Biyiriki bya Bantumu 10
10
Peetelo bamuteele kuri Korenelyo
1Ku Sedzare, kwaba muutu mosi, nkuumbu yaandi Korenelyo ; nde waba mukuutu mukaangu wankama bayongolo, wubateelaa ti "Italiko". 2Nde waba munsaambiri wa makwa, waba se na kibvumi kya Nzaambi, kaanda dyaandi dyodinso se. Nde wabahaanaa lubakusu kwalaka kuri baatu, na waba saambilaana Nzaambi mu ntaangu ngo ntaangu. 3Nde wamono mbasi Nzaambi, mu mamono-miisu kwa bu kyensekelee, kampe kyaba kilookolo kyawa kya mwiini. Mbasi Nzaambi yakoto mu nzo yaandi, yamuteele mbila : "Korenelyo !" 4Nde watala yo kisoosi tumi na boomo bwobunso, nde waleele ti : "Bi nki Mfumu ?" Mbasi yaleele ti : "Nsaambulu dzaaku na lubakusu lwaaku bitoombokirye bunu kikabu ha busu bwa Nzaambi. 5Na mu lumalu heeke baatu ku Yope, na tumisa Simoni wubateelaa Peetelo. 6Nde wuri ku nzo musari mikaanda mya bangoombo, wuri mu nzo yiri ku simu dya mubu." 7Mbasi yaba dzoonso na nde, bu yabvutuka, nde wateele boolo mu bisari byaandi, na muyongolo mosi, wakwiikama mu bakaangama na nde, 8na bu kabaangula myominso kuri bo, nde wabaheeke ku Yope.
9Ha mambisa ma kiluumbu kikyo, bu baba bakiri mu nzila na baba kwekokosolo na bvula, Peetelo wanwaata ku kibeendu kyayiriku ku yulu nzo, mu kusaambila, mu kilookolo kyabisaamunu. 10Nde wakolo nzala na wabatiiri kudya. Bu bari mu kumulambukila byandya, nde wamono mamono-miisu, 11nde wamono yulu dyadzibula, na kitotolo kimosi, bunu nsaanda yayinene yaleleke mu manto momana, kyasunduka ha butoto ; 12munsa yo mwaba bibulu bya makaanda, banyoko ba butoto na banoni ba yulu. 13Mbeembu mosi yayukukuna kuri nde ti : "Teleme, Peetelo, dzusa na dya !" 14Peetelo waleele ti : "Ti bele pe, Mfumu, bukuri me nyadyaanaa ti kimosi kyasumuka na kyamviindu ko." 15Mbeembu yayukukuna lwadzoolo kuri nde ti : "Bibyo biri Nzaambi mwaatsyeemese, ye wuri ndeelele ko, ti byasumuka." 16Bubwo bwamonoko mbala tatu, na hanaho, kitotolo kikyo kyatoombulu ku yulu.
17Peetelo, mu nde-meene madyeele mamuwa, mu mamono-miisu mamo, nki matiiri kuleele. Mono baatu baheekiri Korenelyo, bafuulaa nzo Simoni, bateleme ha mweelu, 18bateele na basaka kuyaaba, mbuti Simoni wubateelaa Peetelo, haho kakoodzakalaa. 19Peetelo, bukari mu kwetsima mu ntoono ya mamono-miisu, Mpeeve yileeriri kuri nde ti : "Mono, baatu batatu basaka ye. 20Ngo teleme, sunduka na yende na bo kwahele maketi-keti, bukuri me nyibaheekirye. 21Peetelo bu kasunduka, waleele kuri baatu babo ti : "Me ngo muutu wunde wu luri mu kwesaka. Nkya ntoono yilutweesi kuri ?" 22Bo baleele « Korenelyo wuri mukuutu nkama bayongolo, muutu wasuunguma na wuri na kibvumi mu Nzaambi, kaanda dyodinso dya Bayudayo bamuteelaa kimbaangi kyakibwete, mbasi yangisi yimulubiryee mu kutumisa ye ku nzo yaandi, na kuyuka maampu ma ye. » 23Peetelo wabakotoso mu nzo, na nde wabadzakasa. Ha mambisa ma kiluumbu kikyo, bu kateleme, wayende na bo, kintwaari na bampaangi ba ku Yope. 24Ha mambisa ma kiluumbu kikyo, nde wakoto ku Sedzare. Korenelyo waba bakiingilaana, wateele kaanda dyaandi, na banduku baandi ba mutima. 25Peetelo bu kaba mu kukoto mu nzo, Korenelyo wayende mu kumubwaana, wabwa ha miilu mya Peetelo, wamutsukumina. 26Peetelo wamutelemese na wamuleele ti : "Teleme, me se muutu nyiri." 27Bu kadzoonso na nde, wakoto mu nzo, na wamono baatu balaka bakutukina. 28Nde waleele kuri bo ti : "Beenu luyaari ti diri dyadiku kuri Muyudayo mu kukaangama bunu pele, mu kukokosolo na wunde wahele kuba Muyudayo. Ngo Nzaambi soongiri me ti, yaa ndeele kuri muutu ko ti wasumuka bunu pele wuri mviindu. 29Mu bubwo me nyiisiri kwahele mpaka, na ntiiri kuyaaba mu nki ntoono beenu lutumusinyee me ?" 30Korenelyo waleele ti : "Kuholosono kiluumbu kyabina ki natee kilookolo ki kyawa, lo me nyiri mu lusaambulu mu nzo yaami, na mono, muutu mosi wateleme ha busu bwa me, mu binkutu biseme, 31nde ti : "Korenelyo, lusaambulu lwa ye luyukukini mu yulu, na Nzaambi baambukiri mwooyo mu bikabu, bikoohaanaa ye kuri bawelu. 32Heeke baatu ku Yope mpisi tumisa Simoni wubateelaa Peetelo. Nde wadzakala ku nzo Simoni musari mikaanda myabangoombo wuri ku simu dya mubu. 33Hanaho me mpeekiri baatu kuri ye, na ye yirikiri bwabubwe bu wiisiri. Mu lumalu beetu bobanso turi ha busu bwa Nzaambi, mu kuyuka momanso ma kusikiryee Mfumu, mu kutuleele."
Nyikusulu Peetelo kuri Korenelyo
34Peetelo bu kadzibula munwa waleele ti : "Mu ngwanwa me mbakiri ti Nzaambi wahele na nsobokoso mu baatu ; 35ngo mu mpisi kaanda, wunde wumubvuminaa, na wusalilaa nsungumunu, lo wabweeye kuri nde. 36Nde waheeke maampu maandi kuri baala ba Iselili, mu kuyaabisa Musamu Wamubwete, wa kiyeengi mu Yisu Kiristo, nde wuri Mfumu ya bobanso. 37Beenu luyaari maampu mayirimini mu Yuuda dyodinso, kubaandikila ku Ngalile, ha mambisa ma mbotokulu, ya yaabisiri Yowane. 38Dyaburi Nzaambi kari kaha Yisu wa ku Nadzareti, Mpeeve Yangisi na mpinu ! Nde wabee kwelutaana mu kweyirika mamabwe, na kwetsinikisa bobanso, babeeri kunsa nkwamusunu dza dyaabulu, bukuri Nzaambi wabeeri na nde. 39Na beetu turi bambaangi mu myominso, mi kayirika mu nkoonsi ya Bayudayo, na ku Yerusalemi. Nde bamudzusiri mu kumumanika ha muti. 40Ngo Nzaambi wamufulukisa, mu kiluumbu kyabitatu, na wamuha miswa mu kwemonokono, 41ngo kari kuri baatu bobanso ko, ngo kuri beetu, bambaangi bari Nzaambi watekisiri kusoolo, beetu twadiiri na twanwiini kintwaari na nde, ha mambisa ma mfulukulu yaandi mu bafwa . 42Nde watutuma mu kuyaabisa kuri kaanda, na kutswiikisa ti Nzaambi nde kari kasa mutsuundisi bafwa na bamwooyo. 43Babikiri bobanso bateele nde kimbaangi; mpisi wusa kanyi mu nde, sa kataambula mpemisi ya masumu, mu nkuumbu yaandi."
Makaanda mataamburi Mpeeve Yangisi
44Peetelo bu kaba wakiri mu kudzoonso, Mpeeve Yangisi yabwa ha yulu bobanso, babayuka maampu. 45Bayudayo basaa kanyi, mu nyirukulu bubakala bayisiri na Peetelo bapamuka, bukuri kikabu kya Mpeeve Yangisi se, kyabwa ha yulu bangooyi. 46Bo bayuka baba dzoonso mu mandiinga mahele kuyabakana, na badumusa Nzaambi. Haho Peetelo kabaangula mbeembu ti : 47"Buri lo bakabikisi muutu kubotoko mu maampa, mu babo bamwaataambula Mpeeve Yangisi bunu beetu ?" 48Nde wabaha miswa, mu kutaambula mbotokulu, mu nkuumbu Yisu Kiristo. Haho, bo bamuloombo mu kudzakala mwaa biluumbu na bo.
Currently Selected:
Biyiriki bya Bantumu 10: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024