Looma 1
1
Mboto
1Poolo, nkutu Yisu Kiristo, wataambula mbila mu kuba ntumu, na wubari basoolo mu ntoono Musamu Wamubwete wa Nzaambi. 2Nzaambi watekisiri kusa nsiilulu, kuri babikiri baandi mu Matinu Mangisi, 3mu mitariri Mwaana waandi, wabutukila mu kaanda dya Daavidi mu muswiinyi, 4wukari kasa Mwaana Nzaambi, mu mpinu, bunu buri Mpeeve yangisi, mu mfulukulu ya bafwa, ngo Yisu Kiristo Mfumu yeetu. 5Mu nde turi twataambula bweese na buntumu, mu kuri ti makaanda momanso matumuma mu kanyi, mu nkuumbu yaandi, 6munsa mo beenu se luri baatu, bataambula mbila Yisu Kiristo. 7Kuri banduku ba Nzaambi bobanso ba mutima, bari ku Looma, bataambula mbila mu kuba bangisi : Bweese na kiyeengi bifuminaa kuri Nzaambi, Taayi dyeetu, na kuri Mfumu Yisu Kiristo biba na beenu.
Poolo tiiri kweemono badibuundu bari ku Looma
8Hatete, me nyibvutula matoondo kuri Nzaambi yaami mu Yisu Kiristo, mu ntoono beenu bobanso, bukuri kanyi dyeenu bakwedzoonsolo mu dyo, mu nsi yansiina. 9Nzaambi mbaangi yaami, nde wunyisalilaa me mu mpeeve yaami, mu nyabusulu Musamu Wamubwete wa Mwaana waandi : Me nyibambukilaa beenu mwooyo kwahele kuhoto, 10mu nsaambulu dzaami, mu mantaangu momanso. Me nyiri mu kuloombaana mpisi mbaka, mu kutya kwa Nzaambi, mpwaanyi ya kwiisa kuri beenu. 11Bukuri nyiri na musoongo walaka wa kulumono, mpisi heki nyilutubukila kikabu kya kimpeeve, mpisi luba bakumusu. 12Mimyo, mu kuri ti tubeenee basyaamusu ha kimosi, ha nyiba kuri beenu, mu kanyi dyantwaari kuri beenu na kuri me.
13Bampaangi, me ntii ko ti beenu luba kunsa bundzimbu. Mantaangu malaka me nkootsimaa kwiisa, mu kutolo bimbutu kuri beenu na kuri makaanda makaka, ngo natee mu lumalu, me bankabikisa. 14Me nyiri na ma nyelemini kuyirika kuri Bangereke, na kuri banzeense, kuri bangaa-madyeele na kuri madzeeke se. 15Mu didyo, me nyiri na musoongo wa kuyaabisa Musamu Wamubwete, kuri beenu se bari Looma.
Mpinu dza Musamu Wamubwete
16Me nyahele na nsoni mu Musamu Wamubwete, bukuri nde ngo mpinu dza Nzaambi, mu mvuukulu ya mpisi wunde wusiila kanyi, hatete kuri Bayudayo, tumi kuri Bangereke. 17Bukuri nsungumunu ya Nzaambi yayabakana mu nde, mu kanyi na mu ntoono kanyi bunu bu diri dyatinu ti : « Ngaa-kusuunguma sa kaba mwooyo mu kanyi. »
Baatu bababi
18Mukwongo, kunu kinsongi-yulu, nkesi dza Nzaambi dzimonokinaa mu baatu bahele na kinzaambi, na bari na bubayi, basweekaa ngwanwa kunsa bubayi, 19ngo mari lo bayaabiri mu Nzaambi, mari mamonokono kuri bo, bukuri Nzaambi wabasoongo mo. 20Mukwongo, bitotolo bya nde byahele kumonokono, mpinu dzahele manunu na bunzaambi, kuholosono nyirikulu nsi, biri byamonokono mbuti babimwiinini mu biyiriki byaandi. Ngo bo ka babaka mpemisi ko, 21bukuri bu bayaaba Nzaambi, ka basii kumukeembese bunu Nzaambi ko, bunu pele kubvutula matoondo kuri nde ko. Kasi bayeki bamikangala mu nsimunu yaaku, na mu mitima mya bo mya buwulu, miri kunsa mampimbisi. 22Bo batsima kuba bangaa-madyeele, ngo bilawuku bari, 23na bayeki baha nkeembu Nzaambi yiri yafwaa ko, kuri biteki biri mu kifwaani kya muutu wufwaanaa, kya banoni, kya bibulu, na kya banyoko.
24Hango nkuumbu, Nzaambi kari kabayekele mu nsumukunu, mu nzila ya nyiimunu dza mitima myaaku, mu kuhele kukiinsa manyutu ma bo-meene. 25Bo bakituri ngwanwa ya Nzaambi yeki mpya, badumusini na basaambiri kiyiriki ha kibeendu kya Muyiriki, nde wuri wasakumunu kwahele manunu. Amene.
26Hango nkuumbu, Nzaambi kari kabayekele mu mantiilu mansoni. Mukwongo, bakyeetu ba bo bahotiri kwepala na babakala, mu kwesakisina na bambaasi bakyeetu. 27Bwobumosi se babakala, bahotiri kwepala na bakyeetu, basangumiki mu mampwiisu ma bo na bo, mu kweyirika myansoni babakala na babakala, na kutaambula mufutu wayelemene na nzimbukulu ya bo-meene.
28Ngo bukuri bahele na musoongo wa kuyaaba Nzaambi mu ngwanwa, Nzaambi wabayekele kunsa madyeele maaku mamabi, mu kweyirika mahele kuyelemene. 29Bayeki baluula mu momanso ma bubayi, mu mutima bubi, mu ntiki-mboongo, mu nyirikulu mamabi ; baluula mu musoki, mu nzusulu baatu, mu mayumu, mu mawunu, mu ndyaatulu dzadzibi. Bo bangaa-musaana, 30bangaa-makele, bataatu ba Nzaambi, bangaa-kinwa, bangaa-masiiku, bangaa-nzala-kubila, bari na madyeele mu nyirikulu mamabi, bari na tungu kuri bataayi na banguri. 31Bo bahele na madyeele, bahele na ngwanwa, bahele na musoongo mu bambaasi, bahele na mutima wangebe. 32Bo bayaari mukesu wa Nzaambi, ti bayirikaa ma bubwo lo bayelemini kubadzusa ; ngo kari kunu kuyirika bari mu kumiyirika ko, ngo bari mu kwesyaamisa se baatu, bakwemiyirika.
Currently Selected:
Looma 1: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024