Flm 1
1
1Jayem Pablo, jo'ne necoñetaejec qa'a yajouaĝat da'me japaĝaguenataĝanec da'me dalaĝaic 'naqataĝanaĝac jo'ne onaĝaic 'me chiyaqayi joñe'me Cristo Jesús. Jayem nataq'aen ñe'me qadaqaya Timoteo ja'uo jenjo' yediijec qaedi am jedenaqatena, am qadaqaya Filemón, jo'ne mach'e am qat'onataĝanaĝaua jo'ne am jauotaĝac, 2nataq'aen ena'uaque joga'me p'etaqadaiquipi jo'ne yema'a't nale ueda'a na'me at'achaqa', nach'e naq'aeta jaga'me qadaqaya Apia, nataq'aen ga'me Arquipo, jo'ne nach'e ena'am qadecochaĝaua queda'me qadeloiquiaĝac. 3'Noota qom Dios mach'e Qadet'a nataq'aen ñe'me Qadejaliaĝanec Jesucristo ami yanema da'me anichoĝodenataguequi nataq'aen da'me at'emaĝaqui.
Da'me lamaic ñe'me Pablo
4Am yaqaya Filemón, nach'e eta't am jenate'ta nale jauo'oe gaa'me ñetamenaĝaco, qama'le janem da'me yamaic joñe'me Dios. 5Qa'a jep'iquilegue da'me yataqata auep'iya'a ñe'me Qadejaliaĝanec Jesús nataq'aen queda'me adoqopitalo ena'uaque jogaa'me Dios lec'oqo'tepi. 6Jajela joñe'me Dios qaedi am lecochiya qaedi maqachaĝa avichoĝode'n jogaa'me Dios lec'oqo'tepi, chiyaqayi da'me adepe'e, qom auayaten yema da'me 'noota jo'ne jaqanatetaq ta'le jauoqo qaedi qo'nonaĝachigui joñe'me Cristo. 7Am yaqaya, yataqachiñe jayem matacolec nataq'aen 'uañaĝaicolec, yataqata 'uo da'me ñetonaĝac, qa'a jouaĝat joda'me adichoĝodenataĝanaĝac, da'me aloyaĝanate'tape ca'li jonaa'me lai'li ena'uaque jogaa'me qadaqaya'olqa jo'ne p'iida'a joñe'me.
Pablo nachoĝodelegue ñe'me Onésimo
8Qo'che' mate mane'e jayem Cristo lamaĝajec, chimaqacheñi ta'le am jamaĝalegue ga'me 'noota ta'le aua'uo, 9qalaĝaja jetaque ch'e am ñachoĝodenot, qa'a 'uo da'me adoqopich'i. Jayem Pablo, male jayem 'yaĝaicachigui, nataq'aen nayi jayem necoñetaejec da'me yajouaĝat joñe'me Cristo Jesús. 10Qama'le nayi am jiyaĝanot qaedi avichoĝoden jo' qomle ñe'me Onésimo: avichoĝoden joñe'me qa'a mach'e yomataĝanaĝat, qama'le ena'am ga'me yataqachiñe yaleeja da'me jonetaue jana'me janjo' coñetaĝanaĝaiqui.
11Ca'li gaa'me noloqo'ote jo'ne yenoĝodegue, ñe'me Onésimo ch'e adelatac ca'li jo'ne qaya'te auen chiyaqayi, qalaĝaja nayi male 'uo ga'me auen chiyaqayi, nach'e ena'am da'me 'uo ga'me jen chiyaqayi. 12Nayi am ji'iyelaĝatot, aue'tem jo' qomle da'me ena'am ta'le naqayem. 13Taama'le ñaviiñi queda'me jetaque cada'ac jayem ue'tajop, qaedi ena'am da'me am nemeneguet qaedi jayem lecochiya da'me cha'li jonetaue jana'me coñetaĝanaĝaiqui, qa'a jouaĝat da'me onaĝaic 'naqataĝanaĝac jo'ne ja'aĝatetac. 14Qalaĝaja qaya'te jetaque ja'uo qom cha'li ja auen 'te 'noota q'aen, qaedi ga'me adichoĝodenataĝanaĝac jo'ne jayem auanem ja ena'am da'me am qodiquetape'uo, dite da'me mach'e aviyamaĝaden.
15Uotaĝa ñe'me Dios cha'li yajeta ñe'me Onésimo da'me uo'oe gaa'me noloqo'ote da'me cha'li ja am 'te ue'tajop, qaedi p'iya'a joñe'me Cristo qama'le yitaĝa am ji'iyelaĝatot nayi, qaedi nale'en am ue'tajop ja yitaĝa am ca'e. 16Qama'le nayi ja ena'am da'me ch'e adelatac dite da'me ena'am da'me napacalegue ga'me ch'e nelatac; ena'am ga'me yataqachiñe adaqayeja jo'ne adoqopita. Jayem jalcote da'me joqopita, qalaĝaja da'me am, 'noota qom yaguegue auen jo' qomle da'me adoqopich'i, qa'a ja nach'edata da'me ch'e adelatac, dite da'me yataqachiñe qadanogaĝaua qadaqayeja jo'ne p'iya'a ñe'me Qadejaliaĝanec.
17Chane'eja, qom auen jayem adepi'iyaĝaua, qama'le auaconeguet jo' qomle ñe'me Onésimo, aualoqochichigui da'me ena'am ta'le naqayem.
18Ta'le 'uo ga'me gamachaqaega am ye'tec jo'ne ja 'noota ca'li, uotaĝa 'uo ga'me nep'iayaĝac, 'noota qom aue'n ñep'iayaĝaco jo'. 19Jayem Pablo, mach'e ñapoquena ledii's naa'me naajo', queda'me mach'e jejeten qomle. ¡Mate mane'e jaqanatet ta'le am ñetouenaĝanaĝanec queda'me dalaĝaic anejiyaĝauayaĝac ena'am ta'le ch'e anep'ia, qa'a am yecochiya ca'li, qaedi 'uo da'me adepe'e!
20Naq'aeta da'me dojo', am yaqaya. Aua'uo jo' da'me ñachoĝodenaĝac, qa'a am yepi'iyaĝaua da'me qademe'teguet joñe'me Qadejaliaĝanec; aloyaĝanatet na'me yeuel qa'a mach'e qo'mi naqaya' da'me jep'iyaqa joñe'me Cristo. 21Am jedenaqatena jenjo' yediijec qa'a jayaten da'me auoqoch'a ga'me jiyaĝanaque, nataq'aen jayaten da'me yaguegue auen ga'me jiyaĝanaque. 22Yitaĝa uoja'ega, aviyamaĝatetac jo' qomle ga'me 'yochaqa', qa'a yeuataqataĝanaĝac da'me ami jauanalo qom 'yategueta daa'me anetamenaĝacodi' joñe'me Dios, qom yajeta da'me cha'li ami jec'atalo.
Da'me p'ategue 'laqatac ñe'me Pablo
23Lamaic ñe'me Epafras, mach'e ñecoñetaĝaua qa'a jajouaĝam joñe'me Cristo Jesús. 24Nataq'aen lamai'j ñe'me Marcos, Aristarco, Demas choqoñe'me Lucas, jo'ne lecochita da'me 'yonataĝanaĝac.
25'Noota qom ena'uaque ami yecodelo'te da'me lichoĝodenataĝanaĝac joñe'me Qadejaliaĝanec Jesucristo.
Currently Selected:
Flm 1: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina