Biyiriki bya Bantumu 9
9
Nyiingulu madyeele ya Sawuli
(Biy 22.6-16; 26.12-18)
1Sawuli waba kwesilikina kusa bubi, na kudzusa bayiki ba Mfumu, nde wakokosolo kuri mukuutu bangaanga-nzaambi, 2na wamuloombo mikaanda mya kwekoto mu manzo ma nkutukunu mari ku bvula dya Damasiko, mu kuri ti, mbuti bweeni bamosi bari mu nzila, baba babakala bunu pele bakyeetu, lo kabankaangaana, wubaneti ku Yerusalemi. 3Mu ntaangu yi kari mu kweende, wakokosolo na Damasiko, nasisuu, buungi bwafumini ku yulu bwamudyengekele, 4bu kabwa ha nsi, nde wayuka mbeembu yaleele kuri nde ti : "Sawuli, Sawuli, mu nki ye wuri mu kwekwaamisa me ?" 5Nde wafuula ti : "Ye na, Mfumu ?" Mfumu waleele ti : "Wu me Yisu wu wuri mu kwekwaamisa, 6ngo teleme na koto kunsa bvula, na sa bakuleele mamo mayelemini kusa." 7Bambaasi baba kintwaari na nde mu budyeengi bateleme, bafwa mapana, bayuka mbeembu, ngo bahele kumono muutu ti mosi. 8Sawuli wabweese kuteleme ha nsi, miisu myaandi mya myadzibulu, ngo wahele kumono ti kyabu ; bu bamukwaata mu koko, bakoto ku Damasiko. 9Nde wasa biluumbu bitatu, kuri wahele kumono, wahele kudya na wahele kunwa.
10Ku Damasiko kwaba muyiki mosi, nkuumbu yaandi Ananyasi. Mfumu, mu mamono-miisu, waleele kuri nde ti : "Ananyasi", Ananyasi waleele ti : "Me ndewu Mfumu !" 11Mfumu waleele kuri nde ti : "Teleme, yende mu nzila yibateelaa ya Lubakala, na saka mu nzo Yuuda, muutu wa ku Taresi, nkuumbu yaandi Sawuli. Nde wuri mu kusaambila, 12na nde wamono mu mamono-miisu, muutu wuri nkuumbu Ananyasi ; bu kakoto mu nzo, wateeteke myooko ha yulu nde mpisi kabweese kumono. 13Ananyasi wabvutula ti : "Mfumu, baatu balaka badzoonsiri kuri me, mu muutu wu ; nde wayirika mamabi malaka kuri bangisi baaku ku Yerusalemi. 14Na hamaha, nde wuri na lutumu lwa bakuutu, ba bangaanga-nzaambi, mu kukaanga bobanso basaambila nkuumbu yaaku. 15Mfumu waleele kuri nde ti : "Yende, bukuri weki kisalulu kya me kinyiri nyasoolo, mu kunata nkuumbu yaami, ha busu bwa makaanda, na se ha busu bwa bambyaasi na baala ba Iselili ; 16bukuri, me sa nyamusoongo mamo mayelemini kuri nde, mu kumono mpasi mu nkuumbu yaami." 17Ananyasi wayende na wakoto mu nzo, na bu kamutetekele myooko, waleele ti : "Sawuli, mpaangi yaami, Mfumu heekiri me; Yisu wukumonikinye mu nzila, yibee kwiisa, mpisi heki ye bweese kumono, na se ba waluulusu mu Mpeeve." 18Hanaho, byaba mu miisu mya nde biri bunu makala, byasonoko, na nde wabweese kumono, na bu kateleme wataambula mbotokulu, 19bu kadya byandya, wabweese kubaka makwa.
Sawuli wayikisa ku Damasiko
Nde wadzakala ku Damasiko, mu mwaa biluumbu byantele, kintwaari na bayiki, 20na hanaho, nde wayikisa mu manzo, ma nkutukunu ti Yisu ngo Mwaana Nzaambi. 21Bobanso bamuyuka, bakimuka na baleele ti : "Buri kari wumawu ko, wabee kwenwaanisa ku Yerusalemi, babo babee kwetaanguna nkuumbu Yisu, na hamaha nde kwiisa kari mu kubakaanga na kubanata kuri bakuutu ba bangaanga-nzaambi ko ?" 22Ngo Sawuli wabaka makwa ha yulu makwa, na wasukuka Bayudayo, babadzakilaana ku Damasiko, mu kubasoongo ti Yisu ngo Kiristo.
23Biluumbu byalaka bu byaluta, Bayudayo bakaanga kitsimi kya kumudzusa. 24Mfuundu bo, ya mu Sawuli bu yabakana, bakebe myeelu butsuku na mwiini, mpisi bamudzusa. 25Bayiki bu bayuka, bamusoko mu mpiri, na bamusundula butsuku ku mbisa kibaka.
Sawuli ku Yerusalemi
26Bu katubuka ku Yerusalemi, nde watsiitsa kuba na bayiki, na bobanso baba na boomo bwa nde, na baba bahele kusa kanyi, ti nde weki muyiki. 27Ngo Baranaba bu kamuholo, wamunata kuri bantumu, na Sawuli wabaangula kuri bo, bunu bu kamwiinini Mfumu mu nzila, na bunu bu kadzoonsiri kuri nde, na bunu bu kadzoonsiri ku Damasiko, mu nsiitu nkuumbu Yisu. 28Nde waba kintwaari na bo, mu nkotulu na mu mpalulu na bo ku Yerusalemi, wukwe dzoonsolo mu nsiitu mu nkuumbu Mfumu. 29Nde waba kwedzoonso, na waba kwesaa se mpaka, se na Bangereke ; ngo bamaba basaka bwa kumudzusa ; 30Bampaangi bu bayaaba, banata Sawuli ku Sedzare, na bamubvutula ku Taresi.
31Mu Yuuda dyodinso, mu Ngalile na mu Samariya, dibuundu dyaba na kidzuunu, dyaba kwetuungumaana, na kwedyaatilaana mu kibvumi kya Mfumu, dyaba kwefununaana mu nsyamusunu ya Mpeeve Yangisi.
Nsinukusu ya Ene
32Peetelo wayooko mwomunso, na kiluumbu kimosi, wasunduka kuri bangisi badzakala ku Lyda. 33Nde wamono muutu mosi, nkuumbu yaandi Ene, wabwa mambwolokoto, kuholosono mibvu mpoomo, waneŋesene ha mbuka. 34Peetelo waleele kuri nde ti : Ene, Yisu Kiristo wu kutsinikisi ! Teleme kwaaku na yirika mbuku yaaku. Hanaho nde wateleme. 35Bobanso baba ku Lida, na baba ku Saroni bu bamumono, bayiingiri madyeele mu Mfumu.
Dorekaasi bamufulukisa
36Ku Yope kwaba muyiki mosi wamukyeetu, nkuumbu yaandi Tabita, mambangukulu "Dorekaasi". Nde waba waluula mu biyiriki byabibwete na waba kwehaanaa lubakusu. 37Mu biluumbu bibyo, nde wabwa kubeele na wafwa. Bu bamuyooso, basuusa nde, mu kihekiri kya ku yulu. 38Lida dyaba bebele na Yope, bayiki bu bayuka ti Peetelo waba kukwo, bamuheekele baatu boolo, mu kumuteele : "Yaa dziingila ko, wasa natee kuri beetu." 39Peetelo bu kateleme, wayisa na bo. Bu katubuka, bamunwaatisa ku kihekiri kya ku yulu, bafwiiri bobanso bamumonokono kuri bari mu kudila, na bamusoongo binkutu na biyuungu byabatuungaa Dorekaasi, bu kaba kintwaari na bo. 40Peetelo bu kapalisa bobanso ku mbasi, nde watsukuma, wasaambila, na bu kasyeeteke kwaba nyutu waleele ti : "Tabita, teleme !" Tabita wadzibula miisu, bu kamono Peetelo, dzakiri. 41Bu kamukwaata mu kooko, Peetelo wamutelemese ; bu kateele bangisi na bafwiiri, Peetelo wabasoongo Tabita wamwooyo. 42Mamo mayabakana mu Yope dyodinso, na balaka basa kanyi mu Mfumu. 43Peetelo wadzakala biluumbu byalaka ku Yope, ku nzo Simoni waba musari mikaanda mya bangoombo.
Currently Selected:
Biyiriki bya Bantumu 9: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024