Mateus 17
17
Jesus Nakfilak Aan Iha Foho
1 # 17:1 Bele lee iha Marcos 9:2-8; Lucas 9:28-36. Liu tiha loron neen, Jesus lori Pedro, Tiago no nia alin João, no sira mes-mesak baa sae foho aas ida. 2No Jesus nakfilak aan iha sira nia oin. Ninia oin nabilan hanesan loro matan, no Ninia ropa sai mutin nebee naroman loos. 3No tebes, Moisés no Elias mosu iha sira nia oin no koalia ho Jesus. 4Depois Pedro dehan ba Jesus, “Nai, ida nee diak katak ita iha nee. Se O hakarak, hau sei harii tenda tolu, ida ba O, ida ba Moisés, no ida ba Elias.” 5Bainhira nia koalia hela, tebes, kalohan nabilan taka sira. No tebes, lian ida sai hosi kalohan nee no dehan, “Ida nee mak Hau nia Oan doben. Hau kontenti liu ho Nia. Rona Nia ba.” 6Bainhira eskolante sira rona tiha lian nee, sira monu ho oin ba rai, no sira tauk tebe-tebes. 7Jesus hakbesik ba sira no kona sira, no dehan, “Hamriik ba, keta tauk!” 8No bainhira sira foti matan, sira la haree ema ida, só Jesus deit.
9 # 17:9 Bele lee iha Marcos 9:9-13. Bainhira sira tuun dadaun hosi foho, Jesus bandu sira, no dehan, “La bele foo hatene kona ba vizaun nee ba ema ida too Ema Nia Oan moris hias hosi mate.” 10Depois Ninia eskolante sira husu ba Nia, “Tanba saa mak eskriba sira dehan katak Elias tenki mai uluk?”#17:10 Profeta Malakias hakerek katak Elias tenki mai uluk. Haree Malakias 4:5. 11Jesus hataan ba sira, “Loos duni, Elias mai uluk, no nia sei hadia buat hotu. 12Maibee Hau dehan ba imi katak Elias mai tiha ona, no sira la konhese nia. Maibee sira halo ona ba nia tuir sira nia hakarak hotu. Nunee mos Ema Nia Oan sei hetan terus hosi sira.”#17:12 Haree Marcos 9:12 no nota. 13Depois Ninia eskolante sira kompriende katak Nia koalia ba sira kona ba João Batista.
Jesus Kura Ema Ida Ho Diabu
14 # 17:14 Bele lee iha Marcos 9:14-28; Lucas 9:37-42. Bainhira sira fila ba ema lubun boot nee, ema ida hakbesik ba Jesus. Nia hakneak iha Jesus nia oin, no dehan, 15“Nai, hatudu laran luak ba hau nia oan mane, tanba nia moras bibi maten, no iha terus makaas. Dala barak nia monu ba ahi laran no monu ba bee laran. 16Hau lori ona nia ba O nia eskolante sira, maibee sira la bele kura nia.” 17Depois Jesus hataan, no Nia dehan, “Oh jerasaun aat nebee la fiar. Too bainhira mak Hau tenki hamutuk ho imi? Too bainhira mak Hau tenki hatudu pasiénsia ba imi? Lori nia mai Hau.” 18Jesus siak diabu nee. No diabu sai hosi labarik no labarik nee sai diak kedas.
19Bainhira Jesus mesak ona, eskolante sira hakbesik ba Nia, no dehan, “Tanba saa mak ami la bele duni sai diabu nee?” 20Jesus dehan ba sira, “Tanba imi nia fiar menus. Tebes, Hau dehan ba imi, se imi nia fiar hanesan mostarda musan ida, imi bele dehan ba foho nee, ‘Muda aan ba nebaa,’ no foho sei muda aan. La iha buat ida nebee imi la bele halo.”#17:20 Manuskritu balu aumenta versíkulu 21, ‘Maibee ida nee sei la sai, só deit liu hosi halo orasaun no jejún.’
Jesus Konta Katak Nia Atu Mate
22 # 17:22 Bele lee iha Marcos 9:30-32; Lucas 9:43-45. Bainhira sira halibur iha Galileia, Jesus dehan ba sira, “Ema sei entrega Ema Nia Oan nee ba ema sira nia liman. 23Ema sei oho Nia, no iha loron terseiru Nia sei moris hias.” No sira sai tristi tebe-tebes.
Taxa Templu Nian
24Bainhira sira too tiha Kafarnaum, ema nebee simu taxa#17:24 Taxa ho folin drakma rua. hakbesik ba Pedro, no dehan, “Laos ita nia Mestri selu taxa ka?” 25Nia dehan, “Sin.” No bainhira Pedro fila ba uma, Jesus koalia kedas ba nia, no dehan, “O hanoin oinsaa, Simão? Liurai sira iha mundu foti impostu ka taxa hosi see? Hosi sira nia oan sira ka hosi ema seluk?” 26Pedro dehan ba Jesus, “Hosi ema seluk.” Jesus dehan ba nia, “Entaun oan sira mak livre. 27Maski nunee ita keta halo sira atu hanoin sala. Entaun tuun ba tasi no soe kail ida no foti ikan primeiru nebee o hetan. Loke tiha ikan nee nia ibun, no o sei hetan osan mutin ida.#17:27 Osan mutin nee mak stater ida nebee iha folin drakma haat, nunee bele uza ba ema nain rua nia taxa. Lori osan nee no foo ba sira hodi selu kona ba Hau no mos ba o.”
Currently Selected:
Mateus 17: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.