Mateus 25
25
Feto Raan Nain Sanulu
1“Reinu lalehan mak hanesan feto raan nain sanulu nebee foti sira nia ahi oan, no baa atu hasoru noivu ida. 2Feto raan nain lima beik no nain lima seluk matenek. 3Bainhira feto sira nebee beik lori sira nia ahi oan, sira la lori mina. 4Maibee sira nebee matenek lori mina iha botir ho sira nia ahi oan.
5Bainhira noivu demora, sira hotu matan dukur no toba. 6Iha kalan boot, ema hakilar, ‘Tebes, noivu mai ona! Mai hasoru nia.’ 7Depois feto raan sira nee hotu hadeer no prepara sira nia ahi oan. 8No feto sira nebee beik dehan ba sira nebee matenek, ‘Foo imi nia mina balu mai ami, tanba ami nia ahi oan besik atu mate.’ 9Maibee feto raan matenek hataan, ‘La bele, tanba karik ami nia mina la too ba ami no ba imi. Baa deit no sosa imi nian hosi sira nebee faan mina.’ 10No bainhira sira sei baa hela hodi sosa, noivu too mai. No sira nebee prontu ona tama hamutuk ho noivu ba festa kazamentu nian. No ema taka tiha odamatan. 11Tuir mai feto raan sira seluk mai no dehan, ‘Nai, nai, loke odamatan mai ami.’ 12Maibee nia hataan, ‘Tebes hau dehan ba imi katak hau la konhese imi.’ 13Nunee matan moris ba, tanba imi la hatene loron ka oras nebee Ema Nia Oan atu mai.
Ema Nain Tolu Nia Talentu
14Tanba reinu lalehan mak hanesan ema ida nebee atu halo viajen ba rai dook. Nia bolu ninia atan sira no foo riku-soin ba sira hodi tau matan. 15Nia foo osan talentu#25:15 Sira tetu osan no sura ho talentu nebee 35kg. Talentu ida iha folin hanesan saláriu tinan 20 nian. lima ba atan ida, no talentu rua ba atan ida no talentu ida ba atan ida fali. Nia foo ba ida-idak tuir sira nia kbiit. Depois nia baa halo ninia viajen. 16Atan ida nebee simu talentu lima baa kedas no halo negósiu ho osan nee no nia manaan talentu lima tan. 17No mos nia nebee simu talentu rua manaan talentu rua tan. 18Maibee nia nebee simu talentu ida baa kee rai. No nia subar ninia nai nia osan mutin. 19Liu tiha tempu kleur, atan sira nee nia nai mai fali hodi husu kona ba osan nee. 20Atan nebee uluk simu talentu lima mai no nia lori talentu lima tan. Nia dehan, ‘Nai, ita boot foo talentu lima mai hau. Haree ba, hau manaan talentu lima tan.’ 21Ninia nai nee dehan ba nia, ‘O halo diak! O mak atan diak no fiel. No tanba o hatudu fidelidade ho buat uitoan, hau sei foo knaar ba o kona ba buat barak. Tama ba o nia nai nia haksolok.’ 22No mos nia nebee simu talentu rua mai no dehan, ‘Nai, ita boot foo talentu rua mai hau. Haree ba, hau manaan talentu rua tan.’ 23Ninia nai nee dehan ba nia, ‘O halo diak! O mak atan diak no fiel. No tanba o hatudu fidelidade ho buat uitoan, hau sei foo knaar ba o kona ba buat barak. Tama ba o nia nai nia haksolok.’ 24Depois nia nebee simu talentu ida mai no dehan, ‘Nai, hau hatene katak ita boot mak ema siak. Ita boot koa iha fatin nebee ita boot la kuda. No ita boot halibur iha fatin nebee ita boot la haliri. 25Tanba nee hau sai tauk, no hau baa no subar ita boot nia talentu iha rai kuak. Haree ba, iha nee mak buat nebee ita boot nian.’ 26Ninia nai hataan no dehan ba nia, ‘O mak atan aat no baruk! O hatene ka, katak hau koa iha fatin nebee hau la kuda, no hau halibur iha fatin nebee hau la haliri? 27Entaun diak liu o rai hau nia osan iha banku, no bainhira hau fila fali mai, hau bele simu hau nia osan ho funan. 28Nunee foti talentu ida nee hosi nia, no foo ba atan nebee iha talentu sanulu. 29Tanba ba ema hotu nebee iha, hau sei foo tan, no nia sei hetan barak loos. Maibee hosi nia nebee la iha, hau sei foti buat uitoan nebee nia iha.#25:29 Lian Gregu la hakerek ‘hau’ iha fraze rua nee, ‘hau sei foo’ no ‘hau sei foti’. 30No soe atan folin laek nee ba liur nebee nakukun tebes. Iha nebaa sira sei tanis no ruun nehan.’
Julgamentu Ikus
31Bainhira Ema Nia Oan mai iha Ninia glória, hamutuk ho anju santu sira hotu, Nia sei tuur iha Ninia kadunan glória nian. 32Nasaun hotu sei halibur iha Ninia oin. Depois Nia sei haketak ema ida-idak, hanesan bibi atan haketak ninia bibi malae hosi bibi timor. 33Nia sei tau bibi malae iha Ninia liman loos, maibee Nia sei tau bibi timor iha Ninia liman karuk. 34Depois Liurai nee sei dehan ba sira nebee iha Ninia liman loos, ‘Mai, imi nebee simu ona bensaun hosi Hau nia Aman. Simu reinu nee nudar liman rohan nebee Nia prepara ona hosi mundu hahuu. 35Tanba bainhira Hau hamlaha, imi foo hahaan mai Hau. Bainhira Hau hamrook, imi foo hemu mai Hau. Bainhira Hau mak estranjeiru, imi simu Hau. 36Bainhira Hau isin molik, imi foo hatais Hau. Bainhira Hau moras, imi mai vizita Hau. Bainhira Hau iha komarka laran, imi mai haree Hau.’ 37Depois ema moris loos sei hataan ba Nia, no sira dehan, ‘Nai, hori bainhira mak ami haree O hamlaha, no ami foo haan ba O; ka hamrook, no ami foo hemu ba O? 38Hori bainhira mak ami haree O nudar estranjeiru, no ami simu O; ka isin molik, no foo hatais O? 39No hori bainhira mak ami haree O moras, ka iha komarka laran, no ami baa vizita O?’ 40No Liurai sei hataan no dehan ba sira, ‘Tebes Hau dehan ba imi, hanesan imi halo buat nee ba Hau nia alin kiik sira nee ida, imi mos halo mai Hau rasik.’
41Depois Nia sei dehan ba sira nebee iha liman karuk, ‘Sai tiha hosi Hau, imi nebee hetan malisan! Tama ba ahi rohan laek, nebee prepara ona ba diabu no ninia anju sira. 42Tanba Hau hamlaha, no imi la foo haan mai Hau. Hau hamrook, no imi la foo hemu mai Hau. 43Hau mak estranjeiru, no imi la simu Hau. Hau isin molik, no imi la foo hatais Hau. Hau moras no iha komarka laran, no imi la mai vizita Hau.’ 44Depois sira sei hataan ba Nia, no dehan, ‘Nai, hori bainhira mak ami haree O hamlaha, ka hamrook, ka estranjeiru, ka isin molik, ka moras, ka iha komarka laran, no ami la ajuda O?’ 45No Nia sei hataan ba sira, no dehan, ‘Tebes, Hau dehan ba imi, hanesan imi la halo buat nee ba Hau nia alin kiik sira nee ida, imi mos la halo mai Hau.’ 46No ema sira nee sei sai hosi fatin nee no tama ba kastigu rohan laek. Maibee ema moris loos sei tama ba moris rohan laek.”
Currently Selected:
Mateus 25: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.