Mankuma 3
3
Madyeele na ntumumunu kuri Nzaambi
1Mwaana waami, yaa dzimbikina nyikusulu dzaami ko,
na kebe ntumunu dzaami munsa mutima waaku.
2Bukuri sa bikubweese biluumbu na mibvu mu kidziingu
na kiyeengi kyalaka kuri ye.
3Mbweeyulu na ngwanwa yaa bikuyekele ko ;
ngo kaanga byo mu nkiingu yaaku,
na tina byo mu baya dya mutima waaku.
4Taambula bweese na ndubukulu yayibwete
ha busu bwa Nzaambi na bwa baatu.
5Kaangama mu Yaave mu mutima waaku ndemunso,
na yaa singimina mu dyeele dyaaku ko.
6Mu manzila maaku momanso, muyabikila,
na nde sa kasuungika misoki mya ye.
7Yaa monokono ngaa-madyeele ha busu bwa ye-meene ko.
Bvumina Yaave, na sasika na mamabi.
8Bubwo buba mvuukulu ye, maampa kuri biyisi byaaku.
9Ha lukiinsu kuri Yaave mu busina bwaaku,
na muha mintekesele mya lubaku.
10Na matalaka maaku sa maluulu mu bele,
na malu sa matsaamuka mu bikamununu.
11Mwaana waami, yaa nyaafuna nyikusulu dza Yaave ko,
mpisi heki ye hele kusaana ndubukulu dzaandi.
12Bukuri Yaave wuseembaa wunde wukatyaana,
bunu buseembaa taayi mwaana wukari katya.
Madyeele, muti wamwooyo
13Kiminu kuri muutu wunde wudzuukiri madyeele,
na wutaambiri nyukulu.
14Bukuri mbakulu ya mo yibvuri bubwete ti na mbakulu ya mboongo,
na mufutu wa mo bvuri bubwete ti na woolo.
15Madyeele mabvuri ntalu ti na miluungu myamibwete.
Biminu byobinso byahele kuyelemene na mo.
16Mu kooko kwaandi kwalubakala mo makwaata bula bwa biluumbu ;
mu kwalumoso mo makwaata busina na lukiinsu.
17Manzila mamo mari manzila madzuunu,
manzila maandi momanso manzila makiyeengi.
18Mari muti wa kidziingu, kuri babo bamasalilaa,
na bakaangama mu mo bari bangaa-lusakumunu.
19Yaave wabala nsi mu madyeele,
wakumisa mayulu mu nyukulu.
20Mbila dzikwehakama mu nyaabulu yaandi,
na matuti manokisaa mvula.
Yaave wukebaa ngaa-madyeele
21Mwaana waami, miisu myaaku yaa mitala bikimi ko,
hemese kuyaaba kuswasikisa na ndubukulu bikutwaalisa, kebe byo. 22Sa byakuha kidziingu kya kyakibwete.
23Ye sa nama nzila yaaku mu kidzuunu,
na miilu myaaku mibumuna kya ko.
24Mbuti waneŋene, lo wutekete mu boomo ko ;
tolo twaaku sa twaba twadzuuna.
25ye wubaka boomo bwa bu sisuu ko,
ti mu kikiindu kya bangaa-bubi ko. 26Bukuri Yaave sa kaba nsiitu dzaaku,
sa kakebe kuulu kwaaku mu myeete.
Kutya mbaasi yaaku
27Yaa bisa kuyirika mamabwe ko, kuri babo bari na nzala mo,
mbuti lo bangisini kumayirika.
28Yaa leele kuri mbaasi yaaku ko ti, bvutuka tumi ha kipari nyikuha,
mbuti wuri na kikari mu kukuloombo.
29Yaa kotolo mbaasi yaaku mbeesi nsa-nsaanda ko,
mbuti wadzakala mu kidzuunu ha teke ye.
30Kweyumuna pe na baatu,
mbuti bahele kukuyirikila dyadibi.
31Yaa wenyiima bangaa-kibakala ko,
na yaa soolo manzila maandi momanso ko.
32Bukuri Yaave wubelaa muutu wateengeme,
ngo Yaave wuyaabisa mansweeki maandi kuri baatu basuunguma.
33Mpopi ya Yaave yiri ha yulu nzo ngaa-bubi,
ngo nde wusakumunaa nzo muutu wasuunguma.
34Kuri bangaa-masiiku, nde se sa kasa masiiku,
kuri bakuluka, nde se sa kasoongo nkulukulu.
35Saala dya bangaa-madyeele ngo nkeembu,
ba biwulu sa bamono nsoni.
Currently Selected:
Mankuma 3: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024