Mataayi 25
25
Nkuma ya bantuumba kuumi banswaasa
1« Kimfumu kya mayulu kyafwanikina na bantuumba kuumi banswaasa, bari bu baholo miinda mya bo, bayende mu kweebwaana mulumi. 2Bataanu mu bo baba biwulu, na bataanu baba balubuka. 3Bantuumba ba biwulu bu baholo miinda, bahele kuholo maasi. 4Ngo baba balubuka baholo miinda myaaku na maasi mu mikuri. 5Mulumi bu kabadziingilaa mu kwiisa, bobanso miisu mya baleme na babwa tolo. 6Mu kakati dya butsuku, mbeembu yabikisa : "Mulumi ndewu, yookee lumubwaana." 7Hanaho, bantuumba bobanso basiimbuka, na bayirika miinda myaaku. 8Bantuumba ba biwulu baleele kuri baba balubuka ti : "Heenee beetu mwaa maasi, mu ma beenu, bukuri miinda mya beetu, miri mu kudzima." 9Ngo baba balubuka babvutula ti : Kuba makukula mu beetu na mu beenu ko ; yendee lwelusaka bayariki ba maasi, na lusuumba ma beenu-meene ! 10Ntaangu yaba kweesuumba babo maasi, mulumi wayisa ; baba bayirima bakoto na nde, mu nzo mu munkeembu wa makweele, na bakaanga mweelu. 11Mwa mantaangu bu maluta, bantuumba bakaka se bayisa, baleele ti : "Mfumu, Mfumu, tudzibukila mweelu." 12Nde wabvutula, waleele ti : "Mu ngwanwa me nyiluleeriri ti, me nyahele kuluyaaba." 13Ngo beenee naana, bukuri lwahele kuyaaba kiluumbu na kilookolo. »
Nkuma ya bisari bitatu
(Luk 19.11-27)
14« Mukwongo, sa dyaba bunu muutu wuri kabaanaa wukweende ku budyeengi, nde wateele bisari byaandi na wabayakisa lubaku lwaandi. 15Kuri wamosi, nde waha bitalanta bitaanu ; kuri wakaka byoolo ; kuri wakimi kimosi, mpisi nde bunu bwaba makwa maandi. Tumi nde wayende ku budyeengi. Hanaho, 16wunde wataambiri bitalanta bitaanu wayende kweebisalila, na wabaka bitaanu bikimi. 17Bwobumosi kuri wunde wataambiri byoolo, wabaka byoolo bikimi. 18Ngo wunde wataambiri kimosi, bu kayende, wahaka bulu, wasweeke mboongo dza Mfumu yaandi. 19Mantaangu malaka bu maluta, Mfumu bisari bibyo wayisa mu kutambikisa lubaku na bo. 20Wunde wataamburi bitalanta bitaanu, wakokosolo, watwaala bitalanta bitaanu bikimi, waleele ti : "Mfumu bitalanta bitaanu wanyakisiri, mono bitalanta bitaanu bikimi, me nyabakiri." 21Mfumu yaandi wamuleele ti : "Bwabubwete ! Ye kisari kyakibwete na kyakwiikama. Ye wabeeri wakwiikama mu byantele, ngo me nyikusuusiri ha yulu byalaka. Koto mu kiminu kya mfumu yaaku." 22Wunde se wataambiri byoolo, wakokosolo, waleele ti : "Mfumu, bitalanta byoolo ye wayakisiri me. Mono byoolo byakaka, me nyabakiri." 23Mfumu yaandi wumuleeriri ti : "Bwabubwete ! Ye kisari kyakibwete na kyakwiikama. Ye wabeeri wakwiikama mu byantele, ngo me nyikusuusiri ha yulu byalaka. Koto mu kiminu kya mfumu yaaku." 24Ngo, wataambiri kitalanta kimosi, nde se bu kakokosolo, waleele ti : "Mfumu, me nyabee nyaari ti ye muutu wuri na mutima wakuba, ye kootolaa kwaaku kuri wahele kukuna, na wukutukisaa biri wahele kunyaka. 25Na me nyabee na boomo ; ngo nyayensi kweesweeke kitalanta kya ye, kunsa butoto. Mono kyaaku kyoki." 26Mfumu yaandi wabvutula, waleele kuri nde ti : "Ye wuri kisari kyakibi na kiri na bubolo. Ye wayaari ti me kootolaa hari nyahele kukuna ; na nkookutukisaa hari me nyahele kunyaka. 27Habee nkani wasuusiri, mboongo dza me, kuri bakebi bamboongo, kuri me habee bu nyikwiisa, me bweese kuholo dzaami na ndaandu. 28Ngo yisilee kitalanta kuri nde, na luha kyo, kuri wunde wuri na kuumi. 29Mukwongo, kuri wunde wuri na byobinso, sa bamuha, na sa kaba wabuukula mu bitotolo. Ngo kuri wunde wahele na kitotolo, na kikari na kyo sa bayisila. 30Kisari kyahele na mufunu, muloose kunsa mampimbisi ma ku mbasi ; kukwo kuba bidilu, na nkweetulu miinu." »
Nsundusulu yampotulu
31« Mbasi tsuku, ha kwiisa Mwaana muutu kunsa nkeembu yaandi, na bambasi bobanso kintwaari na nde, haho nde kadzakala ha yulu mboloko yankeembu yaandi. 32Makaanda momanso sa makutukina ha busu bwaandi, na nde sa kahaambila babamosi na bakaka, bunu bu haambila mutari, bimeeme na bataba. 33Nde sa kasuusa bimeeme ku lubakala lwaandi, na bataba ku lumoso. 34Haho, mbyaasi sa kaleele kuri bari ku lubakala lwaandi : "Waseenu, beenu bari taayi dya me walusakumuna ; taambuleenu saala ngo kimfumu kibari baluyirikila, tekesele nyirikulu nsi. 35Bukuri me nyaba na nzala, na beenu lwampeeri bya kudya ; nyaba na mpwiisu, na beenu lwampeeri bya kunwa ; nyaba munzeense, na beenu lwantaamburi ; 36nyaba mpene, na beenu lwandwiikiri ; nyaba nyabeele, na beenu lwayisa kumono ; nyaba mu boroko, na beenu lwayisa kuri me." 37Hanaho, basuunguma sa babvutula kuri nde, sa baleele ti : "Mfumu, nkya ntaangu beetu twamwiini ye, kuri wuri na nzala na twakudiisiri, wuri na mpwiisu, na twakuheeri bya kunwa ? 38Mu nkya ntaangu twakumwiini kuri ye wuri munzeense, na twakutaambiri, bunu pele wuri mpene na twakulwiikiri ? 39Nkya ntaangu twakumwiini kuri ye wabeele, bunu pele wuri mu boroko na twayisiri ku wuri ye ?" 40Mbyaasi sa kabvutula, sa kaleele kuri bo ti : "Mu ngwanwa me nyiluleele ti : Mamo ma lwayirikiri kuri mosi, mu bampaangi bamaba, babvuri buntele, lo kuri me lwayirikiri." »
41« Haho mbyaasi sa kaleele kuri bari ku lumoso ti : "Tatukeenu la na me, beenu babari babulila mpopi, yendeenu ku mbaawu ya mibvu ngo mibvu, yibari bayirikila mu ntoono dyaabulu na bambasi baandi. 42Bukuri me nyaba na nzala, na beenu lwasii mpa bya kudya ko ; nyaba na mpwiisu, na lwasii mpa bya kunwa ko ; nyaba munzeense, na lwasii ntaambula ko ; 43nyaba mpene, na lwasii ndwiika ko ; nyaba nyabeele na nyaba mu boroko, na lwasii kwiisa kumono me ko." 44Bo se sa babvutula ti : "Mfumu, nkya ntaangu beetu twakumwiini kuri wuri na nzala, bunu pele na mpwiisu, munzeense, bunu pele wuri mpene, bunu pele wabeele, bunu pele wuri mu boroko, na beetu twasiiri kukubakisa ko ?" 45Haho, nde sa kababvutula ti : Amene, me nyiluleele ti : Mamo ma lwaheri kuyirika kuri mosi mu babvuri buntele bamaba, lo kuri me lwaheri kumayirika." 46Na babo, sa beende ku nseembulu dzahele manunu, ngo basuunguma, ku mwooyo wa bibvu ngo bibvu. »
Currently Selected:
Mataayi 25: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024