Biyiriki bya Bantumu 15
15
Mpaka mu dyaambu dya nyirikulu bubakala
1Bamosi banangukini ku nsi ya Yuuda, bayikisa kuri bampaangi ti : « Mbuti beenu lwahele kuyirika bubakala, bunu buri kifu kya Moose, lo beenu lubvuuka ko. » 2Yumu na mpaka dzamakwa byabwa ha kakati dya bayisiri na Poolo, wuri waba kibari kimosi na Barnaba. Bakaanga kitsimi kiri ti Poolo, Baranaba na bamosi bayisiri, batoomboko ku Yerusalemi, kuri bantumu na bakulu bababakala, mu mitariri mpaka dzidzo. 3Dibuundu dyabaheeke, bataba Fenisi na Samariya, kuri bakweyaabisa bunu bwayiingiri bangooyi madyeele, na bampaangi bobanso bamono kiminu kyalaka. 4Bu batubuka ku Yerusalemi, dibuundu, bantumu na bakulu bababakala bababwaana, baleele momanso mari mu kweyirika Nzaambi mu bo. 5Bamosi bari mu kabu dya ba Bafarisi basii kanyi, bateleme baleele ti : "Buri bwayelemene ti bayirika bubakala, mu kukebe mangisi ma Moose." 6Bantumu na bakulu bababakala bakutukina mu kumono dyaambu didyo. 7Nkalikisi dzadzinene dzabwa, Peetelo wateleme, waleele : "Bampaangi baami, beenu luyaari ti, me kuholosono mantaangu mamakulu, Nzaambi wasooriri me, ha kakati dya beenu, mpisi heki bangooyi bayuka, mu munwa me, maampu ma Musamu Wamubwete na basa kanyi. 8Na Nzaambi, wuyaari mitima mya baatu, wubateeriri kimbaangi, mu kubaha Mpeeve Yangisi, bunu bu kaheeri beetu, 9na wahele kusa nsobokoso ha kakati dya bo na beetu, bukuri mu kanyi, Nzaambi katsyeemisinyee mitima mya bo. 10Hango mu lumalu, buri lutiiri kusindikila Nzaambi, mu kukolokoso kihaangu mu mankiingu ma bayiki, kiri, ti bataayi beetu, ti beetu-meene twasii baka makwa ma kukinata ko ? 11Ngo mu bweese bwa Mfumu Yisu, turi na kanyi ti sa batubvuukisa mu nzelu yoyimosi na bo."
12Mpuumbu yoyinso yawura, yiyuka Baranaba na Poolo bari mu kuyaabisa momanso, mari mu kweyirika Nzaambi, bidiimbu na bimaangu ha kakati dya bangooyi, mu kisalu kya bo. 13Ha mambisa ma kuwura kwa bo, Yaakobo wabvutula, waleele ti : Bampaangi baami, ywiilee me ! 14Simehoni baanguri dyaburi Nzaambi katekisiri kumonoko, mu kusolo ha kakati dya bangooyi, baatu mu nkuumbu yaandi. 15Na mimyo myakwelesene na maampu ma babikiri, bunu bu diri dyatinu ti :
16"Ha mambisa ma mimyo, me sa nyabvutuka,
sa nyabweese kutuunga nzo yangooto ya Daavidi, yabee yabwa,
sa nyabweese kutuunga bibaka bya yo byakosoko,
na sa nyabweese kumutelemese ;
17mpisi heki baatu basaala babo, basaka Mfumu,
na makaanda momanso, ma bari batangukina
nkuumbu yaami, masa bwobumosi,
buleele Mfumu, muyiriki bitotolo byobinso,
18byayabakana, kuholosono mantaangu mahele
mbandukulu na manunu."
19Hango nkuumbu, « me nsimini ti kubamisa pe bangooyi, bamwaayiinga madyeele mu kwiisa kuri Nzaambi. 20Kasi batininee mukaanda ti yaa besumuka mu biteki ko, yaa besa buyala ko, yaa bedya toongo twa bibulu byadzusu, mu nsukusulu muwuumunu, na yaa bedya makila ko. 21Bukuri kuholosono mu biseendu byabikulu, Moose wuri na bayikisaa mangisi maandi mu mpisi bvula, mu manzo ma nkutukunu, mu mpisi kiluumbu kya saba, bakoomataangaa. »
Mukaanda wubari baheeke kuri basa kanyi bahele kuba Bayudayo
22Bantumu na bakuutu bayukusina, na dibuundu dyodinso, mu kusoolo baatu munsa bo, na mu kubaheeke ku Antyoke, kintwaari na Poolo na Baranaba. Bo basoolo Yuuda wu bakooteelaa ti Baresaba, na Sila baatu balukiinsu ha kakati dya bampaangi. 23Bo batina mukaanda wumawu ti :
"Bampaangi beenu, bantumu na bakuutu, kuri bampaangi bari bangooyi ku Antyoke, ku Siri na ku Silisi mboto yeenu ! 24Bu twayukiri ti babamosi mu beetu, bu bayisiri kuri beenu, kuri twahele kubaha ntumunu, balubamisini mu miheebulu, 25beetu twamwiini ti bwayelemene, mu kusoolo baatu ba kuheeke ha kimosi na bampaangi beetu ba mutima Baranaba na Poolo ; 26baatu babo baha kidziingu kyaaku mu nkuumbu ya Mfumu yeetu Yisu Kiristo. 27Mu bubwo beetu twaheekiri Yuuda, bo na Sila, bakwiisa kululele ha munwa musamu wunu wunde. 28Hango Mpeeve Yangisi na beetu-meene se, twatsimini ti yaa tulukwiikisa bilemu bikimi ko, ha yulu bini biri mufunu. 29Beenu biseenu toongo, twa bibulu byadzusulu mu kikabu kuri biteki, makila, na toongo twa bibulu byadzusu mu nsukusulu muwuumunu, na buyala ; mbuti lukebiri manyutu meenu mu mimyo, lo bubwo bwabubwe lusa. Mamboto menu !
30Babatumisini bayisika haho, basunduka ku Antyoke, bo bakutukusaa baatu, ha babaheeri mukaanda wunde. 31Bu bataanga mukaanda, bamono kiminu mu nsyamusunu dzidzo. 32Yuuda na Sila, bu baba bo-meene babikiri, bo basyaamisa bampaangi, na babakumisa mu nzoonsulu dzalaka. 33Mwaantaangu bu yaluta, bampaangi bababvutula mu kiyeengi, kuri babo babaheekiri. [34] 35Poolo bo na Baranaba badzakala ku Antyoke, ku baba kweyikisaa na kweyaabisaa Musamu Wamubwete wa Mfumu, kintwaari na bambaasi bakimi balaka.
Poolo na Baranaba bahambikisa
36Mwaa mantaangu bu maluta, Poolo waleele kuri Baranaba ti : Tubvutuka mu kwemono bampaangi, mu mpisi bvula di twayaabisiri maampu ma Mfumu, mpisi tuyaaba kari buri bari basiila. 37Ngo Baranaba waba na nzala kunata se Yowane, wu bakooteelaa Malako. 38Ngo Poolo waba wahele kutya kubweese kuholo muutu wunde wabayekiri ku Pamfili, na wuri kasii kuba kintwaari na bo mu kisalu ko. 39Hango mpaka bu dzabvula, bo bahambikisa bo na bo. Baranaba waholo Malako na nde na wayende ku Sipere. 40Poolo waholo Sila na wayende, bampaangi bamanaana kubaloombolo bweese bwa Mfumu. 41Nde walutila ku Siri na ku Silisi mu kwesyaamisa mabuundu.
Currently Selected:
Biyiriki bya Bantumu 15: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024