Rut 3
3
Rut Hasoru Boaz Iha Kalan
1Iha loron ida, Noemi, Rut nia banin feto, dehan ba Rut, “Hau nia oan, nusaa mak hau la buka fatin deskansa ba o,#3:1 Noemi koalia kona ba oinsaa nia bele buka mane ida hodi kaben fali ho Rut hodi harii nia uma kain. hodi o bele hetan moris diak? 2Laos Boaz mak ita nia parenti ida ka? Nia nebee simu o hodi servisu hamutuk ho ninia feto klosan sira. Rona lai! Kalan nee, nia sei haliri trigu iha fatin hamoos trigu. 3O baa hariis tiha, tau mina morin no hatais ropa diak. Depois o baa fatin hamoos trigu maibee keta husik nia atu haree o too nia haan-hemu hotu ona. 4O haree di-diak nia baa toba iha nebee. Depois o ba iha nebaa loke manta iha nia ain, no hatoba aan ba. Nia sei hatete ba o saida mak o tenki halo.” 5Rut hataan, “Diak. Hau sei halo tuir buat hotu-hotu nebee amaa hatete.”
6Nee duni, Rut baa iha fatin hamoos trigu no nia halo tuir buat hotu-hotu nebee nia banin feto haruka nia halo. 7Bainhira Boaz haan-hemu hotu ona, nia senti kontenti no nia baa toba besik trigu bou nia sorin. Rut baa neineik ba no loke manta iha Boaz nia ain, no hatoba aan. 8Iha kalan fahe rua, Boaz hadeer derepenti, no bainhira nia fila aan, nia hakfodak tanba feto ida toba hela besik nia ain. 9Nia husu, “See mak o?” Rut hataan, “Hau Rut, ita boot nia atan! Taka hau ho ita boot nia manta ninin#3:9 Ka ‘ho ita boot nia liras’. Fraze nee atu husu Boaz bele kaben ho Rut. Haree Ezekiel 16:8. tanba ita boot mak hola-nain ida.” 10Boaz hataan, “Nai foo bensaun ba o, hau nia oan. O hatudu domin metin nebee boot liu fali ida uluk nian, tanba o la baa buka tuir mane foin sae sira nebee riku ka kiak. 11Nee duni, hau nia oan, keta tauk. Hau sei halo ba o buat hotu nebee o husu. Tanba hau nia maluk sira hotu hosi sidade nee hatene katak o feto ida nebee iha forsa.#3:11 Liafuan ‘forsa’ nee hanesan ho liafuan nebee uza ho Boaz. Haree Rut 2:1 no nota. 12Loos duni, hau mak hola-nain ida, maibee sei iha hola-nain ida seluk nebee família besik liu fali hau.#3:12 Direitu ba ema nebee tenki hola fali feto tuir família nia orden, katak see mak família nebee besik liu ba mane ida nebee mate ona. 13Kalan nee o bele toba iha nee. Aban dadeer o sei haree se nia hakarak sai hola-nain. Se nia hakarak, entaun diak, nia bele. Maibee se nia lakohi hola fali o, entaun, hanesan Nai mak moris,#3:13 “katak Nai nebee moris” – ida nee mak fraze ida nebee sira uza hodi promete metin buat ruma. tebes katak hau sei sai hola fali o. Agora, o bele toba iha nee too dadeer.”
14Entaun Rut toba besik iha Boaz nia ain too dadeer. Iha dader-saan nakukun, Rut hadeer ona hodi ema la bele haree nia. Tanba Boaz hatete, “Ema ida la bele hatene katak feto ida nee mai toba iha fatin hamoos trigu nee.” 15Depois nia hatete, “Lori o nia manta mai, no kaer rohan ida.” Rut kaer tiha no Boaz fakar iha manta nee trigu kalen neen no tau iha Rut nia kabaas. Depois Rut fila fali ba sidade.
16Bainhira Rut too ona nia banin feto, nunee Noemi husu, “Oan, buat hotu lao oinsaa?” Entaun Rut konta buat hotu nebee Boaz halo ba nia. 17No Rut konta tan, “Nia rasik mak foo trigu kalen neen nee mai hau. Nia dehan, ‘Keta fila fali ba o nia banin feto ho liman mamuk.” 18Entaun Noemi dehan, “Agora, oan hein deit, hodi haree saida mak sei akontese. Mane nee sei la hakmatek too nia rezolve asuntu ida nee loron ohin kedas.”
Copyright Kadi Timor. All rights reserved. Portions of scripture can be used without permission for the promotion of God's glory.