Mateus 26
26
Planu Atu Oho Jesus
1 # 26:1-5 Haree Marcos 14:1-2 no Lucas 22:1-2. Bainhira Jesus foo sai liafuan hotu nee, Nia dehan ba Ninia eskolante sira, 2“Imi hatene katak iha loron rua tan ita selebra Festa Páskua.#26:2 Páskua mak festa nebee selebra tempu nebee sira sai hosi Ejitu ho Moisés iha tinan 1500 molok Jesus. Haree Exodu 12. Iha tempu nebaa sira oho bibi oan hodi hetan salvasaun. No ema sei entrega Ema Nia Oan ba sira hodi prega Nia ba krús.”
3Depois xefi saserdote sira halibur hamutuk ho katuas sira hosi povu nee. Sira hasoru malu iha xefi saserdote boot Kaifas nia palásiu. 4Sira halo planu atu kaer Jesus sub-subar no oho Nia. 5Maibee sira dehan, “La bele halo ida nee iha loron festa nian, hodi povu la sai hirus.”
Jesus Simu Unsaun
6 # 26:6-13 Haree Marcos 14:3-9 no João 12:1-8. Kompara mos ho Lucas 7:36-50. Bainhira Jesus baa iha Betánia, iha Simão Lepra#26:6 Iha lian Aramaiku, sentidu bele ‘Simão Badaen Rai Mean’. nia uma, 7feto ida hakbesik ba Nia ho botir alabastro#26:7 Botir nebee halo ho fatuk mutin ida nebee hanesan ho marmore maibee laduun toos. nebee iha mina morin ho folin boot. Feto nee fui mina iha Jesus nia ulun bainhira Nia tuur haan hela. 8Bainhira Ninia eskolante sira haree ida nee, sira sai hirus, no dehan, “Tanba saa mak estraga deit mina nee? 9Ita bele faan mina morin nee hodi hetan osan boot no foo ba ema kiak.” 10Jesus hatene sira nia liafuan nee, no Nia dehan ba sira, “Tanba saa mak imi halo susar ba feto nee? Nia halo buat diak mai Hau. 11Imi sempre iha ema kiak iha imi nia leet, maibee imi sei la iha Hau nafatin. 12Nia fui mina morin ba Hau nia isin, hodi prepara Hau ba rate. 13Tebes Hau dehan ba imi, iha fatin nebee deit iha mundu tomak nebee ema haklaken evanjelhu nee, sira mos konta buat nebee feto nee halo ona hodi hanoin fali nia.”
Judas Atu Faan Jesus
14 # 26:14-16 Haree Marcos 14:10-11 no Lucas 22:3-6. Depois eskolante ida, naran Judas Iskariotes, hosi sira nain sanulu resin rua, baa hasoru xefi saserdote sira. 15Nia dehan ba sira, “Imi sei foo saida mai hau hodi hau entrega Jesus ba imi?” No sira sura osan mutin tolu-nulu#26:15 Moisés hakerek nanis ona kona ba ema nia folin. Haree Levítiku 27:1-8, Jénesis 37:28, Exodu 21:30-31, Zakarias 11:12-13. ba nia. 16Hahuu hosi tempu nee, nia buka oportunidade atu faan Jesus ba sira.
Jesus Selebra Páskua
17 # 26:17-19 Haree Marcos 14:12-16 no Lucas 22:7-13. Iha loron primeiru iha Festa Paun Fermentu Laek,#26:17 Festa boot liu ba ema Judeu sira nebee haan paun ho fermentu la iha. Haree Exodu 12:17. eskolante sira husu ba Jesus, “O hakarak ami prepara fatin iha nebee hodi O bele haan Páskua?” 18No Nia dehan, “Tama ba sidade no imi sei hasoru mane ida. Dehan ba nia, ‘Mestri dehan, Hau nia tempu besik ona. Hau sei selebra Páskua iha o nia uma ho Hau nia eskolante sira.’” 19Depois eskolante sira halo tuir Jesus nia orden ba sira. No sira prepara Páskua.
20 # 26:20-24 Haree Marcos 14:17-21. Bainhira kalan ona, Jesus tuur iha meza hamutuk ho sira nain sanulu resin rua nee. 21Kuandu sira haan hela, Nia dehan, “Tebes Hau dehan ba imi, katak ema ida hosi imi sei faan Hau.” 22Sira sai tristi tebe-tebes, no ida-idak komesa husu Nia, “Nai, laos hau ka?” 23No Nia hataan dehan, “Ema nebee hatama ninia liman iha bikan hamutuk ho Hau, nia mak sei faan Hau.#26:23 Kompara ho Salmu 41:9. 24Ema Nia Oan sei baa tuir liafuan nebee ema hakerek nanis ona kona ba Nia. Maibee susar ba ema ida nebee faan Ema Nia Oan! Diak liu ba ema ida nee se nia la moris mai.” 25Depois Judas, nebee sei faan Nia, hataan dehan, “Rabi, laos hau ka?” Nia hataan ba Judas, “O rasik mak dehan nunee.”
Jesus Halo Aliansa Foun
26 # 26:26-29 Haree Marcos 14:22-25 no Lucas 22:18-20. Bainhira sira haan hela, Jesus foti paun no Nia foo bensaun. Depois Nia silu paun nee no foo ba eskolante sira. Nia dehan, “Simu no haan ba. Nee mak Hau nia isin.” 27Depois Nia foti kopu ida no foo agradese. Depois Nia foo kopu nee ba sira no dehan, “Imi hotu, hemu ba. 28Tanba nee mak Hau nia raan aliansa nian,#26:28 Manuskritu balu dehan ‘raan aliansa foun nian’. nebee fakar hodi ema barak bele hetan perdaun hosi sala. 29Hau dehan ba imi, Hau sei la hemu tan hosi uvas fuan nee too loron nebee Hau hemu fali ho imi iha Hau nia Aman nia reinu.”
Pedro Sei Nega Jesus
30 # 26:30-35 Haree Marcos 14:26-31. Bainhira sira hananu tiha knananuk ida, sira sai ba Foho Oliveira. 31Depois Jesus dehan ba sira, “Imi hotu sei monu#26:31 Monu nee katak sira fila sees hosi Jesus, nebee monu ba hahalok nebee nega Jesus. Hosi liafuan iha Gregu nebee skandalizo, hanesan fini nebee moris maibee abut la iha, Mateus 13:21. iha kalan ida nee tanba Hau. Tanba ema hakerek nanis ona, ‘Hau sei baku bibi atan, no bibi sira sei halai namkari.’#26:31 Haree Zakarias 13:7. 32Maibee bainhira Hau moris hias ona, Hau sei baa Galileia uluk liu imi.” 33Pedro hataan ba Nia, “Maski ema hotu monu tanba O, hau sei nunka monu.” 34Jesus dehan ba Pedro, “Tebes Hau dehan ba o, katak iha kalan nee, molok manu kokoreek, o sei nega Hau dala tolu.” 35Pedro dehan ba Nia, “Maski hau tenki mate ho O, hau sei la nega O.” No eskolante sira hotu dehan hanesan.
Jesus Halo Orasaun Iha Getsemani
36 # 26:36-46 Haree Marcos 14:32-42 no Lucas 22:39-46. Depois Jesus tama fatin ida naran Getsemani ho Ninia eskolante sira. No Nia dehan ba sira, “Imi tuur iha nee, no Hau sei baa halo orasaun iha nebaa.” 37Nia lori Pedro ho Zebedeu nia oan mane nain rua, no Nia hahuu sai tristi tebes no laran susar. 38Depois Nia dehan ba sira, “Hau nia laran tristi tebe-tebes, too atu mate. Hein iha nee, no hadeer nafatin ho Hau.” 39Nia baa tan uitoan, no Nia monu taka oin ba rai. Nia halo orasaun no dehan, “Oh Hau nia Aman, se bele karik, hasai tiha kopu nee hosi Hau. Maibee laos tuir Hau nia hakarak, maibee tuir O nia hakarak.” 40Depois Nia fila ba eskolante sira, no Nia hetan sira toba dukur hela. Nia dehan ba Pedro, “Nusaa, imi la bele hadeer ho Hau too oras ida deit? 41Matan moris ba no halo orasaun nafatin, hodi imi la monu ba tentasaun. Espíritu prontu, maibee isin fraku.” 42Ba dala rua, Nia hadook aan no halo orasaun, “Oh Hau nia Aman, se karik la bele hasai kopu nee hosi Hau no Hau tenki hemu, entaun halo tuir O nia hakarak.” 43No Nia fila fali mai no hetan sira toba dukur hela. Tanba sira nia matan dukur loos. 44Nia husik sira, no hadook aan fali. Nia halo orasaun ba dala tolu, no koalia fila-fali liafuan hanesan. 45Tuir mai, Nia fila fali ba Ninia eskolante sira, no dehan ba sira, “Imi toba dukur no deskansa hela ka? Tebes, oras too ona, no ema atu faan Ema Nia Oan ba sala nain sira nia liman. 46Hamriik ba, no husik ita baa lai. Tebes, Hau nia traidór besik mai ona.”
Ema Kaer Jesus
47 # 26:47-56 Haree Marcos 14:43-50, Lucas 22:47-53 no João 18:3-11. Bainhira Jesus koalia dadaun, Judas, nebee hosi sira nain sanulu resin rua, too mai. Nia mai ho ema lubun boot nebee lori surik no ai dona. Sira mai hosi xefi saserdote sira no povu nia katuas sira. 48Ema nebee atu faan Jesus foo ona sinál ida no dehan, “Ema ida nebee hau sei rei, Nia mak nee. Kaer Nia ba.” 49Judas hakbesik kedas ba Jesus, no dehan, “Salóm, Rabi!”#26:49 Salóm nee mai Hosi manuskritu Aramaiku nian (Pesita no seluk tan). Judas foo kumprimentus baibain nian ba Jesus, nebee iha sentidu, ‘Dame, Mestri!’ No nia rei Jesus. 50Jesus dehan ba nia, “Belun, o mai hodi halo nunee ka?” Depois sira mai, kaer Jesus no foti Nia. 51No tebes, ema ida hosi sira nebee hamutuk ho Jesus lolo liman, losu nia surik, no taa saserdote boot nia atan no tesi sai atan nee nia tilun. 52Depois Jesus dehan ba nia, “Hatama fali o nia surik iha ninia fatin. Tanba ema hotu nebee kaer surik sei mate liu hosi surik.#26:52 Iha Aramaiku, ‘surik’ iha sentidu mos ‘ikus mai’, entaun fraze nee bele mos iha sentidu ‘nia nebee foti surik, ikus mai nia mate.’ 53Ita hanoin katak Hau la bele halo orasaun ba Hau nia Aman, no Nia sei haruka kedas anju batalhaun sanulu resin rua mai Hau?#26:53 Lian Gregu dehan ‘lejiaun 12’. Lejiaun ida iha soldadu nain 4.800, nunee Nia dehan anju nain 60.000! 54Maibee oinsaa kumpri Eskritura sira nebee dehan katak buat nee sei akontese?” 55Iha tempu nee, Jesus dehan ba ema lubun sira nee, “Imi sai mai atu hasoru naok-teen ka? Tanba nee imi mai ho surik no ai dona sira hodi kaer Hau ka? Hau tuur hanorin loro-loron ho imi iha Templu, no imi la kaer Hau. 56Maibee buat hotu nee akontese, hodi kumpri Eskritura hosi profeta sira.” Depois eskolante sira hotu husik Jesus no halai lakon.
Jesus Hasoru Kaifas
57 # 26:57-68 Haree Marcos 14:53-65. No sira nebee kaer Jesus lori Nia ba saserdote boot Kaifas, iha fatin nebee ema eskriba no katuas sira halibur hamutuk ona. 58Maibee Pedro tuir Nia hosi dook too iha saserdote boot nia pátiu. Nia tama ba no tuur ho atan sira hodi haree oinsaa ida nee remata. 59Xefi saserdote sira, katuas sira no tribunál#26:59 Lian Gregu dehan ‘Sinédriu’, nebee tribunál relijiaun nian. Haree Apostolu 4:15. tomak buka sasin falsu atu hasoru Jesus hodi kastigu mate Nia. 60Sira la hetan ida, maski sasin falsu barak mai. Ikus mai, sasin nain rua#26:60 Tuir Lei, sira presiza sasin nain rua nebee konkorda hodi foo sala ba ema. Haree Deuteronómiu 19:15. mai 61nebee dehan, “Ema ida nee dehan, ‘Hau bele sobu Maromak nia Templu no harii fali iha loron tolu nia laran.’” 62Saserdote boot hamriik, no dehan ba Nia, “O la hataan buat ida ka? Saida mak nee, nebee sasin sira nee foo sai hasoru O?” 63Maibee Jesus nonook hela deit. Saserdote boot hataan no dehan ba Nia, “Hau haruka O jura hodi Maromak nebee moris, foo hatene mai ami se O mak Kristu, Maromak nia Oan, ka lae?” 64Jesus dehan ba nia, “Ita rasik mak hatete nunee. Maibee Hau dehan ba imi, hosi agora ba oin, imi sei haree Ema Nia Oan tuur iha Kbiit Nain nia liman loos, no Nia sei mai hosi lalehan iha kalohan leten.” 65Nunee saserdote boot lees ninia ropa, no dehan, “Nia koalia aat hasoru Maromak!#26:65 Iha lian Gregu sira dehan Jesus koalia blasfémeo. (Portugés, blasfemou) Tanba saa mak ita presiza sasin tan? Tebes, agora imi rona ona katak Nia rasik koalia aat hasoru Maromak. 66Imi hanoin oinsaa?” Sira hataan, “Nia merese atu simu kastigu mate.” 67Depois sira tafui kabeen iha Ninia oin no tuku Nia. Ema balu basa Nia, 68no dehan, “Foo sai profesia ba ami, Oh Kristu, see mak tuku O?”
Pedro Nega Jesus
69 # 26:69-75 Haree Marcos 14:66-72, Lucas 22:55-62 no João 18:16-27. Pedro tuur hela iha liur, iha pátiu. No atan feto ida hakbesik ba nia no dehan, “Ita mos hamutuk ho Jesus hosi Galileia nee.” 70Maibee nia nega liafuan nee iha sira hotu nia oin, no dehan, “Hau la hatene o koalia kona ba saida!” 71No bainhira nia sai ba portaun, atan feto seluk haree nia, no dehan ba sira nebee besik, “Ema ida nee mos hamutuk ho Jesus hosi Nazaré nee.” 72Nia nega fali ho juramentu ida, “Hau la konhese mane nee!” 73Tuir mai, ema sira nebee hamriik iha nebaa dehan ba Pedro, “Tebes ita mos ema ida hosi sira, tanba ita hatudu aan liu hosi ita nia lian.” 74Depois nia komesa koalia aat no jura, “Hau la konhese mane nee!” Iha momentu nee kedas, manu kokoreek. 75Pedro hanoin hetan fali liafuan hosi Jesus, nebee dehan ba nia, “Molok manu kokoreek, o sei nega Hau dala tolu.” No nia sai ba liur no tanis ho laran dodok.
Currently Selected:
Mateus 26: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.