᓚ ᑮ ᐯᔑᐌᐗᒃ ᐊᓐᑕ ᐊᑎᓐᓯᒃ: ᐎᓚ ᐁ ᐅᓚᔓᐙᑖᑦ ᒫᑲ ᑭᒋ ᐎᑕᒪᐗᓕᒋ ᓵᐃᓚᓴ ᓀᔥᑕ ᑕᐃᒧᑎᐊᓴ ᑭᒋ ᑭᓕᐱ ᐯᒋ ᓇᑎᑯᑦ, ᑮ ᑭᑐᑌᐗᒃ᙮
ᐊᓐᑕ ᐊᑎᓐᓯᒃ
16ᒣᒀᒡ ᒫᑲ ᐹᓪ ᑳ ᐯᐋᑦ ᐊᓐᑕ ᐊᑎᓐᓯᒃ, ᑮ ᒥᑯᔅᑲᑌᓕᑕᒻ ᐅᑦ ᐊᒑᑯᒃ, ᐃᔅᐱ ᐎᐋᐸᑕᒃ ᐃᑖᐎᓂᓕᐤ ᒥᑐᓂ ᐱᔑᔑᒃ ᒫᓂᑐᑳᓇᒃ ᐁ ᓇᐗᑭᔅᑖᒋᒃ᙮ 17ᐁᐗᑯ ᐅᒋ ᑮ ᐋᔭᒥᐁᐤ ᐊᓂᐃ ᒎᐗ ᐱᒋ ᐊᔭᒥᐁᐎᑲᒥᑯᒃ, ᓀᔥᑕ ᐊᓂᐃ ᑳ ᐊᔭᒥᐁᐙᑎᓯᓕᒋ ᐃᓕᓕᐗ, ᓀᔥᑕ ᐱᒋ ᐊᓐᑕ ᑳ ᐃᔑ ᐊᑖᒥᑐᓇᓂᐗᒃ ᑕᑣᐤ ᑳᔑᑳᓕᒃ ᐊᓂᐃ ᐊᓐᑕ ᑳ ᓇᑭᔥᑳᑯᑦ᙮ 18ᐁᑯᔅᐱ ᒫᑲ ᐋᑎᑦ ᑳ ᑲᑫᑕᐌᓕᑕᑭᒃ ᐃᐱᒃᔫᕆᐊᓇᒃ ᐅᒋ, ᓀᔥᑕ ᐊᓂᑭ ᔅᑐᐃᑲᒃ ᐅᒋ, ᑮ ᒫᐎᓀᐅᑯ᙮ ᐊᑎᑦ ᒫᑲ ᑮ ᐃᑗᐗᒃ, ᑖᓀ ᑫ ᐃᑗᑦ ᐊᐗ ᐅᓵᒥᑐᓐ?
ᑯᑕᑭᔭᒃ ᐊᑎᑦ, ᒫᓇᐎ ᐋᓕᒧᒥᐤ ᒫᓐᑌᐎ ᒪᓂᑐᐗ: ᐌᓴ ᑮ ᐊᓕᒨᑕᒪᐌᐤ ᐊᓂᐃ ᒋᓴᓴ, ᓀᔥᑕ ᐗᓂᔥᑳᐎᓂᓕᐤ᙮ 19ᑮ ᐅᑎᓀᐗᒃ ᒫᑲ, ᓀᔥᑕ ᑮ ᐯᔑᐌᐗᒃ ᐊᕆᐅᐯᑲᓯᒃ, ᐁ ᐃᑗᒋᒃ, ᒫᑎ ᓂ ᑳ ᑭᔅᑫᓕᑌᓈᓐ ᓈ ᑫᑯ ᐅᔥᑭ ᑲᑫᔅᑴᐎᓐ ᐅᒪ, ᑳ ᐊᓕᒧᑕᒪᓐ? 20ᐌᓴ ᑮ ᐯᑖᓐ ᐊᑎᑦ ᒫᒪᔅᑳᒋ ᑫᒀᓇ ᓂᑕᐗᑳᓈᒃ: ᐁᐗᑯ ᐅᒋ ᓂ ᐎ ᑭᔅᑫᓕᑌᓈᓐ ᑖᓐ ᐁᑣᒋᑳᑌᑭ ᐅᐅ ᑫᒀᓇ᙮ 21(ᐌᓴ ᒥᓯᐌ ᐊᑎᓂᔭᓇᒃ, ᓀᔥᑕ ᒫᓐᑌᐗᒃ ᐊᓐᑕ ᑳ ᐃᑖᒋᒃ, ᓇᒪᐎᓚ ᑯᑕᒃ ᑫᒀᓐ ᑮ ᑐᑕᒶᒃ, ᐱᑯ ᑭᒋ ᐎᑕᑭᒃ, ᓀᔥᑕᐱᑯ ᑭᒋ ᐯᑕᑭᒃ ᐅᔥᑭ ᑫᒀᓐ᙮)
22ᐁᑯ ᐹᓪ ᑳ ᓂᐸᐎᑦ ᑌᑖᐎᒡ ᒫᕐᔅ ᐗᒋᒃ, ᓀᔥᑕ ᑮ ᐃᑗᐤ, ᑭᓚᐗ ᐊᑎᓐᔅ ᐃᓕᓕᑐᒃ, ᓂ ᐙᐸᑌᓐ ᒥᓯᐌ ᐃᔑ ᓈᔅᐱᒡ ᐁ ᐋᔭᒥᐁᐙᑎᓯᔦᒃ᙮ 23ᐌᓴ ᒣᒀᒡ ᐁ ᐱᒧᑌᔮᓐ, ᐁ ᑲᓇᐗᐸᑕᒫᓐ ᒫᑲ ᑭᑦ ᐋᔭᒥᐋᐎᓂᐙᐗ, ᓂ ᑮ ᒥᔅᑫᓐ ᐯᔭᒃ ᐸᑭᒋᑲᓈᐱᔉ ᐅᒪ ᐁ ᐃᑕᓯᓇᐃᑳᑌᒃ, ᐊᓇ ᐁᑳ ᑳ ᑭᔅᑫᓕᒥᑦ ᒪᓂᑐ, ᐊᓇ ᒫᑲ ᐁᑳ ᑳ ᑭᔅᑫᓕᒣᒃ ᑳ ᐅᒋᒋᒀᓇᐱᔅᑕᐌᒃ, ᐁᐗᑯ ᑳ ᐊᓕᒧᑕᒪᑕᑾᒃ᙮ 24ᑭᒋᒪᓂᑐ ᑳ ᑮ ᐅᔑᑖᑦ ᐊᔅᑭᓕᐤ, ᓀᔥᑕ ᒥᓯᐌ ᑫᒀᓇ ᐊᓐᑕ ᑳ ᐃᑕᑾᓕᓕᑭ ᐁ ᐗᐸᒋᑳᑌᒃ ᐎᓚ ᐁ ᑎᐯᓕᒋᑫᑦ ᑭᒋᑭᔑᑯᒃ ᓀᔥᑕ ᐊᔅᑭᒃ, ᓇᒪᐎᓚ ᑕᔑᑫᐤ ᐱᒋ ᐋᔭᒥᐁᐎᑲᒥᑾ ᑳ ᐅᔑᒋᑳᑌᑭ ᒥᒋᒋᔭ ᐅᒋ; 25ᓇᒪᐎᓚ ᓀᔥᑕ ᐅᒋᒋᑾᓇᐱᔅᑕᐙᑲᓂᐎᐤ ᐃᓕᓕᐗ ᐅᒋᒋᐙᒃ ᐅᒋ, ᒫᓇ ᑖᐱᔅᑯᒡ ᑫᒀᓂᐤ ᐁ ᓇᑕᐌᓕᑕᒃ, ᐁ ᐋᐸᒋᑳᑌᒃ ᐎᓚ ᐁ ᒥᓛᑦ ᒥᓯᐌ ᐱᒫᑎᓯᐎᓂᓕᐤ, ᓀᔥᑕ ᓓᓓᐎᓂᓕᐤ ᓀᔥᑕ ᒥᓯᐌ ᑫᒀᓕᐤ; 26ᓀᔥᑕ ᐁ ᑮ ᐅᔑᐋᑦ ᐯᔭᒃ ᒥᑯᓕᐤ ᐅᒋ ᒥᓯᐌ ᐁ ᑕᑐᔅᑲᓀᓯᓕᒋ ᐃᓕᓕᐗ, ᑭᒋ ᑕᔑᑫᓕᒋ ᒥᓯᐌ ᐁ ᐃᔅᐱᔕᓕᒃ ᐊᔅᑭᓕᐤ; ᐁ ᑮ ᐙᓓᓕᑕᒸᑦ ᒫᑲ ᓂᔭᑲᓇ ᐃᔥᐱᔥ ᐃᑭᑖᓕᒋ, ᓀᔥᑕ ᐃᑕ ᑫ ᐃᔅᑯ ᑕᔑᑫᓕᒋ; 27ᑭᒋ ᓈᓈᑐᓇᐙᒋᒃ ᐅᑎᐯᓕᒋᑫᐗ, ᒫᔅᑯᒡ ᒥᔅᑲᐤ ᑭᒋ ᑮ ᓇᑕᐌᓕᒫᒋᒃ, ᓀᔥᑕ ᒥᔅᑲᐙᒋᒃ, ᐊᑕ ᐁᑳ ᐁ ᓛᐙᐳᒥᑕᒃ ᒥᓯᐌ ᐁ ᐃᑕᔑᔭᒃ; 28ᐌᓴ ᐎᓚ ᐅᒋ ᑭ ᐱᒫᑎᓯᓈᓇᐤ, ᓀᔥᑕ ᑭᑦ ᐋᔮᒋᓈᓇᐤ, ᓀᔥᑕ ᑭᑦ ᐃᑕᓈᓇᐤ; ᑖᐱᔅᑯᒡ ᐊᑎᑦ ᓀᔥᑕ ᑎᐱᓚᐌ ᑭ ᑎᐸᒋᒧᐎᓕᓕᒥᐗᐗᒃ ᑳ ᑮ ᐃᑗᒋᒃ, ᐌᓴ ᑭᓚᓈᓇᐤ ᐊᓯᒋ ᐁᐗᒀᓂᐃ ᐅ ᓂᑖᐎᑭᐋᑲᓇ᙮ 29ᐁᐗᑯ ᐅᒋ ᒫᑲ ᐁ ᐋᐎᔭᒃ ᐅ ᓂᑕᐎᑭᐋᑲᓇ ᑭᒋᒪᓂᑐ, ᓇᒪᐎᓚ ᑭ ᑳ ᐃᑌᓕᑌᑖᓇᐤ ᐊᓇ ᑭᒋᒪᓂᑐ ᐁ ᐃᔑᓈᑯᓯᑦ ᑖᐱᔅᑯᒡ ᐅᓴᐎᔓᓕᐋᓈᐱᔉ ᓀᔥᑕᐱᑯ ᔔᓕᐋᓈᐱᔉ ᓀᔥᑕᐱᑯ ᐊᓯᓂ, ᑳ ᒪᒪᑖᐎ ᒫᒫᒋᔑᑲᑌᒃ ᓀᔥᑕ ᐁ ᐃᑌᓕᑕᒃ ᐃᓕᓕᐤ᙮ 30ᒣᒀᒡ ᒫᑲ ᐅᒪ ᑳ ᐃᔑ ᑲᑫᐸᑎᓯᓈᓂᐗᒃ ᑭᒋᒪᓂᑐ ᓇᒪᐎᓚ ᐅᒋ ᐱᓯᔅᑫᓕᑕᒻ; ᐊᓄᒡ ᒫᑲ ᐅᓚᔓᐙᑌᐤ ᒥᓯᐌ ᐃᓕᓕᐗ ᒥᓯᐌ ᐃᑕ ᑭᒋ ᑴᔅᑳᑎᓯᓕᒋ; 31ᐌᓴ ᑮ ᐅᓓᓕᑕᒻ ᐊᓂᐁᓕᐤ ᐁ ᑭᔑᑳᓕᒃ, ᐃᔅᐱ ᑫ ᑎᐹᔅᑯᓇᒃ ᐊᔅᑭᓕᐤ ᒀᔭᔅᑭᑖᑎᓯᐎᓂᒃ, ᐊᓇ ᐃᓕᓕᐤ ᐅᒋ ᑳ ᑮ ᐗᐌᓛᐸᒫᑦ; ᐁᐗᑯ ᑳ ᑮ ᐅᒋ ᒥᓛᑦ ᑫᒋᓈᐅᐎᓂᓕᐤ ᒥᓯᐌ ᐃᓕᓕᐗ, ᐁ ᑮ ᐗᓂᔥᑳᓈᑦ ᒥᓇ ᐅᓂᐱᐗ ᐅᒋ᙮
32ᐃᔅᐱ ᒫᑲ ᐱᐁᑕᑭᒃ ᒥᓇ ᑭᒋ ᐗᓂᔥᑲᓕᒋ ᐊᓂᐃ ᑳ ᓂᐱᓕᒋ, ᐊᑎᑦ ᑮ ᐹᐱᓄᑕᑫᐗᒃ: ᑯᑕᑭᔭᒃ ᒫᑲ ᑮ ᐃᑗᐗᒃ, ᒥᓇ ᑭ ᑳ ᐯᑖᑎᓈᓐ ᐅᒪ ᑫᒀᓐ ᐅᒋ᙮ 33ᐁᑯ ᒫᑲ ᐹᓪ ᑳ ᑭᑐᑌᑦ ᐊᓐᑕ ᑳ ᐃᑖᓕᒋ ᐅᒋ᙮ 34ᐁᓕᐌᒃ ᒫᑲ ᐊᑎᑦ ᐃᓕᓕᐗ ᑮ ᐎᒉᐎᑯ, ᓀᔥᑕ ᑮ ᑖᐺᑕᒥᓕᐗ; ᐅᑯ ᐋᑎᑦ ᐁᐗᒀᓂᑭ ᑕᐃᐅᓂᓯᐊᔅ ᑳ ᐁᕆᐅᐯᑲᐃᑎᐎᑦ, ᓀᔥᑕ ᐃᔅᑴᐤ ᑖᒪᕆᔅ ᑳ ᐃᔑᓂᑳᓱᑦ, ᓀᔥᑕ ᑯᑕᑭᔭᒃ ᐊᓯᒋ᙮
Currently Selected:
ᐊᐸᔅᑕᓚᒃ 17: MCNT91
Highlight
Copy
Compare
Share
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
