Rut 2
2
Rut Servisu Iha Boaz Nia Toos
1Noemi iha parenti ida hosi nia laen Elimeleke. Ema nee mak asuwain ho forsa.#2:1 Asuwain ho forsa mak ema nebee forti no iha podér, haree mos Josue 1:14, 1 Samuel 1:9, 1 Krónikas 7:11, 2 Krónikas 25:6. Forsa nee mak kaiyil, haree mos Rut 3:11, 4:11, 1 Samuel 16:18, Juis 6:12, 1 Liurai 1:42. Nia naran Boaz. 2Iha loron ida, Rut, hosi Moab, dehan ba ninia banin feto Noemi, “Amaa, hau husu lisensa. Hau sei baa toos hodi hili trigu restu nebee ema nebee kuu husik monu hela iha rai. Hau sei baa iha toos hosi toos nain nebee simu hau ho grasa.” Noemi hataan, “Diak, oan, o bele baa!” 3Entaun Rut baa tiha toos no lao tuir servisu nain sira nia kotuk hodi hili trigu restu nebee monu iha rai. Afinál nia baa iha toos Boaz nian, nebee família ho Elimeleke. 4Iha oras nebaa kedas, Boaz mai hosi Belém, no kumprimenta ema sira nebee koa trigu, hodi dehan, “Nai hamutuk ho imi!” Sira hataan, “Maromak foo bensaun ba ita!” 5Depois Boaz husu ba nia mandór nebee tau matan ba ema sira nebee servisu koa trigu, “See mak feto ida nebaa?” 6Mandór nebee tau matan ba ema sira nee hataan, “Nia feto Moab ida, nebee foin mai ho Noemi hosi rai Moab. 7Nia husu lisensa mai hau hodi baa tuir sira nebee koa trigu hodi hili trigu nebee monu iha rai. Nia servisu hosi dadeer-saan too agora, no foin para uitoan deit hodi deskansa iha uma baraka.”
8Entaun Boaz dehan ba Rut, “Hau nia oan, rona mai. Keta ba hili trigu iha toos seluk no keta hadook hosi nee. Hela hamutuk ho hau nia atan feto klosan sira. 9Haree di-diak ba fatin nebee mane sira koa trigu nee no tuir hamutuk ho feto klosan sira. Bainhira o hamrook, o baa foti deit bee nebee joven mane sira kuru tiha ona. Hau foo ona orden ba sira hodi la bele book o.” 10Rona tiha nunee, Rut taka rabat oin kona iha rai no hatete, “Nusaa mak senhor hatudu grasa mai hau nunee, no tau matan mai hau, nebee ema hosi rai liur?” 11Boaz hataan, “Hau rona ona kona ba buat hotu-hotu nebee o halo ona ba o nia banin feto dezde o nia laen mate, no oinsaa mak o husik tiha o nia inan-aman no o nia rai hodi mai hela iha nee hamutuk ho ema sira nebee o seidauk konhese. 12Nai mak selu o nia kolen hosi buat nebee o halo ona! Nai, Israel nia Maromak, selu fali o nia kolen too resin, Maromak ida nebee o mai hamahon aan ona iha Ninia liras okos.” 13Rut hatete ba Boaz, “Hau hetan grasa ona iha ita boot nia oin, senhor, tanba ita boot foo kamaan mai hau no koalia mamar mai ita boot nia atan hau, maski hau laos ita boot nia atan feto ida.”
14Bainhira too ona oras atu haan, Boaz dehan ba Rut, “Mai iha nee no haan. Foti paun ida no habokon iha tua siin.” Entaun Rut tuur no haan hamutuk ho ema servisu sira nee. Boaz mos foo trigu musan tunu ba nia, no Rut haan too bosu, no sei resin hela. 15Bainhira Rut hamriik no baa fali hili trigu, Boaz foo orden ba ninia servisu nain sira, “Husik nia bele hili trigu besik trigu futun sira no keta hirus nia. 16No mos fokit sai trigu balu hosi futun nebee kesi tiha ona no husik monu ba rai hodi nia bele hili. Keta hirus nia.”
17Nunee Rut hili trigu iha toos too lokraik. Depois nia baku trigu nebee nia hili nee,#2:17 Nia baku trigu hodi haketak trigu musan hosi kain. too trigu musan hamutuk besik kilu rua-nulu. 18Nia tula trigu nee no nia fila ba aldeia no nia banin feto haree trigu hira mak nia hetan. Nia mos foo ba nia banin feto hahaan resin nebee nia haan la hotu. 19Entaun nia banin feto husu, “Ohin, o hili trigu iha nebee? Oinsaa o halo buat nee? Bensaun haraik ba ema nebee hanoin ba o.” Nunee Rut konta ba nia banin feto iha see nia toos mak nia servisu no nia dehan, “Ohin hau servisu ho mane ida naran Boaz.” 20Noemi dehan ba nia feto foun, “Nai foo bensaun ba nia, tanba nia hatudu domin metin ba ema nebee moris no ema nebee mate ona!” Noemi mos dehan, “Mane ida nee mak ita nia família besik ida. Nia mak ita nia hola-nain ida.”#2:20 ‘hola-nain’: liafuan hosi kultura Ebreu ba mane nebee família besik ba mane nebee mate ona, no iha direitu atu hola fali no tau matan ba feto faluk hodi salva feto nee hosi terus boot. Haree kapitulu 3 nia rohan. 21Rut, ema Moab nee, hatete tan, “Nia mos dehan mai hau, ‘O nafatin iha nee hamutuk ho hau nia servisu nain sira too kolheta trigu hotu.’” 22Noemi hataan ba Rut, nia feto foun, “Hau nia oan, diak liu o servisu hamutuk ho ninia feto klosan sira. Iha toos seluk ema bele book o. 23Nunee Rut hela besik Boaz nia atan feto klosan sira. Nia hili trigu iha nebaa too kolheta trigu no trigu boot hotu, no nia hela nafatin ho nia banin feto.#2:23 Povu nee kuda trigu boot no trigu baibain. Bainhira sira koa trigu, dala ruma trigu balu monu ba rai iha toos. No mos, tuir sira nia lei, sira la bele koa too toos ninin. Depois ema kiak bele tuir mai hodi hili restu. Haree Levítiku 19:9-10.
Currently Selected:
Rut 2: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.