Númeru 4
4
Ema Koat Sira Nia Servisu
1 Nai koalia ba Moisés no Arão, no dehan, 2“Halo sensus ba Koat nia oan mane sira nebee iha Levi nia oan sira nia leet, tuir sira nia família sira no sira nia aman sira nia uma kain sira. 3Hosi idade tinan tolu-nulu ba leten too iha tinan lima-nulu. Ema hotu iha forsa nee hodi servisu iha Tenda Enkontru. 4Ida nee mak Koat nia oan mane sira nia servisu kona ba Tenda Enkontru, nebee sasaan santu liu: 5Bainhira akampamentu atu lao sai, Arão sei mai ho ninia oan mane sira, no sira sei hatuun veo iha laran no taka Arka Aliansa ho veo nee; 6depois sira taka veo ho animál nia kulit sira, no taka kulit nee ho hena nebee nia kór hotu mak azúl, depois tau ai lolon iha sira nia kaer fatin. 7Sira tenki taka meza ba paun Prezensa nian ho hena kór azúl no tau iha leten bikan, kanedok, manko no botir sira nebee uza ba oferta hemu nian; no paun nebee tau nafatin sei iha meza leten nee. 8Depois sira tenki taka buat sira nee ho hena kór mean, no taka hena nee ho animál nia kulit sira, depois tau ai lolon iha sira nia kaer fatin. 9Depois sira tenki foti hena kór azúl no taka kandelabru nebee foo naroman, no ninia lampu, pinsa, bikan ahi sira no sasaan hodi lori mina nebee sira uza iha ministériu nee. 10Sira tenki tau kandelabru nee ho ninia sasaan hotu iha animál nia kulit sira nia laran no tau iha ai lolon hodi lori. 11No ba altár osan mean tenki tau hena kór azúl, taka ho animál nia kulit sira no tau ai lolon iha sira nia kaer fatin. 12Depois sira foti sasaan ministériu hotu nebee uza hodi halao ministériu iha Fatin Santu, no tau buat sira nee iha hena kór azúl, no taka ho animál nia kulit sira no tau iha ai lolon hodi lori. 13No sira tenki hasai ahi kdesan hosi altár no taka altár ho hena kór uvas. 14Depois sira tenki tau sasaan hotu nebee uza kona ba altár nia ministériu iha altár leten, nebee bikan ahi, garfu, kanuru no manko sira no altár nia sasaan hotu. No sira tenki taka buat nee ho animál nia kulit sira no tau ai lolon iha sira nia kaer fatin. 15Bainhira Arão no ninia oan mane sira taka tiha Fatin Santu, no sasaan hotu hosi Fatin Santu, no bainhira akampamentu nee atu lao sai, depois Koat nia oan mane sira sei mai hodi lori buat sira nee. Maibee sira la bele book buat ida nebee santu hodi sira la mate. Buat sira nee mak sasaan hosi Tenda Enkontru nebee Koat nia oan mane sira tenki lori.
16Eleazar, oan mane hosi saserdote Arão, iha knaar hodi tau matan ba lampu nia mina, mina morin, oferta trigu nian, mina unsaun, no tau matan ba Tabernakulu tomak no sasaan hotu iha laran, no Fatin Santu no ninia sasaan.”
17 Nai koalia ba Moisés no Arão, no dehan, 18“Keta halakon suku nebee Koat nia família sira hosi ema Levi sira nia leet. 19Maibee halo tuir ida nee hodi sira bele moris no la mate bainhira sira hakbesik ba buat sira nebee santu liu: Arão no ninia oan mane sira tenki tama no foo knaar ba ema Koat ida-idak buat nebee nia tenki halo no lori. 20Maibee sira la bele tama no haree kois sasaan santu nee hodi sira la mate.”
21 Nai koalia ba Moisés, no dehan, 22“Sura Gerson nia oan mane sira, hosi sira nia aman sira nia uma kain hotu, no tuir sira nia família sira. 23Sura ema nebee tinan tolu-nulu too tinan lima-nulu, ema hotu nebee tama hodi halao ministériu, hodi halo servisu iha Tenda Enkontru. 24Buat nee mak ema Gerson sira nia família sira nia ministériu hodi serví no lori: 25Sira tenki lori Tabernakulu nia kortina sira, no Tenda Enkontru, hena nebee taka nia no animál nia kulit sira nebee taka buat nee, no hena odamatan nebee tara iha Tenda Enkontru, 26no kortina sira nebee haleu fatin nee, no hena odamatan nebee tara hodi tama ba fatin nee, nebee haleu Tabernakulu no altár, ho sira nia tali sira no sasaan hotu ba ministériu nee. Sira tenki halo buat hotu iha buat sira nee nia servisu. 27Arão no nia oan mane sira sei diriji Gerson sira nia oan mane sira nia servisu hotu no buat hotu nebee sira tenki lori. O tenki foo knaar ba sira hodi lori sira nia sasaan hotu. 28Buat nee mak servisu ba Gerson nia oan mane sira nia família sira iha Tenda Enkontru; no Itamar, oan hosi saserdote Arão sei tau matan ba sira nia knaar nee.
29Kona ba Merari nia oan mane sira, o tenki sura sira tuir sira nia família sira no tuir sira nia aman sira nia uma kain sira. 30O tenki sura ema hosi tinan tolu-nulu too tinan lima-nulu, ema hotu nebee tama hodi halo ministériu, hodi halo servisu iha Tenda Enkontru. 31Sira nia knaar nebee tenki lori, nebee sira nia servisu hotu iha Tenda Enkontru: Tabernakulu nia ai kabelak, ai naruk, ai riin no ain ba ai riin sira, 32no ai riin sira ba kortina nebee haleu fatin nee, no ain ba ai riin, estaka no tali sira, sasaan hotu hodi halo servisu hotu nee. No o tenki halo lista kona ba buat hotu nebee sira tenki lori. 33Buat nee mak servisu ba Merari nia oan mane sira nia família sira, sira nia servisu hotu kona ba Tenda Enkontru; no Itamar, oan hosi saserdote Arão sei tau matan ba sira nia knaar nee.”
34Entaun Moisés no Arão no xefi sira iha komunidade nee sura ema Koat nia oan mane sira tuir sira nia família no sira nia aman nia uma kain sira, 35hosi tinan tolu-nulu too tinan lima-nulu, ema hotu nebee tama ministériu hodi servisu iha Tenda Enkontru. 36No sira nebee sura nee, tuir sira nia família sira, mak ema nain rihun rua atus hitu lima-nulu (2.750). 37Sira sura ema sira nee hosi Koat nia família sira, ema hotu nebee halo servisu iha Tenda Enkontru, nebee Moisés no Arão sura tuir Nai nia orden nebee Nia foo ba Moisés.
38Ema nebee sura tiha nee hosi Gerson nia oan mane sira, tuir sira nia família sira no sira nia aman nia uma kain sira, 39hosi tinan tolu-nulu too tinan lima-nulu, ema hotu nebee tama ministériu hodi servisu iha Tenda Enkontru, 40no sira nebee sura tiha nee, tuir sira nia família sira, no sira nia aman nia uma kain sira, mak ema nain rihun rua atus neen tolu-nulu (2.630). 41Sira sura ema sira nee hosi Gerson nia oan mane nia família sira, ema hotu nebee halo servisu iha Tenda Enkontru, nebee Moisés no Arão sura tuir Nai nia orden.
42Ema nebee sura tiha nee hosi família sira hosi Merari nia oan mane sira, tuir sira nia família sira no sira nia aman nia uma kain sira, 43hosi tinan tolu-nulu too tinan lima-nulu, ema hotu nebee tama ministériu hodi servisu iha Tenda Enkontru, 44no sira nebee sura tiha nee, tuir sira nia família sira, mak ema nain rihun tolu atus rua (3.200). 45Sira sura ema sira nee hosi Merari nia oan mane nia família sira, nebee Moisés no Arão sura tuir Nai nia liafuan nebee mai liu hosi Moisés.
46Ema hotu nebee sura tiha nee hosi ema Levi sira, nebee Moisés no Arão no xefi Israel sura tiha, tuir sira nia família sira, no tuir sira nia aman sira nia uma kain sira, 47hosi tinan tolu-nulu too tinan lima-nulu, ema hotu nebee mai hodi servisu ministériu nian no servisu hodi lori sasaan hosi Tenda Enkontru, 48ema nebee sura nunee mak ema nain rihun ualu atus lima ualu-nulu (8.580). 49Moisés sura ema sira nee tuir Nai nia orden, ema ida-idak tuir ninia servisu, no tuir buat nebee nia lori. Nunee nia sura sira, tuir orden nebee Nai foo ba Moisés.
Copyright Kadi Timor. All rights reserved. Portions of scripture can be used without permission for the promotion of God's glory.