Looma 6
6
Kufwa na kuba mwooyo kintwaari na Kiristo
1Ngo nki tuleelee ? Mu masumu tunamitinee kweetu, mpisi heki bweese bubuukila ? 2Pele, kadiri bubwo ko ! Beetu-meene bari twafwa mu masumu, buri tubweese kubeele bamwooyo mu masumu ? 3Ho ti beenu lwahele kuyaaba, ti beetu bobanso twabotikiri mu Kiristo Yisu, mu lufwa lwaandi turi twataambula mbotokulu ? 4Ngo beetu batudziika kintwaari na nde, mu mbotokulu mu lufwa, mpisi heki bunu bwafulukiri Kiristo mu bafwa, mu nkeembu ya Taayi, bunubwo se beetu, twedyaatila mu kidziingu kyamoono.
5Mukwongo, mbuti beetu twayeki muutu mosi na nde, mu lufwa lwafwanikina na lwa nde, lo sa twaba kintwaari na nde se mu mfulukulu. 6Butuyaari kuri ti, muutu weetu wamukulu bayeki bamukomono kintwaari na nde, mpisi heki nyutu ya masumu yiba yatsyaamunu, na tuhele kubweese kuba bankutu ba masumu. 7Bukuri, wunde wumwaafwa, lo walulukusu kwakinkulu mu masumu. 8Mbuti twafwa kintwaari na Kiristo, lo twasa kanyi ti sa twaba mwooyo kintwaari na nde. 9Butuyaari kuri ti Kiristo wafulukiri mu bafwa, kabweese kufwa ko, lufwa ka lubweese kuba na lutumu mu nde ko. 10Bukuri, wunde wafwiiri, wafwiiri lwolumosi mu ntoono masumu, ngo wunde wuri mwooyo, wuri mwooyo mu ntoono Nzaambi. 11Mu didyo, beenu se, beeneenu bunu lwafwa mu masumu beenu-meene, na bunu luri mwooyo mu Kiristo Yisu, mu ntoono Nzaambi.
12Ngo yaa lutala ko ti, masumu maba na lutumu mu nyutu yeenu ya mfwiilu, mpisi luhele kutumuma mu nyiimunu dza nyutu. 13Yaa lusalila binamu byeenu, bunu bisalulu bya bubayi, mu kuyirika masumu ko. Ngo beenu-meene salileenu Nzaambi, bunu baatu bamwooyo bafulukusu mu bafwa, na salileenu binamu byeenu, bunu binwaanunu bya nsungumunu mu kusalila Nzaambi. 14Masumu mabweese kuba na lutumu mu beenu ko, bukuri beenu lwahele mu lutumu lwa mangisi, ngo luri mu lutumu lwa bweese.
Kusalila nsungumunu
15Hango nki ? Masumu tukweyirika kweetu, bukuri twahele mu lutumu lwa mangisi, ngo turi mu lutumu lwa bweese ? Pele, kadiri bubwo ko ! 16Buri beenu lwahele kuyaaba ti, lutaambukila kusalila muutu bunu bankutu, lo lweki bankutu ba wunde wu luri mu kutambukila, bankutu ba masumu, mu kweende ku lufwa, bunu pele bankutu ba bintambukulu, mu kweende ku nsungumunu ? 17Matoondo kuri Nzaambi, bukuri beenu lwaba bankutu ba masumu, ngo lumwaataambukila mu mutima ndemunso, kiteesu kya nyikusulu dzibari baluha. 18Bu balukuula mu masumu, lwayeki bankutu ba nsungumunu. 19Mu kimuutu me nyiri mu kudzoonsolo, mu ntoono ya muswiinyi wahele na makwa. Bunu bu lwasariri binamu byeenu, bunu bankutu kuri nsumukunu, na kuri bubi, mu ntoono mamabi, bunubwo se mu lumalu, salileenu binamu byeenu bunu bankutu kuri nsungumunu, mu ntoono bungisi.
20Bukuri, mu ntaangu yi lwaba bankutu ba masumu, lwaba na bunsaalisi mu mitariri nsungumunu. 21Ngo nkya bimbutu luri na byo ? Mu lumalu beenu lweki na nsoni mu byo, bukuri manunu ya byo lufwa. 22Ngo mu lumalu, bu bamwaalukuula mu masumu, lweki bankutu ba Nzaambi, na luri na bimbutu mu mbakulu bungisi. Manunu ya byo ngo mwooyo wa bibvu ngo bibvu. 23Bukuri mufutu masumu ngo lufwa ; ngo kikabu kyamungengi kya Nzaambi, ngo mwooyo wa bibvu ngo bibvu, mu Kiristo Yisu Mfumu yeetu.
Currently Selected:
Looma 6: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024