Ef 3
3
Joga'me jetaque ya'uo joñe'me Pablo
1Jayem Pablo jo'ne jayem necoñetaejec jouaĝat da'me je'etetac da'me Jesucristo en 'yonatac da'me en jayem anapaĝaguenoqo't, da'me ami jo'ne ja ami 'te judiopi. 2Ami joote auayachiñe da'me eeta da'me dojo' 'yonatac jo'ne jayem yanem ñe'me Dios, qaedi ami ja'aĝatema joga'me mach'e lelnataĝac. 3Dios male jayem yaloĝona jena'me jenjo' lelnataĝac jo'ne te'me qoyoĝochiñe ca'li, nach'ena jo'ne male jedetapiñe nayi. 4Chane'eja qom auec'achiñe jena'me jenjo' yediijec, male auayachiñe jena'me jenjo' ja'aĝatetac jo'ne Dios lelnataĝac, jo'ne nataq'aen joote ye'et ca'li ñe'me Jesucristo. 5Jena'me jenjo' lelnataĝac joñe'me Dios ca'li dia'me 'uaediñe ja yayate'n, qalaĝaja nayi Dios male yaloĝonalo jogaa'me ja 'nalo'te jo'ne mach'e lamaĝa's nataq'aen gaa'me 'laqataĝanaĝanaqa, jouaĝat da'me 'uo ñe'me Lepaqal jo'ne uetauelo jogaa'me. 6Qama'le jena'me jenjo' 'lonataĝanaĝac ñe'me jo'ne yataqata ja qoyayaten ca'li, mach'e jenjo' jo'ne enaac: chiyaqayi da'me joote ye'et ca'li joñe'me Jesucristo, yema ga'me ja judiopi male yaqanate't ta'le yacoteguet jena'me nec'alaĝa, nataq'aen yacoteguet yema joga'me ca'li qo'yaĝatetac mach'e 'laqataqa ñe'me Qadet'a jo'ne yanouelo dia'me Israel laje', nataq'aen male onolec jena'me lec'oqo'tepi. Onolec da'me jauoqo da'me jaconaĝaguet jena'me jenjo' 'naqataĝanaĝac jo'ne onaĝaic. 7Dios yataqata onaĝaic da'me loec da'me yataqata jayem yichoĝoden, qama'le jayem yachetajop joda'me lañoqotaĝanaĝac, qaedi male jaqanatet ta'le ja'aĝa'tape jogaa'me 'laqataqa.
8Da'me jayem, ena'am ta'le jayem jaqayi, ja jalo'ogueta gaa'me Dios lec'oqo'tepi laqaya', qalaĝaja Dios yataqata jayem nichoĝodichi'ña, qaedi male ja'aĝatema jena'me jenjo' 'laqatac jo'ne yataqata onaĝaic jogaa'me ja judiopi, ja'aĝa'tape yema jogaa'me Jesucristo lichoĝodenataĝanaĝaco jo'ne yataqata alidaq. 9Nataq'aen jayem qo'yelopec qaedi ja'aĝatetac yema joga'me en ta'tegue jena'me jenjo' lelnataĝac ñe'me Dios jo'ne naqaeñe mach'e 'lonatac jena'me aleua. Yema jena'me jenjo' jo'ne ami ja'aĝatapema nayi, yataqata qaya'te yayaten ca'li, qalaĝaja Dios male yaloĝon da'me jo'ne chiyoĝoteguet jaa'me 'uoidi toye's. 10Qama'le nayi male 'uo jena'me jenjo' Dios lec'oqo'tepi jo'ne qoyemata'a't, qama'le chiyaqayi da'me dojo' male qoyayatenaĝanaĝaneque yema gaa'me jaliaĝanaqa jo'ne piyem laje' da'me eeta da'me layatenaĝanaĝac let'adaic joñe'me Dios jo'ne qaya'te nalo'taguet. 11Nach'ena jena'me jenjo' joote jetaque en 'lonataĝanaĝac joñe'me Dios ca'li 'uaechiñe, qama'le nayi da'me novi' joñe'me Qadejaliaĝanec Jesucristo, qama'le en yataqatelegue di'yoq. 12Chane'eja jouaĝat da'me qademe'teguet joñe'me Jesucristo nataq'aen yataqata jep'iyaqa joñe'me, qama'le male jaqanatetaq ta'le ñec'otaĝauo joñe'me Qadet'a mach'e Qanedios, yataqata qaya'te qat'oitaque. 13Chane'eja, ami yaqaya'olqa, male ami ñachoĝodenouelo nayi da'me ena'te lichiguilo naa'me adai'lidi' jouaĝat da'me yachoĝodec, qa'a naa'me naajo' yataqata ami 'nonaĝachiguilo.
Da'me loqopich'i ñe'me Jesucristo
14Chane'eja male nayi yataqata jejoidiñe naa'me yeliquetel da'me ñetamenot joñe'me mach'e Qadet'a, 15jo'ne nach'eñe 'lonataqa yema gaa'me uo'oe, gaa'me jo'ne neda'ña jena'me aleua nataq'aen gaa'me neda'ague di'me piyem. 16Chiyaqayi da'me 'lonaĝac ñe'me Dios jo'ne p'ajaye, male jajela joñe'me qaedi ñe'me Lepaqal jo'ne yataqata ja 'nalegue 'yañaĝateque naa'me adai'lidi' qaedi yataqata ami 'uañaĝayaqa. 17Qama'le ñachoĝodetapecot joñe'me Dios qaedi joñe'me Jesucristo uauelo naa'me adai'lidi', qa'a jouaĝat da'me yataqata auep'iiya'a joñe'me nataq'aen qaedi da'me adoqopich'i nach'eda da'me chiyaqayi yema ga'me auauoyi, 18qaedi da'me ami jo'ne oviyaue jena'me Dios lec'oqo'tepi male yataqata auayachiñe joda'me loqopich'i ñe'me Cristo jo'ne joote qo'mi yanema. Qa'a yataqata jalcochiñe joda'me, nataq'aen jalote nataq'aen qayaje'mec nataq'aen qaya'ñgui, qaya'te loiquiaqa'. 19Laqaya da'me ñachoĝodenoqo't ñe'me Dios, 'noota qom maqachaĝa auayachiñe jena'me jenjo' loqopich'i joñe'me Cristo jo'ne yataqata t'adaic, mate mane'e da'me qo'mi jiyaĝa'u ja jaqanatetaq ta'le yataqata jayatenaq, qaedi male yema da'me ami qoyanema, chayovida'a da'me ami qoyemata'aque da'me lajoĝoc joñe'me Dios.
20Dios yataqata yaqanatet ta'le yauo'oe gaa'me jo'ne napacalo'te jogaa'me jajelaĝanaqaque uotaĝa ta'le ch'e jenataqatapegalo, qa'a jouaĝat joda'me 'lañaĝac jo'ne qo'mi t'onataĝanouelo. 21¡Eja, 'noota qom qo'nonaĝachigui joñe'me! Yema da'me qo'mi jo'ne jouaqaue jena'me Dios lec'oqo'tepi, qo'mi jo'ne qademe'teguet joñe'me Jesucristo, 'noota ta'le yataqata 'ñonaĝataĝaye joñe'me yemeda naa'me noloqo'ote, nach'e eta't ja pal. Jaja'a, nach'e naq'aeta da'me dojo'.
Currently Selected:
Ef 3: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina