Ananyao 7
7
1Inya, sya arikainye winy, syare nyo sya ana idaura so raijaro matuve,
muno nyo sya anaparatote so raugasya ntami nanuga rai.
2Nyo sya anaparatot raijaro matuve, wirati indamu wingkov,
nyo sya anaparatote rayaranande mavabe maisyare winyo taune nami ayaranande wemaisy.
3Nyo raokaisy matuve nai maisyare sinsinijo nyo rameno nya kawije rai wemaisy,
muno ndaugasyo ntami no nanuga.
4Nyo ana ratantona ntiti umaso rawainamo nya anamo taun dave mijem,
muno winanto anakotare rai rauranamo nya arakovo randani rave,
5wirati indamu mo naorai irati wanya anaerere rai,
muno wanya mbaunam to weramu mo ayao manavane veano nanuga raugabe rai.
6Weye arono masyote inta syeravujeve syo nuge ranyanyut,
syeravo suvire rayuje.
7Umba syo arikainyo kamuram inta mansaen,
onawamo awa ana udaene manui jewen,
muno inta pamo ana ratantona ngkove meweno ai.
8-9Arono namandive, mare ngkaumur kobe,
ndea ngkaumur akakave,
arikainyo kamuram mansae umaso po unanuije raotar,
umba nanto panawadijo wanya anaerere ama yavare raowanto kobe.
10Wanya umaso raasaro ama ansuno anaerere rai,
mare mo anya kamurame umawe anuga raugabe,
weti naije musyo ti manya nto nanto anya umawe ai.
11Wanya umaso mayao umandi vayave, mo ayao ravakambe
ntuna yavare rai kakai.
12Kaintana wananta rai no unanui, kainta nakatoamo nanta rai no vatane uta wanugambeve ri,
mo anya kamurame mansaman no unanui ama antu rai janyi.
13Umba mo anya kamurame umaso apakave muno mo anuv,
umba mayao nanto aija nsamane ramu, mare:
14‘‘Risyo maere inta aotar ti syo inta rameseo Akoe Ai mamaisyo sya urairi syo raokaisy nanto Aije rai.
Umba maere ate inta ntuna indamu raisye mamo manakoe rave.
15Weti wemi mbeamo risyuje syanya syo nakanive.
Umba soamo syo nakanija ride nande nai to.
16Syo tanije rayanundi sya niki raije rai to,
umba syo iije vasye ranakea ngko dave ranari no Mesir raneka vone rai,
17muno syo inyo mur, gaharu ama ranavane mbovov muno inyo manavan, nami ranari ti mbe manimbe rauga anyi,
syo rampapato rai to.
18Weti syare nde ra ntavono rinai rinta rinaki kava,
rinaki namano waravainye so rai java awatan ngkov.
19Weye sya anap pamo no no yavare ramu,
yara pusyo ti to no munijo waravainy.
20Opamo po doijo manui mi po raugav ti to,
weti embae pa yasyine wemaisy umba indati pakare ije.’’
21Naije wanya umaso mo ayao manavane veano arikainyo kamurame umaso anuga raugabe,
mo ayao veano avarive, ti anuga ntento rai.
22Naijeamo tavono rai vayave kobe,
maisyare sapijo augaveta no varoro aubaisy di,
muno maisyare maero ato nteto ai nsiso no anuga umu to wemaisy.
23Opamo po ranaune ramu, yara ato nteto ai mamo mo aukira nto no anuga umu to.
Opamo maisyare insanijo badirir po pamune raron ti sawa rai wemaisy,
opamo pantatukambe yara opa to no no kakai ama uga rai to.
24Maisyare omaiti, sya arikainye weap, syare wapo rinaranide,
wapo sya ana idaura so raraniv mavabe.
25Vemo watavono wanya wato ama unanuije rai nora,
vemo wanya maisyare wato maisye mo wasaponaeya wataopono rai nora.
26Weye mo vatano wanui inta maubai to,
anya wanui ugwenembeve onawamo omi mo maubaisy.
27Unanuijo nto no ama yavare mamo unanui manawadijo amanija rarontoe ma,
mo vatane maugavo wene raowanto kobe.
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)