Stg 1

Lep'iyenataĝanaĝac ñe'me Santiago

1Jayem Santiago jo'ne jayem lalemaĝajet ñe'me Dios choqoñe'me Qadejaliaĝanec Jesucristo, yamaic ami jamaĝalo, yema da'me ami jo'ne ami Dios lec'oqo'tepi 'me auachiyoĝoyegueta jogaa'me doce Israel lec'oqo'tepi 'me laedelegue yema jena'me aleua.

Da'me nayatenaĝanaĝac jo'ne chiyoqo'ot joñe'me Dios

2Ami yaqaya'olqa, 'noota qom ami made'tapolqa qom ami yovitalo jogaa'me yodapecache jo'ne napiyenataĝanaĝaco, 3qa'a joote auayachiñe da'me qom 'uo da'me qoyapiyen da'me adepi'iyaĝaqui, qama'le ua'a da'me nichiquetaye da'me anapogaĝadenaĝaqui. 4Chane'eja yataqata a'nañaĝachi chayovida'a da'me auaqanachichi ta'le anapogaĝadeñiyeguet yema, qaedi ami yovidaĝateda'a da'me en ami yataqatelo'te q'ae'n, yataqata ami yajo't, qama'le qaya'te adouenaĝanaĝaqui.

5Da'me ami, gamachaqaega ga'me jo'ne qaya'te layatenaĝanaĝac, 'noota qom yajela joñe'me Dios, qama'le yataqata qoyanem qomle, qa'a joñe'me ja jemataqaic, qaya'te en lochiya'a q'aen da'me lichoĝodenataĝanaĝac, uotaĝa ta'le 'uo ga'me nauchiyaĝac nale. 6Chane'eja 'noota qom auajelai joñe'me, qama'le yataqata auep'iiya'a, ena'te ta'le auoqoleguetaĝañi, qa'a ga'me jo'ne 'uo da'me loqoleguetaĝanaĝac male ena'am ga'me noĝop lepaĝa qom yajediñe ga'me layat let'adaic, qama'le ja qoyayaten ga'me en ta'ya. 7Chane'eja ga'me jo'ne qoleguetaĝanaĝaic, 'noota qom ja eetapega ta'le yaconeguet ga'me jo'ne chiyoqo'ot joñe'me Dios, 8qa'a jenjo' nolo' uenate'ta ga'me jo'ne jetaque ya'uo, qama'te qom nete' qama'le yitaĝa 'uo ga'me lelnataĝac laqaya, ja en 'te onolec ga'me en ta'ya q'aen da'me nejiyaĝauayaĝac.

9Qama'le ga'me qadaqaya jo'ne choĝodaq, 'noota qom yataqata matac nayi, qa'a Dios male en p'ajaye da'me 'loyaĝac joga'me. 10Nataq'aen ga'me neuoyaq, 'noota qom matac nayi da'me male naĝa'ñejop joñe'me Jaliaĝanec qaedi qo'niyelaĝachiñe. Qa'a ga'me neuoyaq da'me louoyaĝac ena'am ta'le lolelaĝa la'uo, da'me ja nach'e eta't ta'le 'uo. 11Qa'a qom nenoĝojeguem jañe'me ajeua qama'le 'uo 'lañaĝac jena'me lauaq, qama'le en daqaqa jena'me lolelaĝa; chane'eja jena'me te'me la'uo male en 'naqañe ena'uac, qama'le da'me te'me 'lonaĝa male qaya. Qama'le nach'e naq'aeta qomle ga'me neuoyaq, da'me ena'am ta'le daqaqa ga'me mach'e nemenaĝaiqui.

Qanapiyenagueco choqogaa'me qa'niyenagueco

12Matac ga'me jiyaĝaua qom napogaĝadeneguet da'me napiyenaguec qama'le yaqanatet da'me 'nañaĝateguet, qa'a qom yovida'a da'me male ye'm daa'me napiyenagueco, qama'le yaconeguet ga'me lomataĝanaĝac jo'ne nec'alaĝa 'me qaya'te loiquiaqa'. Nach'eda da'me nec'alaĝa jo'ne Dios 'yaĝatema jogaa'me jo'ne noqopideta.

13Qom 'uo ga'me jiyaĝaua jo'ne nomeguet da'me napiyenaguec, ena'te eetac: “Nach'eñe ñe'me Dios jo'ne jayem yapiyen,” qa'a qaya'te 'uo ga'me yaqanatet ta'le yapiyenec joñe'me Dios da'me ja no'en ta'le ya'uo, qama'le ja naqaeñe ta'le ya'uo ga'me mach'e lapiyenataĝanaĝac jo'ne ja no'en. 14Dite da'me uo'oe gaa'me mach'e lamaico ga'me jiyaĝaua: nach'egaua gaa'me jo'ne yapiyen, qama'le yoqovi'n chayovida'a da'me male equeguelo jogaa'me. 15Naa'me naajo' ja 'noe'n jo'ne namaico, nach'enaua jo'ne chiyaqayilo naa'me loeco ga'me jiyaĝaua, qama'le qom yovita da'me male nalo'ta't yema da'me jo'ne chiyaqayilo naa'me loeco, qama'le male najeguem da'me 'uo da'me neleuaĝa.

16Ami yaqaya'olqa jo'ne ñauotaĝa'upi, 'noota qom ena'te anoqoviñela't: 17qa'a yema da'me jo'ne onaĝaic nataq'aen da'me qaneme qoyen jo'ne ja 'nalegue 'me qo'mi qoyanema, yema chiyoĝogue di'me p'ajeguem jo'ne neta'ña joñe'me Dios, joñe'me jo'ne yauo'oe naa'me jo'ne 'uo da'me laqaselegaĝa'j jo'ne lecoyadaĝanaqate q'aen di'me piyem, joñe'me Dios jo'ne ja nadalaĝatela't, qama'le ja ena'am ga'me nepaqaliaĝala' da'me nach'e eta't da'me nichiquetapiyet ga'me nepaqal. 18Qa'a naq'aeta da'me jo'ne mach'e lelnataĝac joñe'me, da'me qo'mi yanema da'me nec'alaĝa jo'ne chiyaqayilo naa'me 'laqataqa jo'ne ejoda, qaedi ena'am ta'le qo'mi jala jo'ne 'uaechidiñe da'me mach'e 'lonataĝanaĝac.

Da'me jo'ne yataqatelegue nepe'e ladic

19Anetoviñetac da'me dojo', ami yaqaya'olqa jo'ne ñauotaĝa'upi: 'noota qom aleuocheta da'me anaquiaĝañi, qalaĝaja anepochitapegue' da'me a'uaqataĝañetac, qama'le nach'e ena'am da'me qom te'me aualemataitac. 20Qa'a ga'me jiyaĝaua jo'ne dalematatac ja yaqanatet ta'le ye'et ga'me jo'ne yataqatelegue ja 'nalegue jo'ne 'yamaqaten joñe'me Dios. 21Chane'eja da'me ami, 'noota qom aniyochela't, aĝañidiñi yema gaa'me jo'ne paĝachiguilo, nach'e ena'ama gaa'me etaĝaloĝoco jo'ne ja najataĝayaqa, qama'le da'me ami ooyaĝayaqa, 'noota qom auacoñiyeguet da'me dojo' napaĝaguenataĝanaĝac jo'ne joote qoyaañi, qa'a da'me dojo' napaĝaguenataĝanaĝac nach'eda jo'ne 'uo da'me lañoqotaĝanaĝac qaedi ami e'n nec'alaĝategue.

22Qalaĝaja 'noota qom ja nach'edata da'me auomachiiya da'me dojo' napaĝaguenataĝanaĝac, dite da'me anapaĝagueñiya, qaedi yataqachiñe auoqochiiya, qa'a qom ja naq'aeta da'me auauoyi qama'le mach'e ami da'me male anoqoviñetapela't. 23Qa'a ga'me jo'ne nach'edata da'me domachiya da'me napaĝaguenataĝanaĝac, qama'te ja yataqachiñe napaĝaguena qaedi male yataqachiñe yoqocha'a, qama'le nach'ega jo'ne ena'am ga'me jiyaĝaua qom yeloue jaga'me c'atenaĝanaĝaiqui da'me yec'aten ga'me mach'e latajoĝoc: 24qama'le yauana ga'me mach'e latajoĝoc da'me nach'eda da'me 'loyaĝac, qalaĝaja qom male nejouoĝoñe, qama'le ja yitaĝa ta'le netouenec da'me eeta da'me mach'e 'loyaĝac. 25Qalaĝaja ga'me jo'ne ja yapalaĝate'ta da'me jo'ne domachiya, nach'ega jo'ne yec'aten nataq'aen da'me yelo'tegue da'me namaĝajoĝonaĝac jo'ne yataqatelegue eja, 'uo da'me 'nemaĝac nataq'aen da'me nach'e eta't da'me chimaqategue, nataq'aen da'me yoqo'cha da'me en yepaquichigui da'me jo'ne mach'e eeta da'me dojo' namaĝajoĝonaĝac, qama'le nach'eda jo'ne nach'e eta't en matac ga'me jo'ne 'yetetac.

26Qom 'uo ga'me ami uetauelo jo'ne eetapela't p'etaqadaic, qama'te ja yayaten da'me naviiñe ga'me mach'e lachaĝat, nach'ega jo'ne mach'e noqovitapela't, qama'le da'me lepe'e qaya'te ta'le chiyaqayi. 27Da'me nepe'e jo'ne qaya'te lale'gue nataq'aen da'me ja paĝachigui jo'ne yec'atetac joñe'me Dios mach'e Qadet'a, nach'eda jo'ne chiyaqayi da'me lecochaĝac, lecochiyalo jogaa'me japelqo't choqogaa'me p'ail jo'ne uetedaue da'me lachoĝode'j, nataq'aen da'me ja yaje'tema ta'le en paĝachiguilo da'me ja no'en jo'ne ueta'ña jenjo' aleua.

Currently Selected:

Stg 1: TSN

Highlight

Copy

Compare