Heb 1
1
Joñe'me Dios Lec'oĝot qo'mi yapaĝague'n
1Joca'li jaa'me 'uoidi jo'ne 'uaechidiñe, Dios yojaĝanaĝa'n jodia'me 'laqataĝanaĝanaqa da'me dojapegue'to jodia'me jiyaĝa'u jo'ne mach'e jachiyojoĝogueta: nach'e eta't 'viyelaĝalegue da'me dojapegue'to, choqoda'me yodapecache daa'me 'laqataqa jo'ne yanema. 2Qalaĝaja nayi naa'me naajo' noloqo'ote jo'ne p'atedegue, male 'uo joñe'me jo'ne mach'e C'oĝot, qama'le nach'eñe jo'ne qo'mi yapaĝague'n, nach'eñe jo'ne qoyen loqo'te ena'uaque jogaa'me jo'ne uo'oe, qa'a nach'eñe 'me chiyaqayi da'me ye'et ena'uac joca'li. 3Queda'me naqaeñe jo'ne laqaselegaĝac da'me 'lonaĝac joñe'me Dios, nataq'aen da'me 'loyaĝac joñe'me ena'am da'me 'loyaĝac joñe'me Dios. Qama'le naa'me 'laqataqa joñe'me C'oĝot 'uo da'me lañoqotaĝanaĝa'j qaedi nelaĝatetedañe ena'uaque naa'me naajo' jo'ne uo'oe. Chane'eja ca'li yomat da'me ena'am ta'le qo'mi yiyo'y qaedi qoyapalaĝa't naa'me mach'e qadoeco, qama'le neta'ña di'me yayaten joñe'me Dios, da'me male na'ague di'me piyem jo'ne lejaliaqa'.
Ñe'me Dios Lec'oĝot napacalo'te joñaa'me piyem laje'pi
4Nach'eñe joñe'me Dios Lec'oĝot jo'ne najoya'ñalo ena'uaque joga'me piyem laje'pi, qa'a naqaeñe 'me qoyen p'ajaye da'me 'loyaĝac, qama'le ja ena'ama daa'me 'loyaĝa'j ga'me piyem laje'pi. 5Qa'a joñe'me Dios qaya'te ta'le ua'a da'me 'uo ga'me 'laqatac ta'le yanem ga'me piyem le'ec ta'le eet'oi:
“Nayi jenjo' nolo' am ja'aĝatem
Da'me naqa'am jo'ne mach'e am yalec;
Qa'a da'me jayem yataqata jayem adet'a.”
Uotaĝa ta'le Dios 'yaĝatetac ga'me piyem le'ec da'me eetac:
“Naqayem jo'ne mach'e jayem let'a joñe'me,
Qama'le naqaeñe 'me mach'e yataqachiñe yalec.”
6Qalaĝaja qom 'yaĝatetac joñe'me mach'e Lec'oĝot jo'ne nipiloĝot, da'me namaĝa'ña jena'me aleua, qama'le eetac:
“Yema jogaa'me mach'e yamaĝa's jo'ne piyem laje'pi,
'Noota qom 'nonaĝachidegue joñe'me.”
7Nataq'aen 'yaĝatema ca'li jogaa'me piyem laje', enaac:
“Da'me ami piyem laje'pi, male aueñiya'am jena'me layat,
Da'me ami yecochaĝa'u, male aueñiya'am jena'me dole' lauaq.”
8Qalaĝaja da'me jo'ne 'yaĝatem joñe'me Lec'oĝot eetac:
“Nach'e am jo'ne am Dios, qama'le qaya'te loiquiaqa' da'me adejaliaĝa,
Nataq'aen da'me am jo'ne yataqatelegue da'me anejaliaĝatelegue ena'uac.
9Yataqata a'uamaqaten da'me 'noota nataq'aen adiquiya'a da'me ja no'en.
Qo'che' jen am yiquiyac, mach'e jayem Anedios,
Qama'le jen am jaqachigui da'me namaic let'adaic,
Da'me anapacalo'te jogaa'me jo'ne am ueteda'ajop.”
10Qama'le nach'e ena'am eetac:
“Naqa'am jo'ne am Jaliaĝanec 'me aviyamaĝachiñe joca'li jenjo' aleua,
Choqoda'me aue'et di'me piyem ca'li.
11Mate mane'e yemeda jogaa'me uo'oe male pa'l jo' qom'te,
Qalaĝaja da'me mach'e at'oyaĝac nach'e eta't ja pal.
Qa'a yema ga'me 'uo ch'e qo'naĝat qomle, ena'am ga'me noĝot jo'ne toĝoic,
12Qama'le qoyenanegue ena'uac,
Nataq'aen yema qoyadalaĝat,
Ena'am ga'me jiyaĝaua qoyenanegue ga'me loĝot jo'ne toĝoic,
Qama'le ya'uo ga'me dalaĝaic.
Qalaĝaja da'me at'oyaĝac nach'e eta't ja pal, qaya'te loiquiaqa'.”
13Joñe'me Dios qaya'te ua'a ta'le enaac da'me dojapegue' ga'me piyem le'ec:
“Ona'ague nayi jena'me jayaten,
Chayovida'a qom ñoma't jogaa'me adaute'udi'
Qama'le jacho'oto naa'me adapia'te.”
14Qa'a ena'uaque jogaa'me piyem laje' nach'egaua jo'ne nepaqa'li 'me t'onataĝadeuo'o joñe'me Dios, qa'a joñe'me nach'eñe jo'ne yamaĝalo'te da'me lecochiyalo joga'me jiyaĝadipi jo'ne qonec'alaĝatedegue.
Currently Selected:
Heb 1: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina