Lutaangu 4
4
Bisalu bya manzo ma Leevi
a. Babutuka mu Kehati
1Yaave waleele kuri Moose na Aaroni ti : 2Taangee baala ba Kehati ha kakati dya baala ba Leevi, mu mpisi nzo na mu mpisi kaanda, 3kubaandika mu wuri na mibvu makuumi matatu na ku yulu kukwo, natee wuri na mibvu makuumi mataanu, babo bakuka mu kusala mu nzo yangooto ya mbwanukunu. 4Kisalu kya baala ba Kehati kunsa nzo yangooto ya mbwanukunu ; kya kukebe bisalulu byangisi na ngisi. 5Mu ntaangu yi banaanguka mu kweende, Aaroni sa kiisa na baala baandi mu kusundula mansaanda mamanika, na kufuka nkobo ya lulelusunu. 6Sa bayala mukaanda kibulu na kuyala bvuunga dya lubuuyi lwabeenge, tumi bakaanga mikookolo mu nkobo mu kweyinata. 7Sa bayala nsaanda yikimi ya lino ya lubuuyi lwa mbala kikila, na kuteeteke bisalulu : Bibeke, nkoombo, mansasi, nkoombo dza bulu, mambasa na biyaayi bya bikabu bya malu ; na mampa mahele mpwiilu#4.7 Kumono Bal 24.5-9., bibyo sa byaba ha yulu taabala. 8Sa bayala nsaanda ya lubuuyi lwabeenge ha yulu byobinso, na mukaanda kibulu, na mikookolo mya kunaanguna nkobo. 9Sa baholo nsaanda ya lubuuyi lwa kikila mu kuyalimina ha yulu kikebulu kya miinda, na mikuru mya maasi. 10Sa badziinga byobinso kunsa mukaanda kibulu na kubiteeteke ha yulu kipooyi. 11Sa bayala nsaanda ya lubuuyi lwa kikila ha yulu dziku dyawoolo, na mukaanda kibulu, na kufulu mikookolo. 12Sa baholo bitotolo byobinso bi basalilaa ha kibeendu kyangisi, mu kubiteeteke ha yulu nsaanda ya lubuuyi lwa kikila, na kuyala mukaanda kibulu, na kubiteeteke ha yulu kipooyi. 13Sa bayusula maasi ha yulu dziku dya Nzaambi, na kuyala nsaanda yabeenge bunu makila 14Sa bateeteke byobinso bi basalilaa mu kutwaalisa ha yulu : Madziku, misomo, bikwangisini, mambasa, bisalulu byobinso bya dziku na sa bayalimina ha yulu bvuungu dya mukaanda dofina ; tumi basa mibabangu mya dziku. 15Aaroni na baala baandi bu bameeni kufuka kibeendu kyangisi na byobinso byangisi, ha mambisa haho baala ba Kehati sa biisa mu kubinata, mu ntaangu yi banaanguka mu kweende. Ngo bo bari mbumunina byangisi ko, mpisi bahele kufwa. Kikyo kisalu kya baala ba Kehati mu nzo yangooto ya mbwanukunu. 16Kisalu kya Elehadzari, mwaana ngaanga-Nzaambi Aaroni, kya kukebe maasi ma kunamika miinda, libano dya kufwiitisa mwiisi wamfuku yayibwe, bikabu bya kuyoko byahele mpwiilu, maasi ma kukwasa, na kisalu kya kusa bunkete mu nzo yangisi yoyinso na byobinso biri ha kibeendu kyangisi.
17Yaave waleele kuri Moose na Aaroni ti : 18« Yaa luyusula kabu dya bakuutu ba Kehati ha kakati dya Baleevi ko. 19Luyelemini kuyirika mamama mu bo, mu kuri baba mwooyo, mpisi bahele kufwa mu ntaangu yi bakokosolo ku kibeendu kyangisi na ngisi : Aaroni na baala baandi, sa babanata na kubatelemese muutu ngo muutu ha kibeendu kyaandi kya kisalu. 20Mu didyo bo bari nkokosolo mu kumono bitotolo byangisi ko, mu kuri ti bahele kufwa. »
b. Babutuka mu Ngeresoni
21Yaave waleele kuri Moose ti : 22« Taanga se baala ba Ngeresoni, mu mpisi kaanda na mu mpisi nzo. 23Kubaandika mu wuri na mibvu makuumi matatu natee mu wuri na mibvu makuumi mataanu, sa wabataanga mu kusa kisalu munsa nzo yangooto ya mbwanukunu 24Kisalu kya kaanda dya Ngeresoni, kinati ki babatwiika kimaki : 25Bo sa banata nsaanda yafuka kibeendu kyangisi, nzo yangooto ya mbwanukunu, mabvuungu na mikaanda mya kibulu myayala ha yulu nde, na mansaanda mamanika ha nkotulu nzo yangooto ya mbwanukunu, 26na mansaanda madyengekele ku mbasi, na mabamanikaa ha mweelu wa nkotulu ku mbasi ya nzo yangisi, kuri dziku dya Nzaambi, na misiinga, na bitotolo byobinso bya kisalu, na bisalulu byayirika mu kisalu kya bo#4.26 Kumono Mpa 26.1-14 ; 27.9-16.. 27Mu lutumu lwa Aaroni na baala baandi, baala ba Ngeresoni bobanso sa basala kisalu kyokinso kya kunata bitotolo. Sa lubasoolo mu kusa kisalu kikyo na kubatwiika kinati kyaaku. 28Bibyo ngo bisalu bi baheeri kuri kinkaaka kya Ngeresoni kunsa nzo yangooto ya mbwanukunu. Itamari, mwaana ngaanga-Nzaambi Aaroni, wukwetala bisalu bya bo. »
Babutuka mu Merari
29« Taanga se baala ba Merari, mu kinkaaka kyaaku na makaanda maaku. 30Kubaandika mu wuri na mibvu makuumi matatu na ku yulu kukwo, natee mu wuri na mibvu makuumi mataanu, ye sa wabataanga mu kuri ti basala munsa nzo yangooto ya mbwanukunu 31Kimaki ngo kisalu kya bo, kinati kibabatwiikiri munsa nzo yangooto ya mbwanukunu : Kunata mabaya, mibabangu, na makuunsi ma nzo yangisi, 32makuunsi ma lupaangu, binko bya lufulu, bituungi, mindala na bisalulu byobinso bya kisalu. Bangaanga-Nzaambi sa baleele kuri mpisi muutu lutaangu lwa bitotolo bikayelemini kunata. 33Kikyo ngo kisalu kya kaanda dya baala ba Merari mu nzo yangooto ya mbwanukunu, mu lutumu lwa Itamari, mwaana ngaanga-Nzaambi Aroni. »
Ntaangulu Baleevi bakiri mu kisalu
34Moose, Aaroni na bamfumu ba kimvuka bataanga baala ba Kehati, mu mpisi nzo na mu mpisi kaanda, 35bobanso bari kuholosono mibvu makuumi matatu na ku yulu natee mu mibvu makuumi mataanu, baba bakuka mu kusa kisalu mu nzo yangooto ya mbwanukunu. 36Babataangiri mu bo, mu mpisi nzo, baba 2 750. 37Bubwo bwaba babataangiri mu myooyo mya Kehati, bobanso babasalaa munsa nzo yangooto ya mbwanukunu ; Moose na Aaroni babataanga mu lutumu lwa Yaave lukaheeri mu munwa Moose. 38Babo babataangiri mu baala ba Ngeresoni, mu mpisi nzo na mu mpisi kaanda, 39kuholosono mibvu makuumi matatu na ku yulu natee mu wuri na mibvu makuumi mataanu, bobanso baba bakuka mu kusala mu nzo yangooto ya mbwanukunu, 40Babo babataangiri mu bo, mu mpisi nzo na mu mpisi kaanda, baba 2 630. 41Bubwo bwaba babataangiri mu myooyo mya baala ba Ngeresoni, bobanso babasalaa mu nzo yangooto ya mbwanukunu ; Moose na Aaroni babataangiri mu lutumu lwa Yaave. 42Babo babataangiri mu myooyo mya baala ba Merari mu mpisi nzo na mu mpisi kaanda, 43kuholosono mibvu makuumi matatu na ku yulu natee mu wuri na mibvu makuumi mataanu, bobanso baba bakuka mu kusala mu nzo yangooto ya mbwanukunu, 44babataangiri mu bo, mu mpisi nzo baba 3 200. 45Bubwo bwaba babataangiri mu manzo ma baala ba Merari ; Moose na Aaroni babataangiri mu lutumu lwaheeri Yaave kuri Moose. 46Baleevi bobanso bataangiri Moose, Aaroni na bamfumu ba Iselili, mwooyo-mwooyo, nzo nzo, 47kuholosono mibvu makuumi matatu na ku yulu natee ku mibvu makuumi mataanu, bobanso baba bayelemene mu kusala kisalu kya bisari na kya banati, mu nzo yangooto ya mbwanukunu, 48bobanso babataangiri mu bo baba 8 580.
49Mu lutumu lwa Yaave, Moose wabataanga mpisi nde mu kisalu na kinati kyaandi, kyatumini Yaave kuri Moose.
Currently Selected:
Lutaangu 4: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024