Ananyao 6
6
Ananyao kotare mainy
1Inya, sya arikainye winy, ranivara nyo urairive vatane inta ai, nyare nyo apa mangke nsawave ai ravae,
muno windamayaro mansai;
2ranivara winawa mpaato rai ti mo naokai tavon,
winyayao tavon dai ti nsawa nai tavona,
3syare mbeare so maisy: sya arikainye winy, wingkarimu uje ra mpaya rai,
weye winy ntemasyo nya vatane so anem uga rai to.
Weti winy nyavave ra nto ai, nyayao kobe akato, inda po napaya rai.
4Weti winya nami tutuve nora,
muno nyana patamive inya.
5Yara nyavave ra wimpaya ai,
maisyare insani paya irati pamune rai, maisyare maere nin ti to vatano pamayo ai.
6Inya, ononae winy, nto nyo mingkarasyine maen,
muno nyo awa ana udave raen, indamu nya ana ndatantona ntiti;
7onawamo awa akari pewena,
inta po matutiro anakere raive ma jewena,
8weramu arono none tamiyamo wo anaisye ratayao ti ntuna,
muno arono nawaisye matu wo ama ine ranugan.
9Inya, ononae winy, nikive ra nandui?
Nugoenta rave to nikivea indati mbeseo aje rako?
10 #
Ananyao 24:33-34
Winyare, ‘‘Ah! Riniki vavai rati, inami maomon akato.
inaneme rakapan da tuna rati, syare niki akato.’’
11Weti kavuratawe ananu mewen nande papabe, maisyare vatano mamune maroyaro nai muno wo raowenta ti rakanive,
muno ananu jajewembe maisyare vatano mamune wo raugave ta.
12Vatane so awa kove inta raeno mai jewen muno mamune obo ntipu mai,
weti wayarurijabe sota sore vayave.
13Ami rakaman aje,
ara ajo mbaon dai muno apa kawi veano raroron,
14yara anuga mamo aarurijate bo mi ntapekano rai, muno po mamune ratantona tutir,
muno po arare raveti ntipu no rui rui.
15Maisyare omaisy ti, wene rabumu ai papabe,
kavurataweamo mo awaumbe ti akanive, ti no akato ramu.
16Anakotare kaujentabo oma AMISY po ramumuibe,
muno anakotare kaururum omainy tavon nggwambe no AMISY Amun maisyare so:
17nami mo vatano kai mansaena onawamo mamaisye ramu, naunane mansako ampapirbe,
vatano wo ana inta raveti ngkakai jewene maubaisy bayave ti mavu nsopat,
18ana ngkakai ratantona no anuga rai,
majo mavave irati ana mamune rai,
19vatano po ana inta raeno ami rai weramu po raura mbe kaijintave,
muno vatano wo arare raveti ntipu taune mai vambinibe.
Ananyao indamu nggwaravainyo anaerere rai
20Inya, sya arikainye winy, nyo injaya apa anaparatote rayaranande,
muno mbemo nyo nangkoya ama ananyao ramumuibe nora.
21Naemeno aya ayao rai tutir, ndaugasyo ntamijo nanuga raija nuge nuganui,
ndangkiono nya isyisye rai.
22Ranivara winy nyanya rai wemirati mo nya unanuije raroron,
ranivara winy niki, wemi mo naman,
arono nseo, wemi mo kove raura nai.
23Weye vatan anui awa anaparatot wemi yawainy, muno ananyao omi var,
muno anaparatot wemi rati mananyaobe nai no winya njaisy ti nyo raito rai.
24Wemi no naora irati wanya mamune rai,
muno wanya nserer ama ayao manavano mo veano nanuga raugabe rai.
25Vemo nanuga ntento wanya ranakea mbobove obo rai nora,
rami rave nakenava vemo ntende rai nora.
26Weye nto wanya anaerere inta rai, ndavae ma maisyare anaisye paurai intabo vayave,
yara ranivara nyayao ura nanto wanya mbaunam to rai, wea indati ana veano ravae mamo indati taune winyi ngkakai.
27Arepi indati po taname raugasyo no apa ansune ama uga rai,
pare veravo taname mo ranene jewen e?
28Indako arepi indati pasyo teto tanam nsore rai,
pare indati ajoe mangkure ramu ge?
29Maisyare omaiti, arepi po ayao ura nanto wanya mbaunam to inta rai,
indati mangke nde ai.
30Vatane inta panaonoambe weye opamo maror dave weti dodorabe,
indati aura tantunawi jewen ranivara panaonoambe.
31Ranivara aijaro rai, weamo po ravae akato mamo radaute ratobea kaururum,
muno apa ananu yavaruga raunande tenambe indamu rave ravae.
32Arepi po anaerere rave wanya mbaunam to rai, opamo ana ratantona ngkove meweno ai,
vatano beare wemaisye po taune anasine rambaon bayave.
33Weti wo anepati wo ayao kakai kapainyo ai,
samanea atee to,
34Weye wanya umaso ama anap pananyanyube ti pari ntipu ai,
aemeno vatane mansai omamo inta no ai jakato ramu yara kakai rasakinav obo mi manakoe ai.
35Weti opa ponayo avae rai,
muno akari matu ti ponae pavakanande raiji.
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)