Tit 1
1
Lep'iyenataĝanaĝac ñe'me Pablo
1Jayem Pablo, jo'ne lalemaĝajet ñe'me Dios, nataq'aen jayem Jesucristo lamaĝajec qaedi jeda'alo da'me 'laqataĝanaĝac jogaa'me jo'ne joote yiyota'alo ñe'me Dios, qaedi p'iida'a joñe'me, nataq'aen qaedi yateto'n da'me yataqatelegue. Nach'eda jo'ne yapaĝagueneque jogaa'me da'me qaedi ye't ga'me jo'ne yepaquetapega joñe'me Dios, 2qaedi yataqachiñe yayate'n jogaa'me queda'me yacoteguet qomle da'me nec'alaĝac 'me qaya'te loiquiaqa'. Dios ja doqovinaĝatac: ca'li maliaĝa ja ye'et jena'me aleua, joote 'yaĝatetac ca'li da'me dojo' qaedi gaa'me lec'oqo'tepi joñe'me nach'e eta't 'uo da'me lec'alaĝa'j. 3Chane'eja ca'li yovita ga'me nolo' jo'ne tachigui q'aen, Dios yaloĝon da'me 'laqataĝanaĝac jo'ne na'yalo q'ae'n jodaa'me lapaĝaguenataĝanaĝaco gaa'me lamaĝa's, dojo' 'naqataĝanaĝac nach'e ena'am jayem qo'yelopec qaedi ja'aĝatetac; naq'aeta da'me jayem yamaĝalegue ñe'me Dios mach'e Qadec'alaĝaiqui. 4Yamaic am janem am Tito, am jo'ne ena'am ta'le yataqachiñe am yalec qa'a qademaye da'me dojo' qadepe'e. 'Noota qom Dios mach'e Qadet'a nataq'aen ñe'me Qadejaliaĝanec Jesucristo am yanem da'me anichoĝodenataguec nataq'aen da'me at'emaĝac.
Da'me 'noota ta'le yauote gaa'me yelolo'te gaa'me p'etaqadayaqa
5Qo'che' am jepota'ña ca'li di'me Creta: qaedi aviyamaĝachiñe ga'me jo'ne maliaĝa ja je'etaq, nataq'aen qaedi yemeda gaa'me noyaqa aviyaĝanalo gaa'me 'yaĝaicachidipi jo'ne niquiyaqa qaedi yelolo'te gaa'me p'etaqadaiquipi; ga'me jo'ne joote am japaĝaguenec nach'eda a'uetec qomle. 6'Noota qom qaya'te lejamaĝataĝac ga'me 'yaĝaicachigui, 'noota qom onole jaga'me loua, nataq'aen joĝodayaqa gaa'me c'oqo'tolqa, ja qoyec'ateneque ta'le ja 'noe'n da'me 'loyaĝa'j uotaĝa ta'le ja yoqocha'alo jogaa'me let'al. 7Ñe'me jo'ne nepoda'tape gaa'me p'etaqadaiquipi 'noota ta'le qaya'te lejamaĝataĝac, qa'a netela da'me Dios 'lonataĝanaĝac. Nataq'aen 'noota ta'le ja pagaĝalaic da'me damaĝajoĝonaĝac, 'noota ta'le ja lemataqaic, ja yomaĝaic, uotaĝa ta'le ja dodinataĝanac, uotaĝa ena'am ta'le ch'e naquitetapega da'me nejetenaguec. 8'Noota qom ja naq'aeta, dite da'me yelo'ogueta gaa'me jo'ne yec'adeta ga'me 'lachaqa', 'noota qom jiyaĝaua jo'ne onaĝaicaloec, yataqachiñe joĝodaic, yataqatelegue, ja 'nalegue, nataq'aen mach'ega yayaten ta'le ja yaqa'a ga'me ye'et. 9'Noota ta'le yataqachiñe nematala't da'me yataqatelegue 'naqataĝanaĝac jo'ne qoyapaĝaguenec, qaedi nach'e ena'am yaqanatet ta'le yapaĝagueneque joda'me yataqatelegue gaa'me laqaya'olqa nataq'aen 'yañaqatetapeque qaedi nach'e eta't quetedalegue, nataq'aen qaedi yaqanatet ta'le noqotetapegalo gaa'me jo'ne te'me nautetedapega.
Da'me 'loyaĝa'j jogaa'me Creta laje'
10Qa'a qayoĝode' gaa'me uo'oe nayi jo'ne otanaĝanaĝaiquipi, 'me dapaĝaguenataĝatedapec ga'me qaya'te chiyaqayi nataq'aen qovinaĝanaĝaiquipi, choqoda'me mach'egaua p'etaqadayaqa jo'ne judiopi yauote da'me dojo'. 11Naa'me naajo' jiyaĝa'u 'noota qom anauañiyegueta qa'a yemeda gaa'me 'nachaqa'te 'naĝa't jogaa'me queda'me jetaque ch'e qoyejete'n qama'le dapaĝaguenataĝatec ga'me jo'ne ja naq'aeta.
12'Uo ñe'me Creta le'ec 'me aqataĝanaĝaic jo'ne 'yaĝa'tape gaa'me mach'e layi: “Qo'mi Creta laje' nach'eda da'me qo'mi qovinaĝanaĝaiquipi, jenaqa'ama gaa'me yejidipi, qo'mi choĝolaĝayaqa choqoda'me qo'mi qui'yaĝayaqa.” 13Dojo' nechoqotaĝanaĝac yataqachiñe yataqatelegue. Qo'che', ja auala'ac da'me adelaĝalo qaedi yacoteguet da'me yataqatelegue napaĝaguenataĝanaĝac, 14qaedi ja 'yamaqate'n gaa'me ch'e nejenaĝaco joga'me judiopi nataq'aen daa'me lamaĝajoĝonaĝaco gaa'me jiyaĝa'u jo'ne 'yotatedac da'me jo'ne yataqatelegue. 15Qom yataqachiñe qanedo'ta't naa'me qadai'li, qama'le yema nedo'ta't ga'me jo'ne jauanaĝa; qalaĝaja gaa'me jo'ne ja yataqachiñe nedo'ta'ajalo nataq'aen ja yacoteguet da'me lepe'e' qamqa'me qaya'te uetauelo jo'ne nedo'ta'ajalo, qa'a paĝachiguilo naa'me lai'li choqodaa'me lelnataĝaco nataq'aen ja nometeguet ta'le 'uo da'me lepocoĝo'j. 16Eetapela'ajalo yateto'n joñe'me Dios, qalaĝaja gaa'me 'lonataqa yaloĝo'n queda'me ja naq'aeta; yataqachiñe quiyaĝanataqayaqa, ja yoqochideta joñe'me Dios nataq'aen ja yaqanate't ta'le yauote gamachaqaega chimaqachiñe.
Currently Selected:
Tit 1: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina