Yooswa 3
3
Nsabukulu Yorodaani
1Yooswa wasiimbika mu nkati kipari. Bo banaanguka ku Sitimi na bayende natee ku Yorodaani, nde na baala ba Iselili bobanso. Balutisa butsuku haho, tekesele basabuka. 2Ha mambisa ma biluumbu bitatu, batini baluta kunsa kibeendu kya manzo mangooto. 3Bo baha lutumu kuri baala ba Iselili ti : Ntaangu yilumono nkobo Yaave Nzaambi yeenu ya lulelusunu na bangaanga-Nzaambi Baleevi#3.3 Bangaanga-Nzaambi Baleevi kumono Ngi 17.9 na matinu. bari mu kweyinata, haho lusiisa kibeendu kiluri na kunama nkobo ya lulelusunu ha mambisa. 4Ngo sa kwaba lutatu ha kakati dya beenu na nkobo lwa kampe nkama makuumi moolo dya mankwaanga : Yaa lukokosolo na yo ko. Mu bubwo beenu luyaabila mu nkya nzila beenu luyelemini kweende, bukuri beenu lwakiri lwahele kulutila mu nzila yiyo.
5Yooswa waleele kuri baatu ti : « Tsyeemesee biluunsi byeenu bukuri ha kipari, Yaave sa kayirika misamu mya nkimukunu ha kakati dya beenu. » 6Yooswa waleele kuri bangaanga-Nzaambi ti : « Nateenu nkobo ya lulelusunu na yookeenu ha mankula ma baala ba Iselili. » Bo baholo nkobo ya lulelusunu na bayende ha mankula ma baala ba Iselili.
7Yaave waleele kuri Yooswa ti : « Kiluumbu kimaki, me nyibandika kusoongo bunene bwa ye ha miisu mya Iselili dyodinso, mpisi bayaaba ti, bunu bu nyaba me na Moose, bunubwo se me nyiba na ye. 8Ye ngo wuri ha lutumu lumalu kuri bangaanga-Nzaambi bakwenata nkobo ya lulelusunu ti : Ntaangu yi lutubuka ha simu dya muwiila wa Yorodaani, lo kotee munsa maampa ma Yorodaani. » 9Yooswa waleele kuri baala ba Iselili ti : « Kokisilee na yukeenu maampu ma Yaave, Nzaambi yeenu. 10Na nde waleele ti : Mu mimami, beenu luyaabila ti Nzaambi yamwooyo wuri ha kakati dya beenu, nde sa kabingisa bari Kanaana ha mankula ma beenu, bari Hiti, Hibvi, Peridzi, Ngirengasi, Amori na bari Yebusi. 11Monee, nkobo ya lulelusunu ya Mfumu butoto bwobunso yiri mu kuluta ha mankula ma beenu mu Yorodaani. 12Mu lumalu, holeenu baatu kuumi na boolo ha kakati dya makaanda ma Iselili, muutu mosi mu mpisi kaanda. 13Ntaangu yiri bangaanga-Nzaambi bakwenata nkobo ya lulelusunu ya Yaave, Mfumu ya butoto bwobunso, basuusiri miilu myaaku mu maampa ma Yorodaani, maampa ma Yorodaani sa maba matabuka dya ku yulu, na sa maba kikuuku kimosi bunu kuri mukamu. »
14Baatu basiisa manzo mangooto maaku mu kwesabuka Yorodaani, bangaanga-Nzaambi babakwenata nkobo ya lulelusunu, bayende ha mankula ma kaanda. 15Babakwenata nkobo bu batubuka ha Yorodaani, na miilu mya bangaanga-Nzaambi babakwenata nkobo, bu myakoto mu maampa, ha teke simu Yorodaani dyaba dyabuukula mu masimu#3.15 Badzoonsolo mu ntolulu bwaangala, ha mambisa ma kutolo lino (kumono 2.6), mu ntaangu ya mbuukulu nyaari ya Yorodaani ha mu ntoono maampa makoosulumuka mu milaandu mya ku Libano (mu ngoondo yamana). maandi momanso, mu biluumbu byobinso bya ntolulu bikunu ; 16maampa ma ku yulu mateleme na masa kibaka kimosi ku la dyalaka, ku Adama, bvula diri ha teke Saritani#3.16 Adami, wadzoonsolo mu Ose 6.7, diri bvula dimosi ku simu dya Yorodaani, bebele na Yaboke. Saritani bvula dimosi diri bebele na haho diri bayaari ha diri na tswitswikii ko., bunu maampa makaka maba yookaa ku kibari kya mubu wa kibiti kyakana, mubu wa Mungwa, matabuka momanso. Baatu basabuka ku simu dya Yeriko 17Bangaanga-Nzaambi babakwenata nkobo ya lulelusunu ya Yaave, bateleme ha butoto bwakana ha kakati dya Yorodaani, kuri Iselili dyodinso diri mu kutaba mu butoto bwakana, natee kwawii kusabuka makaanda momanso Yorodaani.
Alliance Biblique du Congo 2024