2 Ti 4
4
1Da'me yaqataĝac am janem nayi, queda'me yataqata qo'mi yec'ate'tape joñe'me Dios choqoñe'me Cristo Jesús, jo'ne qomle male 'niyelaq, male ena'am ga'me jaliaĝanec t'adaic jo'ne ya'uo lec'atenaĝanaĝac jogaa'me nec'aletedaye choqodia'me joote yele'u, qama'le nejaliaĝatelo'te yema jogaa'me jiyaĝadipi. 2'Noota qom auapaĝaguenataĝaneque naa'me naajo' Dios 'laqataqa yemeda naa'me noloqo'ote, nataq'aen a'viyelaqatapelegue nale maqachaĝa am qonaquiaĝana, nataq'aen ena'am nale ja am 'te qonaquiaĝana. Aualoĝonalo gaa'me jiyaĝadipi da'me lejomaĝa'j nataq'aen da'me anavidijeguem, qama'le auapaĝague'n, ena'te adoualalo. 3Qa'a uo'oe jo' qomle gaa'me noloqo'ote jo'ne nate', male jena'me jiyaĝadipi yataqata ja naquiaĝana naa'me naajo' 'naqataqa, mac joda'me queteda'ague jogaa'me chiyoĝo's nichiyoĝojoĝoco. Nataq'aen male mach'e yelodaque gaa'me napaĝaguenoqo't, qaedi male qoyapaĝagueneque joga'me mach'e paquetedaque domachita. 4Jena'me jiyaĝadipi netauoĝodelegue da'me eja, male 'yamaqate'n jogaa'me gamachaqaegaua ch'e nejenaĝaco. 5Qalaĝaja da'me am Timoteo, yataqata adetela da'me at'onataĝanaĝac, a'nañaĝateta jogaa'me adachoĝodeco, mac joda'me nach'e eta't auapaĝaguenataĝatac jena'me jenjo' 'noota, yataqata aviyamaĝatetac da'me qoyen at'onatac.
6Qa'a da'me jayem male nadi'ta da'me laloqo' da'me naliñi jana'me yetauo' da'me jayem qoyalat, male joote jelo'ta da'me jeca'e jena'me aleua. 7Qa'a joote yem da'me yeloiquiaĝac jo'ne yataqata onaĝaic, nataq'aen da'me yataqata jomat da'me 'yonataĝanaĝac, nataq'aen da'me qaya'te ua'a ta'le jaĝañi da'me jep'iya'a uotaĝa ja joqoch'a ñe'me Dios. 8Chane'eja nayi joote 'uo joga'me yomataĝanaĝac jo'ne jelo'ta, qa'a ñe'me Jaliaĝanec jo'ne qaya'te nepaten jayem yanem jo' qomle. Qalaĝaja ja jayem 'te onolec da'me jayem qoyanem; chayovida'alo qoyanema yemeda jogaa'me 'uo da'me loqopich'i da'me youatetedac ga'me yitaĝa 'niyelaĝac joñe'me Jaliaĝanec.
Da'me p'ategue 'laqatac ñe'me Pablo
9'Noota ta'le paja'a jayem anec'ata; 10qa'a ñe'me Demas jayem ca'e, en p'ajaye da'me loqopich'i jena'me ua'ña jena'me aleua, qama'le dajoyi di'me Tesalónica. Jo'me Crescente dajoyi di'me aleua Galacia, qama'le ñe'me Tito yec'ata di'me aleua Dalmacia. 11Qama'le onolec ñe'me Lucas jayem ue'tajop. Auelaque jo'me Marcos qama'le aquiaĝaua, qa'a uotaĝa yaqanatet da'me jayem lecochiya jena'me jenjo' 'yonatac. 12Ñe'me Tíquico qamqa'me jamaĝa di'me noic Éfeso. 13Ga'me ua'ña da'me auanac, anachi ga'me yapoto jo'ne jepota'ña di'me noic Tróade, 'lachaqa' ga'me Carpo, nataq'aen jogaa'me nedel, nach'agaua gaa'me mach'e yedaĝanaĝalatel.
14Alejandro jo'ne 'yetac nale jena'me laicaua, 'uo ca'li da'me yataqata ja no'en da'me jayem 'yetec; qalaĝaja ñe'me Qadejaliaĝanec male ye'uaĝan. 15Qama'le 'noota ta'le nach'e ena'am at'oiya'aguet qomle, qa'a yataqata nautena da'me qadapaĝaguenataĝanaĝac.
16Jo'me nolo' ca'li yemta te'me 'ñañaĝatela't da'me jajoya'agueta jogaa'me jaliaĝanaqa, yataqata qaya'te yequiaĝaua ta'le maqachaĝa jayem yotauan, yema jayem ca'e; qalaĝaja jepaquetapega qaedi Dios yichoĝode'n naa'me. 17Qalaĝaja joñe'me Jaliaĝanec yataqata jayem lecochiya nataq'aen da'me ya'uo da'me 'yañaĝac, qama'le yataqata jaqanatet da'me ja'aĝatema naa'me Dios 'laqataĝanaĝaco jogaa'me ja p'iida'a jena'me jenjo' 'noota. Qama'le ñe'me Jaliaĝanec en ñec'alegue male jeca'e ga'me nedegaĝat ñe'me jauaĝaic. 18Nataq'aen nach'e eta't ñe'me Jaliaĝanec jayem yachiyoĝotedaue yemeda jogaa'me ja 'noe'n, chayovida'a da'me yataqata jayem nec'alaĝategue, qama'le jayem yauega di'me lejaliaqa' jo'ne ja 'nalegue. ¡'Noota qom nach'e eta't jaloĝonaq da'me onaĝaic lejaliaĝa joñe'me! Jaja'a, nach'e naq'aeta da'me dojo'.
Da'me p'ategue lep'iyenataĝanaĝac ñe'me Pablo
19Yamaic janem jaga'me Prisca nataq'aen ga'me Aquila, choqogaa'me 'lachaqa' laje' ñe'me Onesíforo. 20Ñe'me Erasto ja nac quelqaya, ue'ta di'me Corinto; ñe'me Trófimo qamqa'me yeleuac quelqaya qama'le jepotan, ue'ta di'me noic Mileto. 21Paja'a auanac jo' qomle jona'li naqaviaĝa. Am namaĝata lamai'j gaa'me Eubulo, Pudente, Lino, Claudia nataq'aen yema na'me qadayi.
22'Noota qom Qadejaliaĝanec Jesucristo am ue'tajop, choqoda'me Dios loqopich'i ami yanema onolqa'tape da'me ami.
Currently Selected:
2 Ti 4: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina