Lutaangu 3
3
Bisalu bya kaanda dya Baleevi
1Bimabi ngo bilesi bya Aaroni na Moose, mu kiluumbu kyadzoonsiri Yaave kuri Moose ha mulaandu wa Sinayi. 2Mankuumbu ma baala ba Aaroni ngo mamama : Nadabi, watete mu kubutuka, Abihu, Elehadzari na Itamari#3.2 Kumono 26.60 ; Mpa 6.23.. 3Mamo ngo mankuumbu ma baala ba Aaroni, bangaanga-Nzaambi babakusiri maasi mu kisalu kya bungaanga-Nzaambi. 4Nadabi na Abihu bafwiiri ha busu bwa Yaave, mu ntaangu yi batweesi mbaawu yanzeense#3.4 Kumono Bal 10.1-7. bebele na Yaave, ku nsi yankatu ya Sinayi. Bo baba na baala ko. Elehadzari na Itamari basala kisalu kya bungaanga-Nzaambi ha busu bwa taayi dyaaku Aroni.
5Yaave waleele kuri Moose ti : 6« Kokosolo kaanda dya Baleevi ha teke ye, na wakiha kisalu ha busu bwa ngaanga-Nzaambi Aaroni, mu kuri ti bo baba bisari bya nde. 7Bo sa bamusalila na kusalila kimvuka kyokinso, ha mankula ma nzo yangooto ya mbwanukunu, mu kusala kisalu mu nzo yangisi. 8Sa basa bunkete mu bitotolo byobinso biri mu nzo yangooto ya mbwanukunu, na kusalila Iselili, na kusa bisalu mu nzo yangisi. 9Sa waha Baleevi kuri Aaroni na baala baandi. Sa baba bayakisa kuri nde ha kakati dya baala ba Iselili. 10Sa waha Aaroni na baala baandi kisalu kya bungaanga-Nzaambi. Muutu wamumpitu wukokosolo kukwo sa bamudzusa. »
11Yaave waleele kuri Moose ti : 12Me nsoorirye Baleevi ha kakati dya baala ba Iselili ha kibeendu kya baala bobanso babutuka batete, mu mpisi mwaana Iselili wabutuka watete mu nguri yaandi : Baleevi ba me. 13Bukuri baala bobanso batete bayeki ba me, kubaandika kiluumbu ki nyaseembiri me baala bobanso batete mu nsi ya Ngipiti, me nyasemini baala bobanso batete ba baatu natee ba bibulu ba Iselili, mu kuba ba me#3.13 Kumono 3.40-51 ; kufwanikisa na Mpa 13.1-16.. Bukuri me nyiri Yaave.
Ntaangulu yatete ya kaanda dya Leevi
14Yaave waleele kuri Moose ku nsi yankatu ya Sinayi ti : 15« Taanga baala ba Leevi bobanso bababakala, munu makaanda maaku na manzo maaku, kubaandika mu wuri na ngoondo mosi natee ku yulu. » 16Moose wabataanga mu lutuumu lwa Yaave, bunu bu kamutumini.
17Bamaba ngo baala ba Leevi mu mankuumbu maaku : Ngeresoni, Kehati na Merari. 18Mankuumbu ma baala ba Ngeresoni, bunu buri manzo maaku : Libeni na Simeyi. 19Baala ba Kehati, bunu buri manzo maaku : Amerami, Yitsehari, Heberoni na Udzyeli. 20Baala ba Merari, bunu buri bikuutu byaaku : Maheli na Musi. Bobanso babo kaanda dya Leevi, bunu buri makaanda maaku.
21Mu Ngeresoni kwabutuka kaanda dya ba Libeni na kya ba Simeyi, byobinso bibyo bikuutu bya Ngeresoni. 22Lutaangu lwa babakala bobanso, kubaandika mu wuri na ngoondo mosi natee ku yulu kukwo, lwasa 7.500. 23Binkutu bya Ngeresoni byaba byatuunga nzo yangooto yaaku ku mbisi nzo yangisi, ku lumoso. 24Mukuutu kaanda waba Elyasafe, mwaana Laheli. 25Kisalu kya baala ba Ngeresoni kya kukebe nzo yangooto ya mbwanukunu, nzo yangisi, nzo yangooto, bvuungu dyafuka nzo yangooto, nsaanda yamanika ha nkotulu nzo yangooto ya mbwanukunu, 26mansaanda mayalumuka ha mbasi ya nkotulu nzo yangooto na mu bibaka, mabvuungu mafuka kihekiri na dziku dya Nzaambi, mindala mya bisalu byobinso bya nzo ya lusaambulu.
27Mu muloongo wa Kehati : Kaanda dya Amerami, kaanda dya Yitsehari, kaanda dya Heberoni na kaanda dya Udzyeli. momanso mamo maba manzo ma Kehati. 28Lutaangu lwa babakala bobanso, kubaandika mu wuri na ngoondo mosi natee ku yulu kukwo, lwasa 8 300#3.28 (8 300) : Mu mbangukulu yayikulu mu mukaanda wa Kingereke, yayelemene na mamo mari mu kit.39 ; maampu ma mu Kihebereho matina (8 300).. Bo babasalaa mu kukebe kibeendu kyangisi. 29Manzo ma baala ba Kehati maba matuunga manzo mangooto mu mpele ya suude dya nzo lusaambulu. 30Mukuutu kaanda wa manzo ma Kehati waba Elisafani, mwaana wa Udzyeli. 31Kisalu kya bo kyaba kya kukebe nkobo, taabala, kikebulu kya miinda, madziku, bitotolo byobinso biri ha kibeendu kyangisi, bisalulu bya kutwaalisa lusaambulu, na mansaanda mamanika mu bibaka na ha mweelu wa kunsa kati.
32Mukuutu watete, mu bakuutu bobanso ba Baleevi, waba Elehadzari, mwaana ngaanga-Nzaambi Aroni. Nde wabatalaa bobanso bari na kisalu mu nzo yangisi.
33Mu Merari : Kaanda dya Mali na dya Musi ; mamo ngo makaanda ma Merari. 34Lutaangu lwa babakala bobanso, kubaandika wuri mu ngoondo mosi natee ku yulu kukwo, lwasa 6 200. 35Mukuutu kaanda mu manzo ma Merari waba Suryeli, mwaana wa Abihayili. Bo baba batuungu nzo yangooto ha teke nzo yangisi, mu mpele ya noode 36Kisalu kya bo kyaba kya kukebe mikookolo, mibabangu, makuunsi, bituungi na byobinso bya bisalu bya nzo ya lusaambulu. 37Bo babakebaa se makuunsi, lufulu, binko, bituungi na miinda, byobinso byakwaata nzo ku mbasi.
38Moose na Aaroni, kintwaari na baala baandi, baba batuunga manzo mangooto ha mankula ma nzo yangisi, mu mpele ya lubakala kupalilaa ntaangu, ha mankula ma nzo yangooto ya mbwanukunu. Kisalu kya bo mu Iselili, kyaba munsa nzo yangisi. Muutu wamumpitu waba tsiitsa kukokosolo lo haba kumudzusa.
39Moose na Aaroni bataanga Baleevi bobanso, mu lutumu lwa Yaave. Lutaangu lwa babakala bobanso munu manzo maaku, kubaandika mu bakukisa ngoondo mosi natee ku yulu kukwo, lwasa 22 000.
Nkuululu batete mu kubutuka
40Yaave waleele kuri Moose ti : « Taanga babakala bobanso batete mu kubutuka mu Iselili, kubaandika wuri na ngoondo mosi natee ku yulu kukwo, wubatinisa mankuumbu na kuyaaba lutaangu. 41Ye sa wuungula Baleevi mu ntoono me, me nyiri Yaave, ha kibeendu kya bobanso babutuka batete mu bari Iselili, na bibulu bya Baleevi ha kibeendu kya bibulu byabutuka byatete bya bari Iselili. » 42Moose wataanga babakala bobanso batete mu kubutuka mu Iselili, bunu bwatumini Yaave. 43Lutaangu lwa mankuumbu momanso ma babakala batete mu kubutuka, kubaandika wakukisa ngoondo mosi natee ku yulu kukwo, lwasa 22 273.
44Yaave waleele kuri Moose ti : 45« Holo baala ba Leevi ha kibeendu kya babakala bobanso batete mu kubutuka mu Iselili, na bibulu bya baala ba Leevi ha kibeendu kya bibulu bya bo. Baala ba Leevi sa baba ba me, me nyiri Yaave. 46Mu nkuululu ya 273, ya babakala batete mu kubutuka mu Iselili, bateeteke ha yulu lutaangu lwa baala ba Leevi, 47ye sa holo mipata mitaanu kuri mpisi muutu, bunu butuholaa mipata mu kiteesulu kya nzo yangisi, ye sa teese ma bilemu kuumi, 48na ye sa waha mipata mimyo kuri Aaroni na baala baandi, mu nkuululu ya lutaangu lubvuriri ha kakati dya bo. » 49Moose waholo mipata mya nkuululu mu lutaangu lwaba lubvuriri ha yulu, mu nkuululu Baleevi. 50Mu babutika batete mu baala ba Iselili, nde watolo 1 365 dza mipata. 51Moose waha mipata mya nkuululu mimyo kuri Aaroni na baala baandi, bunu bwaba lutumu lwa Yaave.
Currently Selected:
Lutaangu 3: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024