Mateus 16
16
Ema Farizeu No Saduseu Buka Sinál
1 # 16:1 Bele lee iha Marcos 8:11-21. Ema Farizeu ho Saduseu sira mai atu koko Jesus. Sira husu Nia atu hatudu ba sira sinál ida hosi lalehan. 2Nia hataan no dehan ba sira, “Bainhira rai nakaras mai, imi dehan, ‘Tempu diak sei mai tanba loro leten mean.’ 3No iha dadeer-saan, ‘Ohin tempu la diak, tanba loro leten sei mean no iha kalohan metan.’#16:3 Iha lian Gregu, ‘mean no la kontenti’. Versikulu 2 no 3 nee koalia kona ba tempu (klima). Bainhira rai nakaras no ita haree ba loro leten no haree kor mean, nunee bele hatene katak aban tempu sei diak, la udan ka anin makaas. Maibee iha dadeer saan se ita haree mean, tuir mai bele udan. Oh imi nebee laran makerek! Imi bele kompriende loro leten nee oinsaa, maibee imi la bele kompriende sinál iha tempu nee. 4Jerasaun ida nebee aat no laran foer#16:4 Lian Gregu: ‘halo sala seksuál’ ho sentidu katak sira fila hosi Maromak loos hodi fiar buat seluk. buka sinál ida. Maibee sira sei la hetan sinál ida, só deit sinál Jonas nian.” Depois Nia husik sira no sai hosi fatin nee.
Fermentu Farizeu No Saduseu Nian
5Bainhira Ninia eskolante sira baa too tasi sorin, sira haluha atu lori paun. 6Depois Jesus dehan ba sira, “Matan moris ba no kuidadu kona ba fermentu#16:6 Fermentu bele kompara ho hanorin la loos (v.12). Haree 1 Korinto 5:6-8 no nota. hosi ema Farizeu no Saduseu sira.” 7Sira koalia ba malu, “Nee tanba ita la lori paun.” 8Bainhira Jesus hatene ida nee, Nia dehan ba sira, “Oh imi nebee fiar kiik, tanba saa mak imi koalia ba malu kona ba la lori paun? 9Imi seidauk kompriende ka? Imi haluha ona paun fuan lima ba ema nain rihun lima no imi halibur fali too bote hira? 10No mos paun fuan hitu ho ema nain rihun haat no imi halibur fali too bote boot hira? 11Oinsaa mak imi la kompriende katak Hau la koalia ba imi kona ba paun, maibee katak imi tenki kuidadu kona ba fermentu hosi ema Farizeu no Saduseu sira?” 12Depois sira kompriende katak Nia la dehan ba sira atu kuidadu kona ba fermentu iha paun, maibee kona ba ema Farizeu no Saduseu sira nia hanorin.
Pedro Konfesa Jesus Kristu
13 # 16:13 Bele lee iha Marcos 8:27-29, Lucas 9:18-20. Bainhira Jesus tama ba área Sezareia Filipe, Nia husu Ninia eskolante sira, no dehan, “Ema dehan Ema Nia Oan mak see?” 14No sira dehan, “Balu dehan João Batista, balu dehan Elias, no ema seluk dehan Jeremias ka profeta ida.” 15Depois Nia dehan ba sira, “Maibee imi dehan Hau nee see?” 16No Simão Pedro hataan dehan, “O mak Kristu, Maromak Moris nia Oan Mane.” 17No Jesus hataan no dehan ba nia, “Bensaun ba o, Simão Bar-Jonas! Tanba isin no raan la foo sai buat nee ba o, maibee Hau nia Aman nebee iha lalehan. 18No Hau dehan mos ba o, katak o mak Pedro, no iha fatuk nee nia leten Hau sei harii Hau nia Igreja. No portaun infernu nian sei la manaan hasoru nia.#16:18 ‘Fatuk’ iha lian Gregu mak petra hanesan Pedro; ‘igreja’ iha Gregu mak eklesia katak kongregasaun; no ‘infernu’ iha Gregu mak hades nebee fatin mate nian. 19No Hau sei foo xave sira hosi reinu lalehan ba o. Saida mak o kesi iha mundu sei kesi mos iha lalehan, no saida mak o kore iha mundu sei kore mos iha lalehan.” 20Depois Jesus bandu Ninia eskolante sira atu la bele foo hatene ba ema ida katak Nia mak Kristu.
Jesus Dehan Nia Atu Mate
21 # 16:21 Bele lee iha Marcos 8:3-9:1, Lucas 9:22-27. Hosi tempu nee ba oin, Jesus komesa hatudu Ninia eskolante sira katak Nia tenki baa Jerusalém, no hetan kastigu todan hosi katuas, xefi saserdote no eskriba sira, no sira sei oho Nia, no Nia sei moris hias iha loron terseiru. 22Depois Pedro lori Nia ba sorin no komesa siak Nia no dehan, “La bele hanesan nee#16:22 Gregu iha sentidu atu husu grasa katak buat susar la mai. ba O, Nai! Buat nee sei la kona O.” 23Maibee Nia fila, no dehan ba Pedro, “Sees tiha ba Hau nia kotuk, Satanás! O mak lasu ida ba Hau. Tanba o la hanoin tuir buat nebee Maromak nian, maibee buat nebee ema nian.”
Lori O Nia Krús
24Depois Jesus dehan ba Ninia eskolante sira, “Se ema ruma hakarak tuir Hau, nia tenki nega nia aan, lori nia krús no tuir Hau. 25Tanba ema nebee hakarak salva nia moris, sei lakon nia moris nee; no ema nebee lakon nia moris, tanba Hau nia naran, sei hetan fali nia moris nee. 26Tanba ida nee iha folin saida ba ema, se nia manaan mundu tomak maibee nia lakon nia moris? Ka ema bele foo saida hodi troka nia moris? 27Tanba Ema Nia Oan sei mai iha Ninia Aman nia glória hamutuk ho Ninia anju sira, no Nia sei selu fali ema ida-idak tuir ema nia hahalok. 28Tebes Hau dehan ba imi, katak ema balu nebee hamriik iha nee sei la mate too sira haree Ema Nia Oan mai fali iha Ninia reinu.”
Currently Selected:
Mateus 16: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.