Biyiriki bya Bantumu 8
8
1Sawuli wamono ti bwabubwe bu badzusa Estefano.
Sawuli wukwaamisa dibuundu
Mu kiluumbu kikyo, kwabwa nkwamusunu dzadzinene, mu dibuundu dyaba ku Yerusalemi. Bobanso batsyamikina mu mansi ma Yuuda na ma Samariya ; ha yulu bani bantumu bari basii yitika ko. 2Baatu bari na kinzaambi kyangwanwa, badziika Esetefano., na bamudila mu ngebe dzalaka. 3Sawuli waba kwetsaamuna dibuundu ; nde waba kwekotaa mu mpisi nzo, waba kwepalisaa mu makwa babakala na bakyeetu, na kubasoko mu boroko.
Filipo wayaabisa Musamu Wamubwete ku Samariya
4Bobanso babatsamikisi bayaabisa Musamu Wamubwete, mu babakweyendaana. 5Filipo wasunduka ku bvula dimosi, dya mu nkoonsi ya Samariya, mu kuyaabisa Kiristo kuri baatu. 6Mampuumbu ma baatu, mu mutima mosi, maba makaangama mu nyikusulu dza Filipo, bu bayuka na kumono bidiimbu, bikaba kwesaanaana. 7Bukuri mampeeve mamabi maba mu baatu balaka mapala, kuri makwefula misaakulu myaminene. Balaka babobo binamu na babeele miilu batsiinikini. 8Kiminu kyalaka kyamonikini munsa bvula didyo.
9Mubakala mosi, nkuumbu yaandi Simoni watekisiri kuba ha bula bubwo, waba kwesalilaa mu mukisi, na baatu bari Samariya babapamukaana mu mikaba kweyirikaana. Nde-meene waba kwetsimaana ti, nde muutu wamunene. 10Bobanso, kuholosono bakuutu natee bilesi, baba bakaangama mu nde, na baba kweleelaa ti : « Muutu wumawu ngo mpinu dza Nzaambi, dzi bateelaa ti "Dzadzinene". » 11Bo baba bakaangama mu nde, mu ntoono yiri ti, kuholosono na kidzika, mu mukisi waandi, nde waba kwebapamunaana. 12Mu ntaangu, yi basiiri bo kanyi mu Filipo wabayaabisiri Musamu Wamubwete, wa Kimfumu kya Nzaambi, na wa nkuumbu ya Yisu Kiristo, babakala na bakyeetu bataambula mbotokulu, 13Simoni nde-meene se wasa kanyi na wataambula mbotokulu. Nde wakaangama na Filipo na wapamuka, bu kaba kwemonaana bidiimbu na bimaangu byabinene byaba kweyirimaana.
14Bantumu basiiri ku Yerusalemi, bu bayuka ti bari Samariya bataambirye maampu ma Nzaambi, baheeke Peetelo na Yowane kuri bo. 15Bu basunduka, basaambila mu bo mpisi bataambula Mpeeve Yangisi. 16Mukwongo, Mpeeve Yangisi yaba yakiri kubwa pe ti mu mosi mu bo, kunu kubotoko baba bamwaabotoko mu nkuumbu Mfumu Yisu. 17Hanaho, ba Peetelo na Yowane babatetekele myooko, na bataambula Mpeeve Yangisi. 18Simoni bu kamono ti Mpeeve, bayihaa mu ntetukulu myooko mya bantumu, wabaha mboongo, 19waleele ti : "Heenee me se lutumu lulwo, mpisi kuri wunde wunyitetekele me se myooko, kataambula Mpeeve Yangisi." 20Peetelo waleele kuri nde ti : "Hemese mboongo dzaaku dzifuukila na ye-meene, bukuri ye kutsima ti, kikabu kya Nzaambi kusuumba mu mboongo ! 21Ye wahele na ndaambu, wahele se na kikuuku mu maampu mamama, bukuri mutima ye wahele kusuunguma ha busu bwa Nzaambi ; 22Hango yiinga madyeele mu bubi bwaaku, na saambila Mfumu, kampe bakuhemisini bitsimi bya mutima waaku. 23Me nyimono ti ye wuri na lubelu na bubayi." 24Simoni wabvutula waleele ti : "Beenu-meene saambikilee me kuri Mfumu, mpisi mpele kubwilikila dyaambu ti dimosi, mu maluleeriri beenu." 25Hango bo, bu bata kimbaangi na kuyaabisa maampu ma Mfumu, babvutuka ku Yerusalemi. Bo bayaabisa Musamu Wamubwete, mu mabula malaka ma ku Samariya.
Filipo na kisari kya ku Etyopi
26Mbasi Mfumu yadzoonso kuri Filipo, waleele ti : "Teleme na holo nzila ya ku suude, yisunduka ku Yerusalemi natee ku Ngadza, nzila yiyo yahele na baatu." 27Bu kateleme wayende. Na mono, muutu mosi wampokoro wa ku Etyopi, kisari kyakinene kya Kandase, mukebi busina bwa mbyaasi yamukyeetu ya ku Etyopi, wayensi ku Yerusalemi mu kusaambila. 28Nde waba weki mu kubvutuka, na wadzakala munsa kikokolo kyaandi, wukwetaanga maampu ma mubikiri Esayi. 29Mpeeve yaleele kuri Filipo ti : "Kokosolo na bakila kikokolo kikyo. 30Bu kadzumuna, Filipo wayuka, nde wuri mu kwetaanga mukaanda wa mubikiri Esayi, waleele ti : "Buri wuri mu kubakula mawuri mu kwetaanga ?" 31Nde waleele ti : "Dyaburi nyiyaabila, mbuti muutu wahele kubaangula kuri me ? Na nde wateele Filipo mu kunwaata na kudzakala ha mpele nde. 32Maampu ma kaba kwetaanga maba mamama :
"Nde waba bunu kimeeme kibari mu kunata kukudzusa,
na bunu mwaana kimeeme wahele na mbeembu,
ha busu bwa wuri mu kumutebe myoosi.
Nde wahele kudzibula munwa waandi.
33Kunsa kusaana kubamusaanini,
nde kasii baka wumukalila buungu ko.
Na wuyaabisa kiseendu kyaandi ?
Bukuri kidziingu kyaandi, basukisiri ha butoto."
34Muutu wampokoro bu kadzibula munwa waleele ti : "Leele me, mubikiri mu na kari mu kudzoonsolo ? Mu nde-meene ho ti mu mukimi ? 35Filipo wabaandika mu kuyikisa matinu, wayaabisa Musamu Wamubwete, wa Yisu kuri nde. 36Bu baba mu kweyende mu nzila, batubuka hari maampa. Mpokoro muutu waleele ti : "Mono maampa moma, nki bi kakisiila ye mu kubotoko me ?" [37] 38Nde watelemese kikokolo, Filipo na muutu wampokoro basunduka boboolo mu maampa, na Filipo wamubotoko. 39Bu bantoomboko ku nkoto, Mpeeve ya Mfumu yayisila Filipo ; muutu wampokoro kasii bweese kumumono ko. Nde wanamitina nzila yaandi mu kiminu. 40Filipo bamumono ku Adzote, mu kweyikisa Musamu, mu mabvula momanso natee watubuka ku Sedzare.
Currently Selected:
Biyiriki bya Bantumu 8: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024