Eseteere 4
4
Maredoki waloombo kuri Eseteere kasaka bu kusiila kuri mbyaasi
1Maredoki kayukaa misamu mimyo, nde kaakiri binkutu byaandi, lweeti tsaaka, yitiri butoto-mpolo ku yulu mutu. Nde wapala kunsa bula, na wabeke kwefula misaakulu myangebe. 2Bu katubuka ha mweelu lupaangu lwa mbyaasi ha katelemini, bukuri kwaba kwahele miswa ti muutu kakoto mu nzo mbyaasi, kuri walwaata tsaaka. 3Mu mpisi nkoonsi yatubukiri lutumu na manzeengulu ma mbyaasi, Bayudayo bakoto kunsa kifwiiri kyakinene : Bo bakoto loomi, bakoto mu kudila na kunyoongo, balwaata matsaaka, na baatu balaka baba bari, kuneŋenaa ha yulu butoto-mpolo.
4Bisari byabakyeetu na bampokoro ba Eseteere bayisa, bamuyaabisa misamu mimyo, na nde wamono mpasi mu mutima. Nde waheeke binkutu kuri Maredoki mpisi kalwaata na kayusula tsaaka, ngo, nde kasiiri taambula ko. 5Eseteere wateele Hatake, mosi mu bampokoro bambyaasi, ba kamuheeri mu kumusalilaana. Nde wamuheeke mu kweefuula Maredoki ti nkya misamu miri mu kuluta, na mu nki nde kari mu kusa bubwo. 6Hatake wapala na wayende kumono Maredoki, ha mbasi bvula yiri kisusungu na mweelu nzo mbyaasi. 7Maredoki wamuyaabisa momanso maba meki mu kuyirima, na ntalu mboongo dzataamburi Amani, mu kusuusa mu kisweekulu kya mboongo kya mbyaasi, mpisi bamana kudzusa Bayudayo. 8Maredoki wamuha se mukaanda wubatsamikisi ku Suse, mu kumana kudzusa Bayudayo, mpisi kasoongo nde kuri Eseteere na kamuyaabisa, na kaleele kuri Eseteere ti, keende kayingikila mpemisi kuri mbyaasi mu ntoono kaanda dyaandi. 9Hatake wayisa kuyaabisa kuri Eseteere maampu ma Maredoki. 10Eseteere waleele kuri Hatake ti, yeende weleele kuri Maredoki ti : 11« Bisari bya mbyaasi byobinso, na baatu bobanso bari mu mankoonsi ma kimfumu kya mbyaasi, bayaari kuri ti mpisi wukoto munsa nzo mbyaasi, kaba mubakala bunu pele mukyeetu, kuri bahele kumuteele mbila, lo mangisi bu maleele ti, wakudzusa. Ngo mbuti mbyaasi laamburi luboto lwaandi lwawoolo#4.11 Luboto lulwo ngo kidiimbu kya lutumu lwa mbyaasi. kuri nde, lo bakiri bumwooyo. Me ngo wuri, nyeki na ngoondo yayitsiina, yiri bampele kunteele mu kweende kuri mbyaasi. » 12Maredoki bamuyaabisaana mamo maba leele Eseteere, 13ha kaheeri mvutu kuri Eseteere ti : « Yaa tsima ko ti, mu Bayudayo bobanso, ye ngo wuri lo bvuukiri bukuri ye koobaana mu nzo mbyaasi 14Mbuti ye wuriri, wahele kudzoonso mu mantaangu ma bumabu, lo ntoono pe, kidzuunu na nkuululu ya Bayudayo sa byanangukina kukimi, ye ngo wuri na kaanda dyaaku sa bamana kuludzusa. Ngo na yaari ? Kampe ye kutubuka ku kimfumu bumabu, mu kuri ti ye saka bwakusiila mu mantaangu ma bu. » 15Eseteere wabweese kubvutula mvutu kuri Maredoki ti : 16« Yende wekutukisa Bayudayo bobanso bari ku Suse, lukoto loomi mu ntoono me. Mu biluumbu bitatu bya butsuku na bya mwiini beenu kudya pe na kunwa pe. Me na bisari byaami byabakyeetu, beetu se tukoto loomi. Tumi, ti bukuri mangisi mari mu kudika, me nyeende kuri mbyaasi, ti hayuku mfwiiri kwaami, lo musamu pe. » 17Maredoki wayende na wayirika bunu bwamutumini Eseteere.
Currently Selected:
Eseteere 4: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024