Mateus 18
18
See Mak Boot Liu?
1 # 18:1 Bele lee iha Marcos 9:33-37; Lucas 9:46-48. Iha tempu nee, eskolante sira hakbesik ba Jesus, no husu, “See mak boot liu iha reinu lalehan?” 2Jesus bolu labarik kiik ida mai Nia. Nia tau labarik nee iha sira nia klaran. 3Nia dehan, “Tebes, Hau dehan ba imi, se imi la arepende, no sai hanesan kiik-oan sira, imi sei la tama ba reinu lalehan. 4Nunee see deit nebee haraik aan hanesan labarik kiik nee, nia mak boot liu iha reinu lalehan. 5No see deit nebee simu labarik kiik ida hodi Hau nia naran, nia simu Hau. 6Maibee kona ba kiik-oan ida nebee fiar Hau, ema see deit nebee halo nia monu ba sala, diak liu ema nee kesi fatuk boot dulas batar nian ba ninia kakorok no soe nia ba tasi laran.”
Tentasaun Atu Sala
7“Susar ba mundu tanba lasu nebee halo ema monu ba sala!#18:7 Lasu ka fatuk nebee halo ema sidi no monu ba sala ka sai tentasaun ba ema. Tanba lasu sira nee tenki mai; maibee susar ba ema ida nebee lori lasu nee mai! 8Nunee se o nia liman ka o nia ain halo o monu ba sala, tesi sai ida nee, no soe tiha. Diak liu o tama ba moris ho liman ka ain sorin deit, duké o iha liman rua ka ain rua no sira soe o ba ahi rohan laek. 9No se o nia matan halo o monu ba sala, fokit sai no soe tiha. Diak liu o tama ba fatin moris nian ho matan ida deit, duké o iha matan rua no sira soe o ba ahi infernu nian.
Ai Knanoik Kona Ba Bibi Lakon
10Kuidadu katak imi la hakribi kiik-oan ida hosi labarik sira nee. Tanba Hau dehan ba imi, katak tebes sira nia anju sira iha lalehan sempre haree Hau nia Aman nia oin iha lalehan.#18:10 Manuskritu balu aumenta versikulu 11: ‘Tanba Ema Nia Oan mai hodi buka no salva sira nebee lakon.’ Haree mos iha Lucas 19:10. 12Imi hanoin oinsaa? Se ema ida iha bibi atus ida, no bibi ida lao lakon hosi sira. Laos ema ida nee husik bibi sia-nulu resin sia iha foho, no baa buka ida nebee lao lakon? 13No se nia hetan bibi nee, tebes Hau dehan ba imi, nia haksolok tebes ho bibi ida nee, liu fali bibi sia-nulu resin sia nebee la lao lakon. 14Nunee Hau nia Aman#18:14 Manuskritu balu dehan ‘imi nia Aman’ iha lalehan lakohi kiik-oan sira nee ida atu lakon.
Se O Nia Maluk Sala Hasoru O
15No se o nia maluk halo sala hasoru o, baa no foo hatene ba nia kona ba ninia sala. Koalia ho nia mes-mesak. Se nia rona ba o, entaun o hetan fali o nia maluk. 16Maibee se nia la rona ba o, entaun lori ema ida ka rua tan. Nunee liu hosi sasin nain rua ka tolu nia liafuan, ita bele estabelese asuntu hotu.#18:16 Kompara Deuteronómiu 19:15. 17No se nia lakohi rona sira, foo hatene ba igreja. Maibee se nia lakohi rona igreja, haree nia nudar ema Jentiu ida no kobradór impostu. 18Tebes Hau dehan ba imi, buat hotu nebee imi kesi iha mundu, kesi ona iha lalehan. No buat hotu nebee imi kore iha mundu, kore ona iha lalehan. 19Hau dehan mos ba imi, se ema nain rua iha mundu nee husu buat saida deit ho lian ida, nunee Hau nia Aman iha lalehan sei halo buat nee. 20Tanba iha fatin naran deit nebee ema nain rua ka tolu halibur hamutuk hodi Hau nia naran, Hau mos iha sira nia leet.”
Atan Nebee La Foo Perdaun
21Depois Pedro mai ba Jesus, no dehan, “Nai, too dala hira mak hau tenki perdua hau nia maluk nebee halo sala hasoru hau? Too dala hitu ka?” 22Jesus dehan ba nia, “Hau dehan ba o, laos too dala hitu, maibee too hitu-nulu dala hitu.#18:22 Bele ‘too dala hitu-nulu resin hitu.’ Nafatin deit!
23Nunee reinu lalehan mak hanesan liurai ida nebee hakarak sura osan debe hosi ninia atan sira. 24No bainhira nia hahuu atu sura, sira lori atan ida ba nia nebee tenki selu fali osan talentu rihun sanulu (10.000).#18:24 Talentu ida mak osan boot nebee iha valór katak ema baibain servisu too tinan rua-nulu. 25Maibee atan nee la bele selu fali. Entaun ninia nai haruka sira faan nia, ninia feen no oan sira, no buat hotu nebee nia iha, hodi selu fali osan debe nee. 26Nunee atan nee monu ba rai, no hakruuk ba liurai, no dehan, ‘Nai, foo tempu mai hau, no hau sei selu fali buat hotu ba ita boot.’ 27Depois atan nee nia nai hanoin tebes ninia atan. Nunee nia kansela atan nia osan debe nee. 28Maibee atan nee sai ba, no hetan ninia maluk atan ida nebee debe nia osan denáriu atus ida.#18:28 Denáriu ida mak osan ho folin katak ema baibain servisu loron ida. Depois atan primeiru kaer nia, no buti metin ninia kakorok, no dehan, ‘Selu fali buat nebee o debe hosi hau!’ 29No ninia maluk atan nee monu iha ninia ain, no husu ho laran, no dehan, ‘Foo tempu mai hau, no hau sei selu fali buat hotu ba ita.’ 30Maibee nia lakohi. Nia lori ninia maluk atan nee no soe nia ba komarka too nia bele selu fali osan debe nee. 31Nunee bainhira ninia maluk atan sira seluk haree buat nebee nia halo, sira sai tristi tebes. Sira baa no foo hatene ba sira nia nai kona ba buat hotu nebee akontese. 32Depois atan nee nia nai bolu atan nee no dehan ba nia, ‘O mak atan aat! Hau kansela ona o nia osan debe hotu tanba o husu hau ho laran. 33Laos o tenki hatudu laran luak ba o nia maluk atan, hanesan hau hatudu ona laran luak ba o?’ 34No atan nia nai sai hirus tebes, no entrega nia ba guarda nebee foo kastigu todan ba nia too nia bele selu fali osan hotu nebee nia debe hosi nai. 35Hanesan nee Hau nia Aman iha lalehan sei halo mos ba imi, se imi ida-idak la foo perdaun#18:35 Iha lian Gregu iha istória nee, liafuan ‘kansela’ no ‘foo perdaun’ mak hanesan. ba imi nia maluk sira ho imi nia fuan laran.”
Currently Selected:
Mateus 18: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.