Mateus 6
6
Foo Ba Ema Kiak
1Kuidadu katak bainhira imi halo hahalok loos, imi la halo iha ema seluk nia oin hodi sira bele haree. Tanba hanesan nee, imi sei la hetan kolen hosi imi nia Aman iha lalehan.
2Nunee bainhira o atu foo ba ema kiak, keta huu trombeta iha o nia oin, hanesan ema laran makerek halo iha sinagoga sira no iha estrada sira, hodi ema bele gaba sira. Tebes Hau dehan ba o katak sira simu ona sira nia kolen. 3Maibee bainhira o foo ba ema kiak, keta husik o nia liman karuk hatene buat nebee o nia liman loos mak halo. 4Nunee o bele foo sub-subar ba ema kiak. No o nia Aman nebee haree buat subar nee, Nia sei selu o nia kolen.
Nai Nia Orasaun
5No bainhira imi halo orasaun, la bele halo tuir ema laran makerek sira. Tanba sira gosta halo orasaun bainhira sira hamriik iha sinagoga no iha dalan nia kruzamentu sira, hodi ema bele haree sira. Tebes, Hau dehan ba imi, sira hetan ona sira nia kolen. 6Maibee kona ba o, bainhira o halo orasaun, tama iha o nia kuartu laran, no taka odamatan. Halo orasaun ba o nia Aman nebee iha fatin subar. No o nia Aman nebee haree iha fatin subar nee, Nia sei selu o nia kolen.
7Maibee bainhira o halo orasaun, keta repete beibeik liafuan mamuk, hanesan ema Jentiu sira mak halo. Tanba sira hanoin katak Maromak sei rona sira tanba sira nia liafuan bar-barak. 8La bele sai hanesan sira, tanba o nia Aman hatene ona buat nebee imi presiza molok imi husu ba Nia. 9#6:9-13 Haree Lucas 11:2-4.Nunee, halo orasaun hanesan nee:
Ami nia Aman iha lalehan,
Ita nia naran santu.
10Ita nia ukun mai.
Halao Ita nia hakarak,
iha mundu hanesan iha lalehan.
11Foo mai ami ai haan#6:11 Gregu dehan ‘paun’. loro-loron nian.
12Perdua mai ami nia sala,
hanesan mos ami perdua ona ba ema nebee halo sala hasoru ami.
13No keta lori ami ba tentasaun,
maibee hasai ami hosi buat aat.#6:13 Ka ‘hosi aat nain.’ Manuskritu balu aumenta, ‘Tanba Ita mak Nain ba ukun, kbiit no glória, too tinan ba tinan. Amén.’
14Tanba se imi foo perdaun ba ema sira nebee halo sala, imi nia Aman iha lalehan mos sei foo perdaun ba imi. 15Maibee se imi la foo perdaun ba ema sira nebee halo sala, imi nia Aman mos sei la foo perdaun ba imi nia sala.
Kona Ba Jejún
16No bainhira imi jejún, keta oin tristi hanesan ema laran makerek sira. Tanba sira hatudu oin tristi hodi ema bele hatene katak sira halo jejún. Tebes Hau dehan ba imi, sira hetan ona sira nia kolen. 17Maibee ba o, bainhira o jejún, tau mina ba o nia ulun, no fase o nia oin. 18Hodi nunee ema la hatene katak o jejún hela, maibee o nia Aman nebee iha fatin subar mak haree. No o nia Aman, nebee haree buat subar nee, Nia sei selu o nia kolen.
Riku-soin Iha Lalehan
19Keta haloot riku-soin ba o nia aan rasik iha mundu nee. Tanba ular#6:19 Ida nee mak ular hosi borboleta kalan nian, iha mos versíkulu 20. no ferujen halo riku-soin nee sai aat, no naok-teen sira bele tama no naok. 20Maibee haloot riku-soin ba o nia aan rasik iha lalehan. Tanba iha lalehan ular no ferujen la halo aat, no naok-teen sira la bele tama no naok. 21Tanba iha fatin nebee o rai o nia riku-soin, o nia fuan laran mos iha nebaa.
22 # 6:22-23 Haree Lucas 11:34-36. Matan mak ahi oan ba isin lolon. Nunee se o nia matan moos, o nia isin tomak sei nakonu ho naroman. 23Maibee se o nia matan aat, o nia isin lolon tomak sei nakonu ho nakukun. Nee duni, se karik naroman iha o nia laran sai nakukun, entaun nakukun nee mak boot tebes!
24La iha ema ida nebee bele serví ba patraun nain rua. Tanba nia sei odi ida no hadomi ida seluk; ka nia sei foo laran ba ida, no hakribi ida seluk. Imi la bele serví ba Maromak no Riku-soin.
Keta Hanoin Resin
25Nunee Hau dehan ba imi: keta hanoin resin kona ba imi nia moris, atu haan saida ka atu hemu saida; no kona ba imi nia isin lolon, atu hatais saida. Laos imi nia moris iha folin liu fali ai haan, no imi nia isin lolon iha folin liu fali ropa? 26Haree took ba manu sira iha loro leten. Sira la kuda, no sira la silu ka haloot iha armazén. Maibee imi nia Aman iha lalehan foo haan ba sira. Laos imi folin boot liu fali sira? 27See mak bele aumenta oras ida ba ninia moris#6:27 Ka ‘aumenta ninia isin lolon hodi sai aas sentimu haat-nulu resin tan’ tanba nia hanoin resin? 28No tanba saa mak imi hanoin resin kona ba imi nia ropa? Haree ba ai funan iha rai luan, oinsaa sira moris: sira la servisu no sira la soru tais.#6:28 Liafuan iha Gregu koalia kona ba dulas kabas rahun hodi halo kabas. 29Maibee Hau dehan ba imi katak Salomão iha ninia glória hotu#6:29 Bele lee kona ba Salomão nia glória iha 1 Liurai 10. la bele hatais furak hanesan ai funan sira nee ida. 30Entaun, se Maromak foo hatais ba duut iha rai luan hanesan nee, nebee loron ohin sira iha, depois loron aban ema soe sira ba ahi, laos katak Nia sei foo hatais liu tan ba imi, Oh imi nebee fiar kiik? 31Nee duni, keta hanoin resin no dehan, ‘Ita sei haan saida?’ ka, ‘Ita sei hemu saida?’ ka, ‘Ita sei hatais saida?’ 32Tanba ema Jentiu sira buka buat hotu nee. Maibee imi nia Aman iha lalehan hatene ona katak imi presiza buat sira nee hotu. 33Maibee buka uluk Maromak nia reinu, no Ninia moris loos; no Nia sei foo tan buat hotu nee ba imi.
34Nunee, keta hanoin resin kona ba loron aban, tanba loron aban sei hanoin resin kona ba ninia aan rasik. Loron ohin nia terus too ona ba loron ohin nee.
Currently Selected:
Mateus 6: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.