Númeru 3
3
Arão Nia Oan Mane Sira
1Ema sira nee mak Arão no Moisés nia jerasaun sira iha tempu nebee Nai koalia ho Moisés iha Foho Sinai. 2Arão nia oan mane sira nia naran mak nee: Nadab, nebee oan mane primeiru, no Abiú, Eleazar no Itamar. 3Nee mak Arão nia oan mane sira nia naran, nebee saserdote sira nebee simu unsaun, nebee Moisés konsagra hodi serví nudar saserdote. 4Maibee Nadab no Abiú mate ona iha Nai nia oin bainhira sira oferese ahi nebee la loos iha Nai nia oin,#3:4 Nadab no Abiú mate, haree Levitiku 10:1-2. iha rai fuik Sinai, no sira la iha oan. Eleazar no Itamar serví nudar saserdote iha sira nia aman Arão nia oin.
Ema Levi Sira Nia Servisu
5 Nai koalia ba Moisés, no dehan, 6“Lori suku Levi besik mai, no haruka sira hamriik iha saserdote Arão nia oin hodi sira bele serví nia. 7Sira tenki tau matan ba nia no tau matan ba komunidade tomak iha Tenda Enkontru nia oin, no halao ministériu iha Tabernakulu nee. 8No sira sei tau matan ba sasaan hotu iha Tenda Enkontru, no tau matan ba ema Israel sira, hodi halao ministériu iha Tabernakulu nee. 9O sei foo ema Levi sira ba Arão no ba ninia oan mane sira. Foo suku Levi tomak hosi ema Israel sira ba Arão. 10No o sei foo knaar ba Arão no nia oan mane sira no sira sei halo tuir sira nia servisu saserdote nian. Ema estranjeiru nebee hakbesik sira sei mate.”
11 Nai koalia ba Moisés, no dehan, 12“Tebes, Hau foti ona ema Levi sira hosi ema Israel sira hodi troka oan primeiru hotu nebee loke oan fatin iha ema Israel sira nia leet, nunee ema Levi sira mak Hau nian. 13Oan primeiru hotu mak Hau nian, tanba iha loron nebee Hau oho oan primeiru hotu iha rai Ejitu,#3:13 Oan primeiru mate iha Ejitu iha tempu ema Israel sai hosi kastigu. Exodu 12:29. Hau halo santu#3:13 ‘halo santu’ katak konsagra ka haketak sira nudar buat santu nebee NAI nian. mai Hau oan primeiru hotu iha Israel, inklui ema no animál. Sira mak Hau nian. Hau mak Nai.”
14 Nai koalia ba Moisés iha rai fuik Sinai, no dehan, 15“Rejistu ema Levi sira tuir sira nia aman sira nia família sira, no tuir sira nia uma kain sira. Tenki rejistu mane hotu ho idade hosi fulan ida ba leten.” 16Moisés rejistu sira tuir Nai nia orden nebee nia simu. 17Ema sira nee mak Levi nia oan sira tuir sira nia naran: Gerson, Koat no Merari. 18Nee mak sira nia naran: Gerson nia oan mane sira tuir sira nia família mak Libni no Simei. 19Koat nia oan mane sira tuir sira nia família mak Amram, Izar, Hebron no Uziel. 20Merari nia oan sira tuir sira nia família mak Mali no Musi. Ema Levi sira nia família sira mak nee tuir sira nia uma kain sira.
21Gerson iha família Libni no família Simei; nee mak Gerson nia família sira. 22Ema sira nebee rejistu hosi Gerson, tuir mane hotu nebee fulan ida ba leten nebee rejistu mak ema nain rihun hitu atus lima (7.500). 23Gerson nia família sira sei halo akampamentu iha Tabernakulu nia kotuk, iha sorin loromonu. 24Eliasaf, oan hosi Lael, mak xefi ba Gerson nia uma kain. 25Gerson nia oan mane sira iha knaar iha Tenda Enkontru hodi tau matan ba Tabernakulu, nebee Tenda nee, no lona nebee taka nia, no hena nebee tara iha odamatan ba Tenda Enkontru, 26no kortina sira ba Tenda nia fatin, no hena nebee tara iha odamatan ba Tenda nia fatin, nebee iha Tabernakulu, no haleu altár, no sira nia tali, no servisu hotu kona ba buat sira nee.
27Koat iha família Amram, família Izar, família Hebron no família Uziel; nee mak Koat nia família sira. 28Mane hotu nebee rejistu, hosi fulan ida ba leten, mak ema nain rihun ualu atus neen (8.600) nebee tau matan ba Fatin Santu. 29Koat nia oan mane sira nia família sira sei halo akampamentu iha Tabernakulu nia sorin ba parte súl. 30Elizafan, oan hosi Uziel, mak xefi ba Koat nia uma kain. 31No sira sei tau matan ba Arka, meza, kandelabru, altár sira, no sasaan iha Fatin Santu nebee sira uza iha sira nia ministériu, no hena nebee tara, no servisu hotu kona ba buat sira nee. 32Eleazar, oan hosi Arão, mak xefi ba ema Levi sira nia xefi sira, no nia toma konta ba sira nebee tau matan ba Fatin Santu.
33Merari iha família Mali no família Musi; nee mak Merari nia família sira. 34Mane hotu nebee sura nee, nebee rejistu, hosi fulan ida ba leten, mak ema nain rihun neen atus rua (6.200). 35Zuriel, oan mane hosi Abihail, mak xefi ba Merari nia uma kain. No sira sei halo akampamentu iha Tabernakulu nia sorin ba parte norte. 36Merari nia oan mane sira iha knaar hodi tau matan ba Tabernakulu nia ai kabelak, ai naruk, ai riin no ain ba ai riin sira, no sira nia sasaan, no servisu hotu kona ba buat sira nee. 37No ai riin sira nebee haleu Fatin Santu, no sira nia ain, estaka no tali sira.
38Ema sira nebee halo akampamentu iha Tabernakulu nia oin iha sorin lorosae, nebee iha Tenda Enkontru nia sorin lorosae nee, mak Moisés, Arão no ninia oan mane sira nebee tau matan ba Fatin Santu hodi tau matan ba ema Israel sira. No ema estranjeiru nebee mai besik sei mate. 39Ema Levi hotu nebee rejistu, nebee Moisés no Arão rejistu tuir Nai nia orden, inklui sira nia família sira, nebee oan mane hotu hosi fulan ida ba leten, mak ema nain rihun rua-nulu resin rua (22.000).
Hola Fali Oan Primeiru Sira
40 Nai dehan ba Moisés, “Rejistu oan mane primeiru hotu hosi ema Israel sira, hosi fulan ida ba leten, no sura sira nia naran sira. 41No o sei foti ema Levi sira mai Hau - Hau mak Nai - hodi troka oan primeiru hotu hosi ema Israel sira nia leet; no ema Levi sira nia karau sira hodi troka karau nia oan primeiru hotu hosi ema Israel sira. 42Entaun Moisés rejistu sira tuir Nai nia orden, nebee oan primeiru hotu iha ema Israel sira nia leet. 43No oan primeiru hotu tuir sira nia naran nebee sira sura, hosi fulan ida ba leten, mak ema nain rihun rua-nulu resin rua atus rua hitu-nulu resin tolu (22.273).
44 Nai koalia ba Moisés, no dehan, 45Foti ema Levi sira hodi troka oan primeiru hotu iha ema Israel sira nia leet, no ema Levi sira nia karau sira hodi troka ema Israel sira nia karau sira; no ema Levi sira sei sai Hau nian. Hau mak Nai. 46No ba sira nebee tenki hola fali hosi ema nain atus rua hitu-nulu resin tolu (273) hosi ema Israel sira, nebee barak liu ema Levi sira, 47o sei foti osan mutin lima kada ema ida nebee o sura, tuir Fatin Santu nia osan mutin (osan mutin nebee todan grama kiik rua-nulu.)#3:47 Ebreu ‘sekel lima nebee gera rua-nulu’. Sekel ida todan grama sanulu resin ida. 48O tenki foo osan nee, nebee hola fali ema restu nee, ba Arão no ninia oan mane sira.” 49Nunee Moisés foti osan nebee ema selu hodi hola fali ema restu nebee sei hela hosi sira nebee hola fali liu hosi ema Levi sira. 50Nia foti osan nee hosi ema Israel sira nia oan primeiru, nebee osan mutin rihun ida atus tolu neen-nulu resin lima (1.365), nebee tuir osan mutin Fatin Santu nian. 51Moisés foo osan hola fali nian nee ba Arão no Arão nia oan mane sira, tuir Nai nia liafuan nebee Nia foo ba Moisés.
Currently Selected:
Númeru 3: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.