Mateus 5
5
Haklaken Iha Foho
1Bainhira Jesus haree ema lubun boot nee, Nia sae ba foho ida. Depois Nia tuur no Ninia eskolante sira hakbesik ba Nia.
Moris Haksolok
2Jesus hahuu koalia no hanorin sira, hodi dehan,
3“Haksolok ba sira nebee kiak iha espíritu, tanba reinu lalehan mak sira nian.
4Haksolok ba sira nebee laran tristi, tanba sira sei hetan kamaan.
5Haksolok ba sira nebee laran maus, tanba sira sei simu rai nudar liman rohan.
6Haksolok ba sira nebee hamlaha no hamrook atu hetan moris loos, tanba sira sei sai bosu.
7Haksolok ba sira nebee hatudu laran luak, tanba sira sei hetan laran luak.
8Haksolok ba sira nebee laran moos, tanba sira sei haree Maromak.
9Haksolok ba sira nebee lori dame, tanba sira sei sai Maromak nia oan.#5:9 Lian Gregu dehan ‘hetan naran nudar Maromak nia oan.’
10Haksolok ba sira nebee hetan terus kona ba hahalok loos, tanba reinu lalehan mak sira nian.
11Haksolok ba imi bainhira ema koalia aat imi, foo terus ba imi no sira dehan buat aat oi-oin nebee bosok hasoru imi tanba Hau. 12Haksolok no sai kontenti ba!#5:12 Iha lian Gregu, liafuan ‘kontenti’ nee mak ‘haksoit barak’ (tanba sira kontenti liu). Tanba imi nia kolen sei boot tebes iha lalehan. Tanba sira foo terus hanesan nee ba profeta sira nebee uluk imi.
Masin No Naroman
13Imi mak masin#5:13 Haree masin iha Kolose 4:6 no nota. ba mundu nee. Maibee se masin lakon ninia meer, oinsaa masin nee bele sai meer fali? Nunee nia la iha folin, no ema sei soe nia ba liur no ema sei sama deit nia iha ain okos.
14Imi mak naroman ba mundu nee. Ita la bele subar sidade ida nebee iha foho leten. 15#5:15 Haree Lucas 11:33.Ema la sunu ahi oan hodi taka iha baldi okos. Maibee nia tau iha ahi oan nia fatin, no ahi oan nee bele foo naroman ba ema hotu iha uma laran.
16Nunee husik imi nia naroman nabilan iha ema nia oin, atu sira bele haree imi nia hahalok diak, no foo glória ba imi nia Aman nebee iha lalehan.
Jesus Mai Hodi Kumpri Lei
17Keta hanoin katak Hau mai atu halakon Lei ka Profeta sira.#5:17 Lei mak Jénesis too Deuteronómiu. Profeta sira mak livru seluk iha Testamentu Tuan, liu-liu Isaias too Malakias. Hau mai laos atu halakon, maibee atu kumpri. 18Tebes, Hau hatete ba imi, too lalehan no rai lakon, pontu ida ka asentu ida sei la lakon hosi Lei, too buat hotu nee kumpri ona. 19Nee duni, see deit nebee la halo tuir ukun fuan ida nebee kiik liu nee, no hanorin ema seluk atu la halo tuir, nia sei hetan naran kiik liu iha reinu lalehan. Maibee see deit nebee halo tuir ukun fuan no hanorin ema seluk atu halo tuir, ema nee sei hetan naran boot iha reinu lalehan. 20Tanba Hau dehan ba imi, se imi nia hahalok loos nee la loos liu fali ema eskriba no ema Farizeu nian, nunee imi la bele tama ba reinu lalehan.
La bele Hirus Malu
21Imi rona ona katak ema dehan ba sira iha tempu antigu, ‘O keta oho,#5:21 Bele lee iha Exodu 20:13. no ema nebee oho sei hataan iha tribunál.’ 22Maibee Hau dehan ba imi, see deit nebee hirus ho ninia maun-alin,#5:22 Manuskritu balu aumenta ‘ho razaun la iha’. nia sei hataan iha tribunál. No see deit nebee dehan ba ninia maun-alin, ‘O la iha folin!’,#5:22 Lian Gregu dehan ‘Raka!’, nebee liafuan aat ho sentidu ‘folin la iha’. nia sei hataan iha tribunál aas liu.#5:22 Tribunál boot nee mak ema Judeu nia Sinédriu. No see deit nebee dehan ba ninia maun-alin, ‘O ema beik!’ nia sei hataan iha ahi infernu#5:22 Gregu gehena, nebee liafuan refere ba Foho Leet Hinom ho sentidu katak kastigu ahi nian. nian! 23Nee duni, se o lori dadaun o nia oferta ba altár, no iha nebaa o hanoin hetan katak o nia maluk iha buat ruma nebee hasoru o, 24husik lai o nia oferta iha altár nia oin, no baa halo dame uluk ho o nia maluk, depois mai no oferese o nia oferta. 25Halo dame lalais ho nia nebee akuza o, bainhira o sei lao ho nia ba tribunál. Keta halo be akuzadór nee entrega o ba juis, no juis entrega o ba guarda, no sira soe o ba komarka laran. 26Tebes, Hau dehan ba o katak o sei la sai hosi fatin nee too o selu osan hotu too sentavu#5:26 Gregu kodrantes, osan riti kiik hosi governu Roma nian. ikus.
Sala Ho Matan Moris
27Imi rona ona katak ema dehan, ‘O keta halo sala seksuál.’#5:27 Ida nee koalia kona ba sala seksuál entre ema ida nebee kaben ona no ema seluk nebee seidauk kaben. Bele lee iha Exodu 20:14. 28Maibee Hau dehan ba imi, see deit nebee fihir feto ida too kaan nia mak halo ona sala seksuál ho feto nee iha ninia fuan laran. 29Se o nia matan sorin loos halo o monu ba sala, losu tiha nia no soe ba. Tanba diak liu o lakon buat ida hosi o nia isin duké o nia isin tomak tama ba infernu. 30No se o nia liman sorin loos mak halo o monu ba sala, tesi sai nia, no soe nia ba; tanba diak liu o lakon buat ida hosi o nia isin duké o nia isin tomak tama ba infernu.
La bele Soe Malu
31Ema dehan ona, ‘See deit mak atu soe ninia feen, nia tenki foo surat soe-malu nian ba feto nee.’#5:31 Bele lee iha Deuteronómiu 24:1. 32Maibee Hau dehan ba imi katak ema nebee soe ninia feen, laos tanba sala seksuál, mak halo feen nee monu ba sala seksuál. No ema nebee kaben ho feto nee mos halo sala seksuál.
Koalia Loos
33No mos, imi rona ona katak ema dehan ba sira iha tempu antigu, ‘O keta jura falsu, maibee o tenki kumpri buat nebee o jura ba Nai.’#5:33 Bele lee iha Númeru 30:2. 34Maibee Hau dehan ba imi: la bele jura kona ba buat ida. Keta jura hodi lalehan, tanba nee mak Maromak nia kadunan. 35No keta jura hodi mundu, tanba nee mak fatin nebee Maromak tau Ninia ain.#5:34-35 Haree Isaias 66:1 no Apostolu 7:49. No keta jura hodi Jerusalém, tanba nee mak Liurai Boot nia sidade. 36No keta jura hodi o nia ulun, tanba o la bele halo fuuk lahan ida sai mutin ka metan. 37Maibee dehan deit ‘sin’ nebee sin, no ‘lae’ nebee lae. Buat nebee liu fali nee mai hosi buat nebee aat.
La bele Selu Fali Buat Aat
38Imi rona ona katak ema dehan, ‘Matan troka matan, no nehan troka nehan.’#5:38 Bele lee iha Exodu 21:24, Levítiku 24:20, Deuteronómiu 19:21. 39Maibee Hau dehan ba imi: Keta hapara ema nebee halo aat. Maibee se ema ruma basa o nia hasan sorin loos, see tan o nia hasan sorin karuk ba nia. 40No se ema ruma hakarak lori o ba tribunál, no foti o nia faru, husik nia bele hetan tan o nia kapa. 41No se ema ruma obriga o lao kilómetru ida, lao kilómetru rua ho nia. 42Foo ba nia nebee husu, no keta fila kotuk ba nia nebee hakarak empresta hosi o.
Hadomi O Nia Inimigu
43Imi rona ona katak ema dehan, ‘O tenki hadomi o nia maluk,#5:43 Bele lee iha Levítiku 19:18. no odi o nia inimigu.’ 44Maibee Hau dehan ba imi: Hadomi imi nia inimigu no halo orasaun ba sira nebee foo terus ba imi. 45Nunee imi bele sai imi nia Aman iha lalehan nia oan. Tanba Nia halo Ninia loro matan sae ba ema aat no ema diak, no Nia haruka udan ba ema nebee loos no ema nebee la loos. 46Tanba se imi hadomi sira nebee hadomi imi, nunee imi hetan kolen saida? Laos ema nebee foti taxa#5:46 Iha tempu nebaa ema Judeu sira la gosta ema Judeu ida nebee foti taxa hosi povu hodi foo fali ba governu Roma nian. mos halo hanesan nee? 47No se imi kumprimenta deit imi nia maluk, saida mak imi halo nebee liu fali ema seluk? Laos ema Jentiu sira mos halo hanesan nee? 48Imi tenki sai perfeitu, hanesan imi nia Aman iha lalehan mos perfeitu.#5:48 Gregu telios, nebee perfeitu, kompletu no pas (hanesan ‘loos ona’). Haree Filipe 3:15 no Ebreu 5:14 no nota.
Currently Selected:
Mateus 5: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.