Mataayi 26
26
Yisu bamukutula mamfuundu
(Mal 14.1-2; Luk 22.1-2; Ywa 11.45-53)
1Yisu bu kamanaa kudzoonso misamu myominso mimyo, waleele kuri bayiki baandi ti : 2« Beenu luyaari ti, biluumbu byoolo bisiiri lo Paaka ditubukiri, na Mwaana muutu bee bamuyekiri, mpisi kaba wakomono ha kuruwa. » 3Hanaho, bakuutu ba bangaanga-nzaambi, na bakulu bababakala ba kaanda, bakutukina ku nzo mukuutu bangaanga-nzaambi, wuri nkuumbu Kayifa. 4Bo basa mamfuundu, mpisi heki basaka bu bakaanga Yisu, mu myampya na bamudzusa. 5Bo baleele ti : « Yaa diba mu ntaangu ya munkeembu ko, mpisi heki kisaangala kihele kubwa ha kakati dya baatu. »
Mukyeetu mosi wayitila mananaasi ha yulu mutu Yisu
(Mal 14.3-9; Ywa 12.1-8)
6Yisu bu kaba ku Betani, ku nzo Simoni mubeeru bwaasi, 7mukyeetu mosi wakokosolo kuri nde, na yuku dya mananaasi mantalu yalaka, na wayitila mo ha yulu mutu Yisu, kuri wuri mu kudya. 8Bayiki bu bamono bubwo, babaka nkesi na baleele ti : « Buri babvukiri kwaandi mananaasi ma ? 9Mukwongo, baketyee kumayarika mu ntalu yalaka, na kuha mboongo kuri bawelu ! » 10Yisu bu kayaaba, waleele kuri bo ti : « Mu nki ntoono beenu luri mu kubamisa mukyeetu wu ? Mukwongo, kiyiriki kyakibwete nde kasiiri mu me. 11Bukuri, mu mantaangu momanso, beenu luri kintwaari na bawelu, ngo beenu lwahele kuba kintwaari na me, mu mantaangu momanso. 12Nde mu kuyitila mananaasi ma mu nyutu me, yirikiri mamo mu nziikulu me. 13Mu ngwanwa, me nyiluleele ti, kukwo kubayaabisa Musamu Wamubwete wu, mu nsi yansiina, sa badzoonsolo se mu mamo, makayirikiri, mu kumubambukila mwooyo. »
Yuuda wasaka bwa kuyekele Yisu
(Mal 14.10-11; Luk 22.3-6)
14Haho, mosi mu bo kuumi na boolo, wuri nkuumbu Yuuda Isekaryote, wayende kuri bakuutu ba bangaanga-nzaambi, 15waleele ti : « Nki lutiiri kumpa, mpisi me nyimuyekele kuri beenu ? Bo bamuteesele makuumi matatu ma mipata. » 16Kuholosono haho, Yuuda waba kwesaka mpwaanyi yayibwe, mpisi heki kamuyekele.
Yisu wadya Paaka na bayiki baandi
(Mal 14.12-21; Luk 22.7-14,21-23; Ywa 13.21-30)
17Mu kiluumbu kyatete, kya mampa mahele lufunusu, bayiki bakokosolo kuri Yisu, baleele ti : « Kuri ye tiiri, ti beetu tukuyirikila ndiilu ya Paaka ? » 18Nde waleele ti : « Yendee ku bvula kuri kisungulu, na muleele ti : "Muyikisi ti : Ntaangu ya me yikokisiri. Ku nzo ye me nyidiila Paaka na bayiki baami." » 19Bayiki basa bunu bwa batumini Yisu, na bayirika Paaka. 20Nsinsika bu yatubuka, nde wabeke mu kudya kintwaari na bo kuumi na boolo. 21Bu baba mu kudya, nde wabaleele ti : « Mu ngwanwa me nyiluleele ti, mosi mu beenu bee yekiri me. » 22Bo bamono ngebe dzalaka, babaandika mu kumuleele mosi mosi ti : « Buri me, Mfumu ? » 23Nde wabvutula, waleele ti : « Wunde wukotoso kooko ha kimosi na me mu lukoombo, wunde wunyekele. 24Mukwongo, Mwaana muutu wuri mu kweende, bunu bu diri dyatinu mu ntoono ya nde. Ngo, kyaari kuri muutu wunde, wuri nzila yi bayekekele Mwaana muutu. Bwaketi kubvulila bubwete kuri muutu wunde, mu kuhele kubutuka ». 25Yuuda waba kumuyekele waleele kuri nde ti : « Buri me, Muyikisi ? » Yisu wabvutula kuri nde ti : « Ye leeriri. »
Ndiilu yangisi
(Mal 14.22-26; Luk 22.14-20; 1 Ko 11.23-25)
26Bu baba mu kudya, Yisu waholo mpa, bu kasakumuna yo, wabukuna yo, na bu kaha kuri bayiki, waleele ti : « Holeenu, dyeeneenu yimayi ngo nyutu yaami. » 27Bu kaholo mbasa, wabvutula matoondo, wabaha, waleele ti : « Nweenee yo beenu bobanso. 28Bukuri mamama ngo makila maami, ma lulelusunu matsaamuka mu balaka, mu ntoono mpemusunu ya masumu. 29Me nyileele kuri beenu : Me ka nyibweese kunwa malu ma bviinya ko, kubaandika lumalu, natee kiluumbu kikyo ki nyibweese kumanwa kintwaari na beenu, mu Kimfumu kya Taayi dyaami. » 30Bu bamana kuyimbila mikuunga mya ndumusu, bayende ku Mulaandu wa Mi-olibve.
Yisu wayaabisa ti Peetelo sa kamutuna
(Mal 14.27-31; Luk 22.31-34; Ywa 13.36-38)
31Haho, Yisu waleele ti : « Beenu bobanso bee lubwiiri mu ntoono me, mu butsuku bumabu, bukuri diri dyatinu ti : "Me sa nyalata mutari, na mpuumbu bimeeme sa yatsamukina." 32Ngo me manaa kufuluka, sa nyalutekesele ku Ngalile. » 33Peetelo wamuleele ti : Ntaangu yi wuba ye mpwaanyi ya mbwiilulu kuri bobanso, ye wuba bumosi mu me ko. 34Yisu wamuleele ti : Mu ngwanwa, me nyikuleeriri ti, mu butsuku buubu, tekesele mulumi nsusu kakookolo, ye sa tuna me mbala tatu. 35Peetelo wamuleele ti : Ti hayuku dya kufwa kintwaari na ye, lo me nyiri ntunina ye ko ! Na bayiki bobanso se baleele bunubwo.
Yisu wasaambila ku Ngetesemane
(Mal 14.32-42; Luk 22.39-46)
36Yisu wayende na bayiki baandi, ku kibeendu kimosi kiri nkuumbu Ngetesemane. Nde waleele kuri bo ti : « Dzakilee hamaha mu ntaangu yi nyisasika me, mu kwesaambila hanii. » 37Bu kaholo Peetelo na baala boboolo ba Dzebede, wabaandika kumono ngebe na kubwilikila kinkuuka. 38Haho, nde waleele kuri bo ti : « Mutima me weki na ngebe natee mu kiteesu kya lufwa ; beenee hamaha, na beenee naana kintwaari na me. » 39Bu kayende mwaa kimamanga, nde wabwa kuri watsuka busu ha nsi, wasaambila waleele ti : « Taayi dyaami, mbuti bwakuka, lo hemese mbasa yimayi yiluta la na me. Kasi kari bu ntiiri me ko, ngo bu tiiri ye. » 40Nde wabvutuka kuri bayiki, wabamono babwa tolo, waleele kuri Peetelo ti : « Bumabu, lukoonini kweenu kuba naana, kilookolo kimosi kintwaari na me ? 41Beenee naana na saambileenu, mpisi luhele kukoto mu nsindukulu. Kiluunsi kiri na makwa, ngo muswiinyi wuri na buyonsi. » 42Nde wabweese kusasika lwadzoolo, wasaambila, waleele ti : « Taayi dyaami, mbuti mbasi yimayi yiri ndutula, kuri me nyahele kuyinwa ko, lo hemese kutya kwa ye kuyirima ! » 43Bu kabweese kubvutuka, wabamono babwa tolo, bukuri miisu mya bo myaba myaleme. 44Bu kabasiisa wabweese kusasika, wasaambila mbala yatatu, wabweese kulandikina maampu momamosi. 45Haho, nde wabvutuka kuri bayiki na waleele kuri bo ti : « Bu lusii bu, bweenee kweenu tolo, na wuumeenu. Mono, kilookolo kikokisiri, na Mwaana muutu bee bamuyekiri mu myooko mya bangaa-masumu. 46Siimbikeenu, tweendeenu. Mono, wunde nyekele kokisiri ! »
Yisu bamukaanga
(Mal 14.43-50; Luk 22.47-53; Ywa 18.3-12)
47Yisu bu kaba wakiri mu kwedzoonso, mono, Yuuda mosi mu bo kuumi na boolo, nde watubuka na mpuumbu baatu yayinene, bari na mambeesi mamala, na mboto. Bakuutu ba bangaanga-nzaambi na bakulu bababakala ba kaanda, babaheekiri. 48Wunde waba kumuyekele, wabaheeri kidiimbu waleele ti : « Wunde wu nyinyumbutina me, ngo nde, mubwiilileenu. » 49Hanaho, Yuuda bu kakokosolo kuri Yisu, waleele ti : « Mboto Muyikisi ! » Na wamunyumbutina. 50Yisu waleele kuri nde ti : "Nduku yaami, mu bubwo ye wuri hamaha ! Haho, bu bakokosolo, bamubwiila na bamukaanga. 51Na mono, mosi mu baba kintwaari na Yisu, kayulilaa mbeesi yaandi yayila, walata kisari kya mukuutu bangaanga-nzaambi, wamutabula kutu. 52Haho, Yisu waleele kuri nde ti : Bvutula mbeesi yaaku ha kibeendu ki yibeeri ; bukuri, babo baholo mambeesi sa bafwiila mu mambeesi. 53Buri ye butsimini ti, me lo nyahele kuyingukila taayi dyaami, mpisi nde kasuusa ha teke me, mu kilookolo ki, mikaangu mya bambasi myaluta kiteesu kyakuumi na myoolo ? 54Buri Matinu makwendekele mu mana, mu bana diyelemini kuba bubwo ? 55Mu kilookolo kinikyo, Yisu waleele kuri mampuumbu ti : Beenu lupariryee na mambeesi mamala na mboto, mu kukaanga me, bunu ti me ngaa-bumfuna. Biluumbu byobinso, me nyabee dzakalaa mu Nzo-Nzaambi mu kuyikisa, na beenu lwasii kwiisa mu kukaanga me ko. 56Ngo myominso mi mitubukiri mpisi heki, matinu ma babikiri meende mu mana. Hanaho, bayiki bobanso bamuyekele na bayitika.
Yisu ha busu bwa kikuutu
(Mal 14.53-65; Luk 22.54-55,63-71; Ywa 18.13-14,19-24)
57Bo bamana kukaanga Yisu, bamunata ku nzo Kayifa mukuutu bangaanga-nzaambi, kukwo kwaba kwakutukina Batini ba mangisi, na bakula bababakala. 58Peetelo waba kwemunamaana kila-kila, natee ku mbasi ya nzo mukuutu bangaanga-nzaambi. Bu kakoto kunsa kati, wadzakala bo na bisari mu kumono manunu. 59Bakuutu ba bangaanga-nzaambi, na kikuutu kyokinso, babasakaana kimbaangi kyampya mu Yisu, mpisi bamudzusa. 60Ngo basii baka bimbaangi byampya ko, ha kakati dya balaka baba kokosilaana. Mwaantaangu bu yaluta, baatu boolo bakokosolo, 61baleele ti : « Wumawu wabee leele ti : "Me lo nsyaamini Nzo-Nzaambi, na mu biluumbu bitatu mbweesiri kuyituunga." » 62Mukuutu bangaanga-nzaambi, bu kateleme, waleele kuri nde ti : « Ye wahele kubvutula ntoono ? Nkya kimbaangi bamaba bari mu kuleele mu ye ? » 63Yisu waba wawura. Mukuutu bangaanga-nzaambi waleele kuri nde ti : « Me nyikuloombo, mu nkuumbu ya Nzaambi yamwooyo, tuleele mbuti ye ngo Kiristo, Mwaana Nzaambi. » 64Yisu waleele kuri nde ti : « Ye leeriri. Ngo me nyileele kuri beenu ti : Kuholosono lumalu, beenu sa lumono Mwaana muutu wadzakala ha lubakala lwa mpinu, na wuri mu kwiisa mu matuti mayulu. » 65Haho, mukuutu bangaanga-nzaambi wakaakila binkutu byaandi, waleele ti : « Nde saanini Nzaambi, buri tubweese kuba kwaandi na nzala bambaangi ? Mu lumalu beenu luyukiri nsaanunu. 66Nkya mo lutsimini ? » Bo babvutula, baleele ti : « Nde wayelemene mukesu wa lufwa. » 67Bo bamufulula mante ku busu bwaandi, na bamulata mambata, bakaka bamusyaala mboto, 68baleele ti : « Bikula mu beetu, Kiristo, leele na wukuleti ? »
Peetelo watuna Yisu
(Mal 14.66-72; Luk 22.56-62; Ywa 18.15-18,25-27)
69Peetelo waba wadzakala kunsa mbasi. Kisari kimosi kyamukyeetu wakokosolo kuri nde, na waleele ti : « Ye se bee kintwaari na Yisu, wa ku Ngalile. » 70Nde watuna ha busu bwa bobanso, waleele ti : « Me nyahele kuyaaba nkya mo ye wuri mu kudzoonso. » 71Bu kaba mu kweende ku teke mweelu, kisari kikimi kyamukyeetu kyamumono, na kyaleele kuri baba haho ti : « Wumawu se bee kintwaari na Yisu, wa ku Nadzareti. » 72Nde wabweese kutuna mu ndabulu maalu ti : Me nyahele kuyaaba muutu wu ! 73Mwa kidzika kyantele, baba haho bakokosolo, na baleele kuri Peetelo ti : « Ngwanwa, ye se wuri mosi mu bo, bukuri nzoonsulu ye yiri mu kusoongo. » 74Hango, nde wabaandika mu kubula mampopi na kulaba ti : « Me nyahele kuyaaba muutu wu ! » Na hanaho, mulumi nsusu wakookolo. 75Peetelo wabaambuka mwooyo mu musamu waba muleele Yisu ti : « Tekesele mulumi nsusu kakookolo, ye sa tuna me mbala tatu. » Na bu kapala ku mbasi, wadila mu manyoongi.
Currently Selected:
Mataayi 26: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024