Biyiriki bya Bantumu 14
14
Poolo na Baranaba ku Ikonyo
1Bwayirima bumosi ku Ikonyo, Poolo na Baranaba bakoto mu nzo-nkutukunu ya Bayudayo, na bo badzoonso mu kiteesu kiri mpuumbu yayinene, ya Bayudayo na ya Bangereke basa kanyi. 2Ngo Bayudayo, bari basii sa kanyi ko, basinda bangooyi mu kusa bubi, kuri bampaangi. 3Hango, bo balutisa mwaantaangu yalaka, badzoonsolo mu nsiitu mu Mfumu, wata kimbaangi mu maampu mabweese bwaandi, na wabaha mpinu mu kuyirika bidiimbu, na bimaangu mu myooko mya bo. 4Mpuumbu ya bvula yakabuma mu bibari byoolo ; bamosi baba mu kibari kya Bayudayo, bakaka mu kya bantumu. 5Bukuri kwamonoko kutya kuri bangooyi na kuri Bayudayo, kintwaari na bamfumu ba bo, mu kubakwaamisa, na mu kubadzusila mu matari. 6Bo bu bayaaba, bayitika ku mabvula, ma Likahoni, Lisetere, Derebe na mari nkonsi yiyo. 7Kukwo bo bayikisa Musamu Wamubwete.
Poolo na Baranaba ku Lisetere
8Ku Lisetere, kwaba muutu mosi waba wabobo miilu, wabeeriri miilu, bu kaba wakiri mu mwooyo nguri ; nde kaba kweyendaa ko. 9Nde wayuka Poolo mu kunzoonso. Poolo bu kamutala, na bu kamono ti waba na kanyi, mu kuba wabvuukusu, 10waleele mu mbeembu yamakwa ti : "Teleme kwaaku kuri wasuunguma mu miilu mya ye-meene." Nde wadumuka na wadyaata. 11Mampuumbu ma baatu bu bamono mayirikiri Poolo, badzaangisa mambeembu ma bo, baleele mu ndiinga, ya ku Likahoni ti : "Banzaambi bakitukiri baatu, na basundukiri kuri beetu" ! 12Bo bateele Baranaba, nkuumbu Dzese na Poolo Heremese, bukuri Poolo ngo waba mutuburi misamu. 13Ngaanga-nzaambi ya Dzese, waba munsa bvula, waholo balumi ba bangoombo ba bayende kweleleke bifulu, na wasuusa ha myeelu mya bvula, kintwaari na mampuumbu, mu kudzusa mu kikabu. 14Bantumu bu bayuka, Baranaba na Poolo bakaakila binkutu, babingukila kuri mpuumbu, bafula misaakulu 15na baleele ti : « Bampaangi, buri lusa mya bu mi ? Beetu se turi bitsimi byobimosi na beenu, beetu turi baatu bunu beenu ; Musamu Wamubwete wutuluyaabisiri, ngo mu kubwoongolo myahele mufunu mi, mu kusyeeteke kuri Nzaambi yamwooyo, wayirika yulu, butoto, mubu na byobinso biri mu byo. 16Nde wuri mu biseendu byaluta, waha miswa kuri makaanda momanso, mu kunama manzila ma bo-meene. 17Ngo ti hayuku bubwo, mani mamabwe nde ka kooluyirikilaa : Ku yulu, wuluhaa bvula, mantaangu ma bikuni bibuta, na wululuulusaa mu byandya na kiminu mu mitima myeenu. » 18Bu kaleele mamo, bamono mpasi mu kukabikisa mampuumbu, mu kuri ti bahele kubayokolo bikabu.
19Bayudayo bafumini ku Antyoke, na ku Ikonyo bu bayisa, bu basinda mampuumbu ma baatu, na bu balata Poolo mu matari, bo bamukoko ku mbasi bvula, batsima ti kampe wafwa. 20Bayiki baandi bu bamudyengekele, nde wateleme, na wakoto ku bvula. Bu bwakya, wapala bo na Baranaba mu kweende ku Derebe.
Mvutukulu ku Antyoke dya ku Pisidi
21Bu bamana kuyikisa Musamu Wamubwe kunsa bvula dimadi, na kusa bayiki balaka, bo babvutuka ku Lisetere, ku Ikonyo na ku Antyoke. 22Bo bakumisa mitima mya bayiki, babasyaamisa mu kunamitina mu kanyi, na kubaleele ti mu nwanusunu dzamakwa, tukotileenu mu Kimfumu kya Nzaambi. 23Mu mpisi dibuundu, bo basoolo bakulu bababakala, babasaambikila, na bakoto loomi, bayekele bo kuri Mfumu, wubari basiila kanyi.
24Bu bataba Pisidi, bayisa ku Pamfili, 25bu bayikisa maampu ku Perenge, bo basunduka ku Atalya. 26Bayisika haho, bakoto bwaatu mu kweende ku Antyoke, kukwo ku bataamburi bweese bwa Nzaambi, mu kisalu ki bakukisiri. 27Bu batubuka, bakutukisa dibuundu, bayaabisa momanso mayirikiri Nzaambi kintwaari na bo, mu kudzibikila bangooyi mweelu wa kanyi. 28Bo balutisa mwaa mantaangu malaka kukwo, kintwaari na bantumu.
Currently Selected:
Biyiriki bya Bantumu 14: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024