Biyiriki bya Bantumu 16
16
Timote wayende kufila Poolo bo na Sila
1Ha mambisa haho, Poolo watubuka ku Derebe, tumi ku Lisetere. Kukwo kwaba muyiki mosi, nkuumbu Timote, mwaana mukyeetu wa Muyudayo, wuri na kanyi, ngo taayi waba Mungereke. 2Bampaangi ba ku Lisetere, na ba ku Ikonyo, babataanaa kimbaangi kyakibweete mu nde. 3Poolo wabatiiri kweende na nde. Bu kamuholo, wamuyirika bubakala, mu ntoono Bayudayo baba mu loondolo didyo ; bukuri bobanso baba bayaari ti taayi dya nde Mungereke kaba. 4Mu mabvula mababakwelutaana, bo baba kweyikisaana mu kukebe mangisi maheeri bantumu na bakulu bababakala bari ku Yerusalemi. 5Mabuundu maba kwesyaama mu kanyi na kwefununa mu lutaangu lwa baatu mpisi kiluumbu.
Poolo wabaka mamono-miisu
6Mpeeve Yangisi bu yabadika kuyaabisa musamu ku Adzya, bo bataba nkoonsi ya Feringe na ya Ngalatiya 7Bu batubuka bebele na Misya, bo basaka kukoto ku Bitinya ngo Mpeeve Yisu ya bisiri kubaha miswa. 8Bu bataba Misya, bo basunduka ku Torohasi. 9Ngo mu butsuku, Poolo wabaka mamono-miisu : Muutu mosi wa ku Masedoni, waba wateleme, na waba kumuyiingikila ti : "Wasa ku Masedoni, wutubakisa." 10Hanaho, bu kamono mamo, beetu twasaka mu kweende ku Masedoni, mu nsiitu ti Nzaambi wututeeriri, mu kunata Musamu Wamubwete kuri bo se.
Ku Filipo, Lidi wasiila kanyi mu Mfumu
11Bu twaholo bwaatu ha Torohasi, twasuunguma na soongo-soongo ku Samoterase, na mu kiluumbu kyanama, twayende ku Nehapolisi. 12Bu twayisika haho, twayende ku Filipo, bvula dyatete dya nkoonsi ya Masedoni, kimvuka kya bari Looma. Beetu twalutisa mwaa biluumbu ha bvula didyo. 13Mu kiluumbu kya saba, beetu twapala ku mbasi, mu kweende ku simu dya muwiila maampa, kukwo twaba tsima ti, kuri kibeendu kya lusaambulu. Beetu twadzakala kukwo na twadzoonso kuri bakyeetu baba bakutukini haho. 14Ngo mukyeetu mosi, nkuumbu Lidi, waba tuywiilaana, nde waba muyariki mansaanda mamabwe mabeenge, waba ku bvula dya Tyatire, nde waba bvuminaa Nzaambi. Mfumu wadzibula mutima nde, kuri nde kangamini mu mimyo, mya ba dzoonsaana Poolo. 15Bamanaa kumubotoko, nde na kaanda dyaandi, ha katuyiingukila, na waleele ti : "Mbuti beenu lumono ti me nyiri na kanyi mu Mfumu, lo wasee lukoto na ludzakala ku nzo me." Na nde watukwiikisa mu kutaambula.
Poolo bo na Sila mu boroko ku Filipo
16Kiluumbu kimosi, bu twaba kweende ku kibeendu kya lusaambulu, kisari kimosi kyamukyeetu kyaba na mpeeve ya mbomo, wayisa kutubwaana. Nde waba bakilaa bamfumu baandi ndaandu yalaka mu mbikululu dzaandi. 17Nde wabeke mu kwetunama, Poolo na beetu, kuri wukwefula misaakulu wukweleele ti : "Baatu bamaba, bisari bya Nzaambi Mwa-Yulu bari, bo bari mu kweluyaabisa nzila ya mvuukulu''. 18Nde wasa bubwo mu biluumbu byalaka. Nduungusu dzibvululaana, Poolo wasyeeteke, na waleele kuri mpeeve yiyo ti : "me nyikutumini mu nkuumbu Yisu Kiristo, pala mu nde !" Mu kilookolo kinikyo, mpeeve yapala. 19Bamfumu baandi bu bamono ti, nsiitu mu ndaandu yaaku yi mwaakweende, bo bakaanga Poolo na Sila na babanata ha kibeendu kya baatu bobanso, ha busu bwa bamfumu. 20Na bu babanata kuri batsuundisi ba bari Looma, baleele ti : "Baatu bamaba bari mu kwesa kisaangala kunsa bvula dyeetu. Bo Bayudayo, 21na bo bari mu kweyikisaa bifu, biri beetu twahele na miswa mu kubitaambula bunu pele mu kubisalila, beetu bari Looma." 22Mpuumbu baatu yabaka nkesi mu bo. Batsuundisi batuma ti babasyoonono binkutu, na babalata nkwaasulu. 23Bu bamana kubalata nkwaasulu, babatuba mu boroko, na baleele kuri mukebi boroko, mu kubakebe kwakubwe. 24Bu kataambula lutumu lwa bubwo, nde wabasoko kunsa kihekiri kya boroko, na wakaanga miilu mya bo mu kidu. 25Mu kakati dya butsuku, Poolo bo na Sila babasaambilaana na babayimbilaana mu kudumusa Nzaambi, na baba mu boroko bakaka baba baywiilaana. 26Hanaho, nasisuu, butoto bwatembele mu makwa, kuri lufulu lwa nzo boroko lwawa kutsyaamuka, ha nsi na nsi, bidzibuku byobinso byawa kudzibuma, na bikonyi bya maboroko byobinso byawa kunyanguka. 27Mukebi boroko bu kasiimbuka, nde wamono myeelu mya nzo boroko myadzibulu ; bu kanana mbeesi yayila, nde wasaka kudzusa nyutu yandi nde-meene, nde bu kabatsima ti maboroko ma mwaayitika. 28Poolo wafula mu mbeembu yayinene, waleele ti : "Yaasa bubi mu nyutu yaaku ko, bukuri beetu bobanso turi haaka." 29Mukebi boroko bu kaloombo buungi, nde wabingukila na kinkuuka kyokinso, wabwa ha miilu mya Poolo bo na Sila. 30Tumi, bu kabanata ku mbasi, nde waleele ti : "Bamfumu, me nki nyelemini kusa, mu kuri ti me bvuuka ?" 31Bo baleele ti : "Siila kanyi mu Mfumu Yisu na ye sa bvuuka, ye na nzo yaaku." 32Bo bayaabisa maampu ma Mfumu, kuri nde na kuri bobanso baba mu nzo yaandi. 33Bunu butsuku bubwo, nde wabaholo, waswaaka mamputa ma bo, na hanaho, nde bamubotoko, na baatu baandi bobanso. 34Bu kabanata ku nzo yaandi, nde wabaha byandya ha taabala. Nde wamono kiminu na nzo yaandi yoyinso, bu basiiri kanyi mu Nzaambi. 35Bu bwakya, batsuundisi baheeke bayongolo, mu kweleele kuri mukebi boroko ti : "patila baatu babo." 36Mukebi boroko wayisa kuleele maampu mamo kuri Poolo ti : "Batsuundisi baheekiri mukeensu ti balupatula haaka na haaka, ngo palee kweenu, yendee mu kiyeengi." 37Ngo Poolo waleele kuri bo ti : "Bo bu batumini ti balata beetu nkwaasulu, ha busu bwa baatu, kwahele kututsuundisa, beetu baatu ba ku Looma, na batutubiri mu boroko ; mu lumalu bo batiiri kutupatula mu mansweeki ? Ngo pele, bo-meene biisa batupatula." 38Bayongolo bayende kutubula misamu mimyo, kuri batsuundisi. Bo babaka boomo bayukaa ti bo baatu ba ku Looma bari. 39Bo bayisa, babayingukila, babapalisa ku mbasi, na babatuma ti, bayisika ha bvula didyo. 40Bu bapala mu boroko, Poolo na Sila bayende ku nzo Lidi, na bu bamono bampaangi, babasyaamisa, tumi bayende.
Currently Selected:
Biyiriki bya Bantumu 16: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024