Mataayi 27
27
Yisu ha busu bwa Pilato
(Mal 15.1; Luk 23.1-2; Ywa 18.28-32)
1Bwiisi bu bwakya, bakuutu ba bangaanga-nzaambi bobanso, na bakulu bababakala ba kaanda, bakaanga mfuundu mu ntoono Yisu, mpisi bamudzusa. 2Bamukaanga, bamunata na bamuyekele kuri Pilato, ngoforo.
Lufwa lwa Yuuda
(Biy 1.18-19)
3Yuuda waba kumuyekele, bu kamono ti bakesiri Yisu mukanu wa lufwa, wayiinga bitsimi, wabvutula makuumi matatu ma mipata, kuri bakuutu ba bangaanga-nzaambi, na bakulu bababakala, 4waleele ti : « Me nyayirikiri masumu mu kuyekele muutu wahele kuyaaba ntoono ! » Bo baleele ti : « Diri dyaambu dya beetu ko, ngo mikutariri ! » 5Nde bu katuba mipata mu Nzo-Nzaambi, wapala, wayende kwa la, na waleleme. 6Bakuutu ba bangaanga-nzaambi, bu baholo mipata mimyo, baleele ti : « Kwahele miswa mu kweetuba myo mu kikebulu, bukuri ntalu makila. » 7Bu bakaanga mfuundu, basuumba mu mipata mimyo, nseke ya mubuumbi, mu mampeembe ma banzeense. 8Mu didyo, bakooteelaa nseke yiyo, « nseke ya makila » natee mu lumalu. 9Haho, maleeriri mubikiri Yeremi mayende mu mana, waleele ti : « Bo baholo makuumi matatu ma mipata, ntalu yiyo, baala ba Iselili bari baleele, mu muutu wunde wubari bakesele ntalu, 10na bo baha mipata mimyo mu nseke mubuumbi, bunu bwaheeri Mfumu lutumu kuri me. »
Pilato waha Yisu bifuuri
(Mal 15.2-5; Luk 23.3-5; Ywa 18.33-38)
11Yisu bamutelemese ha busu bwa ngoforo ; na ngoforo wamufuula ti : « Buri ye ngo mbyaasi Bayudayo ? » Yisu waleele ti : « Ye wuleele. » 12Mu ntaangu yaba mufuundaa bakuutu ba bangaanga-nzaambi, na bakulu bababakala, nde kasii bvutula ntoono ko. 13Haho, Pilato kaleele kuri nde ti : « Buri ye wahele kuyuka myalaka mibari mu kukufuundila ? » 14Nde kasii leele ntoono ti mosi ko, mu kumuha mvutu, mu kiteesu kiri ngoforo wakimuka kwalaka.
Yisu bamukesele mukanu wa lufwa
(Mal 15.6-15; Luk 23.13-25; Ywa 18.39–19.16)
15Mu mpisi munkeembu ngoforo waba na kifu kya kupalisaa boroko dimosi, bunu bwaba kutya kwa baatu. 16Haho, kwaba muutu mosi waba mu boroko, wayabakana, nkuumbu yaandi, Yisu Baraba. 17Baatu bu baba bakutukina, Pilato wabafuula ti : « Beenu na lutiiri ti me nyilupatukila, Yisu Baraba ho ti Yisu wubateelaa ti Kiristo ? » 18Mukwongo, Pilato waba yaari ti mu musoki bamuyekiryee. 19Bu kaba kadzakala ha kibala kya mutsuundu, mukasi waandi wamuheeke mukeensu ti : « Yaa kuba musamu ko, ha kakati dya ye na muutu wasuunguma wu, bukuri me mbaminyee kwalaka, lolo di mu ndosi mu ntoono nde. » 20Bakuutu ba bangaanga-nzaambi, na bakuutu bababakala, basinda mampuumbu, mpisi baloombo Baraba na badzusa Yisu. 21Ngoforo wabvutula, waleele kuri bo ti : « Na mu boboolo beenu lutiiri ti me nyilupatukila ? » Bo babvutula ti : « Baraba ! » 22Pilato waleele kuri bo ti : « Heki me nki nyisa mu Yisu wu bakooteelaa ti Kiristo ? » Bobanso baleele ti : « Kaba wakomono ha kuruwa ! » 23Ngoforo waleele ti : « Nkya mamabi kari kayirika ? » Bo bahamisa kubikisa baleele ti : « Kaba wakomono ha kuruwa. » 24Pilato kamonaa ti mufunu pe, ngo kisaangala kiri mu kwisikila, waholo maampa, waswaaka myooko ha busu bwa mpuumbu, waleele ti : « Me nyiri na ntoono ko mu makila ma muutu wu. Mi lutariri beenu-meene. » 25Baatu bobanso babvutula, baleele ti : « Makila ma nde mabwa mu beetu, na mu baala beetu. » 26Haho, nde kabapatukila Baraba, ngo Yisu bamanaa kumulata nkwaasulu, Pilato wumuyekiri mpisi kaba wakomono ha kuruwa.
Bayongolo basiila Yisu munsiku
(Mal 15.16-20; Ywa 19.2-3)
27Haho, bayongolo bangoforo banata Yisu munsa nzo ya mutsuundu, mpuumbu yoyinso yamukutukina. 28Bu bamusyoonono binkutu, bamudziinga kiyuungu kyabeenge. 29Bamuyirikila mpu ya manseende, bamulwiika yo ku yulu mutu, na bamusiila dyaari ha kooko kwalubakala. Bu bamutsukumina, bamusiila munsiku, bamuleele ti : « Mboto yaaku, mbyaasi Bayudayo ! » 30Bamufulula mante, baholo dyaari, babeke kumulata ha yulu mutu waandi. 31Bamana kumusiila munsiku, bamusyoonono kiyuungu kyabeenge, babweese kumulwiika binkutu bya nde-meene, ha bamunata mu kweemukomono ha kuruwa.
Yisu bamukomono ha yulu kuruwa
(Mal 15.21-32; Luk 23.26-43; Ywa 19.17-27)
32Bu bapala, bamono muutu mosi, wa ku Kirene, nkuumbu yaandi Simoni, bamukwiikisa mpisi kanata kuruwa dya Yisu. 33Batubuka ku kibeendu ki baleelaa ti Ngolongota, mbangukulu ti « Kibeendu kya kiteengi kya mutu. » 34Bamunwiisa malu masaanga na nsoko-nyoongo, ngo, bu kamabiimba, kasiiri kutya kunwa ko. 35Bu bamana kumukomono ha yulu kuruwa, bakaba binkutu bya nde mu nteelu wari, 36na bu baba badzakala, bamukebe hanaho. 37Baba basuusa ha yulu mutu waandi, kooti dyaandi, dyatinu ti : « Wumawu ngo Yisu, mbyaasi Bayudayo. » 38Hanaho, bakomono se kintwaari na nde, bangaa-bubi boolo, mosi ku lubakala na mosi ku lumoso. 39Babalutaana haho, baba mutukaana, banyingisa mitu, 40na baleele ti : « Ye mutsaamini nzo yangisi na mutuungi yo, mu biluumbu bitatu, bvuuka ye-meene, mbuti ye ngo Mwaana Nzaambi, na sunduka ha kuruwa. » 41Bwobumosi se, bakuutu ba bangaanga-nzaambi, Batini ba mangisi, na bakulu bababakala, baba musiilaana munsiku baleele ti : 42« Nde wabvuukisiri bakaka, ngo wahele kubangisina kubvuukisa nde-meene ; nde mbyaasi ya Iselili, kasunduka mu lumalu ha kuruwa, na beetu tusa kanyi mu nde. 43Nde wasiiri nsiitu mu Nzaambi, kamukuula lumalu, mbuti tiiri ; bukuri nde waleeriri ti : "Me ngo Mwaana Nzaambi." » 44Bwobumosi se, bangaa-bumfuna babakomini kintwaari na nde, baba mutukaana.
Mfwiilu Yisu
(Mal 15.33-41; Luk 23.44-49; Ywa 19.28-30)
45Kuholosono mu kilookolo kyabisaamunu, natee mu kyawa, mampimbisi mabwa mu butoto bwobunso. 46Bebele na kilookolo kyawa, Yisu wafula mu mbeembu yamakwa, waleele : « Eliya, Eliya, lama sabakatani ? » Mbangukulu ti : « Nzaambi yaami, Nzaambi yaami, buri ye yekiri me ? » 47Babamosi baba bateleme haho, bu bayuka baleele ti : « Wuri mu kuteele Eliya ! » 48Hanaho, mosi mu bo wadzumuna, waholo musasaka, watsuuba mu bviinya dyansa, wakaanga mu dyaari, na wamunwiisa. 49Bakaka baleele : « Hemesee tumonee kari tumi Eliya kamubvuukisa ! » 50Yisu wabweese kufula mu mbeembu yamakwa na wayakisa kiluunsi kyaandi. 51Na mono, nsaanda ya nzo yangisi yatyaabuka mu bibari byoolo, kuholosono ku yulu natee ku nsuku, na butoto bwatembele, matari mabaarika. 52Mampeembe myadzibulu, baatu balaka bangisi baba bafwa bafuluka. 53Bu bapala mu mampeembe, ha mambisa ma mfulukulu yaandi, bakoto mu bvula dyangisi, na bamonokono kuri baatu balaka. 54Mukutu nkama bayongolo, na baba kintwaari na nde mu kukebe Yisu, bu bamono ntembukulu ya butoto, na mamo yirimini, babaka boomo bwalaka, baleele ti : « Ngwanwa, wumawu wabeeri Mwaana Nzaambi ! » 55Kwaba bakyeetu balaka baba haho, baba talilaana. Bo baba kwefilaa Yisu, kuholosono ku Ngalile mu kwemusalila. 56Mu bo, kwaba Maari ma ku Mangadala, Maari ma nguri Yaakobo bo na Yoosefi, na nguri baala ba Dzebede.
Yisu bamudziika
(Mal 15.42-47; Luk 23.50-56; Ywa 19.38-42)
57Nsinsika bu yatubuka, mubakala mosi wakisina, wa ku Arimatayi, nkuumbu yaandi Yoosefi, wayisa. Nde se waba muyiki Yisu. 58Bu kakokosolo kuri Pilato, wamuloombo nyutu Yisu. Pilato waha lutumu ti bamuha yo. 59Yoosefi, kamanaa kuholo nyutu, wayidziinga kunsa mutulu watsyeeme. 60Nde wasuusa yo mu bulu dyamoono dya nde-meene, di kahakiri mu tari. Bu kanengemese tari dyadinene, mu kuduka bulu, nde wayende. 61Maari ma ku Mangadala na Maari makaka, baba haho badzakala ha teke bulu.
Nkebulu mampeembe ma Yisu
62Kiluumbu kyanama, kiri ha mambisa ma nyirimunu, bakuutu ba bangaanga-nzaambi na Bafarisi bakutukina ku nzo Pilato, 63baleele ti : « Mfumu, beetu tubaambuka mwooyo ti mudziimbisi wunde, ha kabee mwooyo, waleeriri ti : "Ha mambisa ma biluumbu bitatu, me sa nyafuluka." 64Hango, ha lutumu mpisi heki, bakebe mampeembe, natee mu biluumbu bitatu, mu kubata kuri ti bayiki baandi, bakwiisa kumuyiba, na kuleele kuri baatu ti : "Nde fulukiryee mu bafwa." Nzimbusulu yampotulu yiyo, sa yibvula bubi ti na yatete. » 65Pilato wabaleele ti : « Beenu luri na babo bakebe. Yendee lukebe bunu bu luyaabiri. » 66Bo bayende na basuusa bakebe mampeembe, bakaanga tari na batelemese bakebi.
Currently Selected:
Mataayi 27: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024