Biyiriki bya Bantumu 13
13
Baranaba na Sawuli baba basoolo mu kweende ku budyeengi
1Mu dibuundu dyaba ku Antyoke, kwaba babikiri na bayikisi : Baranaba, Simehoni wu babateelaa ti Ningere, Lukyosi wa ku Kirene, Manahene wunde wabuukiri ha kimosi na Eroode, mfumu ya mankoonsi mana, na Sawuli. 2Bu baba mu kusaambila Mfumu, na baba bakoto loomi, Mpeeve Yangisi yabaleele bumabu ti : "Nsuusukileenu ha luteke, Baranaba na Sawuli, mu ntoono kisalu ki nyabateeriri mbila. 3Haho, bu bakoto loomi, bo basaambila na babatetekele myooko, na ha babasindika.
Baranaba na Sawuli ku Sipere
4Mpeeve Yangisi bu kabasindika, bo basunduka ku Selesi, haho bayende ku nsi ya Sipere. 5Bu batubuka ku Salamine, bo bayaabisa maampu ma Nzaambi, munsa manzo ma nkutukunu ma Bayudayo. Yowane waba na bo bunu mubakisi. 6Bu bataba kibumu kyokinso natee ku Pafosi, bo bamono Muyudayo mosi ngaa-mpaanu, mubikiri wampya nkuumbu yaandi Bara-Yisu. 7Nde waba kintwaari na ngoforo Serengyosi Poolo, muutu wamadyeele. Nde watumisa Baranaba na Sawuli mu nzala kuyuka kwangwanwa maampu ma Nzaambi. 8Elime ngaa-mpaanu, bubwo babangulaa nkuumbu yaandi, wasaka kuwumuna ngoforo yiyo, la na kanyi. 9Ngo Sawuli wu bateelaa se ti Poolo, waluula mu Mpeeve Yangisi, wamupana kisoosi, 10waleele ti : "Ye, ye waluula mu mawunu na mu kwiibi, mwaana dyaabulu, mutaatu nsungumunu, buri ye wuhoto ko, mu kwetengemese manzila ma Mfumu, masuunguma ? 11Na mono, mu lumalu, koko kwa Mfumu kweki ha yulu ye, na ye sa fwa miisu, wubweese kumono ntaangu ko, mu mwaa kilookolo. Na hanaho mubuungi na mampimbisi mamubwiilikila, wadyeengele na wasaka bamunata. 12Hango ngoforo, bu kamwiini myayirimini, wasa kanyi mu nyikusulu dza Mfumu.
Poolo bo na Baranaba ku Antyoke dya Pisidi
13Bu bayende ku Pafosi, Poolo na banduku baandi batubuka ku Perenge, dya ku Pamfili. Yowane bu kabasiisa, wabvutuka ku Yerusalemi ; 14basiisaa Perenge, batubuka ku Antyoke dya ku Pisidi. Bu bakoto munsa nzo ya nkutukunu, mu kiluumbu kya saba ha badzakala. 15Ha mambisa ma ntaangulu mangisi na babikiri, bamfumu ba nzo-nkutukunu baleele kuri bo ti : "Bampaangi, mbuti luri na dyaambu dya mboondulu dya kudzoonsolo kuri baatu, lo dzoonsee kweenu." 16Poolo, bu kateleme, na bu kanaanguna koko, waleele ti : "Baatu ba Iselili, na beenu lubvuminaa Nzaambi, yukeenu ! 17Nzaambi ya kaanda dya Iselili wasooriri ba taayi beetu, na wafunisa kaanda didyo, mu ntaangu yi badzakala ku nsi ya Ngipiti ; na mu kwa dya kooko kwaandi, nde wabapalisa mu yo, 18na wabakuunda mu mibvu kampe makuumi mana, mu nsi yankatu. 19Bu katsaamuna makaanda nsaamu, ma mu nsi ya Kanana, nde wabaha nsi bo yiyo bunu saala. 20Kampe mu nkama na makuumi mataanu ma mibvu.
Ha mambisa haho, nde wabaha balarimi, natee mu mubikiri Samweele. 21Kuholosono haho, bo baloombo mbyaasi, na Nzaambi wabaha Sawuli, mwaana Kise, muutu wa mu kaanda dya Benyami, wadzakiri mu mibvu makuumi mana. 22Bu kamuyekele, watelemese Daavidi, mbyaasi kuri bo, kuri nde kari kaleele mu kimbaangi kikari kata ti : "Me nzuukiryee Daavidi, mwaana Esayi, muutu wuri bunu bu ntiiri mu mutima waami, wuyirika momanso mantiiri. 23Mu kaanda dya nde, bunu buri nsiilulu dzaandi, Nzaambi kari kapalisa Mubvuukisi Iselili, Yisu. 24Yowane wayaabisa, tekesele nyisulu yaandi, mbotokulu ya nyiingulu madyeele, kuri kaanda dyodinso dya Iselili. 25Yowane bu kaba mu kumana kisalu kyaandi, waleele ti : "Beenu na lutsimini ti me nyiri" ? Pele, me nyiri nde ko ! Ngo mono kukwiisa muutu ku mambisa ma me, wunde wuri, me nyahele kukuka mu kunyanguna misiinga mya masaapatu ma nde.
26Bampaangi baami, baala ba kitsuumbu kya Abarahami, na babo bari ha kakati dya beenu babvumunaa Nzaambi, kuri beetu bari baheeke maampu, ma mvuukulu. 27Bari ku Yerusalemi, na bamfumu ba bo, bamudziimbiri, na bahele kubakula maampu ma babikiri, ma bataangaa mu mpisi kiluumbu kya saba, ngo bakukisa mo, mu kumudzeengele mukanu wa lufwa. 28Mu kumono, bahele kumubakila kibila mu kumudzeengele mukanu wa lufwa, baloombo kuri Pilato mu kumudzusa. 29Bu bakukisa momanso mabatinini mu nde, bamusundula ha muti, na bamusuusa mu mampeembe. 30Kasi Nzaambi wamufulukisa mu bafwa.
31Nde wamonokono mu biluumbu byalaka, kuri babo batoombikiri na nde kuholosono Ngalile natee ku Yerusalemi, na babo bari mu lumalu bambaangi baandi kuri baatu. 32Na beetu turi mu kuluyaabisa Musamu Wamubwete, na lusiilulu lukasa kuri bataayi beetu, 33luri Nzaambi walukukisiri mu baala ba bo beetu, mu kufulukisa Yisu, bunu bu diri dyatinu mu mukuunga wamyoolo ti :
"Ye ngo Mwaana me,
bwalolo me nyikubutiri."
34Nzaambi wamufulukisi mu bafwa, mu kuri ti nde kahele kubvutuka ku mbolulu, bukari kaleele :
"Me sa nyaluha byangisi,
bi nyatambukiri Daavidi."
35Hango nkuumbu, nde wabweese kutswiikisa mu matinu makaka ti :
"Ye ka wutala ko ti waaku wangisi, kamono mbolulu."
36Daavidi ha mambisa, ma kusalila myatiiri Nzaambi, mu ntaangu yaandi, nde wafwa na bamusuusa ha mpele bataayi baandi, na nde wamono mbolulu. 37Kasi mu wumawu, Nzaambi wamufulukisa, na wahele kumono mbolulu. 38Hango, yaabee bampaangi, ti mu nde bari baluyaabisa mpemisi ya masumu, mu myominso, Mangisi ma Moose mahele kubangisina kulukuula mu masumu, 39Mu nde, mpisi wusa kanyi lo sa kaba walulukusu. 40Hango, kebee kweenu, maleele babikiri yaa malutubukila ko :
41"Taleenu beenu bangaa-nsaanunu,
pamukeenu na dziimbileenu !
Bukuri me sa nyakukisa kisalu mu biluumbu bya beenu,
kisalu kiri beenu lusiila kyo kanyi ko, mbuti muutu wuluyaabisiri kyo !"
42Bu bapala, babaloombo mu kubweese kwiisa kubvutuka, mu biluumbu bya saba bikimi, mu kubweese kuyikisa, munu mu musamu wunde. 43Buundu bu dyatsyamikina, Bayudayo balaka na minsaambiri mya Nzaambi bo, banama Poolo na Baranaba. Bamaba badzoonso na bo, babayukusa mu kukaangama mu bweese bwa Nzaambi.
44Kiluumbu kya saba kyanama, kampe bvula dyodinso dyakutukuna mu kuyuka maampu ma Mfumu. 45Bayudayo, bu bamono mampuumbu ma baatu, baluula mu musoki, basaana na babeke kunwaanisa maleele Poolo. 46Kasi Poolo na Baranaba, bu baba baluula mu nsiitu baleele ti : "Kuri beenu baketyee kuyikiseeti maampu ma Nzaambi ; ngo mu bukuri beenu luri mu kulooso mo, na lumono mu beenu-meene ti, lwahele kukuka mu mwooyo wa bibvu ngo bibvu ; mono beetu tusyeetukiri kuri bangooyi. 47Bukuri Mfumu watutumini :
"Me nyakusuusa, mu kuba buungi bwa mansi,
na mu kunata mvuukulu
natee ku nsukulu butoto."
48Bangooyi bu bayuka bubwo, bamono kiminu, badumusa maampu ma Mfumu, na bobanso babataasiri mwooyo wa bibvu ngo bibvu, basa kanyi. 49Maampu ma Mfumu matsamukusu mu nsi yoyinso. 50Kasi Bayudayo basinda minsaambiri mya bakyeetu balukiinsu, na bamfumu ba bvula, mu kutsuba nwanusunu mu Poolo bo na Baranaba, na bababinga natee ku mandilu mabvula. 51Bamaba bakubula fuunda dya bitaambi bya bo, na bayende ku Ikonyo. 52Bayiki baba baluula mu kiminu, na mu Mpeeve Yangisi.
Currently Selected:
Biyiriki bya Bantumu 13: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024