Biyiriki bya Bantumu 18
18
Poolo ku Korinto
1Ha mambisa haho, Poolo wasiisa Atene na wayende ku Korinto. 2Nde wabwaana Muyudayo mosi, wuri nkuumbu Akila, wabutuka ku nkoonsi ya Ponto. Kidzika kyantele kaba kamwaasa, wafumini ku Italya, bo na Pirisika, mukasi waandi, mu ntoono Kolode waheeri lutumu ti Bayudayo bapala mu Looma. Nde wakokosolo na bo, 3na bukuri waba kisalu kimosi na bo, nde wadzakala kuri bo na wasala kintwaari na bo. Bo baba batuungi ba manzo mangooto. 4Nde wabadzoonsaana mu nzo-nkutukunu, mpisi kiluumbu kya saba, na wabayukusaana misamu kuri Bayudayo na Bangereke.
5Sila bo na Timote bu babatubuka kuri ba mwaanangukina ku Masedoni, lo Poolo wuri mu kwelutusa ntaangu, mu maampu ma Nzaambi, mu kweta kimbaangi ha busu bwa Bayudayo, ti Yisu ngo Kiristo. 6Bayudayo, bu baba kwemunyaafuna na kwemutuka, nde wakubula binkutu byaandi na wabaleele ti : "Makila ma beenu mabwa ha yulu mitu myeenu, me nyahele na kibila mu mo ; mu lumalu, me ntalisiri kuri bangooyi." 7Nde wayisika haho, na wayende kukoto mu nzo muutu mosi, nkuumbu yaandi Tityusi Yusitusi munsaambiri Nzaambi, wuri nzo yaba ha teke nzo-nkutukunu. 8Kiriseposi mfumu nzo-nkutukunu, wasii kanyi mu Mfumu, nde na nzo yaandi, na baatu balaka ba ku Korinto bayukiri, basii kanyi na bataambula mbotokulu.
9Butsuku bumosi, Mfumu waleele mu mamono-miisu kuri Poolo ti : "Yaa ba na boomo ko, kasi dzoonso ! Na yaa wura ko, 10bukuri me nyiri na ye, na kuri muutu ti mosi ko, wukwiisa mu kusa ye bubi, bukuri me nyiri na baatu balaka mu bvula dimadi. 11Nde wadzakala na bo, mu mubvu mosi na mangoondo masaamunu mu kweyikisa maampu ma Nzaambi. 12Ngalyoni waba kimonikisi kya nsi ya Looma ku Akayi ; Bayudayo bayukusina batelemise kitaatu mu Poolo, na bamunata ku nzo ya miyalu, 13mu kuleele ti : "Muutu wumawu wuri mu kwesinda baatu mu kusaambila Nzaambi, mu kiteesu kya kuhele kubvumina mangisi. 14Poolo bu kabaandika kudzibula munwa, Ngalyoni leeriri kuri Bayudayo ti : "Mbuti ha beeri lumvuki, bunu pele musamu wamubi, nkani me ntaamburi nyayulu yeenu ; 15mbuti mpaka mu ntoono maampu, mankuumbu, na mu mangisi meenu, lo monee beenu-meene ; me ntiiri kuba mularimi mu mimyo ko. 16Na nde wabapalisa mu nzo miyalu. 17Bobanso bakwaata Sosetene, mfumu nzo-nkutukunu, bamulata ha mbasi nzo miyalu ; kasi myominso mimyo myaba myahele kutala Ngalyoni.
Poolo ku Antyoke
18Poolo wabweese kulutisa biluumbu byalaka haho. Tumi wasiisa bampaangi na wakoto mu bwaatu, mu kweende ku Siri, ha kimosi na Pirisika na Akila. Nde watebe mfu ku Senkereya, mu lusiilulu lukasiiri. 19Bo batubukaa ku Efeso, wubasiisiri kukwo. Bu kakota mu nzo-nkutukunu, nde wadzoonso na Bayudayo. 20Bo bamuloombo mu kulutisa mwaa ntaangu yalaka na bo, kasi nde wabisa. 21Ngo nde wabasiisa, waleele ti : "Me sa bweese kwiisa kuri beenu, mbuti Nzaambi tiri. Na wakoto bwaatu ku Efeso. 22Nde wakulumuka ku Sedzare, bu kanaaka ku Yerusalemi, mu kuha dibuundu mboto, tumi ha kakulumuka ku Antyoke. 23Nde bu kalutisa mwaa mantaangu, ha kataba mankoonsi malandisina , Ngalatiya, Feringe, mu kwesyaamisa bayiki bobanso.
Apolo ku Efeso na ku Korinto
24Muyudayo mosi, nkuumbu yaandi Apolo, wabutuka ku Alekandere, muutu wuri na bunzoonsi, wayisa ku Efeso, waba na nyaabulu mu matinu. 25Nde waba na nyaabulu mu nzila Mfumu, na kuheme mu kisalu, waba kwedzoonso na kweyikisa mu bunkete misamu mitariri Yisu, ngo yini mbotokulu ya Yowane kaba kayaari ; 26Nde wabaandika kuyikisa mu kibakala mu nzo-nkutukunu ; Pirisika na Akila bu bamuywiila, bamuholo mu kuba na bo, na bamuyikisa nzila [Nzaambi]. 27Nde bu kaba katya kweende ku Akayi, bampaangi bamusyaamisa na batinina kuri bantumu, mu kuri ti bamutaambula ; nde bu katubuka wamonoko mufunu walaka, kuri babo basii kanyi mu bweese. 28Nde waba tungukilaa Bayudayo mu makwa, ha busu bwa baatu, na wabasoongaa mu matinu ti Yisu ngo Kiristo.
Currently Selected:
Biyiriki bya Bantumu 18: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024