Mc 16
16
Da'me qo'yaĝatetac queda'me 'niyelaĝajeguem joñe'me Jesús
(Mt 28.1-10; Lc 24.1-12; Jn 20.1-10)
1Yenoĝonegue ga'me nolo' jo'ne niyamaqatac, qama'le María jo'ne Magdala laje, María lat'e ñe'me Santiago, nataq'aen Salomé quetot ga'me yoĝoqui jo'ne davioĝon qaedi qoyecodelegue ga'me lapat ñe'me Jesús. 2Ca'li maliaĝa ne'teta, yemta nenoĝojeguem jañe'me ajeua, qama'le yec'adeta ga'me napa'l lae't, 3nataq'aen queda'me nenatetapega't:
—¿Jach'e jogamaĝa qo'mi lecochiyalo qaedi naqat ga'me qa' t'adaic 'me yapadeno'uet ga'me nadiiuo ga'me napa'l lae't?
4Qalaĝaja ca'li yelodapega, yauata queda'me joote qonaqat ga'me qa' jo'ne lapadenaĝat. Qama'le yoqochetem, qa'a yataqachiñe t'adaic joca'li ga'me qa'. 5Mane'e ca'li tadoue ga'me napa'l lae't 'uo ga'me yauata jo'ne nejoqolec neta'ña ga'me p'aye ga'me yayaten, yatedañe ga'me leuo jo'ne pagaĝayaqa 'me yededañe. Gaa'me yauo' t'oi'y ca'li, 6qalaĝaja joñe'me dojapegue'to:
—Ena'te at'oiyi. Jayaten queda'me aueloyitaque ñe'me Jesús jo'ne Nazaret le'ec, joñe'me jo'ne qoyep'elegue jaga'me sodoso. Qalaĝaja ¡joote 'niyelaĝajeguem! Ja ue'ta jena'me jenjo': auec'achiñe di'me ua'ña jo'ne qoyacha'ña. 7Jamoyi, a'uaqataĝañiyem ñe'me Pedro nataq'aen jogaa'me laqaya' jo'ne lapaĝaguenataqa ñe'me Jesús: “Joñe'me 'uau'tague di'me Galilea qaedi yitaĝa ami yemata'a't; naqaedi ua'a da'me yitaĝa auañiya, naq'aeta da'me joote ami 'yaĝatema.”
8Chane'eja gaa'me yauo' chiyoqodañe ca'li queda'e ga'me napa'l lae't, qa'a t'oi'y, yataqachiñe diviloĝo'l. Eque', qama'le qaya'te gamachaqaega ta'le t'aqataĝatem, qa'a 'uo da'me loqolanaqa'.
Jogaa'me lapaĝaguenataqa ja 'yamaqate'n da'me 'niyelaĝajeguem ñe'me Jesús
(Lc 24.13-35; Jn 20.11-18)
9Ca'li joote 'niyelaĝajeguem ñe'me Jesús ga'me ne'teta nolo' jo'ne 'uaechiñe ga'me semana, 'uaechiñe naloĝoneguet jañe'me María jo'ne Magdala laje, nach'añe jo'ne chiyoĝotauelo siete payac lepaqa'li da'me yamaĝadegue. 10Jañe'me dajoyilo ca'li nataq'aen t'aqataĝanema jogaa'me jo'ne quetedapegue' joñe'me Jesús, jo'ne totelo'te nataq'aen noye'tape jogaa'me. 11Naa'me ca'li domachita queda'me Jesús nec'aletaye nataq'aen jaga'me yataqachiñe yauana, qalaĝaja ja 'yamaqate'n.
12Ca'li yoĝo'yi da'me dojo', Jesús yaqa'a q'aen ga'me 'loyaĝac da'me naloĝonegueta gaa'me dojolqa 'me lapaĝaguenataqa jo'ne yeuo'tape taida'ague ga'me 'nonaĝa. 13Naajo' 'viyela' ca'li qaedi t'aqataĝanema jogaa'me laqaya'; qalaĝaja nach'edi da'me ja qo'yamaqate'n jogaa'me.
Joda'me uaqateque joñe'me Jesús jogaa'me lapaĝaguenataqa
(Mt 28.16-20; Lc 24.36-49; Jn 20.19-23)
14'Uo jo'me nolo' laqaya ca'li Jesús yitaĝa naloĝonegueta jogaa'me once 'me lapaĝaguenataqa, mane'e ca'li cha'li ñichidiñe dajotedalegue ga'me niqui'yaĝala'. Qama'le enapegalo jogaa'me queda'me qaya'te lepe'e' nataq'aen queda'me ja en 'te damichiguilo q'ae'n naa'me lai'li, da'me qaya'te 'lamaqatenataĝanaĝa'j jogaa'me jo'ne 'uaediñe yauata queda'me 'niyelaĝajeguem. 15Chane'eja dojapegue'to: “Jamoyi, a'uaĝachetac da'me 'naqataĝanaĝac jo'ne onaĝaic ena'uaque joga'me jiyaĝadipi 'me nedalegue jena'me aleua. 16Joga'me jo'ne p'iya'a nataq'aen qonachilaĝan, naqaega yataqachiñe qonec'alaĝategue; qalaĝaja ga'me jo'ne ja p'iya'a, naqaega 'uo da'me naviyaqataguec. 17Nataq'aen naajo' nañoqotaĝanaĝaco ami naequetapegue'to nataq'aen yema gaa'me jo'ne p'iida'a, qaedi ami lecochigueta: queda'me yenaĝat auamaqayigui jogaa'me payagodipi lepaqa'li; auadenaĝachi' da'me dalaĝayaqa 'naqataqa; 18auacoñiyalo joga'me nanayaqapi; nataq'aen qom aniyomiyigui gamachaqaega 'uenaĝanaĝat jo'ne dalataĝanac, qama'te ja ami 'te yala't; choqoda'me qom auachiyalo'te naa'me adoua'adi joga'me leuaĝaiquipi qama'le yemedegue jogaa'me.”
Jesús yec'adije'ma jodi'me piyem
(Lc 24.50-53)
19Mane'e ca'li yem da'me dojapegue'to, joñe'me Jaliaĝanec Jesús qoyen taje'ma di'me piyem qama'le na'ña di'me yayaten joñe'me Dios. 20Jogaa'me lapaĝaguenataqa male eque' ca'li qaedi 'yaĝatetedac da'me 'naqataĝanaĝac jo'ne onaĝaic yema joga'me jiyaĝadipi; nataq'aen joñe'me Jaliaĝanec lecochiyalo jogaa'me, nataq'aen yauo'oe jodaa'me nañoqotaĝanaĝaco jo'ne p'ajodaye, jo'ne yotaua'n da'me 'naqataĝanaĝac.
Currently Selected:
Mc 16: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina