Heb 2
2
Nach'eñe ñe'me Jesucristo qo'mi nec'alaĝatedegue
1Chane'eja 'noota qom yataqata jeloqo'tegue da'me ladic na'me napaĝaguenataĝanaĝac jo'ne joote jomachaĝa, qaedi ja jejomaqatac. 2Naa'me namaĝajoĝonaĝaco jo'ne Dios joote yadegue jaa'me noloqo'ote joca'li, naa'me jo'ne e'n 'yaĝate'tape jogaa'me piyem laje', yataqata 'uo da'me lañoqotaĝanaĝa'j naa'me. Chane'eja gaa'me jo'ne yauote da'me loe'j uotaĝa da'me ja yoqochideta, qama'le yataqata qoyen da'me qoye'uaĝa'n ca'li. 3Qama'le nayi, ¿teua'atoqo' qo'mi yaĝa'n ga'me qane'uaĝanaguec, qom ja qadetela da'me nec'alaĝa let'adaic? Qa'a nach'eñe joñe'me Jaliaĝanec jo'ne 'uaechiñe da'me 'yaĝatetac da'me dojo' nec'alaĝa, qama'le jogaa'me jo'ne joote domachita da'me 'naqatac male qo'mi yaloĝonalo da'me naqaeda da'me jo'ne eja. 4Joñe'me Dios nach'e ena'am yauo'oe gaa'me 'lanaqa jo'ne qo'mi naloĝolo'te, gaa'me 'lanaqa onaĝayaqa choqoda'me ye't daa'me ja di'yo't nach'e ena'am da'me jalcote ja qoyauanalo, qama'le ñe'me Dios Lepaqal male qo'mi yanema gaa'me nañoqotaĝanaĝaco jo'ne yodapecache, qa'a nach'e naq'aeta da'me dojo' jo'ne mach'e 'lamaqatenataĝanaĝac joñe'me.
5Qom Dios yadalaĝat jena'me aleua, jena'me jo'ne joote ami ja'aĝatema, qama'le ja nach'egaua gaa'me piyem laje' ta'le qoye'n qadejaliaĝanaqa. 6Dite da'me joote 'uo ga'me jo'ne dojapegue' joñe'me Dios da'me 'yaĝatetac da'me dojo', enaac:
“¿Jach'e jogamaĝa eeta ga'me jiyaĝaua?
¿Toqoch'e auenate'ta nataq'aen da'me adetela joñe'me?
7Qa'a cada'ac da'me auen ja napacalo'te joga'me piyem laje'pi ca'li,
Qalaĝaja yem da'me dojo' qama'le auanem da'me 'lonaĝac
nataq'aen da'me yataqachiñe a'nonaĝachigui joñe'me.
8Qama'le yema gaa'me jo'ne uo'oe
ena'am ta'le auacho'oto naa'me lapia'te joñe'me qaedi nejaliaĝatelo'te.”
Chane'eja joñe'me Dios joote yem da'me yacho'oto naa'me lapia'te joñe'me jiyaĝaua yema gaa'me uo'oe. Qaya'te 'uo ga'me onolec ta'le ja qonauela't, mate mane'e maliaĝa ja jauanaĝa da'me yema joote qonauela't. 9Qalaĝaja jauanaĝa ñe'me Jesús, jo'ne cada'ac da'me qoyen ja napacalo'te joga'me piyem laje'pi jaa'me noloqo'ote ja lama'y, qaedi yeleualegue yema jena'me jiyaĝadipi, yajouaĝat da'me loequenataĝanaĝac joñe'me Dios jo'ne yataqata qo'mi noqopitalo. Chane'eja ca'li yem da'me lachoĝodec joñe'me Jesús, qama'le yataqachiñe qo'nonaĝachigui nataq'aen da'me yaconeguet da'me 'lonaĝac jo'ne chiyaqayi joñe'me Dios.
10Qa'a joñe'me Dios jetaque yema joga'me lec'oqo'tepi nach'e ena'am da'me ueda'ajop da'me 'lonaĝac. Chane'eja joñe'me jo'ne 'netoqo't yemeda gaa'me uo'oe qama'le yema mach'e loĝot joñe'me, yataqata chimaqachiñe da'me 'lonataĝanaĝac jo'ne 'yetec joñe'me Jesús ca'li, da'me en taue da'me lachoĝodec chayovida'a yovita da'me ja 'nalegue, qaedi naqaeñe qoyen Lec'alaĝaiqui' joga'me jiyaĝadipi. 11Qa'a joñe'me jo'ne yauecoto joga'me jiyaĝadipi joñe'me Dios, choqogaa'me jiyaĝa'u jo'ne qoyaue'j, 'uo ñe'me onolec jo'ne Let'a' ena'uac, nach'eñe ñe'me Dios. Chane'eja joñe'me Jesús ja nepocoĝolegue da'me dojelo'te jogaa'me jiyaĝa'u, enaac: “Nach'egaua mach'e yaqaya'.” 12Qama'le yitaĝa dojapegue' joñe'me Dios, enaac:
“Am ja'aĝatema qomle jogaa'me jo'ne mach'e yaqaya' qom yema'a't,
Nataq'aen da'me jo'onaĝan da'me yataqachiñe am 'ñonaĝachigui.”
13Nataq'aen eetac joñe'me Jesús:
“Da'me jayem yataqata jep'iya'a joñe'me Dios.”
Qama'le yitaĝa eetac:
“Da'me jayem male joue'tena,
Da'me joue'tajopa gaa'me nec'oqo'te
Jo'ne Dios jayem yanema.”
14Chane'eja queda'me yemeda gaa'me nec'oqo'te 'uo ga'me nejiyaĝauayaĝa'j, qama'le nach'e ena'am joñe'me Jesús da'me yaconeguet ca'li ga'me mach'e nejiyaĝauayaĝac, qaedi da'me leleuaĝa male en nomat ñe'me jo'ne 'uo da'me lañoqotaĝanaĝac da'me dalataĝan, nach'eñe ñe'me payac. 15Qama'le naq'aeta da'me ya'uo ca'li joñe'me Jesús, qaedi yejodegue ena'uaque jogaa'me jo'ne ena'am ta'le ne'uaqa qa'a nach'e eta't da'me t'oitedac da'me neleuaĝa. 16Qama'le yataqata di'yoq da'me 'lonatac ca'li: da'me ja lecochiyalo joga'me piyem laje'pi, dite joga'me lec'oqo'tepi joñe'me Abraham. 17Qo'che' joñe'me youen da'me yataqata ena'am qoyen da'me 'loyaĝa'j jogaa'me laqaya'olqa, qaedi yovida'a da'me qoyen Letaĝayaĝanaĝane'j jo'ne p'ajaye 'me yataqatelegue nataq'aen choĝodenataĝanaĝaic da'me dajo'tot joñe'me Dios, nataq'aen da'me yapalaĝa't gaa'me loeco joga'me jiyaĝadipi, qama'le yachiyoĝotayilo da'me leleuaĝa'. 18Chane'eja, queda'me 'uo da'me lachoĝodec joñe'me Jesús da'me qoyapiyen ca'li, qama'le nayi nach'eñe joñe'me jo'ne male yaqanatet ta'le qo'mi lecochiyalo, da'me qo'mi jo'ne nach'e ena'ama da'me uo'oe gaa'me qanapiyenagueco.
Currently Selected:
Heb 2: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina