Tit 3
3
Ga'me jo'ne 'noota ta'le yauote ena'uaque joga'me p'etaqadaiquipi
1Ena'uaque jogaa'me anetouenaĝanaĝaneque queda'me 'noota ta'le uatec'alo jogaa'me jo'ne 'uo da'me lejaliaqa' nataq'aen gaa'me jaliaĝanaqa, choqoda'me yoqocha'alo jogaa'me, nataq'aen nach'e eta't niyamaĝateta'ajalo ta'le yauote da'me 'noota. 2'Noota qom ja ja 'noe'n naa'me 'laqataqa jo'ne yachalo'te gaa'me laqaya'olqa, ja loequiaĝayaqa, nataq'aen 'noota qom choĝodenataĝanaĝayaqa, nataq'aen ja en 'te 'yoĝodenaĝaic da'me 'loyaĝa'j nale dajoya'agueta gaa'me laqaya'olqa.
3Qa'a joca'li nach'e ena'am qo'mi chiyoĝo's nataq'aen qoleguetaĝanaĝaiquipi; qadejometac ca'li nataq'aen qo'mi lecoñetae's yema gaa'me yodapecache 'me lamaico jena'me aleua. Jouaqatauelo ca'li gaa'me ja 'noe'n nataq'aen nep'aguenataĝanaĝaco, qo'mi qoniquiyatapegalo nataq'aen qo'mi quiyaĝanataqaiquipi. 4Qalaĝaja ca'li ñe'me Dios mach'e Qadec'alaĝaiqui yaloĝon da'me lichoĝodenataĝanaĝac nataq'aen da'me loqopich'i jouaĝat ga'me jiyaĝadipi, 5qama'le qo'mi nec'alaĝatedegue. Dojo' ya'uo ja naqaeda ta'le yajouaĝat da'me jauoqo ga'me chimaqachiñe, dite da'me yajouaĝat da'me yataqata qo'mi yichoĝode'n. Chane'eja ñe'me Lepaqal 'me ja 'nalegue yiyo'y naa'me qadai'li nataq'aen en dalaĝaic da'me qadañoĝoc qama'le qo'mi yadalaĝa't. 6Nach'eñe joñe'me Dios qo'mi yeyala'aque 'me na'ya q'aen ñe'me Jesucristo mach'e Qadec'alaĝaiqui. 7Dios qo'mi yichoĝode'n qama'le qo'mi e'n yataqatelo'te q'ae'n. Chane'eja ya'uo yema da'me dojo' qaedi jaqanatetaq ta'le nach'e ena'am jaconaĝaguet qomle ga'me nevitaĝanatac; qo'che' 'uo da'me qo'mi uetauelo 'me qadajoĝonataĝanaĝac, nach'eda da'me 'noyaĝac 'me ja 'naidena'a.
8Dojo' yataqachiñe eja, nataq'aen jepaquetapega ta'le a'viyelaĝatalo'te jogaa'me, qaedi jogaa'me jo'ne p'iida'a joñe'me Dios yemeda'a da'me yauote ga'me jo'ne 'noota; dojo' napaĝaguenataĝanaĝac yataqachiñe onaĝaic nataq'aen ena'uaque yiyamaĝatem.
9Qalaĝaja ena'te aualequete'n gaa'me cotaĝaco jo'ne chiyoĝo's, gaa'me nejenaĝaco jogaa'me toye's jiyaĝa'u, da'me ja niyamaĝadenapega't nataq'aen nale qonejoviñelo jodaa'me Moisés lamaĝajoĝonaĝaco. Nach'enaua uo'oe jo'ne qaya'te liyamaĝa'j nataq'aen qaya'te yelo'teguet. 10Qom 'uo ga'me ja nalo'ta'ajalo q'ae'n ga'me p'etaqadaiquipi, qama'le auayatenaĝanec queda'me ya'uo ga'me ja chimaqachiñe; qom ja yaĝañi qama'le yitaĝa auayatenaĝanec. Qom maliaĝa ja am 'te yoqo'cha, qama'le ja yitaĝa auaje'tem ta'le dojapegue'to joga'me p'etaqadaiquipi. 11Joote auayaten queda'me qom naq'aeta ga'me jiyaĝaua qama'le nechiyoĝojoĝola't, nataq'aen mach'e najouaĝatoue ga'me mach'e loeco.
Da'me p'ategue loqotenaĝanaĝac nataq'aen lep'iyenataĝanaĝac
12Qom am jamaĝa ñe'me Artemas uotaĝa Tíquico, auepitaqatenac ta'le auec'ata di'me noic jo'ne Nicópolis qaedi jayem auana, qa'a jetaque joue'ta di'me qom naqaviaĝa. 13Qom maqachaĝa auaqanatet qama'le alecochaĝanaĝaneguet ñe'me taĝayaĝanaĝanec Zenas nataq'aen ñe'me Apolo, auanema yema ga'me youetedaque qaedi quetedalegue da'me leuoĝo'j. 14Nataq'aen ena'uaque gaa'me mach'e qadepi'iyaĝa'u 'noota qom yayate'n ta'le yauote joda'me 'noota, qama'le lecochiyalo gaa'me jo'ne 'uo da'me louenaĝanaĝa'j, qaedi qoyiyamaqa'tema jogaa'me.
15Ena'uaque naa'me jo'ne jayem ueteda'ajop am yamaĝata da'me lamai'j. 'Noota qom auanema da'me qadamaic jogaa'me jauotaĝaque jo'ne qadepi'iyaĝa'u. 'Noota qom ñe'me Jesucristo ena'uaque ami yanema da'me lichoĝodenataĝanaĝac.
Currently Selected:
Tit 3: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina