Biyiriki bya Bantumu 17
17
Poolo bo na Sila ku Tesalonika
1Bu bataba Amfipoli na Apolonya, bo batubuka ku Tesalonika, kwaba Bayudayo na nzo-nkutukunu. 2Bunu bwaba kifu kyaandi, Poolo wayende kubamono. Nde wadzoonso na bo, mu Matinu mu biluumbu bya saba bitatu. 3Nde wabaangula na wasoongo ti : Kiristo waba wayelemene kumono mpasi, na kufuluka mu bafwa, na ti : "Yisu, wu nyiri mu kuluyaabisa me wunde ngo Kiristo." 4Babamosi mu bo bataambula mamo, na babvuutuna na Poolo na Sila, ha kimosi na mpuumbu Bangereke, bari na kinzaambi, na bakyeetu balaka balukiinsu. 5Kasi Bayudayo bamono musoki, na baholo baatu bababakala bari na mutima bubi, babakutukisa na basa kisaangala kunsa bvula. Bu batubuka ha nzo Yaasoni, bo basaka Poolo na Sila mu kubanata ha busu bwa baatu. 6Bahelaa kubamono, bo banata Yaasoni na bampaangi babamosi, kuri batsuundisa, na babeke mu kwefula misaakulu ti : "Baatu bamaba ngo bakotisiri tungu mu nsi yansiina, mu lumalu beki hamaha." 7Yaasoni wubataamburyee ku nzo yaandi, na bobanso bakwetungukila misiku mya Sedzare, bo bakweleele ti kuri mbyaasi yikimi, yiri nkuumbu Yisu." 8Bu bayuka bubwo, mpuumbu baatu na bamfumu ba nsi batekete. 9Bamfumu bu baholo mboongo kuri Yaasoni na baatu bakaka, ha babapatula.
Poolo na Sila ku Bere
10Hanaho, mu butsuku bampaangi, basindika Poolo na Sila ku Bere. Bu batubuka, bayende ku nzo-nkutukunu ya Bayudayo. 11Bo baba babvuri bitsimi bubwete, ti na bari Tesalonika. Bo bataamburi maampu mu kiminu kyalaka. Mpisi kiluumbu, bo baba fyongokinaana Matinu, mu kumono kari myominso myatswiika. 12Mu bo, baatu balaka basiiri kanyi, kwaba Bangereke, bakyeetu balukiinsu, na babakala balaka. 13Ngo Bayudayo ba ku Tesalonika, bayaabaana ti Poolo wuri mu kweyaabisa maampu ma Nzaambi ku Bere, bo bayende kukwo na babeke kunyingisa mpuumbu, na kusa kisaangala. 14Hanaho, bampaangi baholo baatu mu kunata Poolo ku teke mubu ; Sila bo na Timote ngo bari basii sala ku Bere. 15Babakweyende na Poolo, bamunata natee ku Atene. Tumi bo babvutuka na mukeensu wuri ti Sila bo na Timote beende mu mawasu ku kari nde.
Poolo ku Atene
16Poolo mu ntaangu yi kabakiingaana, bambaasi ku Atene, wabama kunsa mitima waandi bu kamono ti bvula didyo dyaba dyaluula mu biteki. 17Nde wabadzoonsaana ku nzo-nkutukunu bo na Bayudayo, na minsaambiri Nzaambi, na ha kibeendu kya bobanso mpisi kiluumbu, nde wabadzoonsaana na baatu baba haho. 18Babamosi se baba kooleelaa ti, ba-epikure na ba-esetoyiko, babayolaa na nde. Bamosi babaleelaa ti : "Ngaa-lusuku wu se ti nki katiiri kuleele ?" Bakaka ti : "Bunu ti muyikisi banzaambi banzeense nde kari", bukuri nde waba yaabisaana Musamu Wamubwete wa Yisu na mfulukulu ya bafwa. 19Bo bamukangaana bamunata ha kibeendu kya mfuundu bakuutu ba bvula, ha bamuleele ti : "Buri beetu lo tutsiitsiri kuyaaba, nkya nyikusulu dzamoono ye wuri mu kweyaabisa ? 20Ye wuri mu kuyukusa beetu misamu myanzeense, na beetu tutiiri kuyaaba mambangukulu mu myo." 21Mukwongo, bari Atene na banzeense badzakala ha bvula didyo baba lutisaa ntaangu yaaku mu kudzoonso, bunu pele kuyuka mampolo mamoono. 22Poolo katelemaa ha kakati dya kibeendu kya mfuundu bakuutu, wabeke mu kuleele ti : "Baatu ba ku Atene, me nyiiri mu kumono ti beenu, luri na kinzaambi kyalaka mu myominso. 23Bu nyabee kweyunga, na kwetala bimama byeenu byangisi, me nyamwiini dziku dimosi dibari batina ti : "Kuri nzaambi yiri bayiyaa ko." Ngo, bibyo biluri mu kwesaambila kwahele kuyaaba, bibyo me nyiisiri mu kuluyaabisa. 24Nzaambi yiyo yayirikiri nsi, na byobinso biri mu nsi, nde ngo Mfumu yulu na butoto, nde kakoodzakalaana mu manzo-nzaambi matuunga mu myooko mya baatu ko. 25Nde wahele se na nzala kuri ti, myooko mya baatu mimusalisa, kari na nzala kitotolo ti kimosi se ko, nde koohaanaa kuri bobanso, kidziingu na muwuumunu na byobinso. 26Mu muutu mosi, nde wayirika bitsuumbu byobinso bya baatu, na wabasuusa ha butoto bwabutsiina, nde wasa mandilu mu mantaangu, mandilu ma mansi ma kwedzakala baatu, 27mpisi bemusaka, ti hayuku bakwebumbula, mu nzala kumudzuukila, koomosoko nde wahele la na mpisi muutu mu beetu. 28Bukuri, mu nde beetu-meene turi bamwooyo, na turi mu kwedyaata, na turi na kidziingu. Bunu bwaleele babamosi, mu baatu bangaa-lungwensu ti : "Beetu se turi mu kitsuumbu kya nde." 29Ngo bu turi kitsuumbu kimosi na Nzaambi, lo yaa tutsima ko ti nde wafwanikina na woolo, na palata, na tari bunu pele kiteki, kyahala mu bunkete, na mu bitsimi bya baatu. 30Nzaambi wahele kubweese kutsima mantaangu ma bunzimbu bwa baatu, na lumalu, nde wuloombo kuri baatu ba mansi momanso ti bayiinga madyeele. 31Bukuri nde wasoolo kiluumbu ki katsuundisa nsi, mu nsungumunu, mu muutu wunde wukari kasoolo, na nde wasoongo kimbaangi kuri bobanso, mu kumufulukisa mu bafwa." 32Bu bayuka mfulukulu ya bafwa, babamosi bamusiila munsiku, bakaka baleele ti : "Beetu ngo bari tumi, bee tukuywiila mu mamo, kiluumbu kikimi." 33Haho, Poolo kayisika ha kakati dya bo. 34Baatu babamosi bakaangamini mu nde, basiila kanyi, mu bo kwaba Deni mosi waba mu mfuundu bakuutu, na mukyeetu wuri nkuumbu Damari na bakaka se.
Currently Selected:
Biyiriki bya Bantumu 17: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024