Mateus 10
10
Eskolante Nain Sanulu Resin Rua
1Jesus bolu Ninia eskolante nain sanulu resin rua. Nia foo kbiit ba sira hodi duni sai espíritu aat sira, no hodi kura moras no isin fraku oi-oin. 2#10:2 Bele lee iha Marcos 2:16-19, Lucas 6:13-16.Apostolu nain sanulu resin rua nia naran mak nee: primeiru mak Simão, nebee iha naran Pedro, no ninia alin André; Tiago, nebee Zebedeu nia oan, no ninia alin João; 3Filipe no Bartolomeu; Tomé no Mateus, nebee kobradór impostu; Tiago, nebee Alfeu nia oan, no Tadeus;#10:3 Manuskritu balu dehan ‘Lebeus, ho naran apelido Tadeus’. 4Simão, nebee ema Kanaan, no Judas Iskariotes, nebee sai traidór ba Jesus.
Jesus Haruka Eskolante Sira
5Jesus haruka eskolante nain sanulu resin rua nee, no Nia foo orden ba sira, “La bele tama dalan ba ema Jentiu sira, no keta tama sidade ida hosi ema Samaria sira. 6Maibee baa bibi nebee lakon hosi uma kain Israel nian. 7No bainhira imi baa, haklaken no dehan, ‘Reinu lalehan besik ona.’ 8Kura ema moras, hamoos ema nebee iha moras lepra, foo moris ba ema mate, no duni sai diabu sira. Imi simu gratis ona, nunee foo gratis deit. 9#10:9 Bele lee iha Marcos 6:8-11, Lucas 9:3-5.Keta buka osan mean, osan mutin ka osan riti atu rai iha imi nia futu kabun. 10Keta lori pasta iha imi nia viajen. Keta lori faru rua, sandálias ka ai tonka. Tanba ema nebee servisu merese atu simu ninia hahaan. 11No sidade ka aldeia naran deit nebee imi tama, buka hatene ema nebee merese iha nebaa, no hela iha nebaa too imi sai fali hodi lao ba fatin seluk. 12Bainhira imi tama iha uma ida, kumprimenta uma kain nee. 13No se uma nee merese duni, husik imi nia dame hela iha nebaa. Maibee se uma nee la merese, husik imi nia dame fila fali ba imi. 14No see deit nebee la simu imi ka la rona imi nia liafuan, bainhira imi husik uma ka sidade nee, liki tiha rai rahun hosi imi nia ain. 15Tebes, Hau dehan ba imi, iha loron tesi lia nian, rai Sodoma no Gomora nia kastigu sei kamaan liu fali sidade ida nee nia kastigu.
Tempu Susar Sei Mai
16Tebes, Hau haruka imi baa hanesan bibi iha asu fuik sira nia leet. Nunee imi tenki matenek klean hanesan samea, no inosenti hanesan manu pombu. 17Kuidadu ba, tanba ema sei lori imi ba tribunál no sira sei baku imi ho sikoti iha sira nia sinagoga sira. 18No sira sei lori imi ba governadór sira no liurai sira nia oin tanba Hau nia naran. No imi sei foo testemunha iha sira nia oin no iha ema Jentiu sira nia oin. 19Maibee bainhira sira entrega imi ba tribunál, keta preokupa kona ba oinsaa imi sei koalia ka buat nebee imi sei hatete. Tanba imi sei simu liafuan iha oras nebee imi atu koalia. 20Tanba laos imi rasik koalia, maibee imi nia Aman nia Espíritu sei koalia liu hosi imi. 21Maun ida sei entrega ninia alin ba kastigu mate, no aman ida sei entrega ninia oan. Oan sira sei hamriik hasoru sira nia inan-aman, no entrega sira ba ema hodi oho sira. 22No ema hotu sei odi imi tanba Hau nia naran. Maibee nia nebee hela metin too rohan sei hetan salvasaun. 23Bainhira sira hanehan imi iha sidade ida, halai ba sidade seluk. Tanba tebes Hau dehan ba imi, katak imi sei la haleu sidade hotu iha Israel molok Ema Nia Oan mai.
24Eskolante ida la aas liu ninia mestri, no atan ida la aas liu ninia nai. 25Too ona katak eskolante ida mak hanesan ninia mestri, no atan ida mak hanesan ninia nain. Se sira temi naran Belzebu ba uma nain, oinsaa liu tan ba ema sira iha Ninia uma kain?
Keta Tauk
26 # 10:26 Bele lee iha Lucas 12:2-9. Nunee keta tauk sira. Tanba buat hotu nebee taka hela, sei nakloke; no buat hotu nebee subar hela, ema sei hatene. 27Buat nebee Hau dehan ba imi iha fatin nakukun, foo sai iha fatin naroman. No buat nebee imi rona bis-bisu, haklaken hosi uma leten. 28Keta tauk sira nebee bele oho isin lolon, maibee la bele oho klamar. Maibee hamtauk ba Nia nebee bele halakon klamar no isin lolon hamutuk iha infernu. 29Laos katak manu liin rua faan ho folin sentavus lima-nulu?#10:29 Lian Gregu ‘asarion ida’, nebee 1/16 hosi denarius ida, no sira selu denarius ida ba servisu loron ida. Maibee la iha manu liin ida nebee monu ba rai, se imi nia Aman la foo lisensa. 30Nia sura imi nia fuuk lahan hotu iha imi nia ulun. 31Nunee keta tauk, tanba imi nia folin nee boot liu fali manu liin barak. 32Nunee ema hotu nebee foo sai kona ba Hau iha ema nia oin, Hau mos sei foo sai kona ba nia iha Hau nia Aman iha lalehan nia oin. 33Maibee see deit nebee nega Hau iha ema nia oin, Hau mos sei nega nia iha Hau nia Aman iha lalehan nia oin.
Surik Ida, Laos Dame
34 # 10:34 Bele lee iha Lucas 12:51-53. Keta hanoin katak Hau mai atu lori dame ba mundu: Hau la mai atu lori dame, maibee atu lori surik ida. 35Tanba Hau mai atu halo mane ida kontra ninia aman, no oan feto ida kontra ninia inan, no feto foun kontra ninia banin feto. 36No mane ida nia inimigu mak sira nebee iha ninia uma kain rasik. 37See deit nebee hadomi ninia aman ka inan liu fali Hau, nia la merese atu sai Hau nian. No see deit nebee hadomi oan mane ka oan feto liu fali Hau, nia la merese atu sai Hau nian. 38See deit nebee la lori ninia krús#10:38 Iha lian Gregu, ‘krús’ refere ba ai riin hodi foo kastigu mate. Tuir Jesus ho ita nia moris tomak. no lao tuir Hau, nia la merese atu sai Hau nian. 39See deit nebee hetan ninia moris sei lakon fali ninia moris; no see deit nebee lakon ninia moris tanba Hau nia naran sei hetan fali ninia moris.
Simu Jesus
40See deit nebee simu imi, nia simu mos Hau. No see deit nebee simu Hau, nia simu mos Ida nebee haruka Hau. 41Ema nebee simu profeta ida tanba nia mak profeta duni, ema nee sei simu kolen profeta nian. Ema nebee simu ema moris loos tanba nia ema moris loos duni, ema nee sei simu kolen ema moris loos nian. 42No see deit nebee foo bee malirin kopu ida deit ba kiik-oan ida hodi hemu tanba kiik-oan nee mak eskolante ida, tebes Hau dehan ba imi, ema nee sei la lakon ninia kolen.”
Currently Selected:
Mateus 10: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.