Biyiriki bya Bantumu 11
11
Kinzoonsi kya Peetelo ha busu bwa dibuundu dya ku Yerusalemi
1Bantumu na bampaangi baba ku Yuuda bayuka ti bangooyi se bataamburi maampu ma Nzaambi. 2Ha toombokiri Peetelo ku Yerusalemi, bayiriku bubakala basa mpaka na nde, 3baleele ti : "Ye wakotiri mu manzo ma baatu bahele kuyirika bubakala, na wadiiri kintwaari na bo !" 4Haho Peetelo, wabaandika mu kubaleele, bunu bwayookiri misamu :
5"Me nyaba ku bvula dya Yope, kunsa lusaambulu. Na nyabaka mamono-miisu, kitotolo kimosi kyasunduka, bunu nsaanda yayinene, yikwesunduka mu manto momana, yatsingisa mu yulu, yatubuka natee ha nyaba me. 6Bu nyatala kwakubwete, me nyamono bibulu bya miilu mina bya ha butoto, bya ku bitiiti, banyoko, na banoni ba mu mayulu. 7Me nyayuka mbeembu yaleele kuri me ti : "Teleme, Peetelo, dzusa na dya ! 8Ngo me nyaleele ti : "Ka buba ko ! Mfumu, bukuri kyasumuka bunu pele kyabviimfuka ti kimosi kyakotiri mu munwa me ko". 9Mbeembu, mu lwadzoolo, yayukukuna ku yulu ti : "Bi tsyeemisini Nzaambi, yaa hololo byo ti byasumuka ko !"
10Mimyo myamonoko mbala tatu, na byobinso ha byeki kweendaa ku yulu. 11Hanaho baatu batatu bantelemini ku nzo ku twaba ; bari Sedzare wabaheekiri kuri me. 12Mpeeve yaleele kuri me ti, me nyeende kintwaari na bo, kwahele kusa maketi-keti. Bampaangi basaamunu, biisiri na me ha, twakoto mu nzo muutu wunde. 13Nde watuyaabisa bunu bu kamwiini mbasi yateleme munsa dzo yaandi na yaleele ti : "Heeke baatu ku Yope, na tumisa Simoni wu bateelaa ti Peetelo, 14nde wukuleele maampu, mu mamo ye wubvuuka, ye na nzo yaaku yoyinso. 15Me bu nyabaandika kudzoonso, Mpeeve Yangisi yabwa ha yulu bo, bunu bu yabwiiriri beetu kunu mbandukulu. 16Me nyibaambuka mwooyo mu maampu ma Mfumu, bunu bu kabaleele : "Yowane wabotokiri mu maampa, ngo beenu sa lwaba lwabotoko mu Mpeeve Yangisi 17Ngo mbuti Nzaambi heeri kuri bo, kikabu kyokimosi, na beetu twasa kanyi mu Mfumu Yisu Kiristo, lo buri me nyaketi kubangisina kuhaakula Nzaambi ? 18Bo bu bayuka mamo, bawura na badumisa Nzaambi, baleele ti : "Na kuri bangooyi se, Nzaambi heeri nyiingulu madyeele yinata ku bumwooyo.
Dibuundu dya ku Antyoke
19Hango, babo babatsyamikisi mu nwanusunu yanata lufwa lwa Esetefano., bayooko natee ku Fenisi, ku Sipere, na ku Antyoke, kwahele kuyikisa maampu kuri muutu, mbuti ka kunu kuri Bayudayo ko. 20Bunu babamosi mu bo, baba bari Sipere, na bari Kirene, bayisiri ku Antyoke, bayikisa kuri Bangereke, mu nyabusulu Musamu Wamubwete wu Mfumu Yisu. 21Kooko kwa Mfumu kwaba na bo, baatu balaka basiiri kanyi, na banama Mfumu. 22Musamu wayukukuna mu makutu ma badibuundu, bari ku Yerusalemi. Bo baheeke Baranaba mu kuyookolo kukwo natee ku Antyoke. 23Nde bu katubuka, wamoono bweese bwa Nzaambi, wakeembe na wasyaamisa bobanso mu mutima mosi, mu kukaangama mu Mfumu, 24bukuri nde waba muutu wamubwete, waluula mu Mpeeve Yangisi na mu kanyi. Na mpuumbu yalaka yabweeseme kuri Mfumu.
25Baranaba wayende ku Taresi, mu kwesaka Sawuli, 26na bu kamumono, nde wamunata ku Antyoke. Bo balutisa mubvu wamutsiina, mu kukutukunaa mu dibuundu, na mu kuyikisa mpuumbu yalaka. Ku Antyoke, mbala yatete bateele bayiki ti Bakiristo. 27Mu biluumbu bibyo, babikiri basunduka ku Yerusalemi, mu kweende ku Antyoke. 28Angabo, mosi mu bo, bu kateleme, wayaabisa mu Mpeeve ti, sa kwaba nzala yayinene mu nsi yoyinso, na yamonoko mu ntaangu ya Kolode. 29Bayiki bakaanga kitsimi, kya kuheeke, bunu buri lubaku lwa mpisi nde, lubakusu kuri bampaangi badzakala ku nsi ya Yuuda. 30Bubwo se basiiri, baheeke lubakusu, kuri bakulu bababakala mu myooko mya Baranaba bo na Sawuli.
Currently Selected:
Biyiriki bya Bantumu 11: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024