Ef 2
2
Dios qo'mi yanema da'me qat'oyaĝac dalaĝaic
1Ca'li da'me ami yataqata ena'am ta'le joote adelevi, qa'a yajouaĝat da'me yataqata ademiya'alo gaa'me adepatenaĝanaĝacodi', nataq'aen yataqata ami loeco lo'olpi. 2Da'me anejiyaĝauayaĝaqui yataqata ja no'en ca'li, oqui'teguelo gaa'me jiyaĝa'u jo'ne ja 'noe'n, nataq'aen oquitapegue' joñe'me payac lepaqal jo'ne nejaliaĝatelo'te yemeda gaa'me payagodipi, nach'eñe jo'ne 'yañaqate't jogaa'me ja p'iida'a joñe'me Dios.
3Nach'e ena'am da'me qo'mi: ca'li yataqata naq'aeta da'me mach'e qanejiyaĝauayaĝac, jauoqo joga'me ch'e qadelnataĝac uotaĝa qadamanaĝanaĝac jo'ne yataqata ja no'en, qama'le yataqata jouaqatoue joga'me lalemataic ñe'me Dios, jenaqa'ama gaa'me jiyaĝa'u laqaya' jo'ne ja 'noe'n. 4Qalaĝaja joñe'me Dios yataqata let'adaic da'me lichoĝodenataĝanaĝac, yataqata onaĝaicaloec, jouaĝat da'me jalcote da'me qo'mi noqopitalo. 5Temaq'aen da'me jenaqa'am da'me joote qadeleu ca'li jouaĝat jogaa'me qadoeco, male nayi Dios joote qo'mi yanema da'me qat'oyaĝac qa'a jouaĝat da'me joqo'taqataguet joñe'me Cristo. Chane'eja male 'uo da'me qadec'alaĝa qa'a jouaĝat da'me loqopich'i ñe'me Dios. 6Ca'li ñe'me Dios nec'alaĝachijeguem joñe'me Jesucristo, qama'le ena'am da'me qo'mi nec'alaĝachidijeguem, chayovida'a da'me ya'uo jodi'me qat'achaqa' jo'ne na'ague di'me piyem, qaedi naqaeñe jonaqa'tajop jo' qomle. 7Ee'tec jena'me jenjo' qaedi naa'me naajo' noloqo'ote jayatenaq da'me eja 'uo da'me loqopich'i nataq'aen leyalaqataĝanaĝac jo'ne chiyaqayi ñe'me Lec'oĝot Jesucristo, nach'eñe jo'ne qo'mi nec'alaĝatedegue. 8Chane'eja ami joote qonec'alaĝatedegue, jouaĝat da'me auacoñiyeguet da'me loqopich'i ñe'me Dios. Qaya'te da'me ami 'uo ga'me eetapega dajelaĝanec da'me nec'alaĝa; ja naq'aeta, yejamaq da'me ch'e qo'mi qoyanema, ñe'me Dios yataqata qo'mi paquetapegalo. 9Da'me nec'alaĝa jo'ne ami uetauelo ja chiyaqayi joga'me a'vichetac; ja naq'aeta, chane'eja ena'te ta'le yataqata ani'yoĝodeñila't. 10Da'me qo'mi mach'e qo'mi 'lonataqa joñe'me Dios, qama'le joqo'taqataguet joñe'me Jesucristo qaedi jauoqo'oe jogaa'me qat'onataqa jo'ne 'noote', nach'egaua jo'ne Dios joote yiyamaĝateta'ajalo qaedi je'etaqa'tape.
Cristo nach'eñe qo'mi yemata'a't
11Joga'me judiopi, jo'ne eetapela't lec'oqo'tepi joñe'me Dios yajouaĝat da'me joote qoye'teque ga'me nichaĝajoĝonaĝac, nach'egaua ami ee'teque da'me ami yoda'alo yajouaĝat da'me qaya'te 'nanec da'me ami. Chane'eja anetoviñetac da'me eeta ca'li, 12da'me ja ami 'te judiopi jo'ne ja auatetoñi ca'li joñe'me Cristo, ja ovitaue jogaa'me lec'oqo'tepi joñe'me, qama'le ja ovitauelo naa'me lamaĝajoĝonaĝaco uotaĝa ga'me leyalaqataĝanaĝac joñe'me Dios, ca'li yanema jogaa'me lec'oqo'tepi. Chane'eja temaq'aen ami uo'oe ca'li, qalaĝaja ja auatetoñi joñe'me Dios nataq'aen yataqata qaya'te adajoĝonataĝanaĝaqui.
13Qalaĝaja nayi te'me eja ca'li yataqata ami qaya'alo, da'me ja auatetoñi joñe'me Dios, male nayi yataqata adavi'teguet joñe'me Dios, chayovida'a da'me adimichiye da'me auep'iiya'a joñe'me Jesucristo, chiyaqayi ca'li yeleu uetalegue jaga'me sodoso. 14Qa'a nach'eñe ñe'me Jesucristo male qo'mi yanema jena'me jenjo' 'nemaĝac. Chiyaqayi ca'li nemela't, uetalegue jaga'me sodoso, Cristo male nomat joga'me naqaleuaĝa qama'le en naqayapega't jogaa'me judiopi nataq'aen jogaa'me ja judiopi, qaedi naa'me naajo' noyaqa male onolec joga'me qoya'uo, qoya'uo da'me 'noota. 15Cristo male yaloĝon da'me 'noota ta'le qoyaĝañi jaga'me judiopi lamaĝajoĝonaĝac lae't, 'noota qom ja qoya'uo yema joga'me uetalegue jaga'me, qama'le ena'am ta'le en tayi da'me naajo' dos noyaqa male yataqata e'n naqaya' jo'ne uetedaue da'me 'nemaĝac. 16Jenjo' chiyaqayi ca'li qoyalat ñe'me Jesucristo uetalegue sodoso, male en yem da'me nauchiyaĝac jo'ne uetauelo naa'me naajo' noyaqa: male yachalegue jada'me sodoso jena'me jenjo' ja no'en, qaedi en onolec jogaa'me noyaqa jo'ne 'niyelaĝadetot ñe'me Dios. 17Cristo naequena ca'li qama'le 'yaĝatetac da'me 'naqataĝanaĝac jo'ne onaĝaic chiyaqayi da'me 'nemaĝac, jo'ne yemata'a'ajalo jogaa'me ja judiopi, jo'ne ca'li ja yateto'n joñe'me Dios, nataq'aen jogaa'me judiopi jo'ne joote yateto'n ca'li joñe'me. 18Jena'me jenjo' ca'li 'lonatac ñe'me Jesucristo, en onolec ladiiuo ga'me judiopi nataq'aen gaa'me ja judiopi, male jauanaĝa ñe'me onolec 'me Dios Lepaqal, jo'ne chiyaqayi da'me male yataqata jovitaĝa ñe'me Qadet'a jo'ne ja 'nalegue.
19Chane'eja ami jo'ne ja ami 'te judiopi male ja ami 'te yaqa'alo, yataqata qaya'te yecolaĝate'ga, male nayi yataqata oviyaue jena'me Dios lec'oqo'tepi, male auaqanachichi da'me aviyaĝañiyeguet joñe'me qa'a male yataqata ami Dios lec'oqo'tepi. 20Da'me ami aueñiya'am ga'me lae ga'me emec let'adaic jo'ne qo'noĝotapejeguem, qama'le quetede'egue jogaa'me ledii's gaa'me paĝaguenataĝanaĝayaqa 'uaediñe jo'ne Jesús lamaĝa's nataq'aen gaa'me Dios 'laqataĝanaĝanaqa, qama'le nach'eñe joñe'me Jesucristo jo'ne ena'am ga'me qa' 'me t'añiyapeguet ga'me emec. 21Naqaeñe jo'ne nelaĝatañe jena'me jenjo' emec qaedi ja 'uaĝañe, dite da'me en nichiquetaye, chayovida'a male yataqata tamenaĝaiqui ja 'nalegue jo'ne mach'e Qadejaliaĝanec 'lemec. 22Da'me ami qoyecoñetegueta joñe'me Jaliaĝanec Jesucristo nataq'aen male ami ovitaue jena'me jenjo' emec jo'ne Dios netaue, mach'e Lepaqal jo'ne ja 'nalegue.
Currently Selected:
Ef 2: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina