Biyiriki bya Bantumu 19
19
Poolo ku Efeso
1Ntaangu yaba Apolo ku Korinto, Poolo wataba mankoonsi ma ku yulu milaandu, mu kweende ku Efeso. Bu kabwaana bayiki bamosi, 2wabaleele ti : "Buri beenu lwataambiri Mpeeve Yangisi ha lwasii kanyi ?" Bo babvutula ti : "Beetu twahele kuyuka ti badzoonso mu Mpeeve Yangisi yiri." 3Poolo wabafuula ti : "Nkya mbotokulu beenu luri lwataambula ?" Bo babvutula ti : "Mbotokulu ya Yowane." 4Poolo waleele ti : "Yowane wasalila mbotokulu, ya nyiingula madyeele, waleele kuri baatu, mpisi heki baatu basa kanyi, mu wunde wukwiisa ha mambisa ma nde, mbangukulu Yisu." 5Bamanaa kuyuka mamo, bataambula mbotokulu mu nkuumbu Mfumu Yisu. 6Poolo bu kabatetekele myooko, Mpeeve Yangisi yayisa ha yulu bo, bo badzoonso mandiinga, na babikula. 7Baatu baba kampe kuumi na boolo.
8Bu kakoto mu nzo-nkutukunu, nde wayikisa mu bunsaalisi, mu mangoondo matatu ; nde wabadzoonsaana na waba bayukusaana mu mitariri Kimfumu kya Nzaambi. 9Bukuri bamosi baba kubisaa mitima na baba bisaa kusa kanyi, bo badzoonsola bwabubi mu nzila, ha busu bwa mpuumbu, na nde wabasiisa. Ngo mpisi kiluumbu, nde waba holaa bayiki kintwaari na nde, wababayolosaa mu nzo nyikulu ya muutu mosi wuri nkuumbu Tirano. 10Mimyo myayirima, mu mibvu myoolo, kuri bobanso badzakalaana ku Adzya, Bayudayo na Bangereke, bayuka maampu ma Mfumu.
Baala ba Sebva
11Nzaambi wabayirikaa bimaangu byankimukunu mu myooko mya Poolo, 12kuri lo babumisa mu babeeru, mansaanda bunu pele biteendi bi babumisinyee mu nyutu nde, mabeeru matsiinika na mampeeve mamabi mapala. 13Bayudayo babamosi, bakookwepalisaa mampeeve mamabi, baba kweyendaa mu mabula, bo se batsiitsa mu kusalila nkuumbu Yisu ha yulu baatu baba na mampeeve mamabi, baleele ti : "Me nyiloombo kuri beenu, mu nkuumbu ya Yisu yikokweyikisilaa Poolo !" 14Bo baba baala nsaamu ba Sebva, mukuutu bangaanga-nzaambi, Muyudayo, baba kwesalila bubwo. 15Mpeeve yayibi yaha mvutu, yabaleele ti : "Me nyaari Yisu, na me nyaari se Poolo, heki beenu ba na luri ?" 16Bu kabasungumina, muutu waba na mpeeve yayibi yababwiisiila kikiindu, wabvula makwa na bo, mu kiteesu kiri, bu babapala mu nzo yiyo, mu ntiinu, kimpene na balemene. 17Mimyo myayabikina kuri Bayudayo bobanso na Bangereke, badzakalaana ku Efeso, na boomo bwabwiilikila ha yulu bobanso, na badzaangisa nkuumbu Mfumu Yisu. 18Balaka mu babo basii kanyi, batambukila na bayaabisa nsalulu yaaku. 19Balaka mu babasalilaa mu mpiitunu, bakutukisa mikaanda, bayoko myo ha busu bwa baatu, bu batangimisa ntalu, kampe 50 000 ma mboongo dza palata. 20Mu didyo, maampu ma Mfumu, mayalimika mu mpinu na mu makwa.
Nangukunu baatu ku Efeso
21Mamo bu mayirima, Poolo wabaka kitsimi mu kutaba Masedoni na Akayi, mu kweende ku Yerusalemi. Nde waleele : "Bu nyiyisika kukwo, bwayelemene ti me mono Looma." 22Nde waheeke ku Masedoni, boolo mu bisari byaandi, Timote na Eraseto, mu ntaangu yi kabakiingila ku Adzya. 23Mu ntaangu yiniyo, kwayirimini kisaangala kyamakwa, mu ntoono nzila ya Mfumu. 24Muyiriki miluungu mosi, nkuumbu yaandi Demeteryosi, wabayirikaa biteki byawoolo mu kifwaani kya manzo ma nzaambi ma Artemi, na wabahaanaa ndaandu yalaka kuri bisari byaandi. 25Nde wakutukisa babari kisalu kimosi kintwaari na nde, waleele ti : "Banduku baami, beenu luyaari ti kisalu ki, ngo busina bwa beetu-meene, 26lutala na luyuka ti ka kunu ku Efeso ko, ngo kampe mu Adzya dyodinso, Poolo, wayukusa baatu, na mpuumbu yalaka yahoomboko kuri nde, wukweleele ti, banzaambi bayirika mu myooko mya baatu, bari banzaambi ko. 27Kari kini kisalu kya beetu ki nyaafuka ko, ngo se Nzo-Nzaambi ya Aretemi, nzaambi yayinene, yiba yabwoongolo ; nzaambi yibari mu kwesaambila mu nkoonsi yoyinso ya Adzya na mu nsi yansiina !" 28Bu bayuka bubwo, bo baluula mu nkesi, bafula misaakulu, baleele ti : "Wadzaangama, Aretemi wa bari Efeso !" 29Bvula dyodinso dyaluula mu kisaangala, bakwaata Ngayo na Arisetarako wa ku Masedoni, bambaasi ba Poolo, babanata mu kitsimi kimosi ku nzo bimpa. 30Poolo wabatiiri kukoto kunsa mpuumbu yiyo, ngo bayiki bamudika. 31Bamosi mu bambaasi baandi ba ku Adzya se, bamuyingukila mu kuhele kweende nde-meene ku nzo bimpa. 32Kisaangala kyakinene kyakoto kunsa buundu, babamosi babikisa mi, bakaka kubikisa mikimi ; na balaka mu bo baba bahele kuyaaba mu nki ntoono baba bari bakutukina. 33Munsa mpuumbu baatu bayaabisa kuri Alekandere, wuri Bayudayo basuusa ha mankula. Alekandere bu kanaanguna koko, watya kukalila nyutu ha busu bwa baatu. 34Bu bayaaba ti nde Muyudayo, bobanso bafula mu mbeembu mosi kampe mu bilookolo byoolo : "Wadzaangama, Aretemi wa bari Efeso !"
35Mutini wa bvula wadzuunisa mpuumbu waleele ti : "Baatu ba ku Efeso, nani mu baatu dziimbiri ti bvula dya Efeso ngo mukebi nzo-nzaambi ya wadzaangama Aretemi na kiteki kyafumini ku yulu ? 36Mimyo myahele na bwa kutununa, beenu luyelemini kuba badzuuna, yaa lubingukila kusa kitotolo ti kimosi ko. 37Beenu lutweesi baatu bamaba hamaha. Bo bari bangaa-kwiibi ko, bunu pele basaani, ba nzaambi yeetu ko. 38Hango, mbuti Demeteryosi na bisari bya miluungu biri kintwaari na nde, bari na kooti mu muutu, lo kuri biluumbu bya miyalu na banzoonsi se na bo, lo be bafundusuna bo na bo. 39Na mbuti luri na kitotolo kikimi ha yulu, lo buundu dikootala misamu sa dyaha mvutu. 40Bukuri bee batuhoriri bunu bangaa-tungu mu mya lolo. Bukuri kwahele ntoono ti yimosi yisoongo, bunu buyirimini buundu dya bangaa-tungu dimadi. Kaleelaa mimyo, nde tsyaamini buundu.
Currently Selected:
Biyiriki bya Bantumu 19: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024