Yooswa 2
2
Yooswa waheeke baketi boolo ku Yeriko
1Yooswa, mwaana Nuni, waheeke baatu boolo bayisikila ku Sitimi mu kweetala mu mansweeki, waleele ti : « Yendee na monee nsi na bvula dya Yeriko. » Bo bayende na bakoto mu nzo mukyeetu mosi ngaa-buyala, nkuumbu yaandi Lahabi#2.1 Sitimi : Mpe kibeendu kimosi na Abele-Sitimi (Ltg 33.49) ku noode-esete dya mubu Wafwa. Yeriko : Bvula diri bebele na Yorodaani, ku nsuku duuru, mu simu dya wesete. Lahabi badzoonsolo mu dyo mu mukaanda wa lulelusunu lwamoono mu Mat 1.5 ; Bah 11.31 na mu Dzk 2.25. na bo baneŋene mumwo. 2Baatu baleele kuri mbyaasi ya ku Yeriko ti mono baatu bamwaakwiisa kumaku butsuku, baala ba Iselili, mu kumono buri nsi. 3Mbyaasi ya ku Yeriko waheeke mukeensu kuri Lahabi mu kuleele ti : « Palisa baatu babo biisiri ku nzo ye, bukuri bo biisiri mu kwemono nsi yoyinso. » 4Ngo mukyeetu wunde waholo babakala boboolo, wabasweeke na nde waleele ti : « Ngwanwa, baatu babo biisiryee kuri me, ngo me mbee nyahele kuyaaba ku banaangukinyee. 5Ngo mu nyilulu bwiisi, mu ntaangu ya kukaanga mweelu bvula#2.5 Mu kubata ti bataatu bakoto kunsa bvula, mweelu haba lo wakaanga mu butsuku., baatu babo bapariryee na me nyahele kuyaaba kuri beensyee. Banamee kweenu mu mawasu, bwe lubabakiri. »
6Kiimee ko nde wabanaakisiri ku yulu muluri na wabasweekiri kunsa misiinga mya lino mikaba kayalimina ku muluri. 7Baatu babanama mu nzila ya Yorodaani, natee ku mpele bibeendu bya nketulu, bakaanga mweelu bvula, ntaangu yapariri babakwenama baatu babo ku mambisa. 8Lahabi wanwaata kwaba baatu babo, tekesele bo baneŋene. 9Nde waleele kuri baatu ba bo ti : « Me nyaari ti Yaave mwaaha nsi yimayi kuri beenu, beenu luri mu kuha beetu boomo bwalaka na baatu bobanso ba nsi yibari na boomo ha busu bwa beenu. 10Bukuri beetu twayukiri ti Yaave wasikisiri ha mankula ma beenu maampa ma mubu wa Madyaari#2.10 Yaave wakanisa mubu wa Madyaari : Kumono Mpa 14.21. Sihoni na Onge : Kumono Ngi 2.24 natee mu 3.17 ; Ltg 21.21-35., ha lwapariri beenu mu nsi ya Ngipiti, na mi lwasiiri beenu kuri bambyaasi boboolo ba ku Amori baba ku simu dya Yorodaani ku Sihoni na ku Onge, beenu lwa baburiri mpopi. 11Beetu twamayukuri, na mutima weetu wakosoko ; kuri bobanso biluunsi byadumuka ha busu bwa beenu, bukuri Yaave, Nzaambi yeenu, wuri Nzaambi ku mayulu na ha butoto. 12Mu lumalu, mbuti lutiiri, lo labee maalu kuri me, mu Yaave, bukuri me nsoongiri nkwikumunu yaami kuri beenu, ti beenu se sa lwasa mamabwe mu nzo taayi dyaami, na sa lwaha kuri me kidiimbu kyangwanwa yeenu. 13Labee, ti beenu sa lwahemese taayi na nguri ba me, bampaangi na bibusi bya me baba bamwooyo, na byobinso bi bari byo, beenu sa lwatubvuukisa mu lufwa. » 14Baatu babo bamuleele ti : « Beetu sa twaha kidziingu kyeetu ha kibeendu kya ye, mbuti ye wahele kuyaabisa mansweeki ma beetu. Ntaangu yiha Yaave nsi yimayi kuri beetu, beetu sa twasalila mu ye mu nkwikumunu na ngwanwa, na sa twayirika kuri ye mamo mambweeyulu mutima na mankwikumunu. »
15Nde wabasundula ha mweelu wantele mu musiinga, bukuri nzo nde yaba ya namikisa na kibaka kya nkalulu bvula, na nde wabadzakalaana mu teke kibaka kikyo. 16Nde waleele kuri bo ti : « Yendee ku yulu mulaandu, mu kubata ti bari mu kwelunama balukaanga. Sweemeenu kukwo mu biluumbu bitatu natee kubvutuka babo bari mu kwelulaanda. Ha mambisa haho, tumi lunama nzila yeenu. » 17Baatu babo baleele kuri nde ti : « Yuka, beetu sa twabvumina maalu ma tulabirye kuri ye. 18Ntaangu yitukwiisa kukoto beetu mu nsi yi, lo kaangiri musiinga wabeenge wumawu ha mweelu wantele haho ha tubeesunduka beetu, na kukutukisa mu nzo yaaku taayi dya ye, nguri ye, bampaangi na kaanda dyaaku dyodinso. 19Mbuti muutu pariri mu myeelu mya nzo ye, lo makila maandi mari ha yulu mutu ye na beetu lo turi babuunu, ngo mbuti basii kooko mu mosi mu baba mu nzo ye, lo makila ma nde mari ha yulu mitu mya beetu. 20Ngo mbuti ye weeyaabisa mansweeki ma beetu, lo beetu twahele kubweese kubvumina maalu ma tulabirye beetu kuri ye. » 21Nde waleele ti : « Buba bunu bu luleeriri beenu ! » Nde wahemese baatu babo na bo bayende. Hanaho, nde wakaanga musiinga wabeenge ha mweelu wantele. 22Baatu babo bayende ku mulaandu na badzakala kukwo mu biluumbu bitatu, natee kwabvutukiri baatu baba kwebanama, baatu babo baba kwebasakaa mu nzila yoyinso, ngo basii kubadzukula ko. 23Baatu boboolo babo, bakulumuka mulaandu, basabuka Yorodaani na bayende kuri Yooswa mwaana Nuni na bamuyalamina misamu myominso mi babweeni. 24Bo baleele kuri Yooswa ti : « Ngwanwa, Yaave mwaha nsi yoyinso mu myooko mya beetu, na baatu ba nsi yi bobanso se beki na boomo ha mankula ma beetu. »
Currently Selected:
Yooswa 2: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024