Stg 5
5
Napaĝaguenague'j gaa'me neuoyaĝadi
1Anaquiaĝañiya da'me dojo', da'me ami jo'ne neuoyaĝadi: anoyeñetac nataq'aen da'me a'ualaqaitac queda'me ami nedalo'te qomle da'me adachoĝodequi. 2Da'me mach'e adeuoyaĝaqui joote 'uo da'me lecochaĝa, choqoga'me jo'ne mach'e adeuodi' decochilo jena'me noĝot lapaĝat. 3Gaa'me mach'e adoqochidi' jo'ne oro nataq'aen gaa'me anaicauadi' male nach'e ena'ama da'me 'uo da'me letoĝo'j, qama'le da'me letoĝo'j nach'eda jo'ne en di'yoq da'me ami qoyepoleguelo'te qomle, qama'le ami yigouelo ena'am ta'le dole' da'me en ami datochiñe. Da'me jo'ne en alapoñetapejeguem da'me adeuoyaĝaqui naa'me naajo' noloqo'ote jo'ne p'atedegue. 4Da'me jo'ne te'me nejetenataĝanaĝac jo'ne ja auañema jogaa'me jiyaĝa'u jo'ne onataĝanaĝayaqa da'me 'yetedac ga'me jo'ne mach'e adoqochidi' jo'ne nejalayaĝac ga'me adanequi, nach'eda jo'ne ami yepoleguelo'te nayi queda'me male ami nautenalo jogaa'me onataĝanaĝayaqa. Chane'eja joñe'me Jaliaĝanec jo'ne yaguegue da'me lañoqotaĝanaĝac, joote domachiya da'me lachitatai'j jogaa'me onataĝanaĝayaqa. 5Nayi da'me maliaĝa oviyalegue jena'me aleua qaya'te auoviñetaque, 'uo da'me adec'alaĝaqui jo'ne onaĝaic, qama'le nach'e ena'am da'me adamaiqui choqoda'me adiqui'yaĝaqui. Qalaĝaja male aueñiya'am ga'me nelopi da'me qom male yovita ga'me nolo' jo'ne nalataĝanaĝaiqui. 6Ami jo'ne auachinataĝañilo'te nataq'aen da'me aualachi' jogaa'me jo'ne qaya'te laviyaĝaje't, qama'le jogaa'me ja ami 'te nematapegueta nataq'aen da'me ja ami 'te de'uotapegueta.
Da'me 'nemaĝac nataq'aen da'me tamenaĝac
7Qalaĝaja ami yaqaya'olqa, 'noota qom ami ue'tajopa da'me anapogaĝadenaĝaqui, chayovida'a da'me qom male novitequena joñe'me Jaliaĝanec. Qama'le nach'e ena'am jogaa'me jo'ne neteda'ña ga'me 'nonaĝa queda'me yeuateteda'a da'me jetaque yapotena'ajalo da'me nejalayaĝac jo'ne onaĝaic, ga'me jo'ne mach'e lane'j, qama'le yeuateteda'agueta gaa'me noloqo'ote jo'ne male 'uo nale ga'me uotep. 8Qama'le nach'e ena'am da'me ami 'noota qom 'uo da'me adeuataqataĝanaĝaqui choqoda'me nach'e eta't da'me adachimaqaetegue, qa'a joñe'me Jaliaĝanec paja'a da'me yitaĝa 'niyelaĝaquena qomle.
9Ami yaqaya'olqa, 'noota qom ena'te adouelitapegalo jogaa'me adaqayadi' nataq'aen jogaa'me laqaya', qaedi ja ami 'te qoye'uaĝa'n qomle, qa'a ñe'me Dios nach'eñe jo'ne loqotenaĝanaĝaic 'me joote uetauet nayi ñe'me jom. 10Ami yaqaya'olqa, 'noota qom auadenaĝachi' jodia'me 'laqataĝanaĝanaqa ñe'me Dios, queda'me 'uo da'me lachoĝode'j nataq'aen da'me napogaĝadenaĝa'j ca'li yojaĝanaĝa'n da'me lañoqotaĝanaĝac joñe'me Jaliaĝanec. 11Qa'a da'me qo'mi jenataqatapega made'tape jogaa'me jo'ne napogaĝadenegueta nataq'aen da'me 'nañaĝategueta daa'me qoye'n lachoĝodeco. Qama'le joote auomachiiya da'me napogaĝadenaĝac di'me Job. 'Uo da'me lachoĝodec joca'li, nataq'aen da'me joote auayachiñe da'me jo'ne 'yetec joñe'me Jaliaĝanec, queda'me yataqachiñe let'adaic da'me lichoĝodenataĝanaĝac, yichoĝoden ga'me jo'ne 'uo da'me lachoĝodec.
12Ami yaqaya'olqa, ena'te a'naĝachiyot jodi'me piyem uotaĝa jena'me aleua uotaĝa gamachaqaegaua jo'ne uo'oe. Nach'edata da'me qom aueñeetac “jaja'a” qama'le 'noota qom naq'aeta da'me auauoyi, nataq'aen qom aueñeetac “aja'y” qama'le 'noota qom naq'aeta da'me ja auauoyi qomle. Chane'eja qom nach'ega joga'me jo'ne anenaĝachiyegue qama'le ñe'me Dios ja ami 'te yapalaĝa't qomle.
13Qom 'uo da'me ami ue'tajop joda'me ja en 'te mach'eñe, 'noota qom netamen, nataq'aen gamachaqaegaua jo'ne ue'tajopa joda'me lamai'j 'noota qom t'onaĝa'tape da'me yi'yoĝodetedac joñe'me Dios. 14Qom 'uo ga'me yeleuac, 'noota qom yiyaĝanalo jogaa'me 'yaĝaicachidi jo'ne tamenaĝaiqui lo'ol qaedi netamedelegue nataq'aen da'me yiyoĝodelegue ga'me aceite joga'me yajouaĝat da'me yeme'teguet ñe'me Jaliaĝanec. 15Nataq'aen qom yataqachiñe 'uo da'me adepi'i da'me anetameñi qama'le joga'me jo'ne yeleuac paja'a da'me yemegue, qama'le joñe'me Jaliaĝanec yañijeguem. Qama'le qom uo'oe jogaa'me loeco nach'e ena'am qoyapalaĝa't. 16Qo'che' 'noota qom auechoĝochiyema gaa'me adaqayadi' ga'me adoequi, nataq'aen da'me anetameñilo'te onolqa'tape jogaa'me adaqayadi' qaedi en yemedegue q'ae'n. Qa'a da'me netamenaĝac joga'me jiyaĝaua jo'ne yataqatelegue, nach'eda jo'ne 'uo da'me lañoqotaĝanaĝac da'me lepe'e. 17Di'me Dios 'laqataĝanaĝanec Elías ch'e jiyaĝaua jo'ne ena'am da'me qo'mi, mane'e ca'li netamen choqoda'me 'uo da'me lepe'e da'me dajelaĝanaque da'me qaedi qaya'te uotep, qama'le da'me lajelaĝanaĝac yepaquichigui da'me ja yitaĝa ta'le 'uo ga'me uotep chayovida'a da'me tres jaa'me 'uoidi choqojo'me uo'e laeñi da'me ja yitaĝa ta'le uotep talegue jena'me aleua. 18Ca'li yem da'me dojo' jo'ne ya'uo, qama'le yitaĝa ya'uo da'me netamenaĝac da'me yiyaĝanaque ga'me uotep, qama'le 'uo jo'me uotep, qama'le yitaĝa 'uo da'me nejalayaĝac jena'me aleua.
19Ami yaqaya'olqa, qom 'uo ga'me jo'ne colaĝaye, ca'ae da'me dojo' jo'ne eja, qama'le 'uo ga'me laqaya jo'ne 'niyelaĝat, 20qama'le auayachiñe da'me dojo': gamachaqaega jo'ne ya'uo da'me en 'niyelaĝauo ga'me loeco lo'o da'me te'me ta'ya ga'me naq'aec jo'ne ja no'en, qama'le nach'ega jo'ne nec'alaĝategue da'me te'me 'uo da'me leleuaĝa, qama'le nach'e ena'am en qoyapalaĝa't gaa'me loeco jo'ne jalcote.
Currently Selected:
Stg 5: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina